1
۱۔اوُں نے اُنہاں باراں کوُں کٹھے سَڈ کے ساریاں بدروحاں تے بیماراں تھوں چنگا کرن دی طاقت تے اختیار بخشیا۔
2
۲۔اوُں نے اُنہاں کوُں خدا دی باشاہی دی مُنادی کرن اَتے بیماراں کوُں چنگا کرن کیتے گھلیا۔
3
۳۔اوُں نے اُنہاں کوُں آکھیا۔"اپنی راہ کیتے کجھ نہ گھِننا نہ سوٹی نہ بٹوا نہ ٹُکر نہ پیسہ اَتے نہ چولا۔
4
۴۔تُساں جیہڑے گھر اِچ داخل تھیسو اُتھایئں روکائے جڈاں تایئں اُتھوں ٹُر نہ پووو۔
5
۵۔اَتے جیہڑے شاہر دے لوگ تہاکوُ قبول نہ کرن اوُں شاہر تھوں نکلدے ویلے اپنے پیراں دی مٹی اُتھایئں جھاڑ ڈیواے تاں جو اُنہاں دے خلاف گواہی تھیوے۔
6
۶۔وَل اوہ اُتھوں ٹُر کے بئے شاہراں اِچ خوشخبری دی مُنادی کریندے گئے اَتے ہر جاہ بیماراں کوُ چنگیاں کریندے گئے۔
7
۷۔اَتے چوتھائی ملک دا حاکم ہیرودیس اے سارا کجھ سُن کے پریشان تھی گیا کیوں جو کجھ لوگ آدھے ہَن کہ یوحنا بپتسمہ ڈیون آلا زندہ تھی گیا ہے۔
8
۸۔اَتے کجھ آدھے ہَن کہ ایلیاہ ظاہر تھی گئے اَتے کجھ ایہہ کہ پہلے نبیاں وِچوں کوئی زندہ تھی گیا ہے۔
9
۹۔ہیرودیس نے آکھیا کہ "میں یوحنا دا سَر کٹ ڈِتا ہا پَر ایہہ کون ہے؟ جیندے بارے اِچ ایہوجئی گالہیں سُندا ہاں؟ہیرودیس نے یسوع کوُ مِلن دے کوشش کیتی۔
10
۱۰۔وَل رسولاں نے جو کجھ کیتا ہا واپس آ کے اوُں کوُ ڈسایا اَتے یسوع اُنہاں کوُ اپنے نال گھِن کے بیت صیدا ناں دے ہِک شاہر کوُ لگا گیا۔
11
۱۱۔پَر وڈے ہجوم نے ایہہ سُنا تاں اوندے پیچھوں ٹُر پیا ۔اَتے اوُں نے اُنہاں کوُ خوش آمدید آکھیا اَتے اُنہاں کوُ خدا دی بادشاہی دے بارے وِچ ڈسایا اَتے جنہاں کوُ چنگا کرن دی ضرورت ہا اُنہاں کوُ چنگا کیتا۔
12
۱۲۔ڈیں ختم تھون کوُ ہا آیا تاں اوہ باراں اوُندے کول آئے اَتے آکھن لگے کہ "اِیں ساری بھیڑ کوُ واپس بھیج چھوڑ تاں جو اوہ آس پاس دے پنڈاں اِچ وَنج کے ٹُکر تے راہون دی جاہ دا بندوبست کرن کیونکہ اَساں ویران جاہ تے پیئں۔
13
۱۳۔ پَر اوُں نے اُنہاں کوُ آکھیا"تُساں ای انہاں کوُ کھاون کوُ کجھ ڈیوو۔"اُنہاں نے آکھیا "ساڈے کول پنج روٹیاں تے ڈُو مچھیاں کولوں زیادہ کیئے نیئں، پَر ہاں اساں اُنہاں کیتے ٹُکر مُل گھِن کے آسگدے ہاں۔
14
۱۴۔اُتھاں تقریباََ پنج ہزار بندے ہَن اَتے اوُں نے اپنے شاگرداں کوُ آکھیا کہ "انہاں کوُ پنجھا پنجھا دے ٹولے اِچ بلہاو"۔
15
۱۵۔پَس اُنہاں نے اوُں ویں کیتا اَتے سارے لوگ بہیہ گئے۔
16
