¹ Daŋ wolngi, a ta nda dǝn gya murwon ɗaŋ cinǝ namboŋi a gib kǝ mǝn varaŋsǝ Farisuyawa nǝ cighǝn ngǝtn cighǝn, zarsǝ tǝ ta ngab tǝ gaaghǝni yir. ² She murwon cighǝni a ken wos ɗaŋ caa gon taas tǝ yasǝŋ wos ta tlǝǝɗi. ³ Yesu a ced mǝn yisǝŋgǝn ngǝtn yo ɗaŋ Musa dlyaad tǝ Farisawa," A ndara tǝ fuud zaar dzaŋ Wolngya ko cib hŋ ŋaa.?" ⁴ Bed tǝ gii tǝ mwaali saɗ. Yesu ngab tii, a fuud tii, a ndǝr gǝǝm tlii. ⁵ She a wulshi tu," Nǝ nu agibi wan yan yir zhwaaki ko ŋaa pǝrshi ya nɗaaɗi gib giir ghǝ zha dzaŋ Wolngi wo nyolar tǝ kyaaɗ hŋ ŋo?" ⁶ She tǝ ta ɗyaa tǝ sutuɗa nǝ ghǝrshi gyaa gin hŋ. ⁷ Ɗaŋ Yesu paŋni yeli,tu gya gi ɗaŋ tǝ cimshiɗi tǝ man bwa lǝb tsǝtn ghǝn mbuni, she a wulshi vii gin tu, ⁸ "Ǝŋ yan gon wo cimki nǝ belak kaɓkǝn gǝd, tsǝtǝtn a lǝb yo ɗaŋ a mob ndarani hŋ,nǝ yo tu ǝŋ yan taa cim gonɗi ɗaŋ a mobkǝ zǝkkǝni. ⁹ Ǝŋ yan muryo ɗaŋ acimki ɗi bedwan mbǝtlǝŋ ya man ,wo wulghǝ tu, ' Vǝr muri gin lǝǝb wayi, ɗani ǝŋ da ka sughǝva lǝǝb tsǝtn yo ɗaŋ a mob ɗadkǝn tǝ dzuun. ¹⁰ Bed tǝ gii ǝŋ ya cimghǝ a lǝǝb belak, she a tlǝn tsǝdni a lǝǝb yo ɗaŋ a mob ɗdkǝni,nǝ durghǝ yo muryo ɗaŋ a cimghǝ ya man, wo dya wul ghǝ tu, "Daakam taci ɗi ɗuun." Ɗani ǝŋ da ka tu luughǝni a ken ngǝ ɓuruk mǝn yo ɗaŋ cigha tsǝnghǝn ɗa ɗani a dakcies. ¹¹ Ɗeɓad muryi ɗaŋ ya luu gamas ta mbatsak tii, muryo ɗaŋ ya mbi gamas nǝ ghǝrwon hŋ, yani ǝŋ ta luutǝ." ¹² Yesu a wul muryo ɗaŋ a cimtǝɗi tu,ǝŋ yan ka cim zaar nǝ cighǝn ngǝtn cighǝn ko belak , ɓak cim gya daakama ko gya ŋaa naa ,ko mǝn dǝnwa,ko muryo ɗaŋ kya tsǝtn cimtǝ mel,mǝn tughǝn ,ɗaŋ giɗaŋ ta cimghǝ ɗaŋ ta dya ta fighǝ men ɗaŋ. ¹³ Bed tǝ gii yan ka cim nǝ belak she acim gya na kui,tǝ gya gyo ɗaŋ taas tul kaar hŋ,tǝ gya gurum ,tǝ gya doŋsǝ, ¹⁴ ka tu mbuni ɗaŋ yaŋshi tǝ yir lǝǝb sularghǝn wa mǝn hŋ. Nǝ yo ɗaŋ ghǝ jan ta sularghǝ mǝn a dzaŋ ghǝ shishighǝn zarsǝ ghǝ zari." ¹⁵ Ɗaŋ nambooŋi wasǝŋ a gya gi ɗaŋ caa tsǝngǝni a dakci tǝ gya Yesu a wum ghǝshi gya gini , she awul tǝ tu, " Shishiɗi wo na nǝ muryo ɗaŋ wo cingǝtn civhǝn aguŋdu ghǝ Cogn von." ¹⁶ Bed tǝ gi Yesu a wiultǝ tu," Nǝ murwon a fi dǝllǝ belak a cim zarsǝɗi monda. ¹⁷ Ɗaŋ dzaŋ belakes a fii ,she a shin mǝnwos tǝ wul gya gi ɗaŋ yǝ cimshi ɗi tu, 'manǝnɗi nghǝtn nǝ ɓumtsǝghǝni ɓuruk." ¹⁸ She ɗeɓad