1
. اتے خداوند نے موسیٰ اتے ہارون نال کلام کر کے آکھیا۔
2
. پئی بنی اسرائیل نال کلام کر کے آکھ۔ پئی دھرتی دے سبھے ڈنگراں وچوں ایہہ جانور نیں، جنہاں نوں تسی کھا سکدے او۔
3
. سبھے چوپائے جنہاں دے کھر وڈے ہوئے ہون اتے اوہ جگالی کردے ہون۔ تسی کھاؤ۔
4
. پر ایہناں وچوں جہڑے جگالی کردے نیں اتے جنہاں دے کھر ہوندے نیں تسی ایہہ نا کھاؤنا۔ اُوٹھ، کیوں جو اوہ جگالی کردا اے، پر اوہدے کھر وٖے ہوئے نئیں۔ ایسے لئی اوہ تہاڈے جوگی ناپاک اے۔
5
. اتے وبر، بھانویں اوہ جگالی کردا اے، پر اوہدے کھر وڈے ہوئے نئیں۔ اوہ تہاڈے جوگی ناپاک اے۔
6
. اتے سہیا، جہڑا جگالی کردا اے، پر اوہدے کھر وڈے ہوئے نئیں۔ ایس لئی اوہ تہاڈے جوگی ناپاک اے۔
7
. اتے سُور، پئی اوہدے کھر وڈے ہوئے تاں ہین، پر اوہ جگالی نئیں کردا۔ ایس لئی اوہ تہاڈے جوگی ناپاک اے۔
8
. تسی ایہناں دے گوشت وچوں کجھ نا کھاؤنا، اتے نا ای اوہنوں ہتھ لاؤنا۔ کیوں جو اوہ تہاڈے جوگی ناپاک اے۔
9
. اتے پانی دے سبھے جانوراں وچوں تسی ایہہ کھاؤنا۔ سمندراں، دریاواں اتے چھپڑاں وچوں سبھے ، جنہاں دے کھمب اتے چھلکے ہون۔ تسی اوہ ای کھاؤنا۔
10
. اتے سمندراں اتے دریاواں وچوں سبھے، جنہاں دے کھمب یاں چھلکے نا ہون، سبھے جہڑے پانی وچ رینگدے نیں اتے سبھے جانور جہڑے اوہدے وچ رہندے نیں، تہاڈے جوگی ناپاک نیں۔
11
. اوہ تہاڈے جوگی ناپاک نیں۔ اوہناں دے گوشت وچوں تسی نا کھاؤنا۔ اتے اوہناں دِیاں آلائشاں تھوں کریچ کرنا۔
12
. اوہ سبھے پانی وچ رہن والے جنہاں دے کھمب اتے چھلکے نا ہون، تہاڈے جوگی ناپاک نیں۔
13
. اتے پکھیرؤاں وچوں، جنہاں تھوں تسی کریچ کرو، اتے نا کھاؤ، اوہ ایہہ نیں۔ نسر اتے ہما اتے عقاب۔
14
. چیل اتے جرے اتے اوہناں دی سبھے قِسماں۔
15
. اتے سبھے غراب، اتے اوہناں دی سبھے قِسماں۔
16
. اتے شُتر مرغ اتے ابابیل اتے حواصل اتے شِکرا اتے اوہناں دی سبھے قِسماں۔
17
. اتے چُغد اتے ماہی گیر اتے اُلو۔
18
. اتے بوم شب اتے بگلا اتے گِدھ۔
19
. اتے لقلق اتے بوتیمار اتے اوہناں دی قِسماں، اتے ہدہد اتے چمگادڑ۔
20
. اتے سبھے رِڑن والے کھمب والے جاندار جہڑے چار پیراں تے ٹردے نیں، تہاڈے جوگی ناپاک نیں۔
21
