1
-تے قریباََ اِک مہینے دے باد اینج ہویا۔پئی ناحاش عمونیؔ چڑھ آیا۔تے یا بیش ؔ جِلعادؔ دےسامنے خیمے لائے۔تد یابیشؔ دے رہن والیاں نیں ناحاشؔ نُوں آکھیا۔پئی ساڈے نال قول بنھ تے اسیں تیری خدمت کراں گے۔
2
-ناحاشؔ عمانیؔ نیں اوہناں نُوں آکھیاپئی ایس شرط اُتے میں تہاڈے نال قول بن داہاں۔پئی میں سبھاں دی سجی اَکھ کڈوا دیاں۔تے کُل بنی اسرائیلؔ اٗتے ایس ذِلت دا داغ لاواں۔
3
-تے یابیشؔ دے بزرگاں نیں آکھیا سانوں سَت دِناں دی مہلت دے۔پئی اسیں اسرائیل دی کُل حداں وچوں قاصد گھلیئے۔تے جے کوئی ساڈا چھُڈان والا ناں ہویا۔تے اسیں تیرےکول نکل کے آواں گے۔
4
-تد اوہناں دے قاصد ساؤل دے جبعہؔ وچ اپڑے۔تے ایہہ گلاں لوکاں دے کَناں تیک اپڑائیاں۔تے سب لوکاں نیں زاری وچ اپنیاں واجاں اُچیاں کیتیاں۔
5
-تے ویکھو ساؤل ڈھگیاں دے پیچھے کھیت تَوں آرہیا سی۔تے ساؤل نیں آکھیا۔لوکاں نُوں کی ہویا پئی روندے نیں؟تے اوہناں نیں یابیشؔ دے رہن والیاں دی گل اوہنوں دسی۔
6
-تے ایس گل دے سُن دے ای رَب دی روح اوہدے اُتے نازل ہوئی ۔تے اوہدا غُصہ بھڑکیا۔
7
-تے اوہنے دو ڈھگے لئے تے اوہناں نُوں ٹوٹے ٹوٹے کیتا ۔تے اوہناں نُوں اسرائیل دیاں کُل سرحداں وچ قاصد اں وَلوں گھل کے آکھیا۔پئی جو کوئی سیموئیل تے ساؤل دے پیچھے حاضر ناں ہووے۔تے اوہدے ڈھگیاں نال اینج ای کیتا جائے گا۔تد رَب دا رعب لوکاں اُتے پیا۔تے اوہ اِک تن ہوکے باہر نکلے۔
8
-تے اوہنے اوہناں نُوں بازقؔ وچ گِنیا تے بنی اسرائیل تِن لاکھتے یہودہ دے بندے تریہہ ہزار سَن۔
9
-تے اوہنے اوہناں قاصداں نُوں جیہڑے اوہدے کول آئے سَن۔آکھیا۔پئی تُسی یابیشؔ جلعادؔ دے لوکاں نُوں اینج آکھو۔پئی گل جس ویلے دھُپ تیز ہووے گی۔تہانوں رہائی مِل جاوے گی۔تد اوہ قاصد پرت آئے تے یابیشؔ دے لوکاں نُوں خبر دِتی۔تے اوہ خوش ہوئے۔
10
-سو یابیشؔ دے لوکاں نیں آکھیا۔پئی کَل اسیں تہاڈے کول نکل کے آواں گے۔تے جو کجھ تہاڈی نظر چہ چنگا ہووے اوہ ساڈے نال کرو۔
11
-تے جدوں اگلا دِن ہویا ۔تے ساؤل نیں لوکاں دے تِن جتھے بنائے۔تے اوہ فجر دے پہر وچ چھاؤنی وچ وڑے ۔تے بنی عمونؔ نُوں دِن دے گرم ہون تیک قتل کردے رہے۔تے اوہناں وچوں جیہڑے بچے ،اوہ پریشان ہو گئے پئی اوہناں وچوں دو وی اِک دوجے دے نال نئیں رہے۔
12
- تد لوکاں نیں سیموئیل نُوں آکھیا۔کون اے اوہ جس نی آکھایا پئی کی ساؤل ساڈا بادشاہ ہووے گا۔؟ اوہناں بندیاں نُوں باہر کڈو۔تاں جو اسیں اوہنوں قتل کریئے۔
13
-تے ساؤل نیں آکھیا پئی اَج دے دِن کوئی قتل ناں کیتا جاوے گا۔کیوں جو اَج دے دِن رَب نیں اسرائیل نُوں رہائی دِتی۔
14
-تے سیموئیل ؔ نیں لوکاں نُوں آکھیا۔پئی ساڈے نال جلجال نُوں آؤ۔تاں جو سلطنت نُون نویں سِرے تَوں قیم کریئے۔
15
-تد سب لوک جلجالؔ نُوں گئے۔تے اوتھے جلجالؔ وچ اوہناں نیں رَب دے حضور ساؤل نُوں بادشاہ بنایا۔تے رَب دےسامنے سلامتی دے ذبیحے کیتے تے ساؤل تے اسرائیل دے سارے بندیاں نیں بوہت خوشی کیتی۔