1
-تے بنامینؔ وچوں اِک بندہ سی جہدا ناں قیشؔ بِن ابی ایل بِن صرور بِن بکورت ؔ بِن افح ؔ بنیامینیؔ اوہ بہادر تے دلیر بندہ سی۔
2
-تے اوہدا اِک پُتر ساؤل نامی سی جیہڑا بوہت سوہنا جوان سی۔پئی بنی اسرائیل وچ اوس تَوں بوہتا سوہنا کوئی بندہ نئیں سی۔تے موڈیاں تَوں لے کے اُتے تیک سبھاں توں قد وچ لما سی۔
3
-تے اینج ہویا پئی ساؤل دے پیو قیشؔ دیاں کھوتِیاں گواچ گئیاں ۔تے قیشؔ نیں اپنے پُتر ساؤل نُوں آکھیا پئی غُلاماں وچوں اِک نُوں اپنے نال لے ۔تے اُٹھ کے کھوتِیاں نُوں لبھن جا۔
4
-سو اوہ اِفرائیم ؔ دے پہاڑ تَوں ہوندیاں ہویاں شالیشہؔ دے علاقے وچوں لنگھے۔پر اوہناں نُوں نئیں مِلیاں ۔
5
-جدوں اوہ بنیامینؔ دے علاقے وچ آئے ۔تے ساؤل نیں اپنے غلام نُوں جیہڑا اوہدے نال سی آکھیا ۔آؤ اسی پرت جائیے۔تاں جو میرا پیو کھوتِیاں نُوں چھڈکے ساڈے بارے پریشان نہ ہووے۔
6
- تے غلام نیں اوہنوں آکھیا ۔ویکھ ایس ویلے ایس شہر وچ اِک رَب دا بندہ اے۔تے اوہ عزت دار اےبندہ اے۔تے جو کجھ اوہ آکھدا اے اوہ پورا ہوندا اے۔سو آؤ اسیں اوہدے کول چلیئے ۔کی پتا اوہ ساڈی اوس راہ بارے مدد کرے جس تے سانوں جانا چاہیدا اے۔
7
-تد ساؤل نیں اپنے غلام نُوں آکھیا ۔پئی جدو ں اسیں اوہدے کول جائیے۔تد اسیں اوس بندے لئی کی لے کے جائیے؟ ساڈے تھیلیاں وچ روٹی وی مُک گئی اے۔تے ساڈے کول کوئی ہدیہ نئیں ۔پئی بندے لئی لے جائیے تے ساڈے کول کی اے؟
8
-غلام نیں ساؤل نُوں فیر جواب وچ آکھیا ۔پئی چوتھائی مِثقال چاندی میرے کول اے جیہڑی میں اوس رَب دے بندے دی نذر کر دیاں گا ۔پئی اوہ ساڈی راہ دی راہنمائی کرے۔
9
- تے پیلاں ایسطراں ہوندا سی۔پئی بنی اسرائیل وچوں جے کوئی رَب دا بندے کولوں کجھ پوچھن جاندا تے آکھدا سی۔آؤ اسیں غیب دی خبر رکھن والے کول جائیے۔۔کیوں جو جنہوں اَج کل اسیں نبی آکھدے ہاں اوہ پیلے ویلیاں وچ غیب بین اَکھواندے سَں۔
10
-سو ساؤل نیں اپنے غلام نُوں آکھیا ۔تُوں بوہت چنگا آکھیا ۔آؤ غیب دی خبر رکھن والے کول چلیئے ۔تے اوہ دونویں اوس شہر وچ آئے ۔جہدے وچ پئی رَب دا بندہ سی۔
11
-تے جدوں اوہ شہر دی چڑھائی اُتے چڑھدے سَن۔اوہناں نُوں کُڑیاں مِلیاں جیہڑیاں پانی بھرن جاندیاں سَن۔تے اوہناں نیں اوہناں نُوں آکھیا۔کی غیب دی خبر رکھن والا ایتھے وے؟
12
- اوہناں نیں آکھیا ۔ہاں۔ویکھو او تہاڈے سامنے وے۔چھیتی جاؤ۔کیوں جو اَج ای اوہ شہر وچ آیا اے۔ایس لئی پئی اُچے تھاں وچ لوکاں دی قربانی اے۔
13
-جدؤں تُسی شہر دے اندر وڑو گے۔تے ایس تَوں پیلاں پئی اوہ اُچی تھاں تے کھان لئی جائے ،اوہ تہانوں ملے گا۔کیوں جو جدو تیک اوہ نہ آئے ۔لوکی نئیں کھان گے۔کیوں جو اوہ قربانی نُوں برکت دیندا اے۔ایس تَوں بعد جنہاں دی بلایا گیا اوہ کھاندے نیں ۔ایس لئی تُسی ہُنے ای چڑھ جاؤ۔کیوں جو اَج ای اوہ تہانوں ملے گا۔
14
