¹ Ɗaŋ a ngaa laai njwaatn zarsǝ zaŋngu monnda taa ta jwaam shi waashii ɗaŋ hal caa daptsǝ dlǝŋsǝ waasǝŋ, she Yesu nguɓ vii wulghǝn keni ɓurug tu, "Ɗaghǝn ɗa nǝ yis kǝ Farisawai, yaan tu ryaaghǝn lǝɓ. ² Beɗ tǝ gii ngǝtn yo ɗaŋ dlǝpmngǝni tu ta ɗyaa ta ŋǝǝr tii hŋ ŋoon, cikkǝn ngǝtn yo ɗaŋ nǝ waaɗi, ta yisǝŋ tii. ³ Beɗ tǝ gii ngǝtn yo ɗaŋ dlǝpmngǝni tu ta ɗyaa ta ŋǝǝr tii hŋ ŋoon, cikkǝn ngǝtn yo ɗaŋ nǝ waaɗi, ta yisǝŋ tii. ⁴ Mya fuu ki gya daakam, ɓak cin vǝrtǝ muryo ɗaŋ wo ɗya ɗu ni dli hŋ. Ǝŋ yaa ɗu ki waanii wo kǝǝm fi ngǝtn won ɗa hŋ. ⁵ Gaan mǝ fuu ki muryo ɗaŋ ka ci vǝrtǝ wos. Cin vǝrtǝ mruyo ɗaŋ yaa ɗui wo ɗyaa gǝmii giɓ wuɗ. Hal jom mya fuu ki tu yaani ghuŋ ka ci vǝrtǝ wos. ⁶ Caa yi ɗiɗar naavyakdǝni nanndam a wurɓa anini mbǝtlǝm ŋaan? Beɗ tǝ gii, laa yi mal Cognvon a gon waasǝŋ hŋ. ⁷ Hal maa mbitlǝŋ gaam waan aa yisǝŋǝi. Cin vǝrtǝ hŋ. Kǝ moɓ naavyakdǝni ɓastǝ vaan. ⁸ Mya fuu ki tu ɗeɓaɗ muryo ɗaŋ ya tlya zhatn a ken zarsǝ , ŋaa zaar ma wo tlya zha wos a ken zhipti shinngǝn Cogn. ⁹ Muryo ɗaŋ yaa nyaŋngasǝm a ken zarsǝ yaani ma ta nyaŋngas tǝ a ken zhipti shinngǝn Cogn. ¹⁰ Ɗeɓaɗ gyo ɗaŋ ya wul vi kemaskǝn a dulgaam ŋaa zaar, ta dlaa tǝ loŋsǝ mǝnii. Beɗ tǝ gii gyo ɗaŋ ya wul vik kemaskǝn a dulgaam zhipti var, ta dlaa tǝ loŋsǝ mǝn hŋ. ¹¹ Ǝŋ yaa tlǝǝr ki viin laadi Yehudawa a ken mǝn ɗǝǝlghǝn vii, a ken mǝn guŋndu, aa vuu nǝ ngǝtn yo ɗaŋ ka wul aa nyolar gamawaan ngai ko ngǝtn yo ɗaŋ ka kon hŋ, ¹² durghǝ yo tu zhipti var wo fuu ki ngǝtn yo ɗaŋ ka kon a kili gies." ¹³ She gon won a dlǝk zarsǝ a wul tǝ tu, "Malǝm, wul yesatii tu tǝ ɓǝǝl duul ghǝ dawopii mi cimtǝ." ¹⁴ Yesu wul tǝ tu, "Murin, nǝ nuu ghǝn a sularǝm nǝ murghǝ ɗǝǝl vii ko ndaghǝn a dlei waan no?" ¹⁵ A wul shi ɗa tu, "Ɗaghǝn ɗa, aa naa nǝ mǝn swaari hŋ, durghǝ yo tu ngǝtn ngǝ ɗǝgn yo ɗaŋ kǝ yir yaani ghǝn a moɓ tsǝtnngǝn waa yaawon hŋ ¹⁶ She Yesu man fuu shi vii gon ɗa tu, "Kitn murghǝ tughǝn won a tu ngǝtn ngai ndara nǝ ŋaanyi hŋ, ¹⁷ a ɓital tǝ a raa wos a wul tu,'Nǝ nii ghǝn ma fie durghǝ tu, mi tǝ lǝɓ ɗaŋ ma shin ngǝtn ngǝ kitatn ngai ɓurug hŋ?' ¹⁸ She a wul tu, 'Ngǝtn yo ɗaŋ ma ghǝni, ma dluuɗ fuŋatii mǝ nal kǝ varaŋshi, mǝ shiin ngǝtn ngǝ kitatn ngai tǝ ngǝrshi gyagon ngai ɗa. ¹⁹ Ma wul raatn tu, "Raatn, kǝ yir ngǝtn monnda ɗaŋ nǝ gaaghǝn nǝghǝ voni monnda. Sǝǝ sǝriiɗ,aa ci,aa tlya, tǝ polghǝ.'" ²⁰ Beɗ tǝ gii Cogn wul tǝ tu, "Ɗǝghǝr zaar, ɗa kaviɗin caa ŋal rai waa. Ngǝtn yo ɗaŋ kaa jwaam, kǝ ndǝr gama mǝn ta naa nǝ kaɓkǝ nuu?' ²¹ Cikkǝn muryo ɗaŋ yaa jwaam ngǝtn gamas mǝn ɗaŋ yaan yir tughǝni a ken ngǝ Cognvon hŋ." ²² Yesu wul mǝǝri dǝn wos tu, "Nǝ gii mya wul ki tu, ɓak vuu nǝ durghǝ tsǝtnngǝn waan-nǝ ngǝtn yo ɗaŋ ka ci, ko nǝ durghǝ dli waan ngǝtn yo ɗaŋ ka caa hŋ. ²³ Durghǝ tu rai moɓ ngǝtn ngǝ cighǝn, dli a moɓ lǝŋsǝ. ²⁴ Yaalǝn aa yel gya yetli ɓa, caa kǝɓ ngǝtn hŋ, caa tlaa hŋ, tǝ yir fuŋ hŋ, tǝ lǝɓ gaaghǝn ngǝtn ngǝ cighǝn hŋ, beɗ tǝ gii Cognvon ca taa shi ngǝtn ngǝ cighǝni. Zhimngǝni waan a moɓ kǝ yetli ɗuun mella? ²⁵ Nuu a gibi waan nǝ durghǝ vuughǝn wos wo ɗya bǝtar mbuɗkǝn wos kai njwaato? ²⁶ Ǝŋ yaan ka keem kǝ fi mǝrghǝ ngetn ɗaŋ gya gii hŋ, nii a caa annda kya vuu nǝ ngǝtn yo ɗaŋ tǝ ɓan tǝ naae? ²⁷ Yaalǝn a yel shilghǝɗ- ɗaŋ caa luuɗ. Caa fi laa hŋ, saɗɗa ca mbwaa mbwaapm hŋ. Mya fuu ki tu guŋ Solomon gamas tǝ zǝkkǝn wos a caa luu ndaraara ɗa namboŋni waasǝŋ hŋ. ²⁸ Ǝŋ yaan Cognvon wo caa lǝŋsǝ yaar mǝn ndara cig, yaar ɗaŋ yaawon ci ɗa, jaan taa caa wuɗ kai. Kyaani ma wo ɗya caa ki lǝŋsǝ mǝn ɗaŋ a moɓ cig. Caaghǝn raa waan yi ŋaa njwaatn! ²⁹ Ɓak vuu tǝ ngǝtn yo ɗaŋ ka ci tǝ ngǝtn yo ɗaŋ ka tlya a ndǝr aa vuu gama waan hŋ. ³⁰ Yini tu mǝn ɗǝgn caa ŋal ngǝrshi gyagin ɓurug, kyaani gwaan Dawan aa yisǝŋǝi tu kyaa ŋal ngǝrshi gyagin. ³¹ Beɗ tǝ gii ŋalǝn guŋndu Cognvon, wo daɗakki ngǝrshi gyagin mǝn ngai. ³² Cin vǝrtǝ hŋ, kyaani ɗaŋ ki ŋaa jwaatǝn, durghǝ tu tǝ polghǝni Dawan wo vǝrki guŋndes. ³³ Ɗiɓarǝn ngǝtn yo ɗaŋ kǝ yir aa vǝr wurɓas gyaa naa kui. Ndǝrǝn taraŋ wurɓa gama waan mǝn gyo ɗaŋ wo malar hŋ, gaan ngǝtn waan tsogn gaami ɗaŋ wo ɗyaa ɓan hŋ, lǝɓ yo ɗaŋ meŋrǝŋsǝ ta ɗya ta tul ghai hŋ, gyaa zhiɓǝr ta ɗya ta malar tǝ hŋ. ³⁴ Nǝ dirghǝ yo tu lǝɓ yo ɗaŋ tughǝn waa ghai, ɗani ghannda raa waa yighai. ³⁵ Mbǝrǝn ki aa njag lǝŋsǝ fuupmshi waanii aa naɗii tǝ mom miis waan, aa gaa kuɓka wuɗ waan a cigheni dzaŋ tǝ kaviɗ. ³⁶ Aa naa ɗa hŋ monsǝ yo ɗaŋ cigha ɓuɓkǝn murghǝ dǝn waasǝŋ wo sutǝɗi a lǝɓ belak kaɓkǝn gǝɗ, ǝŋ yaa man man ɗu ɓiil, ta man ɗǝrǝ tǝ ɓiili mǝnii kyaaɗ ³⁷ Mǝn mbuni nǝ monsǝ gyagii ɗaŋ Daadǝnes wo man tushi a gaaghǝn yir ǝŋ yaa sutǝɗi. Jomjom mya fuu ki tu wo mbǝr tǝ naɗ luu woshii, caa shi tǝ tsǝtni a dakci cighǝn ngǝtn ngǝ cighǝn vǝrshi ngǝtn ngǝ cighǝn yan gamas. ³⁸ Ǝŋ Daaden waasǝŋ yaa man kaviɗ, dlǝk kaviɗ kǝ var, yaa man tushi taa ɓumtsǝi cigha ɓuɓkǝn wos, monsǝ gyagin nǝ mǝnyo ɗaŋ ta tu shiɗshiɗi wos. ³⁹ Yisǝŋǝn ɗa tu yaan murghǝ dǝn tayi yisǝŋ dzaŋ maaghǝn mǝǝrii ɗi, wo gaa mǝǝr tǝ nda tǝ mǝ dǝn hŋ. ⁴⁰ Nǝghǝ gii ɓumtsǝn tsǝtnngǝn waanii nǝ durghǝ yo tu kaa yisǝŋ dzaŋ yo ɗaŋ Ɲaa Zaar wo sutǝɗi hŋ. ⁴¹ She Biturus a wul tǝ tu, "Myaani ghǝn kya fuu mi viinna ko nǝ ko nuu tǝ ko nuu?" ⁴² She Daaden wul tu. "Nǝ nuu ghǝn ci mǝnvar naa jomjomi, murghǝ saɗkǝni gyo ɗaŋ Daadǝn wos yaa man gaa tǝ monsǝ wos mǝn a taas wos tu tǝ paŋshi, tǝ vǝrshi ngǝtn ngǝ cighǝn waasǝŋ a dzaŋ waasǝŋ ŋoo? Daashi gin wo naa nǝ mon ngǝ mbuni, ɗaŋ murghǝ dǝn wos a man tu tǝ a laa yo ɗaŋ a gaa tǝ ghai . ⁴⁴ Nǝ naa jomjomni ghǝn mya fuu ki , wo gaa tǝ duul wos mǝn ɓurug ⁴⁵ Beɗ tǝ gii ǝŋ yaan mones ya wul gha raa wos tu, 'Daadǝnatn a man swaɗ hŋ she a nguɓ voɗkǝn monsǝ dǝnes. guɗi tǝ mǝn monci ɗaŋ caa fi laa cimshi, a ci a tlya zha hal ngaɓtii, ⁴⁶ daaden monǝn wo man a dzaŋ yo ɗaŋ mones aa ca raa ɗa hŋ, a kili yo ɗaŋ aa yisǝŋ hŋ, wo