1
۱۔ اَتے ایندے بعد جلدی ہی یسوع اپنے شاگرداں دے نال ڈوجھے شاہراں تے وستیاں وِچ ونج کے خدا دی بادشاہی دی مُنادی کرنی شروع کیتی۔
2
۲۔ اوُندے نال اوہ زنانیاںوی ہَن جیہڑیاں بُری روحاں تے روگاں کنے چنگیاں تھئی گیاں ہَن۔ اُنہاں وچوں ہِک مریم مگدلینی ہائی جیندے وچوں سَت بُری روحاں کڈھیاں ہَن۔
3
۳۔ اَتے یوآنہ ہیرودیس دے مُنشی خوزہ دی ذال اَتے سوسناہ اَتے بہوں ساریاں زنانیاں وی ہَن جیہڑیاں اپنی دولت دے نال اُنہاں دی خدمت کریندیاں ہَن۔
4
۴۔ اوُں ویلے جڈاں ہَک اکٹھ کٹھا تھیندا پیا ہا اَتے لوگ اوُندے کول بہوں سارے شاہراں کنے کٹھے تھیندے پئے ہَن تاں اوُں نے اُنہاں کوُ ہِک مثال سنائی۔
5
۵۔ ہِک بیج بوؤن آلا بیج بوؤن کوُ باہر گیا، اَتے جیویں ہی اوُں نے بیج زمین اِچ سٹیا تاں اُنہاں وچوں سڑک دی کنی تے ڈھے پیا تے پیراں تھلے لتڑیج گیا تے پکھیاں نے اوُں کوُ چُگ گِدا۔
6
۶۔ کجھ دانے پتھراں آلی زمین اِچ ڈَٹھے تے اُگدیاں سار ہی سُک گئے کیوں جو اُنہاں کوُ پانی نہ ملیا۔
7
۷۔ پر کجھ دانے کنڈیاں آلے جھاڑ اِچ ڈَٹھے تے اوہ ودھن لگے پر جھاڑ اُنہاں کوُ ودھن نہ ڈِتا۔
8
۸۔ وَل وی کجھ دانے چنگی زمین اِچ ڈَٹھے تے سو گُنا پھل گھن آئے۔ جئیں ویلے یسوع ایہ گالہیں کیتیاں تاں اُچی اَلا کے اُنہاں کوُ آکھیا کہ جیندے کن ہوؤن اوہ سُن گھینے۔
9
۹۔ وَلا اوُندے شاگرداں اوُں کنے پُچھیا جو ایں مثال دا کیا مطلب ہِے؟۔
10
۱۰۔ یسوع اُنہاں کوُ آکھیا کہ تُہاکوں خدا دی بادشاہی دیاں رازاں دی سمجھ ڈِتی گئی ہِے، پر باقی لوگاں کوُ صرف مثالاں دے نال سکھایا ویسی۔ تاں جو اوہ ڈیدھیاں ہویاں نہ ڈیکھن تے سُندے ہویاں نہ سم جھن۔
11
۱۱۔ اِیں تمثیل دا مطلب ایہ ہِے: بیج تھوں مُراد خدا دا کلام ہِے۔
12
۱۲۔ اوہ بیج جیہڑا سڑک دے کنے ڈَٹھے اوُں تھوُں مُراد اوہ لوگ ہِن جینہاں نے کلام کوُ سُنیا پر شیطان آ کے اُنہاں دے دِلاں وچوں کڈھ کے گھن گیا تاں جو اوہ اوُں دے تے ایمان گھن کے بچ نہ پوؤن۔
13
۱۳۔ وَل کجھ دانے پتھراں آلی زمین تے ڈَٹھے، ایہ لوگ ہِن جنہاں کلام کوُ سُنیا تاں اوُں کوُ خوشی نال قبول وی کیتا، پر اوہ کلام اُنہاں وچ جڑ نہ پکڑ سگیا صرف کجھ دیر کیتے ایمان تاں گھن آندِن پر اوکھے ویلے مُکر ویندِن ۔
14
