¹ Kili yo ɗaŋ Yesu tai a karaghǝn Cogn a lǝɓ won she namboŋ a giɓ mǝǝri dǝn wos wul tǝ tu, "Daadǝn, giɗ mi a karaghǝn Cogn ɗaŋ Yohanna zhiɗ mǝǝri dǝn wos kai." ² Yesu wul shi tu, "Yaan ka kara Cogn wulǝn tu, 'Daa tǝ gaa sǝm waa tǝ ndzǝkkǝn. Guŋndu waa tǝ shii ɗi.o ³ Vǝrmi ngǝtn ngǝ cighǝn ɗaŋ ma ci Ko dzany gyo. ⁴ Dlaa mi loŋsǝ kusuŋsǝ ngǝtn wopm mǝnii, ɗaŋ gyo ɗaŋ myaa dlaa mǝn yo ɗaŋ myaa dlaa mǝn yo ɗaŋ caa fimi kusuŋsǝ ngǝtn mǝ. Tlǝǝr mi a lǝɓ yo ɗaŋ ta diiɓ mi ghai hŋ." ⁵ Yesu wul shi tu, "Nǝ nuu a gibi waan yaan yir kamnde wo tlǝ ɓastǝ dlǝk kaviɗ wul tǝ tu, "Daa kaam vǝrǝm gurnyi dugn mayi, ⁶ ɗaŋ kamatn won dlam ɗi riighǝn ɗaŋngǝni mǝ yir ngǝtn won ɗaŋ ma vǝr tǝ tǝ ci hŋ.' ⁷ She muryo ɗaŋ ci giɓes sutǝ ɗa wul tǝ tu, "Vuum raa mǝn hŋ. Ɓaanndǝŋ maa yetl ɓiila tii, myan tǝ mǝǝretn maa mbutni, ma dyaa ma shishi ma vǝrghǝ dugn hŋ ⁸ Mya fuu ki tu ǝŋ yaan wo shishi vǝrghǝ dugn hŋ tu durghǝ tu kinǝ kamshi, beɗ tǝ gii durghǝ nghaɗkǝn waa kǝ wum shaam hŋ, wo shishi vǝrghǝ guruŋshi dugn a bamvi ngǝtn yo ɗaŋ kya suu ⁹ Mya wul ki ɗa tu, "Karan, ta vǝr ki, ŋalǝn ka tui, ɗun ɓiil ta ɗǝrǝ ki mǝnii. ¹⁰ Nǝ durghǝ tu, ɓurug murghǝ karaghǝn caa kaɓii, ɓurug murghǝ ŋalghǝn ca tu; gyo ɗaŋ ya ɗu ɓiil ta ɗǝrǝ tǝ mǝnii. ¹¹ Nǝ daktǝ yo agiɓi waan, ŋaa wos ya kara tǝ nǝ gyaas wo vǝr tǝ nyici a bamvi gyaas so? ¹² Ko yaa kara tǝ nǝ mbuutl wo vǝr tǝ nannjaŋo? ¹³ Durghǝ gii kyaani ɗaŋ kinǝ kuushi kaa yisǝŋ vǝrghǝn mǝǝri waan ngǝtn yo ɗaŋ yi ndaraara. Wurii ghǝnnda Dawaan gyo ɗaŋ ci gaami wo vǝr zhipti var mǝn yo ɗaŋ caa karatee?" ¹⁴ Kili won Yesu ta yi gha nyolarghǝn mǝnndǝ won ɗaŋ nǝ bǝnndǝŋ. Ɗaŋ mǝnndǝi nyolii she mures ɗaŋ nǝ bǝnndǝŋǝi ta wul vii, a ta kwasar jwaamngǝn zarshes! ¹⁵ Beɗ tǝ gii gyagon tǝ wul tu, "Tǝ vartǝ Ba'alzabuba guŋ ngǝ mǝnndǝŋsǝ ǝŋ ca nyolar mǝnndǝŋshes." ¹⁶ Gyagon tǝ diiɓ tǝ tǝ ŋan tǝ zhiɗ shi ngǝtn zhiɗkǝn tsognvon. ¹⁷ Bǝɗ tǝ gii Yesu yisǝŋ raa waasǝŋǝi, a wul shi tu,"Ɗeɓaɗ guŋndu yo ɗaŋ yaa ɓǝǝlii mbǝtlǝŋ caa gaa gǝǝɓ tǝ gamas a dluɗii ghǝnndi, ǝŋ dǝn yo ɗaŋ yaa ɓǝǝlii mbǝtlǝm, ca gaa gǝǝɓ tǝ gamas wo ndaaɗii.. ¹⁸ Ǝŋ shetan yaa ɓǝǝlii mbǝtlǝm ca gaa gǝǝɓ tǝ gamas, guŋndu wos wo dlǝǝr wurii? Nǝ durghǝ tu kǝ wul tu kǝ wul tu mya nyolar mǝnndǝŋsǝ tǝ vartǝ Ba'alzabuba. ¹⁹ Yan mya nyolar mǝnndǝŋsǝ tǝ vartǝ Ba'al zabuba tǝ nuu ghǝn mǝn laaɓkǝn waan caa nyolar shee? Durghǝ gii yaaŋ shi ghǝn ta naa nǝ mǝn ɗǝǝlghǝn waan vii mǝn. ²⁰ Beɗ tǝ gii ǝŋ yaan tǝ taas kǝ Cogn ghǝnnda mya nyolar mǝnndǝŋse, a maan ghǝnndi tu guŋndu Cogn aa man baski ²¹ Yaan zaar tlyaaghen gyo ɗaŋ aa mbǝrtii ayy tlya dǝn woshii, ngǝtn wos tǝ fuuɗii, ²² beɗ tǝ gii ǝŋ yaan muri gon ɗaŋ a tlya moɓ tǝ yaa man vumi ɓastǝ wo mbi ngǝtn maanndeshii gha mures, ndǝr nyom tǝ ngǝtii. ²³ Muryo ɗaŋ ci te ɓasǝm hŋ ca gaa ni gǝǝɓ tǝ myan, muryo ɗaŋ ca jwaam tǝ myan hŋ ca basaŋ ni. ²⁴ Kili yo ɗaŋ kuskǝ zhipti yaa nyol gha muresshii, ca yi nyol gha te lǝɓ yo ɗaŋ zha ghai hŋ, ca ŋal lǝɓ yo ɗaŋ wo sǝǝ ghai. Yaa tu hŋ , she tǝ wul tu, 'Ma sum a dǝnatn ɗaŋ mǝ gaa ɗi.' ²⁵ Ɗaŋ a sutǝɗi man tu taa tuɗ dǝneshii ndaraara. ²⁶ She a sutǝ tlǝn nyom mǝnndǝŋsǝ gyagon ɗi wottsǝmai gyagyo ɗaŋ tǝ moɓ tǝ kuuskǝn tǝ man tsǝtn ɗa lǝɓi. She ɓaandǝŋ murii moɓ keni wos kuuskǝn. ²⁷ A naa tu ɗaŋ a kon ngǝrshi gyagin gǝɗ won a wul tǝ tǝ yer tlya tlya a dlǝk zarsǝ tu, "A mbaa vwaa gyo ɗaŋ a bwaaghǝ tǝ maam yo ɗaŋ kǝ tlya." ²⁸ She yaan a wul tǝ tu, "A mbaa mǝn yo ɗaŋ caa wum vik Cogn tǝ fi laa ghai." ²⁹ Ɗaŋ zarsǝ caa daɗak jwaamngǝn ɗi ghai, Yesu nd wulghǝn tu, "Wusuli gin nǝ kuskǝ wusuli. Caa ŋal ngǝtn giɗkǝni ko ɗaŋkutu ngǝtn ngǝ giɗkǝn won ɗa ɗaŋ ta giɗ shi hŋ she giɗkǝn kǝ Yunanai. ³⁰ Nǝ durghǝ tu ɗaŋ Yunana naai nǝ ngǝtn ngǝ giɗkǝn a mǝn Ninevi, cikkǝn ŋaa ghǝ zaar wo naa a wusuli gin. ³¹ Ɗaŋ guŋ gǝɗ kǝ Banndi zaari wo dlǝǝr a ɗǝǝlghǝn vii tǝ mǝmmonci kǝ wusuli gin ndǝr datsǝ shi waashii, durghǝ yo tu a dlam ɗi a lǝɓ fuɓni durghǝ tu tǝ sǝǝ kǝǝm saghaɗkǝn Solomon. Yeli gyo ɗaŋ a moɓ Solomon ci ɗuuni. ³² Memmonci Ninevi ta dlǝǝr ta dlǝǝr a ɗǝǝlghǝn vii tǝ zarsǝ ghǝ wusuli gin ta ndǝr tǝ datsǝtii nǝ durghǝ yo tu nǝ vik Cogn ɗaŋ Yunana fuushi tǝ gaa kusuŋsǝ ngǝtn waasǝŋǝi. Yeli gon ɗaŋ a moɓ Yunana ci ɗuuni. ³³ Gon won ɗa hŋ ɗaŋ wo ngaɓ kuɓka wuɗ yaalghǝni gaa tǝ a lǝɓ waaɗi ko dlǝpm tǝ buŋli hŋ, she de tǝ gaa tǝ gha lǝɓ gaaghǝn wos durghǝ yo tu mǝn ndaghǝn tǝ yel yaalghǝn wos. Yir waan yaan ci kuɓka wuɗ kǝ dli. Yaan yir waan ca yaalii, dli waan wo yaalii ɗeɓaɗ. Yaan yir waan ca yaal mbun mbun hŋ dlii waan wo naa a lǝɓ jii. ³⁵ Nǝ durghǝ gii ɗaghǝn ɗa nǝ lǝɓ yaali yo ɗaŋ yi ɓaski tǝ naai nǝ dugn hŋ. ³⁶ Yaan cighǝi ɗeɓaɗ dli waan nǝ yugnngǝn tǝ lǝɓ yaali, ɗaŋ te laŋshi gon yigha lǝɓ jii hŋ, shǝ ɗeɓaɗ dli waan tǝ naai ɗaŋ gii ǝŋ kuɓka wuɗes yaa vǝr yaalghǝn wos ka gama waan." ³⁷ Ɗaŋ aa ɓan wulghǝn viiyi she mǝn Farisawa won wul tu tǝ man tǝ tlii ɗaa tǝ dǝn tǝ ci ngǝtn ngǝ cighǝn, she Yesu ndai tlǝn tsǝtni. ³⁸ Ngǝrshi kwasar mǝn Farisawai tu Yesu coɓ taas keni ghǝnnda tǝ ci ngǝtnngǝnes hŋ. ³⁹ Beɗ tǝ gii Daadǝn wul tǝ tu, "Ɗan cin kyaani Farisawa kya coɓni gwaan kar kolaaɗ tǝ bangaji, beɗ tǝ gii giɓes nǝ yugnngǝn tǝ nyaŋ tǝ kuuskǝn. ⁴⁰ Kyaani zarsǝ mǝn dwaandǝ ɓitalghǝn! Muryo ɗaŋ a ndǝr kaares yaan ghuŋ a ndǝr giɓes hŋaan? ⁴¹ Vǝrǝn gya naa kui ngǝtn yo ɗaŋ yi giɓi tǝ cig kannda ɓuruk ngǝtn wo naa kaɗ kaɗ ɓaski. ⁴² Beɗ tǝ gii a girki Farisawa, durghǝ yo tu kyaa kaɓ zhakka tǝ gagmashi tǝ mbǝltsǝ tǝ paatsǝ ghǝ ngetn ngǝ laar beɗ tǝ gii kaa nyaŋngas