6

¹ Пиналъёс, кылзӥське анай-атайёстылэсь, озьы Кузё-Инмарлы кулэ, уго озьы шонер.

² "Гажалэ асьтэлэсь анай-атайёстэс" - та кылсётэмлэн нырысетӥез заповедь:

³ "тыныд ӟеч мед луоз, но тон кема мед улод дунне вылын".

⁴ Тӥ но атайёс, эн сюлэмшугъяськытэ асьтэлэсь пиналъёстэс, нош будэтэ соосты писаниелэн но Кузё-Инмарлэн дышетэмезъя.

⁵ Рабъёс, кышканэн но куалекъяса кылзӥське асьтэлэсь дуннеысь кузёоостэс, кызьы тӥ лякыт сюлэмын Христослэсь кылзӥськиськоды,

⁶ возьматыны понна гинэ эн тырше, калык мед вералоз шуыса кыӵеесь пе тӥ ӟечесь, нош Христослэн рабъёсыз кадь тырше, Инмарлэсь куронзэ рос-прос быдэстӥсьёс кадь,

⁷ калыкъёслы кадь эн лэсьтэ, нош сюлмысьтыды тырше, Кузё-Инмарлы ярамон кадь,

⁸ тодыса, котькуд адями, раб яке свободной, лэсьтӥз ке маеке ӟечсэ, Кузё-Инмар кузьмалоз сое солэн ӟеч лэсьтэмез мында ик.

⁹ Тӥ но кузёоос, соосын озьы ик лякытэн кивалтэ, дугдэ кышкатэмысь, тодыса, тӥляд но, соослэн но инмын одӥг Кузё-Инмарды, Кудӥз тонъя-монъя нокинэ но уг быръйы.

¹⁰ Берпумаз, мынам братъёсы, юнмалэ Кузё-Инмарен но Солэн кынарызлэн кужыменыз.

¹¹ Инмарлэсь вань ожмаськон тӥрлыксэ дӥсялэ, дьяволлэн кескич ужъёсызлы пумитъяськон понна,

¹² уго асьмелэн ожмаськонмы ӧвӧл вирлы но мугорлы пумит, нош та даурлэн пеймытэзлэн кивалтӥсьёсызлы но властьёсызлы но ин улысь кырсь духъёслы пумит.

¹³ Со понна басьтэ Инмарлэсь ваньзэ ожмаськон тӥрлыксэ, лек нуналэ тӥ мед быгатоды пумитъяськын но, ваньзэ ортчыса, чиданы.

¹⁴ Озьыен, султэ, макесъёстэс зэмлыкен керттылыса но шонерлыклэсь бронязэ дӥсяса,

¹⁵ тупаса улонэз ивортонлы дась луыны, пыд кутчеттэс кутчалэ.

¹⁶ Нош уката но осконлэсь щитсэ басьтэ, кудӥныз быгатоды сатаналэсь ӝуась стрелаоссэ кысыны,

¹⁷ но басьтэ утиськонлэсь шлемзэ, но Духлэсь мечсэ, кудӥз луэ Инмарлэн Кылыз.

¹⁸ Котькыӵе вӧсяськонэн но куронэн Духен вӧсяське котькыӵе дырын, соин ик котьку дась луэ дугдылытэк вӧсяськыны вань святойёс понна

¹⁹ мон понна но, мыным кыл сётэмын мед луоз шуыса, Ӟеч Иворлэсь лушкемзэ усьтыса но кышкатэк ивортыны,

²⁰ кудзэ мон пытсэн улын но ивортӥсько, вӧсяське мон мед быгато шуыса кышкатэк прповедовать карыны.

²¹ Мон сярысь но мынам ужъёсы сярысь, ваньзэ тӥледлы вералоз Тихик, яратоно братэ но Кузё-Инмарлэн осконо тыршисез,

²² кудзэ мон келяй тӥ доры, тӥ мед тододы ми сярысь но со тӥлесьтыд мед буйгатоз сюлэмъёстэс шуыса.

²³ Братъёс Иисус Христос Кузёлэсь но Инмар Атайлэсь мир но осконэн яратон.

²⁴ Благодать ваньмызлы, кинъёс дугдылытэк ярато асьмелэсь Иисус Христос Кузёмес. Аминь.