¹ A kili gin, mǝn won tǝ ta fuutǝ a dulgam mǝn Galilii gya gi ɗaŋ Bilatus lǝǝ voraŋ wasǝŋ tǝ ngǝtnngǝ vaaghǝn giɗkǝn nyarghǝn. ² She Yesu ta sushi ɗa tu, ''Kya yel ɗan tu mǝn Galiliin ǝŋ tǝ moɓ fighǝn kuskǝ ngǝtn ɓuruk mǝn Galiliya durtu tǝǝ buŋ a tǝpi giniya? ³ O, oi, Mya fuuki. beɗ ǝŋ kya ga ɗeɓaɗ kusǝŋsǝ ngǝtn wan hŋ ka datsǝi ɗaŋ yanshi. ⁴ ko mǝni dzuɓ tliiti tanbtanni ɗaŋ tǝ ta yi siluwam ɗaŋ gwaghaɗ ta ndaɗɗi ɓashi man tlaa shi washi, ca vǝrki tu tǝ moɓ ɓuruk ɓanci mǝn Urshelima kuskǝ ngǝtan? ⁵ Mya fuuki tu yi cik hŋ. Beɗ tǝ gi ɗeɓaɗ muryo ɗaŋ ya kaɓ ndaaɗkǝn wos hŋ, ɗeɓaɗ wasǝŋ ta datsǝi. ⁶ Yesu fuushi gya gin ɗa tu, ''Mur won yir gwaam yi ɗaŋ dluur a kitn darndu dǝnwos a man nǝ ngaghǝn gurghǝ gwashes beɗ tǝ gi tu hŋ. ⁷ She mures wul murghǝ paŋngǝn kites tu, yeli voni mayi ghǝn mya man nǝ gurghǝ gwaamǝn beɗ tǝ gi myaa tu hŋ. Dzakti. Wuri ǝŋ ma gaatǝ yi lyaa lǝǝɓ a ɓyeemiye?' ⁸ She murghǝ paŋngǝn kites a suɗa wul tu, vǝrtǝ ŋaa dǝǝl njwatn nǝ ɓǝl giir mǝ shiintǝ juŋ mǝn ngai. ⁹ Ǝŋ yan ya guur nǝ kǝ ɗiinjini, a ndaara; beɗ tǝ gi ǝŋ ya guur hŋ ǝnnda a dzaktii!''' ¹⁰ Dzaŋ gon won Yesu ta yi gha giɗkǝni zaarsǝ ghai vin ladi Yahudawa dzaŋ ghǝ Wolngi. ¹¹ She gǝɗ won ɗa ɗani voni wos dzuɓ tlitii tan tan tǝ kuskǝ mǝnndǝ, a nguui ɗeɓaɗ, caa kǝǝm tǝ taa tǝ daŋngaɗ hŋ. ¹² Ɗaŋ Yesu yel tǝ, she a cim tǝ wul tǝ tu, ''Gǝɗin taa fuuɗghǝi a kuskǝ gonngǝnin.'' ¹³ She Yesu a mbii taas wos gaa tǝ mǝn a gaam, ɗa ɗani she a shishi dlǝǝrni ngaɓ luughǝn Cogn. ¹⁴ Beɗ tǝ gi a tlǝi munvar ghǝ vin lades nǝ yo tu a fuuɗ zaarbdzaŋ ngǝ wolngi. She munvares wul zarsǝ tu, ''Dzaŋ ciɗa liim ɗaŋ a ndara tǝǝ fi laa mǝnǝn ngai tǝ fuuɗki wani yei tǝ dzaŋ wolngi. ¹⁵ Beɗ tǝ gi Daadǝn sutu ɗa a wul tu, ''Mǝn ryaaghǝni lǝǝɓ! Gon wan wo dlii zwaaki ko gaal wos a tlǝrǝŋ ɗaŋ wo tlǝǝrtǝ laar nǝ zhatlyaghǝn zha wolngi hŋaa? ¹⁶ Kǝnda nyi ghǝ Ibrahim, gyo ɗaŋ Shetan a naɗtii nǝ kǝ voni dzuɓ tliiti tantan, tavkǝǝm tǝ tǝrǝŋtǝ dzaŋngǝ wolngi hŋ kǝnndiya?'' ¹⁷ Ɗaŋ a kon ngǝrshi gya gin, ɗeɓaɗ wasǝŋ tǝ nyaŋngas tǝ ndzuun ndǝr ngaɓshi washi, ɓuruk zarsǝ ɗaŋ tǝ jwaamshi ɗa ɗani a ta polshi tǝ gya ngǝtn mbuni yo ɗaŋ a fishi. ¹⁸ She Yesu wul tu, ngaɓi guŋɗǝ Cognvon yin ɗaŋ ni, ma