¹ ۔ تد واورولے چوںکلام کرکے خُداوند نے ایوبؔ نُوں آکھیا پئی ۔ ² ۔ ایہہ کون اے جیہڑا ناسمجھی دیاں گلّاں کرکے صلاح نُوں چھڈ دیندا اے ؟ ³ ۔ اَپنا لَک بھن تے تگڑا ہو۔ میں تیرے نال سوال کراں گا ۔ ایس لئی تُوں مینوں دَس ۔ ⁴ ۔ تُوں کِتھے جیہدوں میں دھرتی دی نیو رکھی سی ؟ تیرے چہ عقل ہے اے تے دَس ۔ ⁵ ۔ کیہ تینوں پتا اے کِنے ایہنوں میچیا ؟ تے کِنے ایہدے تے ڈوری کھِچی ؟ ⁶ ۔ کیہڑی شے تے اوہدی نیہِ نئیں رکھی گئی تے کِنے اوہدے سِرے دا پتھر رکھیا ؟ ⁷ ۔ جیہدوں سویر تارے رَل کے گاؤندے سَن ۔ تے خُدا دے پُتر خُوشی نال نعرے لاندےسَن۔ ⁸ ۔ کِنے سمُندر نُوں بوہویاں نال بند کیِتا ۔ جیہدوں اوہ اینج پھُٹ پیا ۔ جِس طرحاں کُکھ چوں ؟ ⁹ جیِدوں میں بدلاں نُوں اوہد ا لِباس تے ہنیرے نُوں ولیٹن دا کپرا بنایا ۔ ¹⁰ ۔ تے اوہدے لئی میں اَپنیاں حِدیاں مِتھیاں تے اوہنوں بوُہے لائے ۔ ¹¹ ۔ تے آکھیا ایتھوں تیِکر تُوں آویں گا تے اَگے ناں ودھیں گا ۔ تے ایتھے تیریاں لہراں دا زور ٹُٹے گا ۔ ¹² ۔ کیہِ تُوں اَپنے دیہاڑیاں چہ صبح تے حُکم چلایا اے ۔ یا فجر ویلے اوہدی تھاں دسی اے ۔ ¹³ ۔ پئی اوہ دھرتی تے کنڈیاں پھڑ لے تے بدکار اوتھوں نسائے جان گے ۔ ¹⁴ ۔ اوہ اینج بدلدی اے جِس طرحاں مُہر دے تھلے چیِکنی مِٹی ۔ تے اینج جیویں کپڑے پائے ہوئے ظاہر ہو جاندی اے ۔ ¹⁵ ۔ تے بدکاراں توں اوہناں دی لو لے لئی جاوے گی ۔ تے تے ودھائی ہوئی بانہہ بھن دِتی جاوے گی ۔ ¹⁶ ۔ کیِہ تے سُمند ر دے سوتیاں چہ وڑھیا ایں یا ٹوئیاں دے تہہ خانیاں چہ چلیا ایں ؟ ¹⁷ ۔ کیِہ موت دے بُہے تیرے لئی کھولے گئے نیں ۔ یا تُوں موت دے پرچھاویں دیاں برُوہاں نُوں ویکھیا اے؟ ¹⁸ ۔ کیِہ تُوں دھرتی دی ڈوُنگھیائی نُوں جان لیا اے ؟ ایہہ سرا کُجھ جاننا ایں تے دَس؟ ¹⁹ ۔ پئی لو دی تھاں دا کیہڑا راہ اے تے ہنیرے دی تھاں کِتھے آ؟ ²⁰ ۔ کیوں جو تُوں ہر شے اوہدی حَد تیِکر لے جا سکنا ٰایں ۔ تے تُوں اوہدے گھر دیاں راہواں جاننا ایںَ ²¹ ۔ بناں شَک تُوں جاننا ایں کیوں جو تدھ تُوں جمیا سی تے تیرے دیہاڑیاں دی گِنتی بوہت اے ۔ ²² ۔ کیِہ تُوں برف دے گوداماں چہ وڑھیاں ایں یا تُوں گڑھیاں دے گوداماں نُوں ویکھیا اے ؟ ²³ ۔ جہنوں میں دُکھ دے ویلے دے لئی تے لڑن تے جنگ دے دیہاڑے لئی رکھیا ہوئیا اے۔ ²⁴ ۔ کِس راہ وَلوں لو ودھددی تے چڑھدے وَلوں واہ دھرتی تے ونڈی جاندی اے ؟ ²⁵ ۔ کِہنے میِنہہ دے ہَڑ دے لئی نالیاں تے بجلیاں دی گرج دیاں راہواں مِتھیاں نیں ؟ ²⁶ ۔ تاں جو اوس دھرتی تے میِنہہ وَسے جِتھے لوکی نئیں ۔ تے اُجاڑ چہ جِِتھے بندے نئیں ۔ ²⁷ ۔ پئی اُجاڑ تے سُنجی دھرتی تَر ہو جاوے تے سبزیاں ، گھا ہ سُکی دھرتی اُتے اَگ وَسے ۔ ²⁸ ۔ کیِہ میِنہہ دا کوئی پیو اے ۔ یا کِہنے تریل دے تُمکیاں نُوں جمیا اے ؟ ²⁹ ۔ ٹھنڈ کیِہدی کُکھ چوں نِکلی اے تے اَسمان د ی بَرف کیِہدے توں جمیا اے ؟ ³⁰ ۔ جیِہدوں پانی پتھر وانگر ہو کے لُک جاندے نیں تے سمُندر دی حَد جَم جاندی اے ۔ ³¹ ۔ کیِہہ تُوں ستاریاں دے گُچھے بنھ سکنا ایں ؟ یا زور آور دا کَمر بَند کھلو سکنا ایں ؟ ³² ۔ کیِہ تُوں ویلے تے زُہرہؔ ستارے نُوں کڈھ سکنا ایں ۔ یا دُب ؔ سترے دیاں دھیاں سنھے نُوں مَت دینا ایں ؟ ³³ ۔ کیِہ تُوں اسماناں دے قانوناں نُوں جاننا ایں ۔ یا ں اوہناں دا راج وھرتی تے قائم کر سکنا ایں؟ ³⁴ ۔ کیِہ تُوں اَپنی واج بدلاں تیِکر اُچی کر سکنا ایں ۔ کیوں جو پانی داودھنا تینوں لُکا دیوے ؟ ³⁵ ۔ کیِہ تُوں بِجلیاں نُوں گھل سکنا ایں ؟ پئی اوہ چلدی جاوے ۔ تے تینوں آکھے پئی اسیں تیرے اَگے حاضر آں ³⁶ ۔ کِہنے اَندر عَقل پائی اے یا کِہنے عَقل نُوں ودھایا اے ؟ ³⁷ ۔ کیہڑا اَپنی عَقل نال بدلاں نُوں گِن سکدا اے ۔ تے کیہڑا اَسمان دیاں مشکناں نُوں روہڑ سکدا اے ؟ ³⁸ ۔ گھٹا رِل کے تے ڈھیلا بَن جاندا اے ۔ تے ڈھیلے کٹھے ہو جاندے نئیں ۔ ³⁹ ۔ کیِہ تُوں شیرنی لئی شکار ماریں گا ۔ تے شیر بچیاں دی بُھکھ نُوں پُورا کر دے گا ؟ ⁴⁰ ۔ جیِہدوں اوہ اپنیاں غاراں چہ لُکے رہندے نیں ۔ یا جھاڑیاں چہ چھئی لا کے بہندے نیں ۔ ⁴¹ ۔ جنگلی کاں لئی کون کھانا پینا گھلدا اے؟ جِہدوں اوہدے بال خُدا دے کول نسے آندے نیں تے کھانا پیِنا ناں ہون دے سببوں ایدھر اودھر پھردے نیں ۔