-تد اوہ دونویں شہر وَل چڑھے ۔تے جیویں ای اوہ شہر دے اندر وڑے ۔ویکھو ۔ سیموئیل اوہناں نُوں مل گیا۔جیہڑا اُچی تھاں اُٹے چڑھن لئی جا رہیا سی۔
15
-تے رَب نیں ساؤل دےآؤن دے اِک دِن پیلاں سیموئیل اُتے وحی بھیج کے آکھیا ۔
16
-پئی کَل ایسے ویلے بنیامینؔ دے علاقے وچوں میں اِک بندے نُوں تیرے کول بھیجاں گا۔تُوں اوہنوں میرے لوکاں اسرائیل دا حُکمران بنن لئی مسح کر ۔اوہ میرے لوکاں نُوں فلسططینیاں ؔ دے ہتھوں چُھڈائے گا۔کیوں وج میں اپنے لوکاں اُتے دھیان کیتا ۔ایسلئی پئی اوہناں دا چِیکنا میرے تیک اپڑیا۔
17
-تے جدؤں سیموئیل نیں ساؤل نُؤں ویکھیا ۔رَب نیں اوس نُوں آکھیا ۔پئی اے اوہو ای بندہ اے۔جس دے بارے میں تینوں دسیا سی۔اوہو ای میرے لوکاں اُتے سلطنت کرے گا۔
18
-سو ساؤل پھاٹک دے وچکار سیموئیل دے نیڑے آیا تے آکھیا ۔مینوں دس۔پئی غیب دی خبر رکھن والے دا گھر کِتھے وے؟
19
-سیموئیل نیں ساؤل نُوں آکھیا ۔میں ای اوہ غیب دی خبر رکھن والا ہاں۔سو تُسی میرے اَگے اُچی تھاں تے چڑھو ۔تے اَج میرے نال روٹی ٹُکر کھا ؤ۔تے کَل میں تینو ں گھل دیاں گا۔تے سب کجھ جو تیرے دِل وچ اے تینوں دَس دیاں گا۔
20
-تے تیریاں کھوتِیاں جیہڑیاں تِن دِن تَوں گواچیاں نیں۔تُوں اوہناں دی فکر ناں کر۔کیوں جو اوہ مِل گئیاں۔تے اسرائیل ؔ دیاں ساریاں چنگیاں چیزاں کیہدے لئی نیں ۔پر تیرے لئی تے تیرے پیو دے گھرلئی ۔
21
-ساؤل نیں آکھیا ۔کی میں بنیامینؔ دا نئیں جیہڑا اسرائیل ؔ دے قبیلیاں وچوں سب تَوں نیکا اے۔تے میرا ٹبر بنیامینؔ دے قبیلے دے سارے ٹبراں وچوں سب تَوں نیکا اے۔سو تُوں اینج دی گل مینوں کیوں آکھدا ایں؟
22
-تے سیموئیل ساؤل تے اوہدے غلام نُوں نال لے کے مہمان خانے دے اندر آیا۔تے مہماناں وچوں جیہڑے شائد تریہہ بندے سَن۔اوہناں نُوں صدر تھاں تے بٹھایا۔
23
-تے سیموئیل نیں کھانا بناؤن والے نُوں آکھیا۔پئی اوہ حِصہ جیہڑا میں تینوں دِتا سی ۔تے جس دے بارے میں تینوں آکھیا سی پئی اوہنوں اپنے کول رکھ ،لے آ۔
24
-تد کھانا بناؤن والے نیں مونڈھا تے جو کجھ اوہدے اُتے سی لیا ۔تے ساؤل دے سامنے رکھیا ۔تے سیموئیل نیں آکھیا۔ویکھ۔ ایہہ رکھیا گیاسی۔ ایہنوں سامنے رکھ تے کھا ۔کیوں جو اوہ ایس ویلے تیک تیرے لئی سنبھالیا نئیں گیا سی۔جدوں میں لوکاں نُوں بلایا۔سو ساؤل نیں اوس دِن سیموئیل دے نال کھانا کھادا۔
25
-فیر اوہ اُچے تھاں تَوں شہر وَل تھلے اُترے ۔تے اوس نیں ساؤل دے نال چھت اُتے گلاں کیتیاں ۔تے اوہنے ساؤل لئی چھت اُتے بستر لوایا۔تے اوہ سوتا۔
26
-تے سویرہون دے ویلے اوہ اُٹھے ۔تے سیموئیل نیں ساؤل نُوں چھت اُتے بلایا۔تے اوس نُوں آکھیا ۔اُٹھ پئی میں تینوں گھلاں۔تے اوہ اُٹھیا۔تد اوہ تے سیموئیل دونویں باہر گئے ۔
27
-تے جدوں اوہ شہر دے کنڈے اُتے اُتر دے پئے سَن۔سیموئیل نیں ساؤل نُوں آکھیا ۔غلام نُوں آکھ ۔پئی اَگے آئے ۔تے ساڈے سامنیوں لنگھ جاوے۔پر تُوں ہالے کھڑا رہ پئی میں رَب دا کلام تینوں سُناواں ۔