wasǝŋ , tǝ ngab lǝǝrghǝn de wasǝŋɗi. kǝ keni a wul tu,'ma ɗiib kitan a na cib mǝ tlǝŋ yeli. Mya karaghǝ matulɗi hŋ . ¹⁹ She gon wul tǝ tu, ' Maa ɗiib jir galtsaǝ nandam , mya su mǝ tlǝ dyaghǝn wasǝŋ . Mya karaghǝ ma tuldi hŋ. ²⁰ Muri gon ɗa a wultu, ' Maa kab gǝd muri nǝ ghǝ gi ma kǝǝm ma tlǝ hŋ.' ²¹ Ɗaŋ mones a man fuu murghǝ dǝn wos vii gya gin ,she a tlii murghǝ denes , a wul monwoshes tu, 'Tlǝ motlak a laab gya dǝllǝŋsǝ datǝpm gib yatl tǝ gya mǝǝri datǝpm a lǝǝr gha na kui, tǝ gya mǝn yo ɗaŋ taas tul kar hŋ tǝ doŋsǝ tǝgurum.' ²² She mones a wul tu," Murghǝ dǝn , nghǝtn yo ɗaŋ kǝ kon a ɓani, bed tǝ gi hal ɗaŋgǝni lǝǝb ɓan ɗeghas. ²³ She murghǝ dǝnes a wul mones,' Tlǝ a dǝllǝŋsǝ datǝpm dongai tǝ gib yalt a mbii raa zarsǝ mǝn tǝ man shiɗi tǝ yuŋ dǝnnati. ²⁴ Nǝ duryo tu mya fuuki tu, gon won a a gibkǝ zarsǝi ɗaŋ mǝ cimshiɗi keni wo ɓǝɗi nghǝtn ghǝ belakes hŋ. ²⁵ A dǝli gi mǝnyo ɗaŋ ta, taa jwamshiɗi cigha righǝn cimshi ,she a sutu ɓashi wulshi tu, ²⁶ "Buruk muryo ɗaŋ wo man ɓasǝm bed tǝ gi ǝŋ ya nyaŋngas daagos ,tǝ naagos , tǝ gǝɗiwos ,tǝ mǝri wos , tǝ gya ŋaa nawos mǝn monci tǝ guɗi hŋ - eh hal tǝ raa wos kai,wo dya na nǝ ŋaa dǝnan hŋ. ²⁷ Ɗeɓad muryo ɗaŋ ya mbi ghǝmbǝli wos ya laabǝm ɗi hŋ , wo dya nanǝ ŋaa dǝnan hŋ. ²⁸ Nǝ nu agib wan ɗaŋ a caa ɗa rai tu wo nal dǝn ɗaŋ wo tsǝtn kwaan nghǝtn yo ɗaŋ wo ɗuughai keni,ko yir wurɓa yo ɗaŋ wofi laashiya? ²⁹ Ne ghǝ tu ,tǝ man naa ɗa kari tu ya gǝm dad vineshi ,tǝ man ɗak ɓannghǝn nalghǝni hŋ,hal gya gon ɗaŋ tǝ yeli tǝ ngabtǝ ryaghǝni, ³⁰ ǝŋ ta tayi wultǝ tu, 'Murin ɗaŋ a ngub dǝn nalgǝni bed tǝ gi a kǝǝm naltǝ mban hŋ.' ³¹ Ko nǝ guŋi gyo ǝŋ wo tlǝ nǝ mandǝ tǝ guŋi gon wo ysǝtn kyaad paŋi yel ko yan murghǝ nǝn manɗǝ zangu dzub wo dja fi mandǝ tǝ muryo ɗaŋ yir mǝn mandǝ wos zangu tashi mbǝlǝnǝiya? ³² Ǝŋ yan wo ɗya hŋ ,kyaad muri gi ɗaŋ ɗyagastǝni dongai ,she tǝ shin gon tǝ tlǝn ŋaal ghǝn tsǝghǝn wusnitǝ yani. ³³ Tǝ gi cig , gon won a gibi wan ɗaŋ ya bǝǝltǝ ɓuruk tǝ ngǝtn yo ɗaŋ kǝ yir hŋ wo ɗyaa naa nǝ ŋaa ghǝ dǝnan hŋ. ³⁴ Maas nǝ ngǝtn ghǝ mbuni ,bed tǝ gii ǝŋ yan maas ya amsalaghǝi ,tǝ ni ǝŋ ta man ndǝr tǝ ɗe? Wo man yir laa won a yatl ɗa hŋ ,ko tǝ naa nǝ juŋ .She tǝ paas tǝ ǝŋ ɗi. ³⁵ Ɗebad muryo ɗaŋ citǝ kǝǝm ghǝ wumghǝni tǝ wumi.