¹ ۱۔ سلیمان بادشاہ فرعون دی دھی دے علاوہ وی بڑیاں اوپر یاں زنانیاں یعنی موآبیناں ، عمونناں ، ادومناں ، صَیدانناں تے حِتناں نال پیار کرن لگ پیا۔ ² ۲۔ ایہہ اوہناں قوماں دیاں سَن جنہاں بارے رَبّ نے اِسرائیل نوں آکھیاسی پئی تُسیں اوہناں نوں بیاہیا جے کیوں جو اوہ تُہاڈے دِلاں نوں پکا اپنے دیوتیاں ول پھیر دین گئیاں ۔ تاں وی سلیمان اوہناں ہی دے عشق دے گُن گان لگ پیا۔ ³ ۳۔ اوہدے گھر وِچّ سَت سو بیویا ں سَن جیہڑیاں شاہی ٹبراں توں سَن تے تَن سو گولیاں سَن تے اوہدیاں بیویاں نے اوہنے کراہے پا دِتا۔ ⁴ ۴۔ کیوں جو جد سلیمان بُڈھا ہو گیاتے اوہدیاں بیویاں نے اوہدے دِل نوں اوپرے دیوتاں وَل پھیر دِتاتے اوہدا دِل رَب پُورا وفادار نہ رہیا جویں اوہدے پئو داود دا رہیا سی۔ ⁵ ۵۔ کیوں جو اوہ صیدانیِاں دی دیوی عستارات تے عمُونیاں دے بوہت مکُروہ دیوتا مولک دے پِچھے چلن لگ پیا۔ ⁶ ۶۔ سو سلیمان نے رَبّ دی نظر وِچ بدی کیتی۔ اوہنے سچے دِلوں رَبّ دی پیروی نہ کیتی جِنج اوہدے پئو داود نے کیتی سی۔ ⁷ ۷۔ تے سلیمان نے یروشلیم دے چڑھ دی لامے پہاڑی تے موآب دے بوہت ہی نفرت جوگے دیوتا، کموس لئی تے عمونیاں دے ڈاھڈے نفر ت جوگے مولک لئی اِک اُچا تھاں بنایا۔ ⁸ ۸۔ تے اینج ہی اوہنے اپنیاں کُل زنانیاں لئی کیتاجیہڑیاں اپنے دیوتیاں دے حُضور بخُور پخاندیاں سَن تے قُربانیاں چڑھاندیاں سَن۔ ⁹ ۹۔ تے خُداوند سلیمان توں رُس پیاکیوں جو اوہدا دِل خُداوند اِسرائیل دے ربّ توں جیہڑا دو وار اوہنوں وکھالی دِتا سی ، پھِر گیا سی۔ ¹⁰ ۱۰۔ بھاویں اوہنے سلیمان نوں دُجے دیوتیاں دی پیروی توں ڈَکیاہویا سی پر سلیمان نے خُداوند دے حُکم نوں نہ منیا۔ ¹¹ ۱۱۔ ایس لئی خُداوند نے سلیمان نوں آکھیا پئی کیوں جو تیرا سبھا اجیہا اے تے توں میرے عہد تے میرے آئین نوں جنہاں دا میں تینوں حُکم کیتا سی، نئیں منیا، ایس لئی میں ایس بادشاہی نوں پکا تیرے توں کھو کے تیرے ہیٹھلیاں وِچوں اِک نوں دے دیاں گا۔ ¹² ۱۲۔ تاویں تیرے پئو داود لئی تیرے جیوندے جی اینج نہ کراں گا سگھوں جد بادشاہی تیرے پُتر دے ہتھ وِچّ ہووے گی تد اوہنوں کھواں گا۔ ¹³ ۱۳۔ تاویں میں اوہدے کولوں کُل بادشاہی نہ کھوواں گا سگھوں اپنے بندے داود دے لئی تے یروشلیم دے لئی جنہوں میں چُنیا اے، اوہنے بس اِک قبیلے تے راج کرن دیاں گا۔ ¹⁴ ۱۴۔ فیر خُداوند نے ہَددَادومی نوں جیہڑا ادوم دے شاہی ٹبر وِچوں سی ، سلیمان دا ویری بنا کے کھلاریا۔ ¹⁵ ۱۵۔ ایدُوں پیلاں جدوں داود دے ادوم نال جنگ وِڈی ہوئی سی تے فوج دے آگُو ، یوآب نے جیہڑا مُردے دبن گیا سی، ادوم دے کُل بندیاں نُوں مار مُکایا۔ ¹⁶ ۱۶۔ یُوآب تے کُل اسرائیلی چھے مہینے تیک اوتھے رہے ایتھوں تک پئی اوہناں نے اُدوم دے سارے بندیاں نوں مار مُکایا۔ ¹⁷ ۱۷۔ پر ہَددَ جیہڑا اوس بس مُنڈا جیہاسی، کُجھ ادومی کامیاں دے نال جیہڑاوہدے پئو دے کامے سَن، مَصر وَل بھج گیا۔ ¹⁸ ۱۸۔ اوہ مِدیانوں روانہ ہوے تے فاران وَل گئے تے فیر فرعونیاں نوں اپنے نال لے کے مِصر دے بادشاہ ، فرعون کول ٹُر گئے جنہے ہَددَ نوں اِک مکان تے بھنویں دِتی تے اوہنوں سامان اُپڑایا۔ ¹⁹ ۱۹۔ تے فرعون ہَددَ توں اینا خُوش ہویا پئی اوہنے اپنی بیوی رانی تخفنیس دی بہن اوہدے نال بیاہ دِتی۔ ²⁰ ۲۰۔ تے تخفنیس دی بہن توں اوہدا پُتر جُنوبت جمیا جِدی شاہی محل وِچّ تحفنیس نے پالنا کیتی تے اوہ ااوتھے فرعون دے اپنے بالاں نال رہیا۔ ²¹ ۲۱۔ تے ہَددَ نے جدوں اوہ مصر وِچ سی، سنیا پئی داود اپنے پئو دادے نال سو گیا اے تے فوج دا آگُو یُوآب وی مَر گیا اے تے اوہنے فرعون نوں آکھیا کے مینوں اجازت دے پئی میں اپنے دیس نوں ٹُر جاواں۔ ²² ۲۲۔ فرعون نے پُچھیا پئی ایتھے تینوں کاہد ی تھوڑ اے پئی تُوں اپنے دیس نوں واپس جانا چاہنا ایں؟ ہَددَ نے آکھیا پئی کسی چیز دی نئیں۔ تاویں توُں مینوں کسے طرح سہی، جان تے دے!۔ ²³ ۲۳۔ ربّ نے اِلیدع دے پُتر رِزون نوں سلیمان دی مخالفت وچّ کھلار دِتاجیہڑا اپنے مالک ، ہَددَ عزر ، ضُوباہ دے بادشاہ دے کولوں بھج آیا سی۔ ²⁴ ۲۴۔ تے جدوں داود نے ضُوباہ دیاں فوجاں نوں مار مُکایا تے اہنوے کُجھ ابندیاں نُوں اپنے دوالے جمع کرلیا تے باغیاں دے ٹولے د ا آگُو بن بیٹھا تے اوہ باغی دمشق چلے گئے تے اوہتھے بس گئے تے اپنا راج اوتھے قایم کیتا۔ ²⁵ ۲۵۔ جد تک سلیمان جیوندا رہیا، رِزون ، اسرائیل دا ویر ی ہی بنا یا رہیر ا۔ ²⁶ ۲۶۔ تے نِباط دے پُتر یُربعام نے وی بادشاہ دے خُلاف بغاوت کر دِتی۔ اوہ سلیمان دے کامیاں وِچوں اِک سی جیہڑا صرِیدہ دا افرائیمی سی تے اوہدی ماں دا ناں صَروعہ سی جیہڑی رنڈی سی۔ ²⁷ ۲۷۔ بادشاہ دے خلاف اوہدی بغاوت دا حال اینج وے: سلیمان نے مِلّو دا قلعہ (کوٹ) اُساریا تے اپنے پئو دے شہر دی ولگن دے مورے بھرے۔ ²⁸ ۲۸۔ یُربعام بڑا پجدا سی ۔ جد سلیمان بادشاہ نے ویکھیا پئی اوس جنے نے اپنا کم چنگی طرح نبیڑلیا اے تے اوہنے اوہنے یُوسُف دے ٹبر دے مزدوراں دا مُختار بنا دِتا۔ ²⁹ ۲۹۔ اویس ویلے جدوں یُربعام ، یروشلیموں باہر جا رہیا سی تے راہ وِچّ اوہنوں سَیلا دا نبی اخیاہ ٹکریا جنے نویِں چادر لئی ہوئی سی تے اوہ باہر میدان وِچّ دونویں اکلے سَن ۔ ³⁰ ۳۰۔ اخیاہ نے اوس نویِں چادر نوں جیہڑی اوہنے لئی ہوئی سی، ہتھ وِچ پھڑ لیا تے اوہدے بارہ ٹوٹے کر دِتے۔ ³¹ ۳۱۔ فیر اوہنے یُربعام نوں آکھیا پئی دَس ٹوٹے اپنے لئی رکھ لے کیوں جو خُداوند اسرائیل دا رب اینج فرماندا اے: ویکھ میں سلیمان دی بادشاہی لے کے اوہدے ٹوٹے کرن والا ہاں۔ ³² ۳۲۔ پر اپنے بندے داود تے یروشلیم شہر د ے لئی جنہاں نوں میں اسرائیل دے کُل قبیلیاں وِچوں چُن لیا اے ،اوہدے کول بس اِک قبیلہ رہوے گا۔ ³³ ۳۳۔ میں اینج ایس لئی کراں گاکیوں جو اوہناں مینوں چھڈ دِتا اےتے صیدانیاں دی دیوی عستارات ، موآبیاں دے دیوتا، کموس تے عمونیاں دے دیوتا ، مولِک نوں پُوجیا اے۔ اوہ نہ تے میریاں راہواں تے چلے نہ اوہ جیہڑا میری نظر وِچّ چنگا اےتے نہ ہی میرے آئین تے قانوناں نوں منیاجویں سلیمان دا پئو داود من دا سی ۔ ³⁴ ۳۴۔ پر میں سلیمان دے ہتھوں ساری بادشاہی نہ لواں گا سگھوں اوہنوں اپنے چُنے ہوئے سیوک داود دے پاروں جنہں میرے حُکماں تے آئین تے عمل کیتا، ساری حیاتی تیک حاکم بنائی رکھاں گا۔ ³⁵ ۳۵۔ میں داود دے پُتر دے ہتھوں بادشاہی لے لواں گا تے دَس قبیلے تینوں دے دیواں گا۔ ³⁶ ۳۶۔ میں داود دے پُتر سلیمان نوں صرف اِک قبیلہ دیواں گا تاں جو میرے بندے داود دا دِیوا میرے اَگے یروشلیم وچ یعنی اوس شہر وِچ جنہوں میں اپنا ناں رکھن لئی چُنیا، سدا تیک بَلدا رہوے۔ ³⁷ ۳۷۔ تے رہی گل تیری، تے میں تینوں لے لواں گا تے تُوں جِویں تیرا دِل چاہے گا ، ساریاں تے راج کریں گا تے اسرائیل اُتے بادشاہ ہویں گا۔ ³⁸ ۳۸۔ تے جے تُوں اوہ ہو کریں جِدا میں تینوں حُکم دیاں تے میرے راہواں تے چلیں تے میر ے بندے داود وانگ میرے آئین تے حُکماں نوں من دے ہوئے اوہ ہو کریں جیہڑا میری نظر وِچّ بھلا اے تے میں تیرے نال رہواں گا تے تیرے لئی اِک پکا شاہی ٹبر قائم کراں گا جِویں میں داود لئی کِیتا تے اِسرائیل نوں تیرے حوالے کر دیاں گا۔ ³⁹ ۳۹۔ تے میں داود دی پیڑی نوں ایہدے سببوں دُکھ ضُرور دیاں گا پر سدا تیک نیئں۔ ⁴⁰ ۴۰۔ سلیمان نے یُربعام نوں مارن دا چارہ کِیتا پر یُربعام مِصر نوں سیساق کول نس گیا جیہڑا اوہدا بادشاہ سی تے سلیمان دے مرن تیک اوتھے ہی رہیا۔ ⁴¹ ۴۱۔ تے کی سلیمان دی حُکومت دے دُجے واقعے یعنی سارا کُجھ جو اوہنے کِیتا اوہ تے اوہدیاں سیانیاں گلاں سلیمان دی تاریخ وچّ نیئں لکھیاں ہویاں؟ ⁴² ۴۲۔ سلیمان نے یروشلیم وِچّ کُل اِسرائیل تے چالی ورّے راج کِیتا۔ ⁴³ ۴۳۔ فیر اوہ اپنے پئو دادے نال سو گیاتے اپنے پئو داود دے شہر وِچّ دفنایا گیا۔ تے اوہدا پُتر رُحبعام اوہدی تھاں بادشاہ ہویا۔