¹ ۱۔ جیہڑیاں گالہیں تُساں لکھیاں ہن اُنہاں بارے اے ہِے۔ مرد کیتے چنگا ہِے کہ عورت کوُ ہتھ نہ لائے۔ ² ۲۔ پر حرامکاری دے کھٹکے دے پاروں ہر مرد اپنی ذال تے ہر عورت اپنا پئے رکھے۔ ³ ۳۔ پئے اپنی ذال دا حق ادا کرے تے اوُویں ای ذال اپنے پئے دا۔ ⁴ ۴۔ ذال اپنے بدن دی ولی نئیں بلکہ پئے ہِے۔ اوُویں ای پئے وی اپنے بدن دا ولی نئیں بلکہ ذال۔ ⁵ ۵۔ تُساں ہک ڈوجھے کولوں دُور نہ تھیوؤ پر تھوڑے ویلے کیتے اپنی رضا مندی تھوں تاں جو دُعا کیتے ویلہ ملے اَتے وَل کٹھے تھی ونجو۔ ایویں نہ تھیوے کہ نفس دے حملے دے پاروں شیطان تہاکوں آزمائے۔ ⁶ ۶۔ لیکن ایہہ میں اجازت ڈیون دے طور تے آدھا ہاں۔ حکم دے طور تے نئیں۔ ⁷ ۷۔ اَتے میں ایہہ چاہندا ہاں کہ جیویں میں ہاں اوں ویں سارے بندے ہوؤن پر ہر ہک کوُ خدا دی طرفوں خاص خاص توفیق ملی ہِے۔ کئیں کوُ کئیں طرح دی۔ کئیں کوُ کئیں طرح دی۔ ⁸ ۸۔ پس جنہاں دا ویاہ نئیں تھیا تے بیواہ عورتاں دے حق اِچ ایہہ آدھا ہاں کہ اُنہاں کیتے ایویں ای راہنا چنگا ہِے جیویں میں ہاں۔ ⁹ ۹۔ لیکن اگر اپنے آپ کوُ قابو نہ رکھ سگن تاں ویاہ کر گھنن کیونکہ ویاہ کرنا مَست ہوون تھوں چنگا ہِے۔ ¹⁰ ۱۰۔ پر جنہاں دا ویاہ تھی گئے اُنہاں کوُ میں نئیں بلکہ خداوند حکم ڈیندے کہ ذال اپنے پئے تھوں الگ نہ تھیوے۔ ¹¹ ۱۱۔ ( اَتے اگر الگ تھیوے تاں وَل ویاہ تھوں بغیر راہوے یا وِل اپنے پئے نال مل ونجے ) نہ پئے اپنی ذال کوُ چھوڑے۔ ¹² ۱۲۔ باقیاں کوُ میں ہی آدھا ہاں نہ کہ خداوندکہ اگر کئیں بھرا دی ذال ایمان نہ گھن آئی ہووئے تے اوندھے نال راہون کیتے منیندی ہوئے تاں اوُں کوُ نہ چھوڑے۔ ¹³ ۱۳۔ تے جئیں ذال دا پئے ایمان نہ گھن آیا ہووے تے اوُں دے نال راہون اِچ منیندا ہوئے تاں اوہ پئے کوُ نہ چھوڑے۔ ¹⁴ ۱۴۔ کیوں جو جیہڑا پئے ایمان نئیں گھن آیا اوہ ذال دے پاروں پاک ٹھہرسی اَتے جیہڑی ذال ایمان نئیں گھن آئی اوہ مسیحی پئے دے پاروں پاک ٹھہرسی ورنہ تہاڈے پُتر پلید ہوون ہا پر ہن پاک ہن۔ ¹⁵ ۱۵۔ پر بندہ جیہڑا ایمان نہ گھن آیا ہووے اگر اوہ الگ تھیونا چاہندا ہِے تاں اوُں کوُ الگ تھیون ڈیو۔ ایں حالت اِچ کوُئی بھرا یا بھین پابند نئیں اَتے خدا نے ساکوُ میل ملاپ کیتے بُلائے۔ ¹⁶ ۱۶۔ کیوں جو اے عورت! تیکو کیا پتا ہِے کے شاید تُو اپنے پئے کوُ بچا گھنے؟ تے اے بندے! تیکو کیا پتا ہِے کپ شاید تُو اپنی ذال کوُ بچا گھنے؟۔ ¹⁷ ۱۷۔ پر جیویں خداوند نے ہر ہک کوُ حصہ ڈِتے اَتے جیویں خدا نے ہر ہک کوُ سَڈے اوُویں ای او چلے اَتے میں ساریاں کلیسیاواں اِچ ایویں ہی مقرر کریندا ہاں۔ ¹⁸ ۱۸۔ جیہڑا ختنے دی حالت وچ سَڈا گئے اوُں کوُں بغیر ختنے دے راہون دی ضرورت نئیں۔ جیہڑا بغیر ختنے دی خالت اِچ سڈا گئے اوُں کوُں ختنہ کرواون دی ضرورت نئیں۔ ¹⁹ ۱۹۔ نہ ختنہ کرواونا کئی شئے ہِے نہ ای ختنہ نہ کرواونا بلکہ خدا دے حکماں تے چلنا ای سب کجھ ہِے۔ ²⁰ ۲۰۔ جیہڑا بندہ جیوں جئی حالت اِچ سَڈا گئے اوُویں ای راہوے۔ ²¹ ۲۱۔ اگر تُوں غلامی دی حالت اِچ سَڈا گئے تاں فکر نہ کر لیکن اگر توُں آزاد تھی سگیں تاں ایندے کولوں فائدہ چا۔ ²² ۲۲۔ کیونکہ جیہڑا بندہ غلامی دی حالت اِچ خداوند اِچ سَڈا گئے اوہ خداوند دا آزاد کیتا گئے۔ ایویں جیہڑا آزادی دی ھالت اِچ سَڈا گئے اوہ مسیح دا غلام ہِے۔ ²³ ۲۳۔ تُساں قیمت نال خریدے گئے ہو۔ بندیاں دے غلام نہ بنو۔ ²⁴ ۲۴۔ اے بھراؤ! جیہڑا کوُئی جیوں جئی حالت اِچ سَڈا گیئا ہووے اوہ اوُںوے ای خدا دے نال راہوے۔ ²⁵ ۲۵۔ کنواریاں دے حق اِچ میڈے کول خداوند دا کوُئی حکم نئیں پر دیانتدار ہوؤن کیتے جیویں خداوند دی طرفوں میڈے اُتے رَحم تھیئے اوُں دے موافق اپنی رائے ڈیندا ہاں۔ ²⁶ ۲۶۔ میڈے خیال اِچ موجودہ مصیبت کوُ ڈیدھیا ہویاں میں اے آدھا ہاں کہ بندے کیتے ایہو چنگا ہِے کہ جیویں ای ہِے اوُویں ہی راہوے۔ ²⁷ ۲۷۔ اگر تیڈی ذال ہِے تاں اوندھے کولوں الگ تھیون دی کوشش نہ کر اَتے اگر تیڈی ذال کئے نئیں تاں ذال کوُ گولن دی کوشش نہ کر۔ ²⁸ ۲۸۔ لیکن تُو ویاہ کر گھنے تاںکوُئی گناہ نئیں اَتے اگر کنواری دا ویاہ کیتا ونجے تاں وی کوُئی گناہ نئیں پر ایہو جئے بندے ڈُکھ چاسن اَتے میں تہاکوُں بچاونا چاہندا ہاں۔ ²⁹ ۲۹۔ پر اے بھراؤ! میں اے آدھا ہاں کہ ویلہ تنگ ہِے۔ ہن ساکوُ چاہیدا ہِے کہ ذال آلے ایویں ہوؤن کہ جیویں اُنہاں دی ذال ہن کئے ناں۔ ³⁰ ۳۰۔ اَتے روؤن آلے ایویں ہوون جیویں روندے ای نئیں تے خوشی کرن آلے ایویں ہوؤن جیویں خوشی کریندے ای نئیں اَتے خریدن آلے ایویں ہوؤن جیویں او مال رکھیندے ای نئیں ۔ ³¹ ۳۱۔ اَتے دنیاوی کاروبار کرن آلے ایویں ہوؤن کہ دُنیا دے ای نہ تھی ونجن کیوں جو دُنیا دی شکل بدل دی ویندی ہِے۔ ³² ۳۲۔ پس میں اے چاہندا ہاں کہ تُساں بے فکر تھی ونجو۔ جیندا ویاہ نئیں تھیا اوہ خداوند دی فکر اِچ راہندے کہ کئیں طرح خداوند کوُ راضی کرے۔ ³³ ۳۳۔ پر جیندا ویاہ تھی گئے اوہ دُنیا دی فکر اِچ راہندے کہ کئیں طرح اپنی ذال کوُ راضی کرے۔ ³⁴ ۳۴۔ جیندا ویاہ تھی گئے او تے جیندا ویاہ نئیں تھیا ڈوہاں اِچ فرق ہِے۔ جیندا ویاہ نئیں تھیا او خداوند دی فکر اِچ راہندی ہِے تاں جو اوندھا جسم تے روح ڈوھویں پاک ہوؤن۔ پر جیندا ویاہ تھی گئے اوہ عورت دُنیا دی فکر اِچ راہندی ہِے کہ کئیں طرح اپنے پئے کوُ راضی کرے۔ ³⁵ ۳۵۔ ایہہ تہاڈی چنگائی کیتے آدھا ہاں ناں کہ تہاکوں پنساون کیتے بلکہ کہ اوندے تے عمل کروں جو چنگا ہِے اَتے تُساں خداوند دی خدمت اِچ ہک دِل تھی کے کریندے راہوں۔ ³⁶ ۳۶۔ اَتے اگرکوئی اے سمجھے کہ میں اپنی اوُں کنواری چھویر دا حق مریندا پیاں کیونکہ اوہ بڈھی تھیندی ویندی اے اَتے اگر ضرورت تھیوے تاں اختیار ہِے ایندے وچ کوُئی گناہ کئے نئیں۔ اوندا ویاہ کر ڈیوو۔ ³⁷ ۳۷۔ پر اپنے دِل وچ مضبوط ہوئے اَتے اوندی کجھ ضرورت نہ ہوئے بلکہ اپنے ارادہ کوُ پورا کرن کیتے قادر ہوئے تے دِل وچ ارادہ کیتا ہوئے کہ میں اپنی چھویر دا نکاح نہ کریساں اوہ چنگا کریندا ہِے۔ ³⁸ ۳۸۔ پس جیہڑا اپنی کنواری چھویر دا نکاح کریندا ہِے اوہ چنگا کریندا ہِے اَتے جیہڑا ویاہ نئیں کریندا اوہ اوندے کولوں وی چنگا کریندا ہِے۔ ³⁹ ۳۹۔ جڈاں تائیں عورت دا پئے جیوندا ہِے اوہ اوندی پابند ہِے پر جڈا اوندا پئے مر ونجے تاں جیندے نال چاہوے ویاہ کر گھنے پر صرف خداوند اِچ۔ ⁴⁰ ۴۰۔ لیکن جیویں ہِے اگر اوُویں ای راہوے تاں میںمشورہ ڈینا کہ زیادہ خوش نصیب ہِے اَتے میں جان دا ہاں کہ خدا دا روح میڈے وچ وی ہِے۔