¹ ۱۔ ہن اوُں چندے دے بارے جیہڑا پاک لوگاں کیتے جمع کیتا ویندا ہِے جیویں میں گلتیہ دی کلیسیاواں کوُ حکم ڈِتے اوُویں ای تُساں وی کرو۔ ² ۲۔ ہفتہ دے پہلے (چھن چھن آلے) ڈیں تہاڈے وچوں ہر بندہ اپنی آمدنی دے موافق کجھ اپنے کول رکھ چھوڑا کرے تاں جو میڈے آون تے چندے نہ کرنے پوون۔ ³ ۳۔ اَتے جڈاں میں آساں تاں جنہاں کوُں تُساں آکھسو اُنہاں کوُں میں پَتر ڈے کے گھل ڈیساکہ تُہاڈی خیرات یروشلیم تک پُجا ڈیون۔ ⁴ ۴۔ اَتے اگر میڈا ونجنا وی ٹھیک تھیا تاں اوہ میڈے نال ہی ویسن۔ ⁵ ۵۔ اَتے میں مکدُنیہ تھی کے تہاڈے کول آساں کیوں جو میکوں مکدُنیہ تھی ونجنا تاں ہے ہی۔ ⁶ ۶۔ پر شاید تہاڈے کول ہی راہوں اَتے سیالا وی تہاڈے کول ای کٹاں تاکہ جیہڑے پاسے میں ونجنا چاہواں تساں اوُں پاسے میکو بھیج ڈیسو۔ ⁷ ۷۔ کیونکہ ہن میں راہ وچ تہاڈے نال نہ مل سگساں بلکہ میکوں اُمید ہِے کہ خداوند کوُ پسند آسی کہ میں کجھ دیر تہاڈے کول راہواں۔ ⁸ ۸۔ لیکن میں عید پنتِکُست تک افسس اِچ راہساں۔ ⁹ ۹۔ کیونکہ میڈے کیتے ہک وڈا تے بڑا ہی موثر بوہا کھلا ہِے اَتے دشمن وی بہوں سارے ہن۔ ¹⁰ ۱۰۔ اگر تیمتھیس آونجے تاں تاں کیال رکھائے کہ اوُں کوُ تہاڈے کول کوُئی خوف نہ تھیوے کیونکہ اوہ میڈی طرح خدا دا کم کریندا ہِے۔ ¹¹ ۱۱۔ کوُئی اوُں کوں حقیر نہ جانے بلکہ اوُں کوں صحیح سلامت اِیں پاسے گھل ڈیوائے کہ میڈے کول آ ونجے کیونکہ میں اوندے انتظار اِچ ہاں کہ اوہ بھراواں نال آوے۔ ¹² ۱۲۔ اَتے بھرا اپلوس دے اگے میں بہوں منت کیتی ہائی کہ تہاڈے کول بھراواں دے نال ونجے پر اوُں ویلے اوہ ونجن تے راضی نہ تھیا لیکن جڈاں اوُں کوُ موقع ملسی اوہ لگا ویسی۔ ¹³ ۱۳۔ جاگدے راہو۔ ایمان اِچ قائم راہو۔ مردانگی کرو۔ مظبوط تھیوو۔ ¹⁴ ۱۴۔ جو کجھ کریندے ہو محبت نال کرو۔ ¹⁵ ۱۵۔ اے بھراؤ! تُساں ستفناس دے خاندان کوُ جان دے ہیوے کہ اوہ اخیہ دے پہلے پھل ہن اتے پاک لوگاں دی خدمت کیتے ہر ویلے تیار راہندِھن۔ ¹⁶ ۱۶۔ میں تہاڈے اگے منت کریندا ہاں کہ ایہو جئے بندیاں دے تابع راہو بلکہ ہر ہک وی جیہڑا ایں کم کوُں بڑی محنت نال کریندے۔ ¹⁷ ۱۷۔ اَتے میں ستفناس تے فرتوناتُس تے اخیکس دے آؤن تھوں خوش ہاں کیونکہ جو کجھ تہاڈے کولوں رہ گیا ہائی اوہ اُنہاں نے پورا کر ڈِتے۔ ¹⁸ ۱۸۔ اُنہاں نے میڈی تے تُہاڈی روح کوُ تازہ کر ڈِتے پس ایہو جئے بندیاں دی منو۔ ¹⁹ ۱۹۔ آسیہ دیاں کلیسیاواں تہاکوُں سلام آدِھن۔ اَتے اَکولہ تے پرسکہ اؤں کلیسیا سمیت جیہڑی اُنہاں دے گھر وچ ہِے تہاکوُ خداوند اِچ بہوں بہوں سلام آدِھن۔ ²⁰ ۲۰۔ سارے بھرا تہاکوں سلام آدِھن۔ پاک چمی گھن کے آپس اِچ سلام کرو۔ ²¹ ۲۱۔ میں پولس اپنے ہتھ نال تہاکوُں سلام لکھدا ہاں۔ ²² ۲۲۔ جیہڑا کوُئی خداوند کوُ عزیز نئیں رکھیندا لعنتی ہِے۔ ساڈا خداوند آون آلا ہِے۔ ²³ ۲۳۔ خداوند یسوع مسیح دا فضل تہاڈے تے تھیندا راہوے۔ ²⁴ ۲۴۔میڈی محبت یسوع مسیح وچ تساں ساریاں نال راہوے۔ آمین۔