1
۱۔ اِنہاں ساریاں گالہیں دے بعد خداوند نے ستر بئے لوگاں کوُ مقرر کیتے۔ اَتے اُنہاں کوُ ڈو دوُکر کے ہر شاہر اِچ بھیجے جتھاں اوہ آپ ونجن دا ارادہ رکھیندا ہا۔
2
۲۔اوُں نے اُنہاں کوُ آکھیا کہ۔"فصل تاں بہوں ہے پَر مزدور گھٹ ہِن۔ایں کیتے خداوند تھوں دُعا منگو کہ اوہ مزدوراں کوُ فصل کپن کیتے گھلے۔
3
۳۔پَس ونجو تے ڈیکھو میں بھجیندا ہاں جیویں بھیڈاں بھیڑیاں دے وِچ۔
4
۴۔تُساں ایں سفر کیتے نہ پیسے نہ جھولا نہ جُتے گھِن ونجنا اَتے نہ ہی راہ اِچ کیئں نال مِلنا۔
5
۵۔تُساں جیہڑے گھر ویسو سب تھوں پہلے آکھو کہ۔"ایں گھر تے سلامتی تھیوئے"۔
6
۶۔اگر اُتھاں کوُئی سلامتی دار فرزند ہوسی تاں اوندے تے تہاڈی سلامتی ٹہر ویسی پَر اگر نہ ہوسی تاں سلامتی تہاڈے تے واپس آ ویسی۔
7
۷۔تُساں اوُں گھر وِچ ای راہو اَتے جو کجھ ڈِتا ونجے اوُہو کھاو تے پیو کیونکہ مزدور اپنی مزدوری گھنن دا حق رکھیندے تُساں گھر گھر نہ ونجو۔
8
۸۔تُساں جیہڑے شاہر وی ونجو اَتے اوہ تہاکوُ قبول نہ کرن تاں جو کجھ وی تہاڈے سامنے رکھن اوہ کھاو۔
9
۹۔اَتے اُتھاں جو وی بیمار ہوون اُنہاں کوُ چنگا کرو۔اُنہاں کوُ آکھو کہ خداوند دی بادشاہی نیڑے آ گئی ہے۔
10
۱۰۔پَر تُساں جیہڑے شاہر وی ونجو اَتے اوہ تہاکوُ قبول نہ کرن تاں تُساں گلیاں وِچ ونجو اَتے آکھو۔
11
۱۱۔اساں تہاڈے شاہر دی مٹی جیہڑی ساڈے پیراں تے لگی لاتھی ہے اوُں کو تہاڈے خلاف جھاڑ ڈیندے ہیں پَر اے جان گھِنو کہ خدا دی بادشاہی نیڑے آگئی ہے۔
12
۱۲۔میں تہاکوُ آدھا ہاں کہ عدالت آلے ڈِیں اوُں شاہر دی نسبت سدوم دا حال زیادہ برداشت دے لائق ہوسی۔
13
۱۳۔اے"خرازین "! تیڈے تے افسوس اے بیت صیدا" تیڈے تے افسوس کیونکہ جیہڑے معجزے تہاڈے وِچ ظاہر تھئے ہَن اگر صُور تے صیدا اِچ ظاہر تھیندے تاں اوہ بوری پا کے مٹی وِچ بیٹھ کے کڈایئں دی توبہ کر گھِندے۔
14
۱۴۔پَر عدالت آلے ڈِیں صُور تے صیدا دا حال تہاڈی حالت تھوں زیادہ برداشت دے قابل ہوسی۔
15
۱۵۔اے کفرنحوم کیا توُں سوچیندا ہیں کہ توں آسمان تائیں اوُ چا کیتا ویسیں؟"نہیں بلکہ توُں عالم ارواح اِچ سٹیا ویسیں۔
16
