1
. اتے خداوند نے موسیٰ نال کلام کر کے آکھیا۔
2
. پئی جیکر کسے دے جُسے دی چمڑی وچ ورم یاں چھالا یاں چِٹا چمکیلا داغ ہؤے، اتے انج ای اوہدے جُسے دی چمڑی وچ کوڑھ دی بلا ہؤے۔ تاں اوہ ہارون کاہن یاں اوہدے پُتراں وچوں اک دے کول جہڑا کاہن اے، لئیایا جاؤے۔
3
. تد اوہ کاہن اوہدے جُسے دے چمڑے دے مرض اُتے نگاہ کرے۔ جیکر مرض دی تھاں دے وال چِٹے ہو گئے ہون، اتے مرض دی تھاں چمڑے نالوں ڈوہنگی ہؤے تاں ایہہ کوڑھ دی بلا اے۔ جد کاہن اوہنوں اجیہا ویکھے تاں اوہنوں ناپاک گِنے۔
4
. جیکر اوہ چمکیلا داغ اوہدے جُسے دی چمڑی وچ چِٹا ہؤوے پر اوہدی تھاں چمڑے نالوں ڈوہنگی نئیں اتے وال وی چِٹے نئیں، تاں کاہن اوہنوں ست دیہاڑے تیکر نظر بند کرے۔
5
. فیر ستویں دیہاڑے اوہنوں ویکھے۔ اتے جیکر اوہ بلا کھلوتی رہؤے اتے چمڑی وچ کھِلری نئیں، تاں کاہن اوہنوں ست دیہاڑے ہور نظر بند رکھے۔
6
. فیر ستویں دیہاڑے دوجی واری اوہنوں ویکھے۔ تد جیکر مرض دا رنگ کالا ہون لگ پؤے اتے اوہ چمڑی وچ کھِلریا نا ہؤے، تاں کاہن اوہنوں پاک گِنے۔ پئی ایہہ قُوبا اے۔ اخیر اوہ پنے کپڑے دھوؤے اتے اوہ پاک ہوؤے گا۔
7
. اتے جیکر اوہدے پاک مِتھن جوگی کاہن دے ویکھن مگروں قُوبا اوہدی چمڑی وچ کھِلر گئیا ہؤے تاں اوہ کاہن نوں فیر وکھایا جاؤے۔
8
. تاں جیکر کاہن ویکھے پئی قُوبا چمڑی وچ کھِلر گئیا اے تاں اوہ اوہنوں ناپاک گِنے پئی ایہہ کوڑھ اے۔
9
. جیکر کسے نوں کوڑھ دا مرض ہؤے۔ تاں اوہ کاہن دے کول لئیایا جاؤے۔
10
. تاں کاہن اوہنوں ویکھے اتے جد چمڑی وچ چِٹا ورم ہؤے اتے اوہدے وال چِٹے ہو گئے ہون اتے ورم دی تھاں وچ جیوندا گوشت ہؤے۔
11
. تاں ایہہ اوہدی چمڑی وچ پرانا کوڑھ اے۔ تد کاہن اوہنوں ناپاک گِنے اتے اوہنوں نظر بند نا کرے۔ کیوں جو اوہ ناپاک اے۔
12
. اتے جیکر کوڑھ چمڑی اُتے جاپے، اتے مریض دے جُسے نوں سِر تھوں پیراں تیکر سبھے، جہڑا کاہن دی نگاہ وچ آؤندا اے، لُکاؤے۔
13
. تاں کاہن اوہنوں ویکھے اتے جیکر کوڑھ نے اوہدے سبھے جُسے نوں لُکایا اے تاں مریض نوں پاک مِتھے۔ کیوں جو اوہ سارا چِٹا ہو گئیا اے۔ تاں اوہ پاک اے۔
14
. پر جہڑے دیہاڑے اوہدے وچ زجیوندا گوشت نظریں آؤے، اوہ ناپاک ہؤے گا۔
15
. جد کاہن جیوندا گوشت ویکھے تاں اوہنوں ناپاک گِنے۔ کیوں جو جیوندا گوشت ناپاک اے۔ اتے ایہہ کوڑھ اے۔
