1
1۔ پربھو یسوع آپ رے ٻارھاں چیلاں ناں ھیلو کریو آݨ اُواں ناں بھونتاں آݨ خارے بیماریاں آݨ مرضاں تے اختیار ݙنہو کہ اُواں ناں کاڈھے۔
2
۲۔ اُواں ٻارھاں چیلاں را ناں اے ہے شعمون(جکے ناں اُو پطرس وی کہوتو) آݨ اندریاس،زبدی رو ݙیکرو، یعقوب آݨ اُوے رو بھائی یوحنا،
3
۳۔فلیس آݨ برتلمائی، توما آݨ متی چونگی لیؤݨ آݪو۔
4
۴۔حلفی رو ݙیکرو یعقوب آݨ تدی، شمعون کنانی آݨ یہودہ اسکریوتی، جکے اُوے ناں جھلوایو ھتو۔
5
۵۔ اُواں ٻارھاں ناں پربھویسوع بہیرکریا۔ اُوے اُواں ناں خمجھا رو کہیو! کہ ایڑی جگہ نی جایا جتھے غیرقوماں آݨ خامریاں رے کہی پاڑے میں نی ٻڑیا۔
6
۶۔ائیاں خاں ٹاݪ اسرائیل رے گمیجوݪے بھڈاں کوڈھی جایا۔
7
۷۔ جݙے تھیں جاؤ تو اے پرچارکریا کہ آکاش ری راجائی نیݪی ہے۔
8
۸۔ بیماراں ناں بلاں کریا، مؤڑاں ناں جیوتا کریا، کوڑھیاں ناں کوڑھ خاں آچھا کریا، آݨ بھونتاں ناں کاڈھیا، تھاں موکھت میں لی ہے مومکھت میں ݙیئا۔
9
۹۔آپرے تھیلاں میں خونو، چاندی یا پتݪ نی لے جایا۔
10
۱۰۔ آپرے سفر رے خاروں خامان نی لے جایا، نی گابھا،جتّی یا ݙنڈی، کیانکہ مزدورآپری ٻاٹی رو حقدار ہے۔
11
۱۱۔ جکے شہر یا پاڑے میں جاؤ تو جویا کہ کݨ قابل ہے جتی تک پاچھا نی جاؤ تھیں اتھے رہیا۔
12
۱۲۔جݙے تھیں گھر میں بڑو تو (سلامتی) خیرخیریت (ری دعا) مانگو۔
13
۱۳۔ جے گھرائیے لائق ہے تو تھاری خیرخیریت اُواں تے ھوئے، جے اُوے لائق کونی توتھاری خیرخیریت پاچھی تھاں نی آوخے ری۔
14
۱۴۔آݨ جکو تھاناں قبول کونی کرتا، آݨ تھارے شٻدھ ناں کونی خݨتا تو اُوے گھر یا شہر خاں ٻاہرنخرݨ ری گھڑی آپرے پگاں ری مٹی چھنٹکیا ری۔
15
۱۵۔ ھوں تھاں خاں کہ عدالت رے ڈھن اُوے شہر آݪی کرسُوؔدم آݨ عمُوؔرہ رے علاقے رے حال خاں گھݨوبے کابھو ھوخے۔
16
۱۶۔ جوؤ ھوں تھاناں رڈھاں ناں نہاراں میں بہیر کرئی وہ۔ پر تھیں لُنڈ (سانپ) آݪی کر ہوشیار آݨ کبوتر آݪی کر بھݪا(بے آزار) بݨو۔
17
۱۷۔منکھں تے نظر راکھو، اُو تھاناں عدالتاں میں لے جاخے آݨ بھگتی گھرمیں کوڑا مارخے۔
18
۱۸۔ آݨ تھیں مانجی خاطرراجاواں آݨ نیات (صدرعدالت) کوڈھی لایا جاخو تاکہ اُواں رے آݨ ٻجے قوماں رے خاروں گواہی ہووئے۔
19
۱۹۔ پݨ جݙے اُو تھاناں جھلواوے تو گھٻرایا نی کہ ککر آݨ کی ٻولخاں، جکو کہیوݨوھے اُوے گھڑی کہیوجاخے۔
20
۲۰۔ اے تھیں ٻولݨ آݪا کونی ہووہ، پݨ تھاں میں اے آکاشی پتا رو روح تھاں میں ٻولخے۔
21
۲۱۔ بھائی بھائی ناں مراؤݨ رے خاروں ٻندھاخے، آݨ ٻاپ آپ رے ݙیکرے ناں۔ اولاد آپ رے ٻاپ رے خلاف ہوخے آݨ اُواں ری موت رو خبب بݨخے۔
22