۱۶۔اوہ جو تہاڈی سُن دا ہے اوہ میڈی سُن دا ہِے اَتے جیہڑا تہاکوُ نئیں منیندا اوہ میکوُ نئیں منیندا اَتے جیہڑا میکوُ نئیں منیندا اوہ میڈے بھیجن آلے کوُ نئیں منیندا۔
17
۱۷۔وَل اوہ ستر خوش تھی کہ ایہہ آدھے ہوئے واپس آئے کہ "اے خداوند تیڈے ناں تھوں بُری روحاں وی ساڈے تابع ہَن"۔
18
۱۸۔یسوع نے آکھیا"میں شیطان کوُ آسمان تھوں بجلی دے طرح ڈھاندے ہویاں ڈیدھا پیا ہاں۔
19
۱۹۔اَتے ڈیکھو میں تہاکوں سپاں ،ٹھوئیاں تے دشمن دے ساری طاقت کوُ مَسلن دا اختیار ڈِتا ہے۔اَتے کوُئی تہاکوُ نقصان نہ پجا سَگسی۔
20
۲۰۔تُساں ایں گالھ تھوں خوشی نہ مناو کہ بُری روحاں تہاڈے تابع ہَن پَر ایں گالھ تے خوشی کرو کہ تہاڈے ناں آسمان تے لکھے گئے ہِن ۔
21
۲۱۔اوُں ویلے اوہ روح القدس اِچ خوش تھی کہ آکھن لگا کہ"اے باپ آسمان تے زمین دے خداوند میں تیڈی تعریف کریندا ہاں کیونکہ توُں عقل منداں کولوں ایہہ گالہیں لُکائیاں ہَن اَتے انہاں اَن پڑھاں تے بچیاں تے ظاہر کیتن۔ ہاں اے باپ کیونکہ ایویں ای تیکو پسند آئے۔
22
۲۲۔اَتے باپ دی طرفوں ساریاں شئیاں میکوں ڈِتیاں گیاں ہَن تے باپ دے علاوہ کوُئی نہیں جان دا کہ پُتر کون ہے اَتے پُتر دے علاوہ کوئی نہیں جان دا کہ باپ کون ہے پر اوہ جیندے تے پُتر ظاہر کرے۔
23
۲۳۔وَل اوُں نے شاگرداں دے پاسے مُڑ کے علیحدگی اِچ اُنہاں کوُ آکھیا کہ "خوش نصیب ہَن جیہڑے اوہو شیئاں ڈیدھے ہَن جنہاں کوُ تُساں ڈیدھے وے۔
24
۲۴۔میں تہاکوُ آدھا ہا کہ "بہوں سارے نبی تے بادشاہ اوہ معجزے جیہڑے تُساں ڈیدھے ہو ڈیکھن دی خواہش رکھیندے ہَن پَر نہ ڈیکھ سگے اَتے جو گالہیں تُساں سُن دے ہو اوہ سُنن پَر نہ سُن سگے۔
25
۲۵۔ڈیکھو ہک شرع دا عالم کھڑا تھیا اَتے ایہہ آدھے ہوئے اوُں کوُ آزماون لگا کے "اے استاد میں کیا کراں کہ ہمیشہ دی زندگی پاواں؟۔
26
۲۶۔یسوع نے اوُں کوُ آکھیا کہ"شریعت اِچ کیا لکھا لا تھے؟"توُں اینکوُں کیویں پڑھدیں؟۔
27
۲۷۔اوُں نے جواب ڈیندے ہوئے آکھیا کہ"توں خداوند اپنے خدا دے نال اپنے سارے دِل،اپنی ساری جان،اپنی ساری طاقت تے اپنی ساری عقل نال محبت رکھ تے اپنے گواہنڈی نال وی اپنی مانند محبت رکھ۔"
28
۲۸۔یسوع نے اوُں کوُ آکھیا کہ "توں بالکل صیح آکھے ایویں ای کرتے توں ہمیشہ دی زندگی پاسیں۔
29