16
. اتے جیکر جیوندا گوشت پرت کے چِٹا ہو جاؤےتاں اوہ کاہن دے کول آؤے۔
17
. اخیر کاہن ویکھے پئی مرض دی تھاں چِٹی ہو گئی اے، تاں مریض نوں پاک گِنے۔ کیوں جو اوہ پاک اے۔
18
. اتے جیکر کسے دے جُسے دی چمڑی اُتے پھوڑا سی، اتے اوہ چنگا ہو گئیا۔
19
. اتے پھوڑے دی تھاں وچ چِٹی اُگھری ہوئی تھاں یاں چمکیلا داغ لالگی والا ہؤے تاں اوہ کاہن نوں وکھایا جاؤے۔
20
. اخیر جیکر کاہن ویکھے پئی اوہ تھاں چمڑی تھوں تھلے اے، اتے اوہدے وال چِٹے ہو گئے نیں، تاں کاہن اوہنوں ناپاک مِتھے۔ کیوں جو ایہہ کوڑھ دی بلا اے۔ جہڑی پئی پھوڑے تھوں جمی۔
21
. اتے کاہن ویکھے پئی اوہدے وال چِٹے نئیں ہؤئے اتے اوہ چمڑی تھوں تھلے نئیں اتے اوہدا کالا رنگ اے تاں کاہن اوہنوں ست دیہاڑے نظر بند رکھے۔
22
. تد جیکر اوہ چمڑی اُتے کھِلر گئیا ہؤے تاں کاہن اوہنوں ناپاک گِنے کیوں جو ایہہ کوڑھ اے۔
23
. جیکر اوہ چمکیلا داغ آپنی تھاں اُتے ٹھیریا ہؤے اتے کھِلریا نا ہؤے تاں ایہہ پھوڑے دا داغ اے۔ کاہن اوہنوں پاک آکھے۔
24
. جیکر کسے دی چمڑی اگ نال سڑ گئی ہؤے اتے سڑن دا داغ چمکیلا چِٹا لالگی یا چِٹا ہوندا ہویا جاپے۔
25
. تاں کاہن اوہنوں ویکھے۔ جیکر چمکیلے داغ وچ وال چِٹے ہو گئے ہون اتے اوہ ویکھن وچ چمڑی نالوں تھلے جاپے، تاں ایہہ کوڑھ اے، جہڑا داغ وچوں جمیا۔ تاں کاہن اوہنوں ناپاک مِتھے۔ کیوں جو ایہہ کوڑھ دی بلا اے۔
26
. پر جیکر کاہن ویکھے پئی اوس چمکیلے داغ اُتے چِٹے وال نئیں، اتے نا اوہ چمڑی تھوں ڈوہنگا اے، سگوں اوہدی چمک وی گھٹ ات تاں اوہ اوہنوں ست دیہاڑے تیکر ڈک دؤے۔
27
. اتے ستویں دیہاڑے کاہن اوہنوں ویکھے۔ جیکر اوہ چمڑی اُتے چوکھا کھِلر گئیا ہؤے تاں کاہن اوس بندے نوں ناپاک گِنے۔ کیوں جو اوہنوں کوڑھ دی بلا اے۔
28
. اتے جیکر اوہ چمکیلا داغ آپنی تھاں اُتے اوتھے دا اوتھے ای رہؤے اتے چمڑی اُتے کھِلریا ہویا نا ہؤے سگوں اوہدی چمک وی گھٹ ہؤے تاں اوہ نِراسڑ جاؤن دے پاروں پھُلئیا ہویا اے اتے کاہن اوس بندے نون پاک گِنے کیوں جو اوہ داغ سڑن جاؤن دے پاروں اے۔
29
. جیکر کسے بندے یاں بی بی دے سِر یا ٹھوڈی وچ داغ ہؤے۔
30
. تاں کاہن اوس داغ نوں ویکھے اتے جیکر ویکھے پئی اوہ چمڑی تھوں ڈوہنگا جاپدا اے اتے اوہدے اُتے زرد رنگ دے پتلے لُوں نیں تاں کاہن اوہنوں ناپاک مِتھے کیوں جو اوہ سعفا اے جہڑا سِر یاں ٹھوڈی دا کوڑھ اے۔