۱۴۔ اوہ دانے جیہڑے کنڈیاں آلی جھاڑ اِچ ڈَٹھے، اوہ لوگ ہِن جِنہاں نے کلام کوُ سُنیا تے ہولے ہولے زندگی دی پریشانیاں، دولت دا لالچ تے اپنی عیش و آرام اِچ پہ ویندِن تے پھل نئیں گھن آندِے۔
15
۱۵۔ پر اوہ دانے جیہڑی چنگی زمین تے ڈَٹھے ہَن، اوہ لوگ ہِن جیہڑے ایماندار تے نیک دِل ہِن، تے اوہ کلام سنن تھوں بعد اوُندے تے مظبوطی نال قائم راندھن تے ثابت قدمی نال پھل گھن آندِن۔
16
۱۶۔ کوُئی ڈیوا بال کے اوُں کوُں ڈیوے دان دے تھلے نئیں رکھیندا بلکہ ڈیوے دان دے اُتے رکھیندِن تاں جو جیہڑا کوُئی اندروں آوے اوُں کوُ سوجھلا ہوؤے۔
17
۱۷۔ اِیں کیتے کوُئی شئے لُکی ہوئی نئیں جیہڑی ظاہر نہ کیتی ویسی نہ کوُئی راز جیندا پتا نہ لگسی۔
18
۱۸۔ پس خیال کرائے کہ تُساں کیا سُندے ہیوے، کیوں جو جیندے کول ہِے اوُں کوُ بیا وی ڈِتا ویسی، تے جیندے کول نئیں اوُں کنے اوہ وی گھن گِدا ویسی جیہڑا اوہ سوچیندے کہ میڈے کول ہے۔
19
۱۹۔ وَل یسوع دی ماں تے اوُندے بھرا اوُندے کول آئے پر وڈی بھیڑ دے سببوں اوُندے کول نہ آ سگے۔
20
۲۰۔ تے اوُں کوُ ڈسایا گیا کہ، " تیڈی ماں تے تیڈے بھرا تیکوُ ملنا چاہندے ہِن"۔
21
۲۱۔ پر یسوع اُنہاں کوُ آکھیا جو، "میڈی ماں تے میڈے بھرا اوہ ہن جیہڑے خدا دا کلام سُندے ہِن۔
22
۲۲۔ہِک ڈِینہ یسوع تے اوُندے شاگرد ہِک بیڑی اِچ سوار تھئے تے اوُں اُنہاں کوُ آکھیا جو، "اساں جھیل دے پرلے پاسے جُلوں۔" اُنہاں اپنا سفر شروع کیتا۔
23
۲۳۔ پر جیویں ہی اوہ جھیل اِچ گئے یسوع سُم تھیا۔ بہوں تیز اندھاری گھُلیتے جھیل اِچ طوفان آگیا تے بیڑی پانی نال بھریجن پئے گئی تے اُنہاں کوُ زندگی دا خطرہ پئے گیا۔
24
۲۴۔ وَل یسوع دے شاگرد اوُندے کول آئے تے اوُں کوُ ایہ آکھ کے جگایا، "مالک اساں مردے پیوں۔" اوہ اُٹھیا، تے اپنا ہتھ ودھا کے ہوا تے پانی کوُ جھڑکیا تے اُتھاں وڈا امن تھی گیا۔
25
۲۵۔ وَل اوُں نے اُنہاں کوُ آکھیا، "تُہاڈا ایمان کِتھا ہِے؟" اوہ ڈر گئے تے حیران تھی کے ہِک ڈوجھے کوُ آکھن لگے کہ ایہہ کون ہِے جیہڑا ہوا تے پانی کوُ حکم ڈیندا ہِے تے اوہ ایندا حکم منیندِن۔
26
۲۶۔ وَل اوہ گراسینیاں دے علاقے وِچ آئے جیہڑا گلیل دے ڈوجھے پاسے ہا۔
27
۲۷۔ جڈاں یسوع اوُں شاہر اِچ وڑیا تے اوُں کوُ ہِک بندہ ملیا جیندے وِچ بُریاں روحاں ہَن۔ وڈے عرصے تھوں اوُں کپڑے نہ پاتے ہَن۔ تے اوہ گھر اِچ نئیں بلکہ قبراں اِچ راہندا ہا۔
28
