1
۱۔ جڈاں بہوں سارے بندیاں نے اِیں کم کوُں ہتھ پاتے تاں جیہڑیاں گالہیں ساڈے وِچ تھیاں ہِن اُنہاں کوُ ٹھیک ٹھیک لکھوُں۔
2
۲۔ جیویں کہ اُنہاں نے جو کجھ شروع تھوں آپ ڈِٹھا ہا اَتے کلام دی خدمت کرن آلے ہَن اُنہاں کوُ ساڈے تک پہنچائے۔
3
۳۔ میڈے پیارے تھفلس میں وی اے کوشش کیتی ہے کہ سب کجھ شروع تھوں گھِن کے ترتیب نال تیڈے کیتے لکھاں۔
4
۴۔تاں جو تُوں جیہڑی گالہیں دی تعلیم پائی ہائی اوندی سچائی دا تیکوُ پتا لگ ونجے۔
5
۵۔یہودیہ دے بادشاہ ہیرودیس دے زمانے وِچ ابیاہ دے گروہ وِچوں زکریا ناں دا ہِک کاہن ہا اُتے اوندی ذال ہارون دی اولاد وِچوں ہائی اَتے اوندا ناں الیشبع ہائی۔
6
۶۔اَتے اوہ ڈوویں خدا دے اَگوں راستباز تے خدا دے سارے حُکم تے ہدایت تے عمل کرن آلے ہَن تے ایہو جئی زندگی گزریندے پئے ہَن کہ جیندے وِچ کوئی کمی نہ ہووے۔
7
۷۔اَتے اُنہاں دے بال بچے نہ ہن اَتے الیشبع بال نہ جم سگدی ہائی ہَن اوہ ڈوویں بُڈھے تھی گئے ہَن۔
8
۸۔ہک ڈیں ابیاہ دے گروہ دی واری ہائی کہ خدا دے حضور کہانت دا کم پورا کرے تاں ایویں تھیا۔
9
۹۔کہ کہانت دے دستور دے مطابق نال زکریا دا ناں نکل آیا کہ اوہ مَقدس اِچ ونج کے خوشبو کوُ بھا لاوے۔
10
۱۰۔وَل خوشبو ساڑن دے ویلے بہوں سارے لوگ باہر دُعا منگدے پئے ہَن۔
11
۱۱۔کہ خداوند دا فرشتہ خوشبو ساڑن دی جاہ دے سجے ہتھ اوُں کوُ ڈِکھائی ڈِتے۔
12
۱۲۔اَتے زکریا اوُں کوُ ڈیکھ کے گھابر گئے تے ڈر گیا۔
13
۱۳۔پر فرشتے نے اوُں کو آکھیا اے زکریا! نہ گھبرا کیوں کے تیڈی دُعا سُن گِدی گئی ہے اَتے تیڈے کیتے تیڈی ذال الیشبع پُتر جَمسی توُں اوندا ناں یوحنا رکھیں۔
14
۱۴۔تے تُوں خوشی دے نال بھریج ویسیں اَتے اوندے جمن نال بہوں سارے لوگ خوش تھیسن۔
15
۱۵۔اوہ بال خدا دے نیڑے بہوں عظیم ہوسی اَتے نہ او شراب پیسی نہ مَے پیسی اَتے اپنی ماں دے ڈھِڈ وِچ ای روح نال بھریج ویسی۔
16
۱۶۔تے اوہ بہوں سارے اسرایلیاں کوُ خدا دے پاسے پھیر گھِنسی جیہڑا اُنہاں دا خدا ہے۔
17
۱۷۔تے اوہ ایلیا دی رُوح تے طاقت نال خداوند دے اَگے اَگے چلسی کہ پیوواں دے دِل پُتراں دے پاسے تے نافرماناں کوُ راستبازاں دی حکمت دی طرف چلن دے پاسے پھیرے اَتے اوہ اوُں قوم کوُ خدا کیتے تیار کرے۔
18
۱۸۔زکریا نے فرشتے کوُ آکھیا میں کیویں اِیں گالھ کوُ جان ساں؟کیونکہ میں بُڈھا ہاں تے میڈی ذال دی عمر بہوں زیادہ تھی گئی ہے۔
19
