1
. اتے خداوند نے موسیٰ نال کلام کر کے آکھیا۔
2
. پئی ہارون اتے اوہدے نال اوہدے پُتراں نوں اتے اوہناں دا لباس اتے مسح دا تیل اتے خطا جوگی وچھا اتے دو بھیڈو اتے فطیری روٹیاں دی چنگیر لؤے۔
3
. اتے سبھے منڈلی نوں حضوری دے تنبو دے بوہے کول کٹھا کر۔
4
. تد موسیٰ نے جیویں خداوند نے آکھیا، اتے منڈلی حضوری دے تنبو دے بوہے کول کٹھی ہوئی۔
5
. تد موسیٰ نے آکھیا پئی ایہہ اوہ گل اے، جہدے کرن دا خداوند نے حکم دتا اے۔
6
. اتے ہارون اتے اوہدے پُتراں نوں اگے لئیایا اتے اوہناں نوں پانی نال دھوتا۔
7
. فیر اوہنوں کڑتا پؤایا اتے اوہنوں لکدا بنھیا اتے اوہنوں جُبا پؤایا، اتے اوہدے اُتے افود پؤایا۔ اتے افود دا پٹکا لویٹیا۔ اتے اوہدے نال اوہنوں بنھیا۔
8
. اتے اوہدے اُتے سینا پوش لائیا، جہدے وچ اوریم اتے تمیم سی۔
9
. اتے اوہدے سِر اُتے عماما رکھیا اتے اوہدے اُتے متھے دی تھاں سونے دا ٹکا رکھیا۔ جیویں پئی خداوند نے موسیٰ نوں حکم دِتا سی۔
10
. اتے موسیٰ نے مسح دا تیل لئیا، اتے مسکن اتے اوہدے اندرلے سبھے سامان نوں مسح کیتا۔اتے اوہنوں پاک کیتا۔
11
. اتے اوہدے وچوں مذبحے اُتے ست وار چھڑکیا، اتے مذبحے اتے سبھے بھانڈیاں اتے حؤدی اتے اوہدی چوکی نوں مسح کیتا۔ تاں جو اوہ پاک ہؤن۔
12
. اتے مسح دے تیل وچوں ہارون دے دے سِر اُتے لُدیا اتے اوہدی تقدیس جوگی اوہنوں مسح کیتا۔
13
. تد موسیٰ ہارون دے پُتراں نوں اگے لئیایا اتے اوہناں نوں کڑتے پؤائے۔ اتے اوہناں نوں لکدے بنھے۔ اتے اوہناں نوں پگاں پؤائیاں۔ جیویں پئی خداوند نے موسیٰ نوں حکم دِتا سی۔
14
. تد اوہ خطا جوگی وچھا اگے لئیایا اتے ہارون اتے اوہدے پُتراں نے آپنے ہتھ خطا دے وچھے دے سِر اُتے رکھے۔
15
. اتے موسیٰ نے اوہنوں ذبح کیتا۔ اتے اوہدا لہؤ لئیا اتے مذبحے دے سِنگاں اُتے سبھنی پاسے آپنی انگلی نال لائیا۔ اتے مذبحے نوں پاک کیتا اتے اوہدے پاوے کول روڑھیا اتے اوہنوں پاک کیتا تاں جو اوہدے اُتے کفارہ دتا جاؤے۔
16
. اتے موسیٰ نے سبھے چربی جہڑی آندراں اُتے سی اتے کلیجی دی جھلی اتے دوہنویں گردےاتے اوہناں دی چربی لئی، اتے اوہناں نوں مذبحے اُتے ساڑیا۔
17
. اتے وچھے نوں سنھے اوہدی کھل اتے گوشت اتے آلایش دے تنبو احاطے وچوں باہر اگ نال ساڑیاجیویں پئی خداوند نے موسیٰ نوں حکم دِتا سی۔
18
. فیر اوہ سوختنی قربانی دے بھیڈو نوں اگے لئیایا اتے ہارون اتے اوہدے پُتراں نے آپنے ہتھ اوہدے سِر اُتے رکھے۔
19
. اتے موسیٰ نے اوہنوں ذبح کیتا اتے اوہدا لہؤ مذبحے اُتے سبھنی پاسے چھڑکیا۔
20
. اتے موسیٰ نے بھیڈو نوں وڈھ کے ٹوٹے کیتے۔ اتے سِر اتے ٹوٹیاں اتے چربی نوں ساڑیا۔
21
. اتے آندراں اتے پاوے پانی نال دھوتے اتے موسیٰ نے بھیڈو دا سبھے کجھ مذبحے اُتے ساڑیا۔ ایہہ سوکتنی قربانی اعلا خشبو خداوند جوگی اگ والی قربانی سی۔ جیویں پئی خداوند نے موسیٰ نوں حکم دتا سی۔
