1
۱۔ پَر اپنا محل بنان لئی سلیمان نُوں تیراں ورّے لگے۔
2
۲۔ کیوں جو اوہنے اپنا مَحلّ لُبنان دے جنگل دی لکڑی نال بَنایا۔ اوہ سَو ہتھ لما، پنجاہ ہتھ چوڑا تے تریہ ہتھ اُچّا سی جِدھے وِچّ دیودار دے تھماں دِیّاں چار قطاراں سَن تے اوہناں دے اُتے رندہ پھِرے دیودار دے چھہتیر رکھے ہوے سَن۔
3
۳۔ تھماں تے ٹِکّے ہوئے چھہیتراں دا اُتلا چھت دیودار دا بنّیا ہویا سی۔ ہر قطار وِچّ پندراں چھہتیر سَن یعنی کُل پینتالی چھہیتر۔
4
۴۔ اوہدیّاں بارئیاں ، تِن تِن بارئیاں جوڑ کے اُچائی تے لائیاں گئیاںسَن جیہڑیاں اِک دُجّی دے آمو سامنے سَن۔
5
۵۔ اوہناں دے بوہیاں دیّاں چوگاٹھاں چَو گُٹھیاں سَن تے سامنے حصے وِچّ اوہ اِک دُجّے دے آمو سامنے تِن تِن دیّاں قطاراں وِچّ سَن۔
6
۶۔ تے اوہنے تھماں دی اِک قطار بنائی جہیڑی پنچاہ ہتھ لمی تے تریہ ہتھ چوڑی سی تے اوہدے سامنے اِک برانڈہ سی تے اوہدے سامنے تھم سَن تے اِک چھجّہ سی جہیڑا اگاں ودھیا ہویا سی۔
7
۷۔ تے اوہنے اِک بیٹھک بنائی جہدے وِچّ نّیاں داتخت لگا ہویا سی تے اوہنے اوہنوں پھنویں توں لے کے چھت تک دیودار دے تختیاں نال ڈھکیا ہویا سی۔
8
۸۔ تے برانڈے دے ویڑے توں پِچھاں ہٹ کے اوہدے اپنے رہن دا محل سی جہیڑا اوہدے وانگ ہی بنایا گیا سی۔ اوسے بیٹھک جیہا اِ ک محل سلیمان نے فرعون دی دھی لئی وی بنایا جنہوں اوہنوں بیایاہ ہویا سی۔
9
۹۔ ایہہ کُل عمارتاں باہروں لگ کے وڈّے ویڑھے تیک تے نیہ توں لے کے بَنیریاں تیک ودّھیا قسم دے پتھر نال بنیایاں گئیاں سَن جہدے میچ دے حسّاب نال آریاں نال وڈھ کے ڈکّرے کیتے گئے سَن تے جہیڑے اندروں باہروں کَھڑے گئے سَن ۔
10
۱۰۔ نیہاں وی ودّھیا قسم دے وڈّھے وڈھے پتھراں دیّاں سَن جنہاں وچوں کئی دَس ہتھ تے کئی اَٹھ اَٹھ ہتھ دے سَن ۔
11
۱۱۔ اوہناں اُتے نفیس قسم دے پتھر جیہڑے میچ دے حساب نال وڈّھے گئے سَن تے دیودار دے چھہیتر ٹِکے ہوئے سَن۔
12
۱۲۔ تے باہرلے ویڑے دے آل دوالے کھَڑے ہوئے پتھراں دے تِن تِن ردّے تے کَٹے ہوے دیودار دے چھہتیراں دی اِک اِک کندھ سی جیویں دی خُداوند دے گھر تے برانڈے دے وِچلےویڑے دی سی۔
13
۱۳۔ فیر سلیمان بادشاہ نے صُور توں حِیرام نوں سد لیا۔
14
۱۴۔ جہدی ماں نفتالی دے قبیلے دی اِک بیوہ سی تے جہدا پئو صُور دا وسنِیک سی تے پِتل دا کاریگر سی۔ حِیرام پِتل دے کم دا وڈّا تجربہ کار کاریگر سی۔ اوہ سلیمان بادشاہ کول آیا تے جہیڑا کم اوہنوں سونپیاں گیا سی، اوہنے پُورا کیِتا۔
15
۱۵۔ اوہنے پِتل ڈھال کے دو تھم بنائے جنہاں وِچّوں ہر اِک اٹھاراں ہتھ اُچّا تے گولائی وِچّ بارہ ہتھ سی ۔
16
۱۶۔ تے اوہنے اوہناں تھماں دے اُتلے حصّیاں تے دھرن لئی دو تاج وی بنائے۔ ہر اِک اُتلا تاج پنج ہتھ اُچا سی۔
17
۱۷۔ تے اوہناں ستُوناں دے اُتلے تاجاں تے زنجیراں دی جالی دا سہرہ سی۔ ہر اُتلے تاج لئے سَت سَت سہرے سَن ۔