. پر رِڑن والے کھمب والے جانداراں وچوں جہڑے چار پیراں تے ٹردے نیں، تسی ایہہ کھاؤنا۔ جنہاں دِیاں لتاں ہتھاں نالوں چوکھیاں لمیاں اتے اوہ دھرتی اُتے ٹپدے نیں۔
22
. جنہاں نوں تسی کھا سکدے اوہ، ایہہ نیں۔ ٹرِڈی اتے اوہدی سبھے قِسماں۔ گنجی ٹرِڈی اتے اوہدی سبھے قِسماں اتے جھینگر اتے اوہدی سبھے قِسماں اتے گھاء دا ٹرِڈا اتے اوہدی سبھے قِسماں۔
23
. پر سبھے کھمب رکھن والے رِڑن والے جاندار، جنہاں دے چار پیر نیں، تہاڈے لئی ناپاک نیں۔
24
. ایہناں نال تسی ناپاک ہوؤ گے اتے جہڑا وی اوہناں دی آلائشاں نوں ہتھ لاؤے گا، اوہ ڈیگر ویلے تیک ناپاک رہؤے گا۔
25
. اتے جہڑا وی اوہناں دی آلائشاں نوں چُکے اتے اوہ آپنے کپڑے دھوؤے اتے ڈیگر ویلے تیک ناپاک رہؤے گا۔
26
. سبھے حیوان جنہاں دے کھر وڈے ہوئے نئیں، اتے سبھے جہڑے جگالی نئیں کردے، تہاڈے جوگی ناپاک نیں۔ جہڑا وہ اوہناں نوں ہتھ لاؤے ، ناپاک ہؤے گا۔
27
. اتے سبھے چار پیراں نال ٹرن والئیاں وچوں اوہ، جہڑے آپنے پنجیاں بھار ٹردے نیں، تہاڈے جوگی ناپاک نیں۔جہڑا وی اوہناں دی لاش نوں ہتھ لاؤے گا، اوہ ڈیگر ویلے تیک ناپاک رہؤے گا۔
28
. اتے جہڑا وی اوہناں دی لاش نوں چُکے، اوہ آپنے کپڑے دھؤے اتے ڈیگر ویلے تیک رہؤے گا۔ کیوں جو اوہ تہاڈے جوگی ناپاک اے۔
29
. اتے رِڑن والے جانداراں وچوں جہڑے دھرتی اُتے رِڑدے نیں، تہاڈے جوگی ایہہ ناپاک نیں۔ نیولا اتے گوہ اتے اوہناں دی سبھے قِسماں۔
30
. حِرزون اتے ورل اتے کِرلی اتے سانھا اتے کِرگٹ۔
31
. رِڑن والئیاں وچوں ایہہ تہاڈے جوگی ناپاک نیں۔ جہڑا وی اوہناں وچوں موئے ہؤے نوں ہتھ لاؤے گا، دھمی ویلے تیکر ناپاک رہؤے گا۔
32
. اتے جہدے اُتے اوہناں وچوں کوئی مؤیا ہویا ڈِگے، اوہ ناپاک ہؤے گا۔ لکڑی دے سبھے بھانڈے اتے کپڑے اتے چمڑا اتے ٹاٹ اتے ہر اک بھانڈا جہڑا ورتیا جاندا اے، اوہ پانی وچ ڈوبیا جاؤے اتے دھمی ویلے تیکر ناپاک رہؤے گا۔ فیر پاک ہؤے گا۔
33
. اتے ہر اک مِٹی دا بھانڈا جہدے اندر اوہنوں وچوں کوئی شئے ڈِگے تاں جو کجھ اوہدے اندر اے، ناپاک ہؤے گا۔اتے اوہ بھانڈا بھنیا جاؤے۔
34
. سبھے خوراک جہڑی کھاہدی جاندی اے، جیکر اوہدے اُتے ایس بھانڈے دا پانی پؤے تاں اوہ ناپاک ہؤے گی۔ اتے ہر اک پین والی شئے ، جہڑی اوہدے وچ پیتی جاندی اے، ناپاک ہوؤے گی۔