31
. اتے جیکر کاہن ویکھے پئی اوہ سعفا دی بلا چمڑی نالوں ڈوہنگی نئیں جاپدی اتے اوہدے اُتے کالے وال نئیں نیں تاں کاہن اوہنوں، جنہوں سعفا دا مرض اے، ست دیہاڑے تیکر ڈکی رکھے۔
32
. اتے ستوین دیہاڑے کاہن اوس بلا نوں ویکھے۔ اتے جیکر ویکھے پئی سعفا کھِلریا نئیں اتے اوہدے اُتے کوئی زرد رنگ دا وال وی نئیں اتے سعفا چمڑی نالوں ڈوہنگا نئیں جاپدا۔
33
. تاں اوس شخص دے وال مُنے جاؤن پر جتھے سعفا اے، اوہ تھاں نا مُنی جاؤے اتے کاہن اوہنوں جنہوں سعفا کا مرض اے ست دیہاڑے ہور ڈکی رکھے۔
34
. فیر ستویں دیہاڑے کاہن سعفا ویکھے اتے جیکر ویکھے پئی سعفا چمڑی وچ کھِلریا نئں اتے نا ای اوہ چمڑی نالوں ڈوہنگا نظریں آوندا اے تاں کاہن اوہنوں پاک مِتھے اتے اوہ آپنے کپڑے دھؤے اتے صاف ہؤے۔
35
. پر جیکر اوہدی صفائی مگروں سعفا اوہدی چمڑی اُتے کھِلر جاؤے تاں کاہن اوہنوں ویکھے۔
36
. اتے جیکر سعفا اوہدی چمڑی اُتے کھِلریا ہویا نظریں آوے تاں کاہن زرد وال نوں نا لبھے کیوں جو اوہ شخص ناپاک اے۔
37
. پر جیکر اوہنوں سعفا آپنی تھاں اُتے اوتھے دا اوتھے ای نظریں آؤے اتے اوہدے اُتے کالے وال نکلے ہون تاں سعفا چنگا ہو گئیا۔ اوہ شخص پاک اے اتے کاہن اوہنوں پاک مِتھے۔
38
. اتے جیکر کسے بندے یان بی بی دے جُسے دی چمڑی وچ چمکیلے داغ یاں چِٹے چمکیلے داغ ہون۔
39
. تاں کاہن ویکھے اتے اجیکر اوہناں دے جُسے دی چمڑی دے داغ کالے ہوندے ہوئے چِٹے ہون تاں اوہ چھِیپ اے جہڑی چمڑی وچ نکل آئی اے۔ اوہ شخص پاک اے۔
40
. اتے جہدے سِر دے وال ڈِگ گئے ہون، اوہ گنجا تاں ہے، پر پاک اے۔
41
. اتے جہدے وال متھے ولوں ڈگ گئے ہون، اوہ چندلا تان ہے، پر پاک اے۔
42
. پر اوس گنجے یا چندلے سِر اُتے لالگی والا چِٹا داغ ہؤے تاں ایہہ کوڑھ اے، جہڑا اوہدے گنجے یاں چندلے سِر اُتے نکلئیا اے۔
43
. اکیر کاہن اوہنوں ویکھے اتے جیکر اوہ ویکھے پئی اوہدے گنجے یا چندلے سِر اُتے اوہ داغ اجیہا لالگی والا چِٹے رنگ دا اے جیہا چمڑی دے کوڑھ وچ ہوندا اے۔
44
. تاں اوہ بندہ کوڑھی اے۔ اوہ ناپاک اے اتے کاہن اوہنوں لازمی ناپاک مِتھے کیوں جو اوہ مرض اوہدے سِر اُتے اے۔
45
. اتے جہڑا کوڑھی ایس بلا وچ ہؤے، اوہدے کپڑے پاٹے اتے اوہدے سِر دے وال کھِلرے رہئن اتے اوہ آپنے اُتلے بُلھ نوں ڈھکے اتے چیک چیک کے آکھے 'ناپاک! ناپاک!'۔
