¹ ۱۔ لیکن تُو اوہ گالہیں بیان کر جو صحیح تعلیم دے مناسب ہِن۔ ² ۲۔ یعنی ایہہ کہ بُڈھے مَرد پرہیزگار سنجیدہ تے مُتقی ہوون تے اُنہاں دا ایمان تے محبت تے صبر صحیح ہووے۔ ³ ۳۔ ایویں ای بُڈھی عورتاں دی وی وضع پاک لوگاں دی کار ہووے۔ تُہمت لاون آلی تے زیادہ مَے پیون وِچ مبتلا نہ ہوون بلکہ چنگیاں گالہیں سکھاون آلی ہوون۔ ⁴ ۴۔ تاکہ جوان عورتاں کوُ سکھاون کہ اپنے پئے کوُ پیار کرن۔ بالاں کوُ پیار کرن۔ ⁵ ۵۔ اَتے مُتقی تے پاک دامن تے گھر دا کاروبار کرن آلی تے مہربان ہوون تے اپنے اپنے پئے دیاں تابعدار ہوون تاکہ خدا دا کلام بدنام نہ تھیوے۔ ⁶ ۶۔ جوان بندیاں کوُ وی ایویں ای نصیحت کر کہ مُتقی بنن۔ ⁷ ۷۔ ساریاں گالہیں وِچ اپنے آپ کوُ نیک کماں دا نمونہ بنا۔ تیڈی تعلیم اِچ صفائی تے سنجیدگی ہووے۔ ⁸ ۸۔ اَتے ایہو جئی صحت کلامی پائی ونجے جو ملامت دے لائق نہ ہووے تاں جو مخالف ساڈے تے عیب لاون دی کوُئی وجہ نہ پا کے شرمندہ نہ تھی ونجے۔ ⁹ ۹۔ نوکراں کوُ نصیحت کر کے اپنے مالکاں دے تابع راہون اَتے ساریاں گالہیں وِچ اُنہاں کوُ خوش رکھن اَتے اُنہاں دے حکم توں کجھ انکار نہ کرن۔ ¹⁰ ۱۰۔ چوری چالاکی نہ کرن بلکہ ہر طرح دی دیانتداری چنگی طرح ظاہر کریں تاں جو اُنہاں نال ہر گالہہ ساڈے مُنجی خدا دے تعلیم دی رونق ہووے۔ ¹¹ ۱۱۔ کیونکہ خدا دا اوہ فضل ظاہر تھیا ہِے جو سارے بندیاں دی نجات دا باعث ہِے۔ ¹² ۱۲۔ اَتے ساکوُ تربیت ڈیندا ہِے تاکہ بےدینی تے دُنیاوی خواہشاں دا انکار کر کے اِیں موجودہ جہان وِچ پرہیزگاری تے راستبازی تے دینداری دے نال زندگی گزارن۔ ¹³ ۱۳۔ اَتے اوُں مُبارک اُمید یعنی اپنے بزرگ خدا تے مُنجی یسوع مسیح دے جلال دے ظاہر تھیون دے منتظر راہون۔ ¹⁴ ۱۴۔ جئیں نے اپنے آپ کوُ ساڈے واسطے ڈے ڈِتے تاکہ فدیہ تھی کے ساکوُ ہر طرح دی بےدینی توں چھُڑا گھِنے تے پاک کر کے اپنی خاص ملکیت کیتے ہک ایہو جئی اُمّت بنائے جو نیک کماں وِچ سرگرم ہوئے۔ ¹⁵ ۱۵۔ اِیہہ گالہیں پورے اختیار نال آکھ اَتے نصیحت ڈے تے ملامت کر۔ کوُئی وی تیڈی جوانی دی حقارت نہ کرن پاوے۔