۲۲۔پر کوئی مانجے ناں خاں تھاں خاں نفرت کرخے پݨ جکو یہ ناں آکھر تک خہخے بچایو جاخے۔
23
۲۳۔ جݙے اُوتھاناں ائیے شہر میں تنگ کرے تو ٻجے میں جایا، ھوں تھاناں خچ کہیں کہ اسرائیل رے خارے شہراں میں کونی جاؤ تے، (ابن آدم) منکھ جایو آخے رو۔
24
۲۴۔ چیلو آپ رے گرو خاں موٹو کونی، نوکر آپ رے مالک خاں۔
25
۲۵۔ چیلے رے خاروں کہیوڑو ھے اُو آپرے گرو آݪی کر ہوئے، آݨ نوکر آپ رے مالک آݪی کر بݨے۔ جݙے اُواں گھر رے دھݨی(مالک) بعلزٻول کہیو تو گھر رے ٻیجا منکھاں ناں یہ خاں گھݨو کیاں کونی۔
26
۲۶۔ائیے خاروں ائیاں خاں نی گھٻرایا، کیانکہ ایڑو کوئی کونی جکو لکیؤݪو ݙخیجے نی،آݨ کوئی کونی جکو لکیوݪوھے پر اُوݪکھیو نی جاوے۔
27
۲۷۔ جکوھوں تھاناں اندھارے میں کہیں ، تھیں اُو اجاݪے ݙخلو، آݨ تھیں آپ رے کاناں میں ہوݪیا خاں خوݨیی گھراں ری چھت تے پرچار کرو۔
28
۲۸۔ اُواں خاں نی ٻہیوجکو جسم ناں ماری اُو یہ قابل کونی کے آتما ناں مارے، ائے خارواُوے خاں ٻہیو جکو جسم آݨ آتما ٻہیاں2 ناں مار خگئی (ختم کر خگئی)
29
۲۹۔کی ٻے چڑکے ٹکّے رے کونی بکتے؟ پݨ اُواں میں خاں ہیک وی پتا ری مرضی خاں ٹاݪ دھرتی تے کونی کھرے۔
30
۳۰۔ اتری تک کے تھارے ماتھے را باݪ بھی گݨیوڑا ھے۔
31
۳۱۔ تھاری قدر توگھݨے چڑکیاں خاں گھݨی (زیادہ) ھے۔
32
۳۲۔ ائیے رے خاروں جکو منکھاں رے آگی مانجو اقرار کرئی ھوں وی اُوے رو پتا رے آگی مانجواقرار کریخ جکو آکاش (آسمان) میں ھے۔
33
۳۳۔پݨ جکو منکھں رے خامھومانجو انکار کرئی ھوں وی پتا رے آگی اُوے رو انکار کریخ جکو آکاش تے ھے۔
34
۳۴۔ اے نی خچو کہ ھوں دھرتی تے شانتی کرݨ آیوھاں پݨ تلوار چلاؤݨ رے خاروں۔
35
۳۵۔ ھوں منکھاں ناں اُوے رے پتا خاں آݨ ݙیکری ناں ماں رے خلاف آݨ بوہاری ناں اُوے ری خاخو رے خلاف کرݨ آیوھاں۔
36
۳۶۔ منکھاں را دخمݨ اُوے رے گھر آݪا ھوخے۔
37
۳۷۔ جکو آپ رے مات پتا خاں گھݨو پریم کرئی اُو ماجو کونی آݨ جکو ݙیکرے آݨ ݙیکری خاں گھݨو پریم کرئی اُو ماجو کونی۔
38
۳۸۔آں جکو آپرا ݙکھ (صلیب) اُکھݨ مانجے لارے کونی آوتو اُو ماجو کونی۔
39
۳۹۔ جکو جیؤݨ چاوہی اُو آپ ری جاں گماخے پݨ جکو مانجے خاروں آپ رو جیؤݨ ݙئی اُو آپ رو جیؤݨ پاخے۔
40
۴۰۔ جکو تھاناں منئی اُو مناں منئی آݨ جکو منا منئی اُو مانجے بہیر کرݨ آݪے ناں منئی۔
41
۴۱۔ جکو سنت(نبی) ناں منئی ائیہے رے خاروں کہ اُو سنت ھے، تے اُو سنت رو پھݪ (اجر) پاخے، جکو خچے منکھ ناں منئی کیانکہ اُو خچو ہے تو اُو خچے منکھ رو پھݪ پاخے
42
42 آݨ جکو ائیاں چھوٹا میں خاں کہی ناں چیلو خمجھ ہیک گلاخ پاݨی پیاݪخے ھوں تھاناں خچی کہیں کہ اُو آپ رو پھݪ کونی گماوئے۔