۱۶۔اوُں نے پنج روٹیاں تے ڈو مچھیاں گھِن کے آسمان دی طرف ڈیدھے ہویاں اُنہاں کیتے برکت دی دُعا منگی روٹیاں توڑ کے شاگرداں کوُ ڈیتاں تاں جو بھیڑ اِچ ونڈ چھوڑن۔
17
۱۷۔اُنہاں ساریاں نے کھادا تے رَج گئے،جڈاں ٹُکر کھاون دے بعد بچے ہوئے ٹکڑے چُنے گئے تاں اُنہاں نال بارہ ٹوکرے بھریج گئے۔
18
۱۸۔جڈاں یسوع کلیاں اپنے شاگرداں دے نال دُعا کریندا پیا ہا تاں اوُں نے اُنہاں کولوں پچھیا جو بھیڑ میڈے بارے اِچ کیا آدھی ہے کہ میں کون ہاں؟۔
19
۱۹۔اُنہاں نے جواب اِچ آکھیا کہ"یوحنا بپتسمہ ڈیون آلا ،کجھ ایہ کہ توُں ایلیاہ ہیئں اَتے کجھ آدھے ہَن کہ توُں پُرانے نبیاں وِچوں ہک ہیں جیہڑا دوبارہ زندہ تھی گئے۔
20
۲۰۔ اوُں نے اُنہاں کوُ آکھیا کہ"تُساں میکوُ کیا آدھے ہو۔"کہ میں کون ہاں ؟پطرس نے آکھیا کہ توُں خدا دا گھلیا ہویا مسیح ہیئں۔
21
۲۱۔پَر یسوع اُنہاں کوُں نصیحت کریندے ہویاں ہدایت کیتی کہ اوہ کیئں کوُ نہ ڈساون ۔
22
۲۲۔کیوں جو ایہ ضروری ہے کہ ابن آدم بہوں ڈکھ چاوے اَتے بزرگاں تے سردار کاہناں تے صدوقیاں دی طرفوں رَد کیتا ونجے اَتے مارا ونجے اَتے تریجھے ڈیں وَل زندہ تھی ونجے۔
23
۲۳۔وَل اوُں نے اُنہاں ساریاں کوُ آکھیا کہ اگر کوُئی میڈے پیچھے آونا چاہوے تاں اپنے آپ دا انکار کرے اَتے ہر روز اپنی صلیب چا کے میڈے پیچھے تھی ونجے۔
24
۲۴۔جو کوُئی اپنی جان کوُ بچاسی اوہ اوُں کوُ گواسی پَر جیہڑا کوُئی اینکوُ میڈی خاطرگواسی اوہ اوُں کوُ بچا گھِنسی۔
25
۲۵۔بندے کوُ ایندا کیا فائدہ تھیسی کہ اگر اوہ سارا جہان حاصل کر گھِنے پَر اپنی جان گنوا چھوڑے۔
26
۲۶۔جیہڑا کوُئی میڈے کولوں تے میڈے کلام تھوں شرماندا ہے،ابنِ آدم وی جڈاں اپنے باپ دے جلال وِچ پاک فرشتیاں دے نال آسی تاں اوہ وی اُنہاں کولوں شرماسی۔
27
۲۷۔پر میں تہاکوُ سچ آدھا ہاں کہ تہاڈے وِچوں کجھ لوگ جیہڑے اِتھاں کھڑے ہَن موت دا مزہ نہ چکھسن جڈاں تایئں اوہ خدا دی بادشاہی ڈیکھ نہ گھِنن۔
28
۲۸۔ایہہ آکھن دے تقریباََ اَٹھ ڈیہاں دے بعد یسوع پطرس ،یوحنا تے یعقوب دے نال پہاڑی تے دُعا کرن کیتے گیا۔
29
۲۹۔جیہڑے ویلے اوہ دُعا کریندا پیا ہاں تاں اوندے چہرے دے رنگ بدل گیا اَتے اوندے کپڑے چٹے تے چمکدار تھی گئے۔
30
۳۰۔ڈیکھو اُتھاں ڈو بندے یسوع نال گالہیں کریندے پئے ہَن اوہ موسیٰ تے ایلیاہ ہَن ۔
31
۳۱۔اوہ جلال اِچ ڈِکھائی ڈِتے اُنہاں نے اوندے مرن دے بارے گالھ کیتی جیہڑی یروشلیم اِچ تھیون آلی ہا۔
32
