1
-تد سیموئیل نیں کُل اسرائیل نُوں آکھیا پئی او سب جو کجھ تُسی مینوں آکھیا ۔میں تہاڈی سُنی۔تے تہاڈے اُتے اِک بادشاہ مِتھیا۔
2
-تے ہُن تہاڈا بادشاہ تہاڈے اَگے چلدا اے۔تے میں تے بُڈھا ہو گیا ہاں۔تے ایہہ میرے پُتر تہاڈے نال نیں۔تے میں لڑکپن تَوں اَج تیک تہاڈے نال چلدا رہیاہاں۔
3
-ویکھو ۔میں حاضر آں۔رَب دے سامنے تے اوس دے ممسوح دے سامنے میرے بارے اگوائی دو ۔میں کس دا ڈھگا لیا یاں میں کس دا کھوتا لیا یاں کس دے نال میں دغا بازی کیتی یاں کس تے میں ظلم کیتاتے کس دے ہتھوں میں رِشوت لیتی یاں جوڑی جوتن لئی لیا ؟میں تہانوں موڑن لئی تیار آں۔
4
-تے اوہناں نیں آکھیا تُوں ساڈے نال بے انصافی نئیں کیتی۔تے تُوں ساڈے اُتے ظلم نئیں کیتا ۔تے ناں تُوں ساڈے ہتھوں کوئی شے لئی۔
5
-تد اوہنے اوہناں نُوں آکھیا۔پئی رَب تہاڈے اُتے گواہ تے اوہدا ممسوح اَج دے دِن تہاڈے اُتے گواہ اے۔پئی تُسی میرے ہتھ وچ کوئی چیز نئیں پائی ۔اوہ بولے۔اوہ گواہ اے۔
6
- فیر سیموئیل نیں لوکاں نُوں آکھیا۔رَب ای گواہ اے۔جس نیں موسیٰؔ تے ہاورنؔ نُوںمِتھیا تے تہاڈے پیو دادا نُوں مصرؔ دے دیس وچوں باہر کڈیا۔
7
- ہُن کھڑے ہووؤ۔پئی میں رَب دے سامنے اوہناں ساریاں نیکیاں دے بارے جیہڑیاں رَب نیں تہاڈیاں پُشتاں نال کیتیاں ۔سُناواں۔
8
-جدوں یعقوب مصر وچ آیا تے تہاڈے پیو دادا رَب دے کول چِیکے۔تے رَب نیں موسیٰؔ تے ہارونؔ نُوں گھلیا۔تے اوہناں نیں تہاڈے پیو دادا نُوں مصر وچوں کڈیا۔تے ایس تھاں تے وسایا۔
9
-تے اوہ اپنے رَب خُداوند نوں بھُل گئے ۔تے اوس نیں اوہناں نُوں حاصور دے لشکر دے سردارسیسراؔ دے ہتھ تے فلسطینیاں ؔ ہتھ تے موآب ؔ دے بادشاہ دے ہتھ ویچیا۔تے اوہناں نیں اوہناں نال لڑائی کیتی۔
10
-تد او ہ رَب دے اَگے چِیکے تے آکھیا ۔اسیں گناہ کیتا۔کیوں جو اسیں رَب نُوں چھڈیا۔تے اسیں بعلیمؔ تے عِشتاروت ؔ دی بوجا کیتی۔پر ہُن تُوں سانوں ساڈے دُشمناں کولوں چھُڈا تے اسیں تیری عبادت کراں گے۔
11
-تے رَب نیں یروبؔ بعل تے عبدونؔ تے یفتاح ؔ تے سیموئیل ؔ نوں گھلیا۔تے تہاڈے دُشمناں دے ہتھوں جیہڑے تہاڈآسے پاسے سن۔تہانوں چھُڈایا۔تے تُسی چین نال وسے۔
12
-فیر تُسی ویکھیا۔پی بنی عمونؔ دا بادشاہ ناحاش ؔ تہاڈے اُتے چڑھ آیا۔تے تُسی مینوں آکھیا ۔کوئی بادشاہ ساڈے اُتے سلطنت کرے ۔جد کے رَب تہاڈا خُدا تہاڈا بادشاہ سی۔