۲۹۔پَر اوُں نے اپنے آپ کوُ پاک ٹھراون کیتے یسوع کوُ آکھیا کہ "میڈا گواہنڈی کون ہے؟۔
30
۳۰۔یسوع نے جواب اِچ اوُں کوُ آکھیا کہ ہک بندہ یروشلیم تھوں یریحو کوُ ویندا پیا ہا اوہ ڈاکواں وِچ پھس گیا اَتے اُنہاں نے اوُں کوُ لُٹ کے بہوں ماریا تے اوُں کوُ مَرن آلا چھوڑ کے تے لگے گئے۔
31
۳۱۔ابڑگت ہک کاہن اوُں رستے تے آندا پیا ہا اَتے جیہڑے ویلے اوُں نے اوُں کوُ ڈیکھیا تاں اوہ سڑک دے ڈوجھے پاسے تھی کے ٹُرن لگ گیا۔
32
۳۲۔ایویں ای ہک لاوی وی جیہڑے ویلے اوُں جاہ تے آیا اَتے اوُں نے اوُں کوُ ڈٹھا تاں اوہ وی سڑک دے ڈوجھے پاسے تھی گیا۔
33
۳۳۔پَر ہک سامری وی سفر کریندے ہوئے اُتھاں آیا۔جیہڑے ویلے اوُں نے اوُں کوُ ڈیکھیا تاں اوُں کوُ اوُندے تے ترس آیا۔
34
۳۴۔اوہ اوندے کول گیا تے اوندے زخماں تے تیل تے مَے لاکے اوُندے زخماں تے پٹی بَدھی تے اوُں کوُ اپنے جانور تے بیلہا کے ہک سراں اِچ گھِن گیا تے اوُندی ڈیکھ بھال کیتی۔
35
۳۵۔ڈوجھے ڈیں اوُں نے سراں دے مالک کوُ ڈُو دینار ڈے کے آکھیا کہ "ایندا خیال رکھائے اَتے بئے جتنے پیسے ایندے تے خرچ آسن میں آکے تیکو ڈیساں"۔
36
۳۶۔اِنہاں تریہاں وِچوں اوُں بندے دا جیکو ڈاکواں نے ماریا ہا تیڈے مطابق کون اوُندا گواہنڈی ہے؟
37
۳۷۔شرع دے عالم نے اوُں کوُ آکھیا"اوہ جیئں نے اوندے تے رحم کیتا"۔یسوع نے اوُں کوُ آکھیا کہ "ونج توں وی ایویں ای کر"۔
38
۳۸۔اَتے جڈاں اوہ سفر کریندے پئے ہَن تاں اوہ ہک پنڈ اِچ گیا اَتے مرتھا ناں دی ہک زنانی نے اپنے گھر اِچ اوُں کوُ آون دی اجازت ڈِتی۔
39
۳۹۔اوُندی ہک بھین ہائی جیندا ناں مریم ہا اوہ خداوند دے پیراں وِچ بیٹھ کے اوندا کلام سُن دی ہائی۔
40
۴۰۔پَر مرتھا ٹُکر بناون اِچ لگی ہائی اوہ یسوع دے کول آئی اَتے آکھن لگی کہ اے خداوند کیا تیکو کوئی فکر نیئں کہ میڈی بھین نے میکو خدمت کرن کیتے کلہا چھوڑ ڈِتا ہے توساں اینکوُ میڈی مدد کرن کیتے آکھو۔
41
۴۱۔پَر خداوند نے جواب اِچ اوُں کوُ آکھیا کہ"مرتھا مرتھا توں تاں بہوں شئیاں دے بارے اِچ فکر مند ہیئں۔
42
۴۲۔صرف ہر ہک شئے ضروری ہے مریم نے اوُں چُن گِدا ہے جیہڑا ساریاں تھوں چنگا ہے جیہڑا کہ ایندے کولوں کھسیجا نہ ویسی۔