mborki tǝ suughǝn kǝ Cogn. A naa ciɓ a fi ngǝtn mbuni aa suu Cogn ,baa tǝ gaaghǝn fighǝn ngǝrshi gyagon hŋ. ⁴³ A girki Farisawa, durghǝ yo tu kyaa suu tǝ vǝrki lǝɓ tsǝtnngǝn kǝ ndaraani giɓ viin laadi Yehudawa tǝ ŋalghǝn tǝ luu ki yaan ta wuru ki a lǝɓ vǝǝn. ⁴⁴ A girki durghǝ yo ɗaŋ tu kini ɗaŋ vii giir yo ɗaŋ tǝ dlyaaɗ ngǝtn won ngai ɗaŋ tǝ giɗ tu ngǝtn ɗa ɗan hŋ ɗaŋ zarsǝ caa rii ghai ɗa duuli tǝ yisǝŋngǝn waasǝŋ hŋ." ⁴⁵ Namboŋ a giɓ malǝmci mborki ghǝ Yehudawa a wul tǝ tu, "Malǝm, ngǝtn yo ɗaŋ kǝ kon a cimi raa ɗaŋ." ⁴⁶ Yesu wul tu, "A girki kyaani Malǝmci mborki! Durghǝ tu kaa naaɗ ngǝtn mgǝ kǝǝn ngǝn zarsǝ mǝn laaɓ laaɓ gyo ɗaŋ yi shi mǝn tǝ ɗakkǝn mbiighǝn,beɗ tǝ gii kya tǝǝn ngǝtn ngǝ kǝǝn ngǝ nes tǝ namboni mǝrǝ taas waan hŋ. ⁴⁷ A gir ki durghǝ tu kyaa ɓǝl vii giir nǝ durghǝ mǝn shinngǝn Cogn, ɗa bamvies nǝ jiɗ kǝ gya jiɗ waan ngǝn tǝ tlaa shi. ⁴⁸ Nǝ ghǝ kinǝ mǝn tlyaghǝn zha tǝ yisǝŋngǝn laa ghǝ gya jiɗ waan, durghǝ tu yaŋshi ghǝn tǝ tlaa mǝn shinngǝn ghǝnnda kyaani kya nal gwaasǝŋ. ⁴⁹ Nǝ durghǝ dei gin nguŋ saghaɗkǝn Cogn wul tu, "Ma shinndarsh mǝn shinngǝn Cogn mǝn tǝ mǝn shinngǝn Yesu,vta fir shi forǝm tǝ ndǝr tǝ tlaa gya gon waasǝŋǝi.' ⁵⁰ Wusuli gin wo mbi voraŋ jii ghǝ voraŋ ɗeɓaɗ mǝn shinngǝn Cogn ɗan tǝ dlaa ɓaandǝŋ fighǝn ɗǝgn, ⁵¹ ngaɓkǝn ɗi a voraŋ Habila tǝ voraŋ ngǝ Zakkariya gyo ɗaŋ tǝ ɗu a te bagadi tǝ lǝɓ ndzǝk ndzǝki. Eh! Myaa fuu ki taa ŋal voraŋ jii waasǝŋ a wusuli gin. ⁵² A girki kyaani malǝmci mborki Yehudawa nǝ durghǝ tu kaa mbi piis kǝ yisǝŋngǝn ngǝni, kyaani gama waan kǝ nda hŋ, kǝ ndǝr kǝ ɗaghar ndaghǝni a mǝn ndaghǝni." ⁵³ Ɗa kaari ɗaŋ Yesu gaa lǝɓeshii, mǝn dlyaaɗkǝn tǝ Farisawa tǝ ta gaa gǝǝɓ tǝ yaan tǝ ndǝr tǝ sǝrɗ yer tǝ yaan nǝ dulgaam ngǝtn monda, ⁵⁴ caa mɓershi tu tǝ ca tǝ laɓm mǝn durghǝ yo tu tǝ tǝ ngaɓii a vii wos .