¹ ۱۔ فیر میں چار فرِشتیاں نوں زمین دے چاروں کونیاں تے کھلوتے ویکھیا جناں نے زمین دی چار ہواواں نوں مظبوتی نال روکیا سی کے زمین تے سمندر تے ہوا نہ چلے یا کسے درخت نوں ہوا نہ لگے۔ ² ۲۔میں اِک ہور فرِشتے نوں مشرق ولّوں آندیاں ویکھیا، جدے کول زندہ خُدا دی مُہر سی۔ اونہے چار فرشتیاں نوں جنہاں نوں زمین تے سمندر نوں نُقصان دِین دی اجازت دتی گئی سی، اُچّی آواز نال آکھیا۔ ³ ۳۔” زمین تے سمندر یا درختاں نوں نُقصان نہ پہنچاؤ جدوں تک اسی خُدا دے خادماں دے متھیاں تے مُہر نہ لائے۔“ ⁴ ۴۔ میں جنہاں تے مُہر کیتی گئی سی شُمار سُنیا: اسرائیل دے ہر قبیلے چوں ۱۴۴۰۰۰ تے مُہر لگی سی: ⁵ ۵۔ بارہ ہزار یہودہ دے قبیلے توں، ـ بارہ ہزار روبن دے قبیلے توں، ـ بارہ ہزار جد دے قبیلے توں، ⁶ ۶۔ بارہ ہزار آشر دے قبیلے توں، ـ بارہ ہزار نفتالی دےقبیلے توں، ـ بارہ ہزار منسّی دے قبیلے توں، ⁷ ۷۔ بارہ ہزار شمٰعون دے قبیلے توں، ـ بارہ ہزار لاوی دے قبیلے توں، ـ بارہ ہزار آشکار دے قبیلے توں، ⁸ ۸۔ بارہ ہزار زبلوں دے قبیلے توں، ـ بارہ ہزار یوسف دے قبیلے توں، ـ بارہ ہزار بنیامین دے قبیلے توں، ⁹ ۹۔ فیر میں تخت، تے برّے دے سامنے، ساری دُنیا دیاں قوماں، قبیلیاں تے ہر بولی بولن والیاں دی، اک بڑی وڈی جہی بھیڑ جنوں گِنیا نئیں جا سکدا سی، کھلوتے وہکھیا۔ اوہناں نے چٹّے کپڑے پائے سن تےاپنے ہتھاں وِچ کھجور دیاں ٹہنیاں پھڑیاں ہویاں سن۔ ¹⁰ ۱۰۔ تے اُچّی آواز چے کہندے سن؛ نجات خُدا ولّوں اے، جیہڑا تخت تے بیٹھا اے تے برّے ولّوں۔ ¹¹ ۱۱۔ سارے فرشتے تے وڈیرے تے چاروں جاندار مخلوق تخت دے چاروں پاسے کھلوتےسن، اُنہاں نے منہ بھار تخت دے اگے ڈِگ کےخُدا دی عبادت کیتی، ¹² ۱۲۔ کہندے ہویاں” آمین! تمجید، جلال، حِکمت، شُکرگزاری، عزّت، قُدرت، تے طاقت ہمیشہ توں ہمیشہ تیک خُدا دی ہو وے، آمین۔ ¹³ ۱۳۔ فیر اِک بزرگ نے مینوں پُچھیا اے سفید کپڑیاں وچ کون نے تے کتھون آے نے؟ ¹⁴ ۱۴۔ میں اوہنوں کیا ”جناب تہانوں پتہ اے، تے اوہنے مینوں کیا اے او نیں جیہڑےبُہت وڈی مُصیبت توں باہر نکل کے آئے نے۔اوہناں نے اپنی پوشاکاں برّے دے خُون نال چٹّیاں کیتیاں نے۔ “ ¹⁵ ۱۵۔ ایدہی وجہ توں اے خُدا دے تخت دے سامنے کھلوتے نےتے اوہدی ہیکل چے دِن رات اوہدی عبادت کردے نے۔ جیہڑا تخت تے بیٹھا اےاو اپنا تنبو اوہناں اُتے کھرال(تان) دیوے گا۔ ¹⁶ ۱۶۔ فیر او کدی وی بھُکے تے ترہائے نہ ہوون گے۔ سورج اوہنان نوں نہ ساڑے گا تے نہ ہی بلدی تپش ساڑے گی۔ ¹⁷ ۱۷۔ تخت دے درمیان چے برّا (لِیلا) اُہناں دا اجالی ہووے گا۔ او اوہناں نوں زندہ پانی دے چشمیاں کول لے جائے گا۔ تے رب اوناں دی اکھاں دے اتھرو پونجھ دے گا۔