35
. اتے سبھے کجھ جہدے اُتے اوہناں لاشاں وچوں کجھ پؤے ناپاک ہؤوے گا۔ تندور ہؤے یاں چُلہا، اوہنوں تسی بھن دئینا۔ کیوں جو اوہ ناپاک اے۔ اتے اوہ تہاڈے جوگی ناپاک ہؤے گا۔
36
. پر چشما اتے کھوء اتے سبھے کٹھا کیتا ہویا پانی پاک ہؤے گا۔ پر جو اوہدے وچ اوہناں دِیا لاشاں نال مس ہوؤے اوہ ناپاک ہوؤے گا۔
37
. اتے جیکر اوہناں دِیاں لاشاں وچوں کجھ کسے بی اُتے جہڑا بیجیا جاندا اے پؤے، تاں اوہ پاک رہؤے گا۔
38
جیکر بیج نوں پانی لگ گئیا ہؤے اتے اوہدے اُتے اوہناں دی لاش وچوں کجھ ڈِگے تاں اوہ تہاڈے جوگی ناپاک ہوؤے گا۔
39
. جیکر کوئی جانور جنہوں تسی کھا سکدے او، مر جاؤے تاں جہڑا وی اوہدی لاش نوں ہتھ لاؤے، دھمی ویلے تیکر ناپاک ہوؤے گا۔
40
. اتے جہڑا وی اوہدی لاش وچوں کجھ کھاؤے اوہ آپنے کپڑے دھوؤے اتے دھمی ویلے تیکر ناپاک رہؤے گا۔ اتے جہڑا وہ اوہدی لاش نوں چُکے آپنے کپڑے دھوؤے اتے دھمی ویلے تیکر ناپاک رہؤے گا۔
41
. اتے سبھے رِڑن والے جاندار جہڑے دھرتی اُتے رِڑدے نیں، اوہ ناپاک نیں۔ اوہناں نوں نا کھاؤنا۔
42
. اتے سبھے جہڑے آپنے سینے نال ٹردے اتے جہڑے چار پیراں نال ٹردے نیں اتے بہتیرے پیراں والے سبھے رِڑن والئیاں وچوں جہڑے دھرتی اُتے رِڑدے نیں، اوہناں نوں نا کھاؤنا۔ کیوں جو اوہ ناپاک نیں۔
43
. اتے تسی رِڑن والے جاندار دی، جہڑا دھرتی اُتے رِڑدا اے، کسے شئے نال آپنے آپ نوں داغی نئیں لاؤنا۔ اتے نا آپنے آپ نوں اوہناں نال ناپاک کرنا۔ پئی تسی ناپاک ہو جاؤو گے۔
44
. کیوں جو میں خداوند تہاڈا رب ہاں۔ تسی آپنے آپ نوں پاک کرو اتے پاک ہو جاؤو۔ ایس لئی پئی میں پاک ہاں۔ اتے رِڑن والے جاندار دی کسے شئے نال جہڑی دھرتی اُتے ہلدی اے، آپنے آپ نوں ناپاک نا کرنا۔
45
. کیوں جو میں خداوند ہاں جہڑا تہانوں مصر وچوں کڈھ لئیایا تاں جو تہاڈا رب ہؤواں۔ اخیر تسی پاک او، کیوں جو میں پاک ہاں۔
46
. ڈنگر اتے پکھیرو اتے سبھے جاندار جہڑے پانی وچ ٹردے نیں، اتے سبھے جہڑے دھرتی اُتے رِڑدے اوہناں پاروں ایہو ای شریعت اے۔
47
. تاں جو پاک اتے ناپاک وچ اتے اوہناں جانوراں وچ جہڑے کھاہدے جاندے نیں، اتے جہڑے کھاہدے نئیں جاندے، تسی ونڈ کرو۔