1
. جد اٹھواں دن ہویا تد خداوند نے ہارون اتے اوہدے پُتراں اتے اسرائیل دے وڈیریاں نوں سدیا۔
2
. اتے اوہنے ہارون نوں آکھیا۔ پئی توں اک وچھا خطا دی قربانی جوگی اتے اک بھیڈو سوختنی قربانی جوگی لَے۔ بے عیب ہون۔ اتے دوہنواں نوں خداوند اگے ذبح کر۔
3
. اتے بنی اسرائیل نوں آکھ پئی اک بکرا خطا دی قربانی جوگی اتے اک وچھا اتے اک برہ دونویں اک سال دے اتے بے عیب ہون۔ سوکتنی قربان جوگی لئیان۔
4
. اتے اک ڈھگا اتے اک بھیڈو سلامتی دی قربانی جوگی خداوند دے ساہمنے ذبح کیتے جان اتے نذر دی قربانی تیل نال ملی ہوئی ہوؤے۔ کیوں جو اج دے دیہاڑے خداوند تہانوں آپنا آپ وکھاوے گا۔
5
. تد اوہ جو کجھ موسیٰ نے حکم کیتا حضوری دے تنبو اگے لئیائے اتے سبھے منڈلی نیڑے آئی اتے خداوند دے اگے کھلوتی۔
6
. موسیٰ نے آکھیا۔ ایہہ اوہ کم اے جہدے کرن دا تہانوں خداوند نے حکم دتا اے۔ اتے خداوند دا جلال تسی ویکھو گے۔
7
. اتے موسیٰ نے ہارون نوں آکھیا پئی مذبحے دے نیڑے جا اتے آپنی خطا دی قربانی اتے آپنی سوختنی قربان کر۔ اتے اوہناں جوگی کفارہ دے۔ اتے قوم دی قربانی کر اتے آپنے جوگی اتے قوم جوگی کفارہ دے۔ اتے قوم دی قربانی کر اتے اوہناں جوگی کفارہ دے۔ جیویں پئی خداوند نے حکم کیتا اے۔
8
. تد ہارون مذبحے دے کول گئیا اتے آپنی خطا دی قربانی دا وچھا ذبح کیتا۔
9
. اتے ہارون دے پُتر لہؤ اوہدے کول لئیائے۔ تاں اوہنے آپنی انگلی اوہدے وچ ڈوبی اتے مذبحے دے سِنگاں اُتے لائیا۔ اتے باقی لہؤ مذبحے دے پاوے کول روڑھ دِتا۔
10
. اتے چربی اتے دونویں گردے اتے کلیجے دی جھلی خطا دی قربانی وچوں مذبحے اُتے ساڑے۔ جیویں پئی خداوند نے موسیٰ نوں حکم دتا سی۔
11
. اتے گوشت اتے کھل نوں تنبو احاطے وچوں باہر اگ نال ساڑیا۔
12
. فیر سوختنی قربانی نوں ذبح کیتا اتے ہارون دے پُتراں نے لہؤ اوہنوں دتا۔ تاں اوہنے مذبحے اُتے اوہدے آل دوالے چھڑکیا۔
13
. فیر سوختنی قربانی دے ٹوٹے سنھے اوہدے سِر دے اوہنوں دتے۔ تاں اوہنے اوہناں نوں مذبحے اُتے ساڑیا۔
14
. اتے آندراں اتے پاوے دھوتے اتے اوہناں نوں مذبحے اُتے سوختنی قربانی دے اُتے ساڑیا۔
15
. فیر اوہ لوکاں دی قربانی اگے لئیایا۔ اتے خطا دی قربانی دا بکرا لئیا، جہڑا لوکاں جوگی سی، اتے اوہنوں پہلی قربانی کر کے چاڑھیا۔
16
. تد سوختنی قربانی نوں اگے لئیایا اتے حکم دے موافق اوہنوں چاڑھیا۔
17
. فیر نذر دی قربانی اگے لئیایا اتے اوہدے نال اک مٹھ بھری اتے اوہنوں مذبحے اُتے سویل دی قربانی تھوں وکھ ساڑیا۔
18
. اتے ڈھگے اتے بھیڈو نوں لوکاں دی سلامتی دی قربانی جوگی ذبح کیتا۔ اتے ہارون دے پُتراں نے لہؤ اوہنوں دتا۔ تاں اوہنے مذبحے اُتے اوہدے آل دوالے چھڑکیا۔
19
. اتے ڈھگے دی چربی اتے بھیڈو دی موٹی پُشل اتے اوس چربی نوں جہڑی آندراں ڈھکی رکھدی اے اتے دونویں گردے اتے کلیجے دی جھلی۔
20
. اتے چربی نوں سنھے سینیاں دے لئیا تد چربی مذبحے اُتے ساڑی۔
21
. اتے دونویں سینے اتے سجے موہڈے نوں ہارون نے خداوند اگے ہلاؤن دی قربانی جوگی ہلایا۔ جیویں پئی خداوند نے موسیٰ نوں حکم دتا سی۔
22
. تد ہارون نے آپنے ہتھ لوکاں ول چکے اتے اوہناں نوں برکت دتی۔ اتے خطا دی قربانی اتے سوختنی قربانی اتے سلامتی دی قربانی کرن پچھوں اوہ تھلے اُتر آیا۔
23
. اتے موسیٰ اتے ہارون حضوری دے تنبو وچ وڑے۔ فیر باہر نکلے اتے لوکاں نوں برکت دتی۔ تد سبھے لوکاں نے خداوند دے جلال نوں ویکھیا۔
24
. اتے خداوند دے حضوروں اگ نکلی اتے سوختنی قربانی اتے چربی نوں، جہڑی مذبحے اُتے سی، کھا گئی۔ اتے سبھے لوکاں نے ویکھیا۔ اتے للکار کے خداوند دی وڈیائی کیتی اتے مونھ پرنے ڈِگے۔