ndǝr ma ɓumtsǝ tǝ tǝ ni? ¹⁹ Yin ɗaŋ ŋaa tsir ciɗ gyobɗaŋ murwom ya mbii gǝm a ŋaa kitn wos, a mbwa luui naai nǝ dǝlǝghǝn gwas, gya yetkii tǝ man yi dǝn tǝ ɗuu voni a gya dlǝŋri wos.'' ²⁰ A man wul ɗa tu, ''Tǝ ni ǝŋ ma ɓumtsǝ guŋndǝ Cognvone? ²¹ Yin ɗaŋ ŋaa yisti won gyo ɗaŋ gǝɗ won mbii tǝ mbuur tǝ nyoptǝ waa koɗi mayi nǝ yo tu tǝ tlǝǝshi'' ²² Yesu a nda ko a ŋaa yatli gyo ɗaŋ cigha tǝpmwos nǝ kǝ tlǝghǝn Urshelima ǝŋnda yi giɗ zarsǝ ghai. ²³ She gon won wul tǝ tu, ''Daadǝn, mǝn yo ɗaŋ ta tu kaɓkǝn a guŋndǝ wa ci ŋaa njwata?'' She a wulshi tu, ²⁴ ''fin taas ɗa a nda a te ɓilghǝ mecaaghaɗ nǝ duryo tu mǝ wul tu, zarsǝ monnda ta ŋal ndaghǝni beɗ tǝ gi ta kǝǝm ta nda hŋ. ²⁵ Ǝŋ yan murghǝ dǝn a yetl ɓǝdlǝŋi, ǝnnda ka dlǝǝr ɓǝdlǝŋ ki ɗuu ɓiil, ki wul tu, 'Daadǝn, Daadǝn, gaami mǝ ndai giɓii.'' She wo sushi ɗa wul ki tu, myani ma yisǝŋ lǝǝɓ yo ɗaŋ kǝ dlamɗi ghai hŋ.' ²⁶ Ǝnnda ka wul tu, maa ci maa tlyaa a ken wa, kaa ndǝr kǝ giɗ a gya datǝpm wopm!' ²⁷ Beɗ tǝ gi wo suɗ wul tu, ''mya fuuki maa yisǝŋ kǝ dlamɗi te ɗo hŋ, tlǝnni, ɗeɓaɗ wan mǝn fiighǝn kusǝŋsǝ ngǝtn!' ²⁸ Kaa ngwar tǝ ŋaaskǝn shin dzaŋ gi ɗaŋ kya yel Ibrahim tǝ Ishaku tǝ Yakuɓ mǝn shinngǝn Cogn a guŋndǝ Cognvon, beɗ tǝ gi kyaani ta gaaki wani ɓǝdlǝŋ. ²⁹ Ta nbwaaɗi a te bandi gǝshi tǝ gaami, tǝ zaari tǝ napti ta ci a dakci ghǝ cighǝna guŋndǝ Cogn von. ³⁰ Yisǝŋǝi gya ginni, ''mǝn kaari ta man keni, mǝn ken ǝŋ ta man ɗa kaari.'' ³¹ Ɗa ɗanni gya Farisiwa won tǝ man tǝ wul tǝ tu, '' Gaa ɗuuni nǝ yo yo tu Hiridus caa ngal tǝ ɗuughǝi'' ³² Yesu wul tu, ''Tlǝn a tlǝŋ fuu Shawayi tu yellǝn maa nyolar mǝndǝŋsǝ, mya fuuɗkǝni zaarsǝ yawon tǝ jaan, ǝnndi a dzaŋ ghǝ kǝ mayes ma manndar laa tii. ³³ ko ɗaŋ wuri a na ciɓ mǝ ci ken tǝ riighǝn yaawon tǝ jaan tǝ ɗiini ghai nǝ yo tu a ndara tǝ dur murghǝ shinngǝn Cogn ɗoŋngai tǝvUrshelima hŋ. ³⁴ Urshelima, Urshelima, mǝn tlaagǝn mǝn shinngǝn Cogn, mǝn liiɗkǝn gya gyo ɗaŋ tǝ shinshiɗi ɓaski. Tǝpm wurivǝŋ mya su mǝ jwaam mǝri wa ɗaŋ gi ɗaŋ geri caa yi jwaam nǝriwos a giɓ gyomtliwos, beɗ tǝ gu kǝ su gin hŋ. ³⁵ Yelli, taa bushuk dǝn wayi. Mya ndǝr mǝ fuuki tu ka man yellǝm ɗa hŋ she dzaŋngi ɗaŋ kya wul tu, ''Mbuni tǝ na muryo ɗaŋ caa nanba sǝmngǝ Daadǝ.''