۱۹۔فرشتے نے اوُں کوُ جواب ڈِتا ۔میں جبرائیل ہاں جیہڑا خدا دے حضور کھڑا راہندا ہے۔اَتے اِیں کیتے بھیجا گیا ہاں کہ تیڈے نال کلام کراں تے تیکوُ اِنہاں گالہیں دی خوشخبری ڈیواں۔
20
۲۰۔اَتے ڈیکھ جیئں ڈیہاں تائیں ایہہ گالہیں پوریاں نہ تھی ونجن تیکوُ چُپ لگی راہسی اَتے توں بول نہ سگ سیں۔ایں کیتے کہ توں میڈی گالہیں تے یقین نہ کیتے جیہڑیاں اپنے ویلے تے پوریاں تھیسَن۔
21
۲۱۔اَتے لوگ زکریا دی راہ ڈیدھے ہَن تے حیران تھیندے ہَن کہ اوُں کوُ اوُں جا ہ تے دیر کیوں لگی۔
22
۲۲۔جیہڑے ویلے اوہ باہر آیا تے کجھ نہ آکھ سگا۔اُنہاں نے اوُندے کولوں پچھن دی کوشش کیتی اُنہاں کوُ پتا لگے کہ اوُں جاہ تے اوُں کوُ دیر کیوں لگی۔اوہ اُنہاں کوُ اشاریاں دے نال ڈسیندا ہا تے کجھ بول نہ سگا۔
23
۲۳۔وَل ایویں تھیا کہ جڈاں اوُں دی خدمت دے ڈیں پوُرے تھی گئے تاں اوہ اپنے گھر لگا گیا۔
24
۲۴۔ اُنہاں ڈیہاں دے بعد اوندی ڈال الیشبع ڈِھڈ نال تھئ گئی۔ اَتے اوندے پنج مہینے تک اپنے آپ کوُ ایہہ آکھ کے لُکائے رکھیا کہ۔
25
۲۵۔ جڈاں خداوند نے میڈی بےعزتی لوگاں وچوں دور کرن کیتے میڈے تے نگاہ کیتی، اُنہاں ڈیواراں اِچ اوُں نے میڈے کیتے ایویں کیتا۔
26
۲۶۔ چھیویں مہینے وِچ جبرائیل فرشتہ خدا دی طرفوں ناصرۃ نامی گلیل دے ہِک شاہر اِچ ہِک کنواری دے کول بھیجا گئے۔
27
۲۷۔ جیندی منگنی داؤد دے گھرانے دے ہِک جوان یوسف ناں دے نال تھئی ہا اَتے اوُں کنواری دا ناں مریم ہائی۔
28
۲۸۔ وَل فرشتے نے اوُں کوُ اندر آکے آکھیا سلام تیکوُ جیندے تے فضل تھیا ہِے! خداوند تیڈے نال ہِے۔
29
۲۹۔ اوہ ایں کلام تھوں بہوں پریشان تھی گئی اَتے سوچن لگی کہ ایہہ کیئو جیہا سلام ہِے
30
۳۰۔ فرشتے نے اوُں کوُ آکھیا اے مریم! گھبرا نہ کیونکہ خداوند دی طرفوں تیڈے تے فضل تھیا ہِے۔
31
۳۱۔ اَتے توں ڈِھڈ نال ہوسیں تے تُوں پُتر جمسیں تے اونداناں یسوع رکھیں۔
32
۳۲۔ او نیک ہوسی تے خدا تعالیٰ دا پُتر اکھواسی۔ اَتے خداوند خدا اوندے پیئو داؤد دا تخت اوُں کوُ ڈیسی۔
33
۳۳۔ اَتے او یعقوب دے گھرانے تے اخیر تک بادشاہی کریسی تے اوندی بادشاہی دا اَخیر نہ تھیسی۔
34
۳۴۔ مریم نے فرشتے کوُ آکھیا ایہہ کیویں تھی سگدے جڈاں کہ میں کئیں جوان کوُ نئیں جان دی۔
35
۳۵۔ اَتے فرشتے نے جواب اِچ اوُں کوُ آکھیا کہ روح القدس تیڈے تے نازل تھیسی تے خدا تعالیٰ دی قدرت تیڈے تے چھاں کریسی تے ایندے پاروں اوہ پاک بال خدا دا پُتر اکھواسی۔
36