18
۱۸۔. تے تھماں دے اُتے تاج سجّان لئی اوہنے جالیاں دے دوالے قطاراں وِچّ انّار وی بنائے۔ ہر تھم دے تاج نُوں اوہنے اینج ہی شنگھاریاں۔
19
۱۹۔ تے برانڈے دے تھماں دے تاج سوسن دے مُہاندرے دے سَن تے چار ہتھ اُچے سَن ۔
20
۲۰۔ دونہاں تاجاں تے جالی توں اَگے پیالہ جیہے حصّے تے چَواں پاسے قطاراں وِچّ دو سَو انّار سَن۔
21
۲۱۔ اوہنے اوہناں تھماں نوں ہیکل کے برانڈے وِچّ گَڈھیا تے دَکھن وَل دے تھم دا ناں یاکِن رکھیا تے شمال ول دے تھم دا ناں بوعز رکھیا۔
22
۲۲۔ تے اوہناں دے اُتلے تاج سوسن دے پُھل ورگے سَن ۔ تے اینج تھماں دا کمّ پُورا ہویا۔
23
۲۳۔ فیر اوہنے ڈھالی دھات دا اِک وڈّا حوص بنایا جہدی شکل گول سی جہیڑا پنج ہتھ اُچا سی تے اِک کنڈے توں دُجّے کنڈے تیک دَس ہتھ لما سی۔ تے اوہدا گھیر آل دوالے تریہ ہتھ دے سُوتر جِڈا سی۔
24
۲۴۔ تے اوہدے کنڈھے دے آل دوالے دَسے ہتھ تیک لاٹُو سَن جہیڑے دُوں قطاراں وِچّ حوض دے نال ہی ڈھالے گئے سَن۔
25
۲۵۔ تے اوہ حوض بارہ سنڈیاں تے ٹِکیا ہویا سی جنہاں وِچوں تِنہاں دا منہ شمال (پہاڑ) وَل، تِنہاں دا لہندے وَل تے تنہاں دا چڑھدے وَل سی۔ حوض اوہناں دے سراں تے ٹِکیا ہویا سی تے اوہناں دے پُچھلے دھڑ اندرلے پاسے سَن۔
26
۲۶۔ اوہدی موٹائی ہتھ دی چوڑائی جنہی سی تے اوہدہ کنڈا پیالے دے کنڈے وانگ سوسن دے پُھل جیہا سی۔تے اوہدے وِچّ دو ہزار بَت یعنی گیاراں ہزار پنج سو گیلن پانی دی سمائی سی۔
27
۲۷۔ اوہنے پِتل دیّاں دَس کُرسّیاں بنایاں۔ جنہاں وِچّوں ہراِک چار ہتھ لمی ، چار ہتھ چوڑی تے تِن ہتھ اُچّی سی ۔
28
۲۸۔ اوہ کُرسیاں اینج بنائیاں گئیاں سَن پئی سیدھیاں چوگاٹھاں دے نال پاسیاں دیّاں چُگاٹھاں ٹُھکیاں ہوہیاں سَن۔
29
۲۹۔ تے سیدھیاں کھلوتیاں چَوگاٹھاں دے وِچکار تختیاں تے شیر، سنڈے تے کروبی بنے ہوئے سَن ۔ تے سیدھیاں کھلوتیاں چُوگاٹھاں تے وی اوہناں شیراں تے سنڈیاں اُتے تے تھلے تاج سَن جہڑے ہتھوڑیاں نال کُٹ کُٹ کے بنائے ہوئے سَن ۔
30
۳۰۔ ہر کُرسی نُوں پِتل دے چار چار پہیے لگے سَن جنہاں دے دُھرے وی پِتل دے سَن۔ تے ہر اِک دا پرات (لگن) سی جہیڑی چار پاویاں تے ٹِکی ہوئی سی جہدے ہر پاسے تاج ڈھالے ہوئے سَن۔
31
۳۱۔ تے اوس کُرسی دا اندرلا ڈھانچہ اِک ہتھ ڈُونگھاسی۔ اوہدا مُنہ گول سی تے اپنے تھلے دے نال اوہدی منتھ ڈیڑھ ہتھ سی۔ تے اوہدے مُنہ دے آل دوالے کَڈھائی کیتی ہوئی سی۔ تے کُرسیاں دِیّاں اسّیاں چُگوٹھیاں سَن ، پر گول نیئں سَن۔
32
۳۲۔ تے اوہ چارے پہیے چوگاٹھاں دے تھلے سَن تے پہیاں دے دُھرے کُرسی وِچّ ٹُھکے ہوئے سن تے ہر پہیے دا ویڈھ ڈیڑھ ہتھ سی۔
33
۳۳۔ تے اوہ رتھاں دے پہیاں وانگ گھڑے ہوئے سَن تے دُھرّے ، کنڈے، سلاخاں تے نابھاں وغیرہ کُل حِصّے ڈھالی ہوئی دھات دے سَن۔
34
۳۴۔ تے ہر کُرسی دیّاں چار چار ہتھیاں سَن یعنی ہر نُکّر تے اِک ہتھی سی جیہڑی کُرسی باہر نکلی ہوئی سی۔