۲۸۔ جئیں ویلے اوُں یسوع کوُ ڈِٹھا تے اُچی آواز نال آکھن لگا۔" اے یسوع خدا تعالیٰ دے پُتر تُوں مئیں کنے کیا چاہندا ہَیں؟ میکو عذاب اِچ نہ سَٹ۔
29
۲۹۔ یسوع بُری روح کوُں اوُں بندے وچوں نکلن دا حکم ڈِتا کیوں جو اوہ وڈی مُدت تھوں اوُں دے قبضے وچ ہا۔ بہوں دفعہ لوگاں اوُں کوُ سَنگل نال بدھا پر اوہ اوُں کوُ وی تروڑ سٹیندا ہا۔ تے بُری روُح اوُں کوُ جنگلاں وچ گھن ویندی ہائی۔
30
۳۰۔ وَل یسوع اوُں کنے پُچھیا۔" تیڈا ناں کیا ہِے؟ تاں اوُں نے آکھیا "لشکر"کیوں جو اوُندے وچ ڈھیر ساریاں بُریاں روحاں ہَن۔
31
۳۱۔ تے اوہ اوُندی منت کر کے آکھن لگے کہ ساکوں سزا آلے کھڈے وِچ ونجن دا حکم نہ ڈے۔
32
۳۲۔ اوُں دے نیڑے ای پہاڑ تے سئوراں دا اجڑ چردا پیا ہا۔ تے بُری روحاں نے اوُندی منت کیتی جو ساکوں اجازت ڈے جو سئوراں وِچ وڑ ونجوں تے اوُں نے اُنہاں کوُں اجازت ڈے ڈِتی۔
33
۳۳۔ تے بُری روحاں اوُں بندے وِچوں نکل کے اُنہاں سئوراں وِچ وڑ گیئیاں تے اوہ اجڑ پہاڑی تھوں ریڑھ کے جھیل اِچ بُڈھ گیا۔
34
۳۴۔ جئیں ویلے اوُں بندیاں ایہہ ڈِٹھا تے اوہ بھجدے ہوئے آئے تے شاہر اِچ ونج کے لوگاں کوُ ایہہ واقعہ ڈسایا۔
35
۳۵۔ جئیں ویلے لوگاں ایہہ گالھ سُنی تاں اوہ ایہہ ڈیکھن کیتے شاہروں باہر یسوع کول آئے تے اوہ بندے کوُں جیندے وچوں بُری روحاں نکل گئیاں ہَن، ڈِٹھا تے اوہ بندہ اپنی صحیح حالت اِچ تے کپڑے پاتے ہویاں یسوع دے قدماں اِچ بیٹھا ہا، اَتے اوہ بہوں ڈر گئے۔
36
۳۶۔ وَل جِنہاں ایہ ڈِٹھا ہا جو کیا تھیا ہِے، بِناں کوُ ڈسایا کہ اوہ بندہ جیندے وچ بُری روحاں ہَن، ٹھیک تھی گیا ہِے۔
37
۳۷۔گراسینیاں تے آسے پاسے دے علاقے دے لوگاں یسوع کوُں آکھیا جو ایں جاہ تھوں لگا ونج کیوں جو اوہ بہوں ڈر گئے ہَن۔ وَل اوہ واپس ونجن کیتے بیڑی وِچ بیٹھ گیا ۔
38
۳۸۔ تے اوُں بندے جیندے وِچوں بُری روحاں نکل گئیاں ہَن، یسوع دی منت کیتی جو اوُں کوُ وی اپنے نال ونجن دی اجازت ڈیوے۔ پر یسوع اوُں کوُ ایہہ آکھ کے وَلا چھوڑیا جو۔
39
۳۹۔ اپنے گھر لگا ونج تے اُنہاں کوُ ڈسا جو خدا نے تیڈے کیتے کیا وڈا کم کیتا ہِے۔ وَل اوہ بندہ شاہر دے پاسے ٹُر پیا تے پورے شاہر اِچ اوُں وڈے کماں دی مُنادی کریندا گیا جیہڑے یسوع اوندے کیتے کیتے ہَن۔
40
۴۰۔ جئیں ویلے یسوع واپس وَلیا تے بھیڑ اوُندا استقبال کیتا کیوں جو اوہ اوندا انتظار کریندے پئے ہَن۔