46
. جِنے دیہاڑے اوہ ایس بلا وچ پھسیا رہؤے، اوہ ناپاک رہؤے گا۔ اتے اوہ ہے وی ناپاک۔ اخیر اوہ کلا رہئیا کرے۔ اوہدا مکان لشکری احاطے تھوں باہر ہؤے۔
47
. جیکر کسے اُن یا کتان دے کپڑے نوں کوڑھ دا داغ ہؤے۔
48
. یاں کتانی کپڑے دِی تند یا بُنت وچ یاں اُن وچ یاں چمڑے وچ یاں کسے شئے وچ جہڑی چمڑے نال بنائی گئی اے۔
49
. جیکر اوہ داغ ہریالا یا لالگی والا کپڑے وچ ہؤے یا چمڑے وچ تند یا بُنت وچ ہؤے یاں چمڑے دے سامان وچوں کسے شئے وچ ہؤے۔ تاں اوہ کوڑھ اے۔ اوہ کاہن نوں وکھایا جاؤے۔
50
. اتے کاہن اوس داغ نوں ویکھے اتے جہدے اُتے اوہ داغ اے اوہنوں ست دیہاڑے تیکر ڈکی رکھے۔
51
. فیر ستویں دیہاڑے اوہنوں ویکھے اتے جیکر اوہ داغ کپڑے وچ کھِلر گئیا ہؤے یاں تند وچ یا بُنت یاں چمڑے وچ۔ بھانویں کسے شئے وچ جہڑی چمڑے نال بنائی گئی ہؤے۔ تاں ایہہ داغ خراب کوڑھ اے اتے اوہ ناپاک اے۔
52
. تاں اوہ کپڑے نوں اُنی ہؤے یا کتانی جہدی تند یا بنت وچ داغ اے یا چمڑے دی شئے نوں جہدے وچ اوہ داغ اے، ساڑ دئے۔ کیوں جو ایہہ خراب کوڑھ اے اوہ اگ نال ساڑیا جاؤے۔
53
. اتے جیکر کاہن ویکھے پئی اوہ داغ کپڑے وچ تند وچ یاں بنت وچ یاں چمڑے دی کسے شئے وچ کھِلر نئیں گئیا۔
54
. تاں کاہن اوہنوں دھو دیئن دا حکم کرے۔ تد ست دیہاڑے ہور اوہنوں ڈکی رکھے۔
55
. اتے کاہن فیر اوس دھوتے ہوئے نوں ویکھے۔ جیکر ویکھے پئی داغ دا رنگ نئیں بدلیا۔ بھانویں اوہ کھِلریا نئیں، تاں اوہ ناپاک اے۔ اوہ اگ نال ساڑیا جاؤے۔ کیوں جو کوڑھ اوہدے باہر وار یا اندر وار اے۔
56
. جیکر اوہ ویکھے پئی دھؤن مگروں اوہ کالگا ہو گئیا اے تاں اوہ اوس کپڑے نال یاں تند نال یا بنت نال یاں فیر چمڑے نال داغ دی تھاؤں وڈھ دؤے۔
57
. جیکر اوہ کپڑے وچ تند وچ یا بنت وچ یاں کسے چمڑے دی شئے وچ فیر نظریں آؤے تاں ایہہ کھِلرن والا کوڑھ اے۔ ججہدے اُتے اوہ ہے، اوہنوں اگ نال ساڑیا جاؤے۔
58
. اتے کپڑا یاں تند یا بنت یاں چمڑے دی کوئی شئے جہدے دھؤن نال داغ چلا جاندا اے، دوجی واری دھوتا جاؤے اتے اوہ پاک اے۔
59
. ایہہ کوڑھ دے داغ دی شریعت اے۔ جہڑا اُن دے کپڑے وچ یاں کتان وچ یاں تند وچ یاں بنت وچ یاں چمڑے دی کسے شئے وچ ہؤے، جہدے حساب نال اوہنوں پاک یاں ناپاک مِتھیا جاؤے۔