1
-تے جدوں سیموئیل بُڈھا ہو گیا ۔تے اوس نیں اپنے پُتر اں نُوں اسرائیل اُتے سرپنچ مِتھیا ۔
2
-تے اوہدے پلیٹھی دا ناں یوئیلؔ سی۔تے دوجے دا ناں اِبی یاہؔ ۔تے اوہ دونویں بیرِ شابعؔ وچ قاضی سَن۔
3
-تے اوہدے پُتر اوہدی راہ اُتے نئین چلے۔ایہہ لالچ وَل ٹور پئے ۔تے رِشوت لیندے تے عدالت کرن وچ پخ مار دے سَن۔
4
-تے اسرائیل ؔ دے کُل بزرگ اکٹھے ہوئے تے رامہؔ وچ سیموئیل دے کول آئے۔
5
- تے اوہنوں آکھیا ۔ویکھ تُوں بُڈھا ہو گیا ایں۔تے تیرے پُتر تیری راہ تے نئیں چلدے۔سو تُوں ساڈے اُتے اِک بادشاہ قیم کر۔جیہڑا ساڈے وچکار حُکمرانی کرے۔جیویں پئی ساریاں قوماں وچ اے۔
6
-تے ایہہ گل سیموئیل دی نظر وچ بھیڑی سی جیہڑی اوہناں نیں آکھی ۔پئی ساڈے اُتے اِک بادشاہ قیم کر جیہڑا ساڈے وچکار حُکمرانی کر ۔تد سیموئیل نیں رَب کولوں دُعا کیتی ۔
7
-رَب نیں سیموئیل نُوں آکھیا۔پئی ساریاں گلاں وچ جیہڑیاں لوکی تینوں کہندے نیں اوہناں دی سُن۔کیوں جو اوہناں نیں تینوں رَد نئیں کیتا۔سگوں مینوں پئی میں اوہناں اُتے حُکمرانی نہ کراں۔
8
-جس دِن توں پئی میں اوہناں نُوں مصر وچوں کڈیا اَج تیک اوہناں نیں اپنے سارے کماں دے حساب نال ای اے کیتا اے۔اوہناں نیں مینوں چھڈیا۔تے غیر معبوداں دی پوجا کیتا۔اینج ای اوہ تیرے نال وی کر دے نیں۔
9
-تے ہُن تُوں اوہناں دی گل سُن ۔پر اوہناں اُتے گواہی دے ۔تے اوہناں دَس دے پئی جیہرا بادشاہ اوہناں اُتے سلطنت کرے گا۔اوہدے طریقے کی ہون گے۔
10
-تے سیموئیل نیں رَب دیاںساریاں گلاں لوکاں نُوں دسیاں جیہڑے اوہدے کولوں بادشاہ چاہندے سَن۔
11
-تے اوس نیں آکھیا پئی جیہڑا بادشاہ تہاڈے اُتے سلطنت کرے گا ۔اوہدا ایہہ طریقہ ہووے گا۔پئی اوہ تہاڈے پُتراں نُوں لے کے اپنے لئی تے اپنی گڈی لے کے تے اپنے گھوڑیاں لئی رکھے گا۔تے اوہ اوہدی گڈی اَگے دوڑن گے۔
12
-اوہ اپنے لئی ہزار ہزار دا رسالہ دار تے پنجاہ پنجاہ دےجمعدار بنائے گا۔اوہناں توں ہل جتوائے گا تے فصل کٹوائے گا تے لڑائی دے ہتھیار تے اپنی گڈیاں دا سامان بنوائے گا۔
13
-تے تہاڈی دھیاں نُوں لے لَوے گا۔پئی اوہ اوہناں لئی عِطر بناؤن والیاں تے کھانا بناؤن والیاں تے روٹی پکان والیاں ہون۔
14
-تے تہاڈے کھیت تے تہاڈے تاکستان تے تہاڈے سارے چنگے زیتون دے باغاں نُوں اوہ لے لے گا ۔تے اپنے خمت گاراں نُوں اوہ دے دے گا۔
15
-تے تہاڈی کھیتی تے تہاڈے انگوراں دا دسواں حصہ لے کے اپنے درباریاں تے ملازماں نُوں دیوے گا۔
16
-تے تہاڈے غُلاماں تے تہاڈی لونڈیاں تے تہاڈے چنگے چنگے ٹگیاں تے تہاڈے کھوتیاں نُوں لے لے گا۔تے اپنے کام تے لاوے گا۔
17
-تے تہاڈی بھیڑ بکریاں دا وی دسواں حصہ لے گا ۔تے تُسی اوہدے گلام ہووؤ گے۔
18
-تے اوس دِن تُسی اپنے بادشاہ دے سبب جنہوں تُسی اپنے لئی مِتھیا ترلا کرو گے۔پر اوس دِن رَب تہاڈی نہ سُنے گا۔
19
-پر لوکاں نیں سیموئیل دی گل نئیں سُنی تے آکھیا ۔اُکا نئیں ۔سگوں بادشاہ ساڈے اُتے سلطنت کرے گا۔
20
-تے اسیں وی ساریاں قوماں وانگ ہوواں گے۔تے ساڈا بادشاہ ساڈے وچکار حُکمرانی کرے گا۔تے ساڈے اَگے چلے گا۔تے ساڈیاں لڑائیاں لڑے گا۔
21
-سو سیموئیل نیں لوکاں دیاں ساریاں گلاں سُنیاں تے رَب دے کَناں تیک اپڑئیاں ۔
22
-تد رَب نیں سیموئیل نُوں آکھیا پئی اوہناں دی سُن ۔تے اوہناں اُٹے اِک بادشاہ مقرر کر۔تد سیموئیل نیں اسرائیل دے بندیاں نُوں آکھیا ۔پئی تُسی ہر اِک اپنے اپنے شہر نُوں چلے جاؤ۔