۳۲۔پطرس تے باقی جو اوُندے نال ہَن اُنہاں تے نیند دا بہوں اثر ہا۔پَر جیہڑے ویلے اوہ پوری طرح جاگ گئے تاں اُنہاں نے اوُندے جلال اَتے اوُندے نال دُو بندیاں کوُ ڈٹھا۔
33
۳۳۔اَتے جڈاں اوہ یسوع کولوں دُور تھیندے پئے ہَن پطرس نے اوُں کوُ آکھیا"مالک اِتھاں ہوونا ساڈے کیتے چنگا ہے ساکوُ تر یئے پناہ گاہ بناون ڈے ،ہک تیڈے کیتے،ہک موسیٰ کیتے تے ہک ایلیاہ کیتے۔اوُں کوُ سمجھ نہ آئی کہ اوہ کیندے بارے اِچ گالھ کریندے پئے۔
34
۳۴۔جڈاں اوہ اُنہاں نال ایہہ گالہیں کریندا پیا ہا،ہک بدل نے اُنہاں کوُ لُکا گِدے اَتے اوہ ڈر گئے تے بدل نے اُنہاں کوُ لپیٹ گِدے۔
35
۳۵۔آسمان تھوں آواز آئی کہ "ایہہ میڈا چُنیا ہویا پُتر ہے ایندی سنو"۔
36
۳۶۔جڈاں آواز آونا بند تھی گئی تاں یسوع کلہا ہا، اوہ چُپ رِہ گئے اَتے اُنہاں نے جو کجھ ڈیکھیا ہا اوندے بارے وِچ کیئں کوُ کجھ نہ ڈسایا۔
37
۳۷۔ڈوجھے ڈیں جڈاں اوہ پہاڑ تھوں تھلے لاہندے پئے ہَن تاں ایویں تھیا کہ ہک وڈی بندیاں دی بھیڑ اوُں کوُ مِلی۔
38
۳۸۔اَتے ڈیکھو بھیڑ وِچوں ہک بندے نے آوُں کوُ آواز ڈِتی استاد میں تیڈے اَگے منت کریندا ہاں کہ میڈے پُتر تے نظر کر کیوں جو اوہ میڈا پلیٹھی دا پُتر ہے۔
39
۳۹۔اَتے ڈیکھ ہک رُوح اوُں کوُ قابو کر گھِندی ہے۔اَتے اوہ اَبڑ گَت روندا پٹیندا ہے جیندی وجہ تھوں اوندے منہ وِچوں جھگ نکلدی ہے اَتے اوہ اوُں کوُ بہوں تکلیف ڈیندے ہویاں نچوڑ کے چھوڑ ڈیندی ہے۔
40
۴۰۔میں شاگرداں دی مِنت کیتی ہا کہ اوہ اِینکوُ کڈھن پَر اُنہاں کولوں نیئں تھیا ۔
41
۴۱۔یسوع نے جواب اِچ اُنہاں کوُ آکھیا کہ"اے بے اعتقاد اَتے وگڑی ہوئی نسل میکوں کیہ تک تہاڈے نال رِہ کے برداشت کرنا ہوسی۔اپنے پُتر کوُ اِڈے گھِن آو۔
42
۴۲۔جیہڑے ویلے اوہ جوان آندا پیا ہا تاں بدرُوح نے اوُں کوُ تھلے سَٹ ڈِتا اَتے زور نال جھٹکا ڈِتا۔پَر یسوع نے بد رُوح کوُ جھڑکیا تے جوان کو چنگا کر کے اوندے پیئو دے حوالے کر ڈِتا۔
43
۴۳۔اوہ سارے خدا دی عظمت کوُ ڈیکھ کے حیران تھی گئے۔پَر جڈاں اوہ اِیں عجیب کماں تے جیہڑے اوُں نے کیتے ہَن تعجب کریندے پئے ہَن تاں یسوع نے اپنے شاگرداں کوُ آکھیا کہ"۔
44
۴۴۔ تُساں ایہہ گالھ کن کھول کے سُن گھِنو کہ ابنِ آدم بندیاں دے حوالے کیتا ویندا ہے۔
45
۴۵۔پر اوہ ایں گالھ دا مطلب نہ سمجھ سگے کیونکہ ایہہ اُنہاں کولوں لُکائی گئی ہا اِیں کیتے اوہ ایندا مطلب نہ سمجھ سکے اَتے یسوع کولوں ایندے بارے پوچھن تھوں ڈردے ہَن۔
46