35
۳۵۔ تے کُرسی دے سر تے اِک گول پٹّی سی جیہڑی ادھا ہتھ ڈوہنگی سی۔ تے اوہ کنگنیاں تے کنارے کُرسی دی چوٹی تے لگے ہوئے سَن۔
36
۳۶۔ تے اوہنے کنا رِیاں کنگنیاں وِچّ جِتھے وہلی تھاں سی اوتھے کروبی، شیر تے کھجور دے بُوٹے کڈھے ہوئے سَن تے اوہناں دے چواں پاسے تاج سَن۔
37
۳۷۔ اینج اوہنے اوہ دَس کُرسیاں بَنایاں تے اوہ ساریاں اِکو ہ سَچے وِچّ ڈھالیاں گیاںسَن تے اپنے جُسّے تے بَن وِچّ سانجھیاں سَن۔
38
۳۸۔ اوہنے پِتل دے دَس حوض بنائے جنہاں وِچوں ہر حوض وِچّ چالی بَت پانی پے سکدا سی ۔ ہر حوض چار ہتھ دا سی تے دَساں کُرسیاں وِچّوں ہر اِک تے اِک حوض کھڑیا جاندا سی۔
39
۳۹۔ اوہنے اوہناں کُرسیاں وِچّوں پنج نُوں ہیکل دے دَکھن پاسے تے پنج نوں شمال (پہاڑ) وَل رکھیا تے وڈّے حوض نُوں دَکھن وَل ہیکل دے دَکھنی چڑھدے دی نُکّر وِچّ رکھیا۔
40
۴۰۔ تے اوہنے پراتاں ، بیلچے تے ترَونکا لان والے پیالے وی بنائے۔ سو حِیرام نے ایہہ ساریاں شَیواں بنان دا کمّ توڑ اَپڑایا۔ جہدا اوہنے رَبّ خُداوند دے گھر وِچّ سلیمان بادشاہ لئی ٹھیکہ چُکیا سی۔
41
۴۱۔ یعنی دو تھم ، تے اوہناں تھماں دے سِراں تے پیالیاں ورگے تاج۔
42
۴۲۔ دو جوڑے جالیاں لئے چار سَو اَنّار (تھماں دے سراں دے پیالاں جیہے تاجاں نوں شنگھارن لئی اناراں دیّاں دو قطاراں )۔
43
۴۳۔ دَس کُرسیاں تے اوہناں دیّاں دَس پراتاں ۔
44
۴۴۔ وڈّا حوض تے اوہدے تھلے بارہ سنڈھے ۔
45
۴۵۔ پانڈے، بیلچے تے تَرونکا لان والے کَو لے۔ ایہہ کُل شَیواں جیہڑیاں حِیرام نے خُداوند دے گھر لئی سلیمان لئی بَنائیاں، لِشکدے ہوے پِتل دیّاں سَن۔
46
۴۶۔ بادشاہ نے اوہناں نُوں یردن دے میدان وِچّ سُکات تے ضرتان دے وِچکار مِٹی دے سچّیاں وِچّ ڈھلا کے بنوایا۔
47
۴۷۔ تے سلیمان نے اوہناں کُل شَیواں نُوں تولیانیئں سی کیوں جو اوہ چوکھیاں سَن، سو جِنّا پِتل لگا سی اوہدے بھار دا حِساب نہ لایا جا سکیا۔
48
۴۸۔ سلیمان نے ایہہ سامان وی بنایا جہیڑا خُدا دے گَھر وِچّ سی: یعنی سونے دا مذبح تے سونے دی میز جہدے تے نذر دی روٹی رکھی جاندی سی۔
49
۴۹۔ تے پاسے دے سونے دے چراغدان (جہیڑے وِچلے مَقدِس دے سامنے پنج سجے تے پنج کھبے پاسے سَن)۔ تے سونے دے پُھل ، دیِوے تے چمٹے۔
50
۵۰۔ تے پاسے دے سونے تے تسلے، لاٹ بُجھان والے کُپے، تراونکا لان والے کَولے، ڈونگے تے بخوردانیاں۔ تے سبھ توں وِچّلے کمرے یعنی سبھ توں پاک تھاں دے بوہے دے سونے دے قبضے تے ہیکل دے بوہیاں دے قبضے وی سونے دے سَن
51
۵۱۔ تے جد اوہ سارا کم جیہڑا سلیمان بادشاہ نے رَبّ دے گھر لئے اپنے ہتھ وِچّ لیا سی، مُک گیا تے اوہ اوہناں شَیواں نُوں اندر لیایا جہیڑیاں اوہدے پئو داود دیّاں مخصوص کیتیاں ہویئاں سَن یعنی چاندی تے سونا تے ہور سامان تے اوہناں نُوں خُداوند دی ہیکل دے خزانیاں وِچّ اَپڑایا۔