22
. تد اوہ دوجے بھیڈو مطلب کاہناں دی تقدیس دے بھیڈو نوں نیڑے لئیایا، اتے ہارون اتے اوہدے پُتراں نے آپنے ہتھ اوہدے سِر اُتے رکھے۔
23
. اتے موسیٰ نے اوہنوں ذبح کیتا۔ اتے لہؤ وچوں کجھ لئیا، اتے ہارون دے سجے کن دی چُنج اُتے اتے اوہدے سجے ہتھ دے انگوٹھے اُتے اتے سجے پیر دے انگوٹھے اُتے لائیا۔
24
. تد اوہ ہارون دے پُتراں نوں اگے لئیایا اتے لہؤ وچوں کجھ اوہناں دے سجے کناں دِیاں چُنجاں اُتے اتے اوہناں دے سجے ہتھاں دے انگوٹھیاں اُتے اتے اوہناں دے سجے پیراں دے انگوٹھیاں اُتے لائیا۔اتے موسیٰ نے باقی لہؤ مذبحے دے سبھناں پاسے چھڑکیا۔
25
. اتے چربی اتے پُشل اتے سبھے چربی جہڑی آندراں اُتے سی، اتے کلیجے دی جھلی اتے دونویں گردے اتے اوہناں دی چربی اتے سجے موہڈے نوں لئیا۔
26
. اتے فطیری روٹیاں دی چنگیر وچوں جہڑی خداوند دے ساہمنے سی، اک فطیری کلچا اتے اک روغنی کلچا اتے اک چپاتی لئی، اتے اوہنان نوں چربی اتے سجے موہڈے دے اُتے رکھیا۔
27
. اتے سبھناں نوں ہارون اتے اوہدے پُتراں دی تلیاں اُتے رکھیا۔ اتے اوہناں نوں خداوند دے ساہمنے ہلاؤن دی قربانی جوگی ہلائیا۔
28
. فیر موسیٰ نے اوہناں نوں اوہناں دی تلیاں اُتوں لئیااتے مذبحے اُتے سوختنی قربانی دے اُتے ساڑیا۔ کیوں جو ایہہ تقدیس دی قربانی خداوند جوگی اعلا خشبو دار اد والی قربانی سی۔
29
. فیر موسیٰ نے سینے نوں لئیااتے خداوند دے ساہمنے ہلاؤن دی قربانی جوگی ہلائیا۔ اتے ایہہ تقدیس دے بھیڈو وچوں موسیٰ دا حصا ہوئیا، جیویں پئی خداوند نے موسیٰ نوں آکھیا سی۔
30
. تد موسیٰ نے مسح دے تیل وچوں اتے لہؤ وچوں جہڑا مذبحے اُتے سی لئیا، اتے ہارون اُتے اتے اوہدے کپڑیاں اُتے اتے اوہدے پُتراں اُتے اتے اوہناں دے کپڑیاں اُتے چھڑکیا اتے ہارون نوں اتے اوہدے کپڑیاں نوں اتے اوہدے پُتراں نوں اتے اوہناں دے کپڑیاں نوں پاک کیتا۔
31
. اتے موسیٰ نے ہہارون اتے اوہدے پُتراں نوں آکھیا، پئی حضوری دے تنبو دے بوہے کول ایہہ گوشت پکاؤ۔ اتے اوہنوں اوتھے ای تقدیس کیتی ہوئی روٹی دے نال جہڑی چنگیر وچ اے، کھاؤ۔جیویں خداوند نے حکم دے کے آکھیا پئی ہارون اتے اوہدے پُتر اوہنوں کھاؤن۔
32
. اتے جہڑا گوشت اتے روٹی بچے، اوہنوں اگ وچ ساڑو۔
33
. اتے حضوری دے تنبو دے بوہے کولوں ست دیہاڑے تیک باہر نا جاؤ، جد تیک پئی تہاڈی تقدیس دے دیہاڑے پورے نا ہؤن۔ کیوں جو ست دیہاڑیاں وچ تہاڈی تقدیس پوری ہوؤے گی۔
34
. جیویں پئی اج تہاڈے نال کیتا گئیا اے، خداوند نے حکم دتا پئی تہاڈے کفارہ دین جوگی وی تیویں ای کیتا جاؤے۔
35
. اتے تسی حضوری دے بوہے کول دن اتے رات ست دیہاڑے تیک خدمت کردے ہوئے کھلوتے رہؤ گے۔ تاں جو تسی مر نا جاؤو۔ کیوں جو انج ای مینوں حکم دتا گئیا اے۔
36
. تد ہارون اتے اوہدے پُتراں نے اوہناں سبھناں حکماں دے حساب نال جہڑے خداوند نے اوہناں نوں موسیٰ دی راہیں دتے، عمل کیتا۔