۴۶۔وَل اُنہاں دے وِچ جھگڑا شروع تھی گیا کہ اُنہاں وِچوں وڈا کون ہوسی ؟۔
47
۴۷۔پَر جیہڑے ویلے یسوع کوُ پتا لگے کہ اوہ کیندے بارے وِچ بحث کریندے ہَن تاں اوُں نے ہک چھوٹے بال کوُ اپنے نال بٹھایا۔
48
۴۸۔اَتے اُنہاں کوُ آکھیا کہ"اگر کوُئی ایں چھوٹے بال کوُ میڈے ناں تھوں قبول کریندا ہے تاں اوہ میکوُ قبول کریندا ہا۔اَتے جیہڑا میکو قبول کریندا ہے اوہ اوُں کوُ وی قبول کریندا ہے جیئں میکو گھلے جیہڑا تہاڈے وِچوں سب تھوں گھٹیا ہے اوُہو ساریاں تھوں وڈا ہے۔
49
۴۹۔یوحنا نے جواب اِچ اوُں کوُ آکھیا"مالک اساں کیئں بندے کوُ تیڈے ناں تھوں بدروحاں کڈھیندے ہوئے ڈٹھا اَتے اساں اوُں کوُ روکے۔کیونکہ اوہ ساڈی پیروی نیئں کریندا۔
50
۵۰۔پَر یسوع نے اوُں کوُ آکھیا کہ "تُساں اوُں کوُ نہ روکو کیونکہ اوہ جو تہاڈے خلاف نیئں اوہ تہاڈے نال ہے۔
51
۵۱۔اَتے جیویں ای اوُندے آسمان دے ونجن دے ڈِیں نیڑے آئے اوُں نے یروشلیم ونجن دا پکا ارادہ کر گِدا۔
52
۵۲۔اوُں نے پیا مبراں کوُ اپنے تھوں پہلے گھلیا اِتے اُنہاں نے سامریاں دے پِنڈ اِچ داخل تھی کے اوُں کیتے تیاری کیتی۔
53
۵۳۔پَر اُتھاں دے لوگاں نے اوُں کوُ قبول نہ کیتا کیوں جو اوہ یروشلیم ویندا پیا ہا۔
54
۵۴۔جڈاں اوُندے شاگرداں یعقوب تے یوحنا نے ڈیکھیا تاں اُنہاں نے آکھیا کہ اے خداوند تُوں چاہندا ہیئں کہ اساں حکم کروں اَتے آسمان تھوں اَگ نازل تھیوے تے انہاں کوُ ہلاک کر ڈیوے۔
55
۵۵۔پر اوُں نے مُڑ کے اُنہاں کوُ جھڑکیا۔
56
۵۶۔وَل اوہ کیئں ڈوجھے پِنڈ اِچ گئے۔
57
۵۷۔جڈاں اوہ رستے وِچ ہا تاں کیئں نے اوُں کوُ آکھیا کہ توں جِتھاں کِتھاں وی ونجیں میں تیڈے نال ویساں۔
58
۵۸۔یسوع نے اوُں کوُ اکھیا۔کہ لومڑیاں دے راہون کیتے غار ہوندن اَتے ہوا دے پنکھیاں دے گھونسلے پر ابن آدم دے کول سَر لُکاون دے وی جاہ کیئے نیئں۔
59
۵۹۔وَل اوُں نے کیئں ڈوجھے بندے کوُ آکھیا کہ"میڈے پیچھوں آ" پر اوُں نے آکھیا کہ "خداوند پہلے میکوُ اپنے پیئو کوُ دفن کرن دی اجازت ڈے۔
60
۶۰۔پَر یسوع نے اوُں کوُ آکھیا کہ"مُردیاں کوُ اپنے مُردے دفن کرن ڈے پَر توُں ہر جاہ ونج کے خداوند دی بادشاہی دا علان کر۔
61
۶۱۔ہک بئے بندے نے اوُں کوُ آکھیا کہ"اے خداوند میں تیڈے پیچھے چلساں پر پہلے میکوُ اپنے گھر آلیاں کوُ الوداع آکھن ڈے۔
62
۶۲۔پَر یسوع نے اوُں کوُ آکھیا کہ"جیہڑا کوُئی ہل تے ہتھ رکھ کے پیچھے ڈیدھا ہے اوہ خدا دی بادشاہی دے لائق نیئں۔