ndǝr fi tǝ forǝm monnda man gǝm tǝ a mǝn kusuŋsǝ ngǝtn fighǝn. ⁴⁷ Monǝ a yisǝŋ raa ghǝ daadǝn woshii, beɗ tǝ aa yisǝŋ ngǝtn yo ɗaŋ daaden wos ca suu hŋ. Wo tlya ɓoptsǝ nǝ ŋaa nyi hŋ. Wo tlya voɗkǝn tǝ ɓoptsǝ monnda. ⁴⁸ Beɗ tǝ gii muryo ɗaŋ aa yisǝŋ hŋ, a fi ngǝtn yo ɗaŋ yi ndaraara hŋ, wo tlya voɗkǝn tǝ ɓoptsǝ ŋaa njwaatn. Ɗeɓaɗ muryo ɗaŋ taa taa tǝ ngtn monnda, ta ŋal ngǝtn ɓastǝ monnda ɗaŋ. Saɗɗa muryo ɗaŋ ya vǝrte ngǝtn monnda ngaɓkǝni , ta ŋal ngǝtn yo ɗaŋ a moɓ lǝǝɗkǝni ɓastǝ. ⁴⁹ Mǝ man mǝ caa ni wuɗ ka ɗǝgn. Nǝ suughǝnetn taa yi nuɓ cighǝn ɓaandǝŋ ⁵⁰ Mitǝ Baptisma yo ɗaŋ ta fim Baptisma mǝn ngai. Maa vui tu she mya ɓan tii. ⁵¹ Kyaa gaa gwaan tu mǝ lǝǝr ni tsǝtn ngǝn wusni ɗi gha ɗǝghaan? Ko njwaatn! Ma fuu ki nǝ hǝrɗkǝni ghǝn mǝ lǝǝr ɗi. ⁵² Ɗan ɗaŋngǝni zarsǝ nanndam a dǝn nambonyi ta ɓǝǝlii, zarsǝ mayi ta nyaŋngas mbǝtlǝmmes,mbǝtlǝmmes cigha nyaŋngaskǝn mayes. ⁵³ Naktǝ tǝ Daktǝ ta nyaŋngas dlǝŋsǝ waasǝŋ. Ɲaa wo nyaŋngas daagos. Naktǝ wo nyaŋngas ŋaanyi wos, nyes cig wo nyaŋngas naashi, kawoktǝ wo nyaŋngas gǝɗi kuni wos, gǝɗi kunes wo nyaŋngas kawoshi." ⁵⁴ Yesu a man wul zarsǝ yo ɗaŋ tǝ jwaamshi ɗa tu, "Tǝ yelghǝn kurvon ya shishiɗi te banndi gaami, kyaɗ kǝ wul tu, "Von wo shi,' cikkǝn cayi naa cig. ⁵⁵ Ǝŋ kya wum yetar ya vaɗ ɗi te banndi zaari, kyaa yi wul tu, " l Lǝɓ wo vaa nǝ ŋaanyi hŋ,' ca yi naa cig. ⁵⁶ Kyaani gya mǝn ryaaghǝni lǝɓ, kaa yisǝŋ waarghǝn gya kili ghǝ ngǝtn gaami tǝ yaatl, beɗ tǝ gii kaa ɗyaa worghǝn ngǝtn yo ɗaŋ wo fi ɗaŋngǝni hŋaa? ⁵⁷ Nǝ nii a caa ka yisǝŋ ngǝtn yo ɗaŋ wo somkiɗa hŋe? ⁵⁸ Ǝŋ yaan kya tlǝghǝn a lǝɓ ɗǝǝlghǝn vii tǝ muryo ɗaŋ a tlǝǝr vii waa, fi taas ɗa aa ɓumtsǝi kyaaɗ a datǝpm, nǝ durghǝ yo tu tǝ tlǝǝrghǝ a mǝn ɗǝǝlghǝn vii hŋ. Durghǝ tu murghǝ ɗǝǝlghǝn vi tǝ tlǝǝr ghǝ a mǝn paŋngǝn jaarum, yaan murghǝ paŋngǝn jaarumes wo zhiɗkǝ tu aa yisǝŋngǝi hŋ. ⁵⁹ Mya fughǝ tu ka ɗya kǝ nyol hŋ she kya sular ɗeɓaɗ wurɓa yo ɗaŋ ca laaɓkǝi."