4

¹ Озьыен, котькудыз валаны кулэ милемды, Христослэсь служителъёссэ но Инмарлэсь лушкем тодӥсьяськисьёссэ кадь.

² Тодӥсьяскисьёслэсь кулэ, котькудыз мед кылёз шуыса оскымон.

³ Мон уг кышкаськы, мар тӥ малпаськоды мон сярысь, яке мар малпало мукет адямиос. Мон ачим но уг малпаськиськы ачим сярысь.

⁴ Мон ӧй но ке лэсьтылы урод ужъёс, озьы ке но соин асме шонере поттыны уг выриськы; Кузё Инмар мыным судья.

⁵ Соин ик дырызлэсь вазь нокызьы но судить эн каре, Кузё Инмар лыктытчёзь, Кудыз пеймытысь ватэмзэ югдытоз, но сюлэмлэсь малпанъёссэ шарае поттоз, нош соку котькудызэ ушъялоз Инмар.

⁶ Вынъёсы, тае мон уже кутӥ аслым но Аполлослы тӥ понна, тӥ мед дышоды шуыса гожтэмлэсь мултэссэ ватсатэк, но ог-огды азьын вылӥе астэсты пуктытэк.

⁷ Кин тонэ вылие пуктӥз? Маид тынад вань, кудзэ тыныд ӧз сётэ? Нош сётэмын ке тыныд, малы вераськод, сётымтэ кадь на?

⁸ Тӥляд кӧтты тыр ини, тӥ узырмиды ни, тӥ митэк царьёс луиды ни. Э, тӥ зэмзэ но царствовать карсалды ке, милем но тӥленыд царствовать карон вылысь!

⁹ Кызьы мон малпасько, милемлы, берпуметӥ Апостолъёслы, виыны приговорить карем адямиос кадь луыны косӥз Инмар, малыке шуоно, быдэс дуннелы но ангелъёслы но калыкъёслы но ми луим серемес.

¹⁰ Ми визьтэмесь Христос понна, нош тӥ визьнодоесь Христос пушкын; ми лябесь, нош тӥ золэсь; тӥ данын, нош ми возьытэ уськытэмын.

¹¹ Али но сиеммы но юэммы потыса улӥськом, дӥськутлы кулэяськиськом, жугоннъёс чиданы луиськом, улонни инты утчаса ветлӥськом,

¹² асьмелэн киосынымы ужаськом. Ми сярысь урод кылъёс верало - ми соосты благославить кариськом, улляло милемды - ми чидаськом,

¹³ милемыз ултӥяло - ми вӧсяськиськом. Ми дуннелы жаг кадь, дэри кадь, кудзэ али но ваньмыз лёгало.

¹⁴ Тӥледыз возьытэ вуттон понна уг гожтӥськы, нош дышетыса верасько, мынам яратоно нылпиосылы кадь.

¹⁵ Тӥляд сюрсэн Христос пушкын дышетӥсьёсты ке но, нош тросс ӧвӧл атайёсты. Мон вордскытӥ тӥледыз Иисус Христос пушкын благовествовать карыкум.

¹⁶ Соин ик сюлварыса курисько: адӟем каре мынысьтым, кызьы мон Христослэсь.

¹⁷ Соин ик мон келяй тӥ доры Тимофеез, мынысьтым яратоно но оскымон Кузё Инмар пушкысь пиме, кудыз тодады вайытоз мынам Инмар пушкысь сюресъёсме, кызьы мон дышетӥсько котькуд черкъёсын.

¹⁸ Куд огез вылтӥяськыны кутскизы, мон дорады ветлымтэ муген.

¹⁹ Инмар мылкыд кариз ке мон ӝоген лыкто дорады, но вылтӥяськисьёслэсь кылзэс уг эскеры, нош кужымзэс эскеро,

²⁰ малыке шуоно Инмарлэн Царствоез кылын ӧвӧл нош кужымын.

²¹ Тӥледлы ӟечгес луоз, тӥ доры сюлоен лыктыны яке яратонэн но зибыт духен?