¹ ۱۔ سلیمان بادشاہ نے کُل اسرائیل تے راجّ کیتا ۔ ² ۲۔ تے اوہدے وڈّے وڈّے سردار ایہہ سَن، صدُوق دا پُتر عزریاہ کاہن سی۔ ³ ۳۔ تے سیسہ دے پُتّر الیحورف تے اخِیاہ مُنشی سن تے اخِیلود دا پُتر یہُوسفط تاریخ دا لیکھک سی ۔ ⁴ ۴۔ تے یُہویدع دا پُتر بِنایاہ فوج دا آگُو سی ، صدُوق تے ابیاتر کاہن سن۔ ⁵ ۵۔ تے ناتن پُتّر عزریاہ اوس علاقے دے حاکماں دا سردارسی تے ناتن دا پُتر زبُود کاہن تے بادشاہ دا مُشیر سی۔ ⁶ ۶۔ تے اخِیسر محل دا بندوبستی سی تے عبدا دا پُتر ادونرام بیگاریاں دا بندوبستی سی۔ ⁷ ۷۔ تے سلیمان دے بارا عہدے دار سَن جیہڑے بادشاہ تے اوہدے ٹبّر لئی رسد اَپڑاندے سَن۔ ہر اِک ورّے دے اِک اِک مہینے لئی رسد اَپڑانی پیندی سی۔ ⁸ ۸۔ اوہناں دے ناں ایہہ نیں: افرایئم دے پہاڑی علاقے وِچّ حُور دا پُتّر ⁹ ۹۔ تے مقص، سعلبِیم ، بیت شمس تے اَیلون بَیت حنان وِچّ دِقر۔ ¹⁰ ۱۰۔ تے اربوت وِچّ حصد دا پُتر سی(شوکہ تے حِفر دی ساری پھنویں اوہدی سی)۔ ¹¹ ۱۱۔ کُل دور دے کُل اُچّے عِلاقے وِچّ ابینداب دا پُتّر سی (اوہ سُلیمان دی دھی طافت نال ویّایاہ ہویا سی)۔ ¹² ۱۲۔ تے تعناک تے مجِّدو تے کُل بَیت شان وِچّ ضِرتان تُوں اَگےتے یزرویل دے تھلے بَیت شان توں لے کے یقُمعام دے پار ابیل محُولہ تک اخَیلُود دا پُتّر بعنہ سی۔ ¹³ ۱۳۔ تے رامات جلعاد وِچّ جبر دا پُتّر سی (منّسی دے پُتر یائیر دے جلعاد وِچّ بستیاں اوہدیاں سن تے بسن وِچّ ارجُوب دا علاقہ تے اوہدے سَٹھ چار دیواری شہر وی اوہدے سَن جنہاں دے پھاٹکاں وِچّ پِتّل دے بالے پئے ہووے سَن)۔ ¹⁴ ۱۴۔ تے محنایم وِچّ عدُو دا پُتر اَخینداب سی ۔ ¹⁵ ۱۵۔ تے تفتالی وِچّ اخیمعض سی (اوہنے سلیمان دی دھی بِسمت نُوں ویاہ لیا سی)۔ ¹⁶ ۱۶۔ تے آشر تے عَلوت وِچّ حُوسی دا پُتّر بعنہ سی۔ ¹⁷ ۱۷۔ تے اِشکار وِچّ فُروح دا پُتّر یہوُسفط سی۔ ¹⁸ ۱۸۔ تے بنیمین وِچّ ایلہ دا پُتر سمِعی سی۔ ¹⁹ ۱۹۔ تے جلعاد وچّ اُوری دا پُتر جبر سی (یعنی جیہڑا اُموریا ں دے بادشاہ ، سِیحون دا ملک تے بسن دے بادشاہ عوج دا ملک سی)۔ اوس علاقہ دا اکّلا عہدیدار سی۔ ²⁰ ۲۰۔ تے یہُوداہ تے اسرائیل دے لوک وادھے وِچّ سمندر کنڈے دی ریت وانگ سَن۔ تے اوہ کھاپی کے تے ہنس کھیڈ کے حیاتی جی رہے سَن۔ ²¹ ۲۱۔ تے سلیمان فرات دے دریا توں لے کے فِلستیاں دی دھرتی تک تے مصر دیاں حدّاں تیک سارے دیساں دا حاکم سی۔ ایہہ سارے دیس ٹیکس دیندے سَن تے سلیمان دے جیوندے جی اوہدے ہی رعایا رہے۔ ²² ۲۲۔ سلیمان دی اِک دِن دی رسد ایہناں شیواں تے مشتمل سی: تیس کور مَیدہ تے سَٹھ کور آٹا ، ²³ ۲۳۔ واڑے وِچّ پلے ہوئے دَس ڈھگے، چرگاہواں وچّ ویہ ڈھگے تے سو بھیڈاں بکریاں۔ تے ہَرنی، ہَرنی تے اوہدے جاہ، نَر چکارے تے پَلے ہوے کُکڑ۔ ²⁴ ۲۴۔ کیوں جو اوہ تِفسح توں لے کے غزّ ہ تک فرات دے دریا دے لاندے پاسے دیّاں سارے دیساں تے راج کردا سی تے ہر پاسے صلح صفائی دا دور چَل رہیا سی۔ ²⁵ ۲۵۔ سلیمان دی حیاتی دے دِنّاں وِچّ یہوداہ تے اسرائیل ، دان توں لےکے بیر سبع تک اَمن نال رہندے سَن۔ یعنی ہر بندہ اپنے انگور تے انجیر دے تھلے محفوظ سی۔ ²⁶ ۲۶۔ تے سلیمان دے کول رتھاں ، رتھ چلان والے آں تے گھوڑیاں لئی چار ہزار واڑّے تے بارہ ہزار سوار سَن۔ ²⁷ ۲۷۔ تے علاقیاں دے عہدے داراں وِچّوں ہر اِک اپنی واری دے مہینے وچّ سلیمان بادشاہ لئے تے اوہناں ساریاں لئی جیہڑے بادشاہ نال روٹی کھاندے سَن رسد اَپڑاندا سی تے اوہ ایس گل دا دھیان رکھدے سَن پئی کوئی شے تُھڑے نہ۔ ²⁸ ۲۸۔ تے اوہ رتھ گھوڑیاں تے دُجّے گھوڑیاں لئی مِتھی ہوئی مِقدار نال جَوں تے تُوڑی وی واڑیاں وِچّ اَپڑاندے سَن۔ ²⁹ ۲۹۔ رَبّ نے سلیمان بادشاہ نُوں سمندر دے کنڈے دی ریت وانگ دانائی، سوجھّا تے پرکھن دی طاقت دِتّی ہوئی سی۔ ³⁰ ۳۰۔ اوہدی دانائی چڑھدے دے سارے لوکاں توں ودھ سی تے مصر دی کُل حِکمت توں ودّھ سی۔ ³¹ ۳۱۔ اوہ ہر بندے توں ایتھوں تک کہ ایتان ازراحی توں وی تے بنی محول دے ہیمان ، کل کُول تے دردع توں ویں بوہتا سیانا سی تے اوہدی مشہوری آل دوالے دے سارے دیساں وِچّ ہوگئی۔ ³² ۳۲۔ اوہدے ناں نال تِن ہزار اَکھان تے اِک ہزار پنج گیت سنہانے چاندے سَن۔ ³³ ۳۳۔ اوہنے رُکھاں دا یعنی لُبنان دے دیودار توں لے کے زُوفے تک دا جیہڑا دیوداراں تے اُگدا اے، بیان کیتا۔ اوہنے چرند پرند، رہڑن والے جانوراں تے مچھیاں بارے وی سیکھا اے۔ ³⁴ ۳۴۔ تے اوہدے دانائی دا حال سُن کے جہان دے کُل بادشاہا ں ولوں ساریاں قومان دے لوک سلیمان دے سیانے اَکھان سنن آوندے سَن۔