13
-سو ہُن اے تہاڈا بادشاہ اے۔جنہوں تُسی متھیا ۔تے جس دی تُسی خواہش کیتی۔ویکھو رَب نیں تہاڈے اُتے بادشاہ متھیااے۔
14
-سو جے تُسی رَب کولوں ڈر دے او۔تے اوہدی عبادت کرو ۔تے اوہدی گل سُنو۔تے اوہدے حکم تَوں ناں پھیرو۔تے تُسی تے تہاڈا بادشاہ جیہڑا تہاڈے اُتے سلطنت کر دا اے۔رَب اپنے خُدا دے پیرو ہوو گے۔
15
-پر جے تُسی رَب دی گل ناں سُنو۔تے اوہدے حُکماں توں پھیرو ۔تے رَب دا ہتھ تہاڈے خلاف ہووے گا۔جسطراں پئی اوہ تہاڈے پیو دادے دے خلاف سی۔
16
-تے ہُن تُسی کھڑےرہوو۔تے ویکھو اوہ وڈا قصہ جیہڑا تہاڈیاں اکھا ں دے سامنے اَج رَب کرے گا۔
17
-کی اَج گہیوں کٹن دا دِن نئیں ؟میں رَب کولوں دُعا کراں گا۔پئی اوہ گرجاں گھلے تے مینہ وگائے تد تُسی جانو گے تے ویکھو گے پئی تہاڈی بدی جیہڑی تُسی رَب دی نطر وچ کیتی۔کِنی وڈی اے۔پئی تُسی اپنے لئی اِک بادشاہ منگیا۔
18
-تد سیموئیل رَب دے کول چِیکیا۔تے رَب نیں اوسے دِن گرجاں گھلیاں تے مینہ وگایا۔
19
-تد سارے لوکی رَب کولوں تے سیموئیل کولوں ڈاھڈا ڈر گئے۔تے سارے لوکاں نیں سیموئیل نُوں آکھیا پئی رَب اپنے خُدا کولوں اپنے خادماں لئی دعا منگ ۔پئی اسیں مر ناں جائیےکیوں جو اسیں اپنیاں ساریاں خطاواں نالوں ودھ ایہہ بدی بوہتی کیتی۔پئی اسیں اپنے لئی بادشاہ منگیا۔
20
-تد سیموئیل نیں لوکاں نُوں آکھیا۔ڈرو ناں۔ایہہ شرارت تے تُسی کیتی۔پر رَب دی پیروی توں تُسی ناں مُڑو۔سگوں اپنے سارے دل نال رَب دی عبادت کرو۔
21
-تے تُسی فضول شیواں وَل دھیان ناں کرو۔جیہڑایاں فائدہ نئیں دیندیاں ۔تے ناں ای چھُڈاندیاں نیں۔کیو ں جو فضول نیں۔
22
-تے رَب اپنے وڈے نام دے سبب اپنے لوکاں نُوں نئیں چھڈے گا۔کیوں جو رَب چاہندا اے۔پئی تہانوں اپنی قوم بناوے۔
23
-تے جیہڑا میں ہاں۔اے تے اُکا ای ناں ہووے گاپئی میں رَب دا خطاکار بناں تے تہاڈے لئی دُعا منگنا چھڈ دواں سگوں اوہ رستہ جیہڑا سیدھا تے چنگا اےمیں تہانوں دَساں گا۔
24
-تے تُسی رَب کولوں ڈروتے اپنے سارے دل نال سچائی وچ اوہدی عبادت کرو۔کیوں جو تُصی اوہ وڈے کام ویکھے نیں۔جیہڑے اوہنے تہاڈے وچکار کیتے ۔
25
-تے جے ہُن وی تُسی بدی کرو تے تُسی تے تہاڈا بادشاہ سارے مر جاؤ گے۔