۳۶۔ اَتے ڈیکھ تیڈی رشتے دار الیشبع دے وی بُڈھے وارے پُتر تھیون آلا ہِے۔ ہُن اوہ جیہڑی بال نہ جم سگدی ہائی چھیواں مہینہ ہِے۔
37
۳۷۔ کیونکہ جو کجھ خدا نے آکھیا ہائی اوہ بےکار نہ تھیسی۔
38
۳۸۔ مریم نے آکھیا ڈیکھ میں خداوند دی عبادت کرن آلی ہاں میڈے کیتے تیڈے کلام دے مطابق تھیوے۔ تاں فرشتہ اوُں دے کولوں لگا گیا۔
39
۳۹۔اوُں ڈیواراں وِچ چھیتی نال مریم پہاڑی مُلک اِچ یہوداہ دے ہِک شاہر کوُ گئی۔
40
۴۰۔ اَتے زکریا دے گھر اندر آ کے الیشبع کوُ سلام کیتا۔
41
۴۱۔ جیویں ای الیشبع نے مریم دا سلام سُنیا تا ایویں تھیا کہ بال اُوندے ڈِھڈھ اِچ خوش تھی گیا تے الیشبع روح القدس نال بھر گئی۔
42
۴۲۔اَتے اُچی آواز نال آکھن لگی تُوں عورتاں وِچوں خوش قسمت ہیئں تے تیڈے ڈِھڈھ دا پھل وی خوش قسمت ہے۔
43
۴۳۔اَتے میڈے تے ایہہ فضل کتھوں تھیا کہ میڈے خداوند دی ماں میڈے کول آئی؟۔
44
۴۴۔کیوں جو ڈیکھ جیویں ہی تیڈے سلام دی آواز میڈے کن اِچ آئی بال خوشی دے پاروں میڈے ڈِھڈھ اِچ خوشی تھی پیا۔
45
۴۵۔اَتے اوہ خوش قسمت ہے جیہڑی ایمان گھِن آئی کیونکہ جو گالہیں خداوند دی طرفوں اوُں کوُں آکھیاں ہن اوہ پوریاں تھیسن۔
46
۴۶۔وَل مریم نے آکھیا کہ میڈی جان خداوند دی وڈیائی کریندی ہے
47
۴۷۔اَتے میڈی رُوح میڈے نجات ڈیون آلے خدا تھوں خوش تئھی۔
48
۴۸۔کیونکہ اوُں اپنی عبادت کرن آلی بندی دی بدحالی تے نگاہ کیتی اَتے ڈیکھ ہن تھوں گھِن کہ ہر زمانے دے لوگ میکوں خوش قسمت آکھسن۔
49
۴۹۔کیونکہ اوُں ذات کریم نے میڈے کیتے وڈے وڈے کم کیتے ہَن اَتے اوندا ناں پاک ہے۔
50
۵۰۔جیہڑے اوندے کنوں ڈردے ہن اُنہاں تے اوندا رحم ہر دوار اِچ ہوسی۔
51
۵۱۔اوُں نے اپنی بانہہ نال زور ڈِکھایا کہ جیہڑے اپنے آپ کوُ وڈا سمجھدے ہن اُنہاں کوُ حیران کر ڈِتے۔
52
۵۲۔اوُں زور آلیاں کوُ تخت تھوں ہٹا ڈِتا جیہڑے کمزور ہَن اُنہاں کوُ طاقت ڈِتی۔
53
۵۳۔اوُں نے بُھکے بندیاں کوُ چنگیاں شیئاں ڈِتیاں اَتے پیسے آلیاں کوُ کنگال کر ڈِتا۔
54
۵۴۔اوُں نے اپنے خدمت گار اسرایئل کوُ سنبھال گِدے تاں جو اپنی رحمت کوُ یاد کرے۔
55
۵۵۔جو ابرہام تے اوندی نسل تے اخیر تک راہسی جیویں اوُں نے ساڈے پیو ڈاڈا کوُ آکھیا ہائی۔
56
۵۶۔تریئے مہینے الیشبع دے کول رہ کے مریم اپنے گھر واپس لگی گئی۔
57
۵۷۔اَتے وَل الیشبع دے بال جمن دا ویلہ آگئے اَتے اوندے پُتر تھیا۔
58
۵۸۔اَتے اوندے ہمسایاں تے رشتےداراں کوُں جیہڑے ویلے پتا لگے کہ خداوند دی طرفوں اوندے تے وڈی رحمت تھئی ہے تاں اُنہاں نے بہُوں خوشی کیتی۔