41
۴۱۔ تے ڈیکھو یائر ناں دا ہِک بندہ آیا جیہڑا عبادت خانے دا سردار ہا۔ اوہ یسوع دے پیراں وِچ ڈھے کے منت کیتی کہ اوہ اوُندے گھر آوے۔
42
۴۲۔ کیوں جو اوندی ہِکو ہِک دھی جیہڑی بارہ سال دی ہائی مرن آلی ہا۔ جئیں ویلے یسوع ویندا پیا ہا تے اوُندے چارے پاسے بہوں لوگ ہَن۔
43
۴۳۔ اُنہاں لوگاں وِچ ہِک زنانی ہائی جیندا بارہ سالاں تھوں خون واہندا ہائی۔ تے اوہ اپنا سارا پیسہ حکیماں تے خرچ کر چکی ہائی۔ پر اوہ اُنہاں وچوں کئیں کنوں وی ٹھیک نہ تھی سگی۔
44
۴۴۔ اوہ یسوع دے پِچھوں آئی تے اوندے کپڑیاں کوُ ہتھ لایا، تے اوُں ویلے اوندا خون واہونا بند تھی گیا۔
45
۴۵۔ یسوع آکھیا جو "اوہ کون ہِے جئیں میکوُ ہتھ لایا؟ ۔" جئیں ویلے ساریاں انکار کیتا تے پطرس آکھیا، "مالک لوگ تُہاڈے اُتے ڈھاندے پئے ہِن۔
46
۴۶۔ پر یسوع آکھیا جو، " کئیں میکوُ ہتھ لایا ہِے، کیوں جو میڈے اندروں قوت نختی ہِے۔
47
۴۷۔ جئیں ویلے اوُں زنانی ڈِٹھا کہ اوُں جو کجھ کیتا ہِے اوہ نئیں لُکا سگدی تے اوہ ڈردی ہوئی آئی تے یسوع دے پیراں وِچ ڈھے کے ساریاں لوگاں دے سامنے ایہہ اعلان کیتا جو کیویں اوُں کوُں ہتھ لائے تے کیویں اوہ ہتھ لاون نال ٹھیک تھی گئی ہِے۔
48
۴۸۔ وَل اوُں کوُ آکھیا " دھیئے تیڈے ایمان تیکوُ ٹھیک کیتا ہِے، سلامت لگی ونج۔"
49
۴۹۔ اوہ ایہہ گالہیں کریندا ای پیا ہا۔ ہِک بندہ عبادت خانے دے سردا دے گھروں آ کے آکھن لگا۔" تیڈی دھی مر گئی ہِے اُستاد کوُ تکلیف نہ ڈے۔
50
۵۰۔ جئیں ویلے یسوع ایہ سُنیا تے اوُں کوُ جواب ڈِتا "پریشان نہ تھی "صرف ایمان رکھ تے اوہ بچ ویسی۔
51
۵۱۔ وَل جڈاں اوہ گھر آیا تے اوُں پطرس، یوحنا، یعقوب، چھویر دے پیئو تے ماں دے علاوہ کئیں کوُ اندر آون دی اجازت نہ ڈِتی۔
52
۵۲۔ اُتھائیں سارے لوگ روندے تے پٹیندے پئے ہَن۔ پر اوُں آکھیا " رو ناں" ایہ موئی نئیں بلکہ نیندر اِچ ہِے۔
53
۵۳۔ پر اوہ اوندے تے کھلن پے گئے، کیوں جو اُنہاں کوُ پتا ہا کہ اوہ مر گئی ہِے۔
54
۵۴۔ پر اوُں اوندا ہتھ پکڑ کے آکھیا " میڈی دھی اُٹھی"
55
۵۵۔ اوندی روح اوندے وِچ وَل آئی تے اوہ اُٹھی بیٹھی۔ اوُں حکم ڈِتا کہ چھویر کوُ کجھ کھاون کیتے ڈیوو۔
56
۵۶۔ اوُں چھویر دے ماں پیئو حیران تھئے۔ وَل اوہ اُنہاں کوُ حکم ڈِتا کہ " اِتھاں جو کجھ وی تھیا ہِے اوہ کئیں کوُ نہ ڈسائے۔