1
. فیر ہارون دے پُتراں ندابؔ اتے ابیہوؔ نے آپنا آپنا بخور سوز لئیا اتے اوہناں وچ اگ سُٹی اتے اوہدے اُتے بخور رکھیا اتے خداوند دے ساہمنے بے حکمی اگ کیتی، جہدا خداوند نے حکم نئیں دتا سی۔ اتے ندبؔ اتے ابیہو نے جہڑے ہارون دے پُتر سن آپنے آپنے بخور دان نوں لے کے اوہناں وچ اگ بھری اتے اوہدے اُتے اتے اُتلی اگ جہدا حکم خداوند نے اوہناں نوں نئیں دتا سی خداوند دے حضور کیتی۔
2
. اتے خداوند دے حضوروں اگ نکلی اتے اوہناں دونواں نوں کھا گئی اتے اوہ خداوند دے حضور مر گئے۔
3
. تد موسیٰ نے ہارون نوں آکھیا ایہہ اوہو ای گل اے، جہڑی خداوند نے آکھی سی پئی جہڑے میرے نیڑے آؤن اوہ مینوں پاک جانن، اتے سبھے لوکاں دے اگے میری وڈیائی کرن اتے ہارون چُپ رہئیا۔
4
. فیر موسیٰ نے میسائیل اتے الصفن نوں جہڑے ہارون دے چاچے عزی ایل دے پُتر سن، سد کے اوہناں نوں آکھیانیڑے آؤ اتے آپنے بھراواں نوں مقدِس اگوں چک کے لشکری احاطے دے باہر لےیجاؤ۔
5
. اخیر اوہ نیڑے گئے اتے اوہناں نوں اوہناں دے کرتوتاں سنھے چک کے موسیٰ دے حکم موجب لشکری احاطے دے باہر لے گئے۔
6
. اتے موسیٰ نے ہارون اتے اوہدے پُتراں الیعزر اتے اتمر نوں آکھیاپئی نا تیرے سِر دے وال کھِلرن اتے نا توں آپنے کپڑے پھاڑیِں تاں جو نا توں مریں اتے ناں سبھے منڈلی اُتے اوہدا قہر پؤے پر اسرائیل دے سبھے گھرانے دے لوک جہڑے تہاڈے بھرا نیں، اوس اگ اُتے جہڑی خداوند نے لائی اے، ماتم کرن۔
7
. اتے تسی منڈلی دے تنبو دے بوہے وچوں باہر نا جانا تاں جو ایویں نا ہوؤے پئی تسی مر جاؤ۔ کیوں جو خداوند دا مسح کرن دا تیل تہاڈے اُتے لگئیا ہویا اے۔ اخیر اوہناں نے موسیٰ دے آکھے دے موجب عمل کیتا۔
8
. اتے خداوند نے ہارون نوں آکھیا پئی ۔
9
. توں یاں تیرے پُتر مے یاں شراب پی کے کدی وی منڈلی دے تنبو وچ ناں وڑن تاں جو تسی مر ناں جاؤ۔ ایہہ تہاڈے جوگی پیڑھی تھوں پیڑھی تیکر ہمیشاں اک قانون رہؤے گا۔
10
. تاں جو تسی مقدِس اتے عام شیئواں وچ اتے پاک اتے ناپاک وچ فرق کر سکو۔
11
. اتے بنی اسرائیل نوں اوہ سبھے قانون سکھا سکو جہڑے خداوند نے موسیٰ دی راہیں دتے نیں۔
12
. فیر موسیٰ نے ہارون اتے اوہدے پُتراں الیعزر اتے اتمر نوں جہڑے باقی رہ گئے سن آکھیاپئی خداوند دی اگ والی قربانیاں وچوں جہڑی نذر دی قربانی بچی اے، اوہنوں لے لئو اتے بنا خمیر دے اوہنوں مذبحے دے کول کھاؤ کیوں جو ایہہ چوکھی پاک اے۔
13
. تسی اوہنوں پاک تھاں وچ کھاؤ۔ کیوں جو خداوند دی اگ والی قربانیاں وچوں ایہہ تیرا حصا اتے تیرے پُتراں دا حصا اے۔ کیوں جو ایویں ای مینوں حکم دتا گئیا اے۔
14
. پر ہلاؤن دا سینا اتے چُکن دا موہڈا، جہڑا اے، اوہناں نوں کسے پاک تھاں وچ کھاؤ۔ توں اتے تیرے پُتر اتے تیری دھِیاں تیرے نال۔ کیوں جو بنی اسرائیل دی سلامتی دی قربانیاں وچوں ایہہ تیرا حصا اتے تیرے پُتراں دا حصا اے۔
15
. چُکن دا موہڈا اتے ہلاؤن دا سینا جہڑا ساڑن دی چربی سنھے لئیایا جاؤے گا۔ تاں جو خداوند دے ساہمنے ہلاؤن دی قربانی جوگی ہلایا جاؤے۔ اوہ دونویں تیرے اتے تیرے پُتراں دے ہون گے۔ خداوند دے حکم دے حساب نال ایہہ ابدی فرض ہوؤے گا۔
16
. اتے موسیٰ نے خطا دے بکرے دی لابھ کیتی۔ تاں معلوم ہویا پئی اوہ ساڑیا گئیا سی۔ تد اوہ الیعزر اتے اتمر ہارون دے پُتراں وچوں جہڑے باقی سن، ناراض ہویا اتے آکھیا۔
17
. پئی تسی خطا کیتی ، قربانی پاک تھاں وچ کیؤں نا کھاہدی۔ اوہ پاک شیئواں وچ پاک اے،اتے خداوند نے تہانوں دتی اے۔ تاں جو تسی منڈلی دے گناہ چک کے خداوند دے ساہمنے اوہناں دا کفارہ دؤو۔
18
. ویکھو! اوہدا لہؤ مقدِس وچ نئیں سی واڑیا گئیا، اتے واجب سی پئی تسی اوہنوں پاک تھاں وچ کھاندے۔ جیویں میں تہانوں حکم دتا سی۔
19
. تد ہارون نے موسیٰ نوں آکھیا۔ پئی اج ای اوہناں نے آپنی خطا دی قربانیاں اتے سوختنی قربانیاں خدا دے ساہمنے کیتیاں اتے میرے اُتے انج دے جوکھے ہوئے۔ اخیر جیکر میں اج ای خطا دی قربانی کھا لیندا تاں کیہ ایہہ خداوند دی نگاہ وچ چنگا ہوندا؟
20
. موسیٰ نے جد ایہہ سُنیا تاں اوہنوں بھلا لگا۔