59
۵۹۔اَٹھویں ڈیں اوُں بال دی طہور دا ویلہ آیا اَتے اوندا ناں اوندے پیئو دے ناں تے زکریا رکھن لگے۔
60
۶۰۔پر اوندی ماں نے آکھے نیئں بلکہ ایندا ناں یوحنا رکھیا ونجے۔
61
۶۱۔لوگاں آکھیا کہ تیڈے گھرانے اِچ کیئں دا ایہہ ناں نیئں۔
62
۶۲۔وَل اُنہاں نے بال دے پیئو کوُں اشارے نال پچھیا کہ توُں ایندا کیا ناں رکھنا چاہندا ہیئں؟
63
۶۳۔اوندے پیئو لکھن کیتے ہک تختی منگائی تے اوندے تے لکھیا کہ ایندا ناں یوحنا ہے۔اَتے سارے ہکے بکے رہ گئے۔
64
۶۴۔ ابڑ گت اوندی زبان کھل کھُل گئی تے اوہ بولن لگ پیا تے خدا دی تعریف کریندا ریہا۔
65
۶۵۔ اَتے اُنہاں دے آسے پاسے راہن آلے حیران تھی گئے تے یہودیہ دے سارے پہاڑی علاقے اِچ اُنہاں ساریاں گالہیں دا چرچا تھی گئے۔
66
۶۶۔سارے سنن آلیاں نے اُنہاں کوُ اپنے دل اِچ سوچ کے آکھے کہ ایہہ بال کیئوں جیا ہوسی؟کیونکہ خداوند دا ہتھ اوندے تے ہا۔
67
۶۷۔اوُں بال دا پیئو زکریا روح القدس نال بھر گیا۔تے نبوت نال آکھن لگا کہ ۔
68
۶۸۔خداوند اسرایئل دے خدا دی تعریف تھیوئے کیونکہ اوُں نے اپنے بندیاں تے نظر کر کے اوُں بچا گِدا۔
69
۶۹۔اَتے اپنے خادم داؤد دے خاندان اِچ ساڈے کیتے نجات گھلی۔
70
۷۰۔جیویں کہ اوُں نے اپنے پاک نبیاں دی راہیں آکھیا ہا جو کہ دنیا دے مُڈھوں تھیندے آیئن۔
71
۷۱۔یعنی ساکوُں ساڈے دشمناں تھوں اَتے سارے دشمنی کرن آلیاں دے ہتھ تھوں نجات ڈِتی۔
72
۷۲۔ تاں جو ساڈے پیئو ڈاڈا تے رحم تھیوے اَتے اپنے عہد کوُ یاد فرمائے۔
73
۷۳۔یعنی اوُں قسم کوُ جیہڑی اوُں نے ساڈے پیئو ابرہام نال کھادی ہا۔
74
۷۴۔ کہ اوہ ساکوُ ایہہ ڈیسی کہ اپنے دشمناں دے ہتھ تھوں آزاد تھی کے۔
75
۷۵۔اوندے حضور پاک تھی کہ راستبازی دے نال ساری عمر بے خوف اوندی عبادت کروں۔
76
۷۶۔وَل تُوں اے بال خدا دا نبی اکھویسیں کیونکہ تُوں خداوند دی راہ تیار کرن کیتے اوندے اَگے اَگے چلسیں۔
77
۷۷۔تاں جو اوُں دے لوگاں کوُ رہائی دا علم ڈیوے تاکہ اُنہاں کوُ گناہاں دی معافی حاصل تھیوے۔
78
۷۸۔ایہہ ساڈے خدا دی رحمت نال تھیسی جیئں دے پاروں عالمِ بالا دا سورج ساڈے تے ظاہر کریسی۔
79
۷۹۔تاں جو اُنہاں کوُ جیہڑے اندھارے تے موت دے پرچھاویں وِچ بیٹھے ہِن سوجھلا ڈیوے اَتے ساڈے پیراں کو سلامتی دی راہ تے ٹراوے۔
80
۸۰۔اَتے اوہ بال ودھدا تے روح اِچ طاقت پاندا گیا تے اسرایئل تے ظاہر تھیون دے ڈِیں تائیں جنگلاں اِچ ریہا۔