1
۱۔ آن پچھے او شہراں آن گاواں میں تعلیم ݙیوتو رہیو۔ ان اِیشور ری بادشاہی روی خوشی ری خبر ݙیوتو رہیو۔ ان او باز اُوے رے بھیݪا ہوتا۔
2
۲۔آن گھݨے لُگائے جکاں نا بھونت ان بیماری میں ہتے ٹھیک ہوتے جکاں میں مریم مگدلینی ہتی جکے میں خاں خات بھونت کاڈھیا ہَتا۔
3
۳۔ان حنہ ہیرودیس ارے دیوان خوزہ ری لُگائی۔ ان سوسناہ آن ٻجے لُگایے وی ہتے جکو آپرے مال خاں اُواں ری مدد کرتے ہَتے۔
4
۴۔آن جکے گھڑی موٹو ٹوݪو بھیݪو ہویو۔ ان ہر شہر خاں لوک اُوے کڈھے بھیݪا ہوتا۔ پچھے اُواں خاں مثال میں کہیو۔
5
۵۔باوݨ آݪو ٻیج باوݨ نکݪیو۔ ان کئینک پدھر تے کھریا ان ٻیج گیا آن آسمان را پھکی اُواں نا چُگ لنھو۔
6
۶۔ان کئینک پتھریلی دھرتی تے کھریا ان اگ تے خُوک گیا۔ کیانکہ اُواں نا خیم کونی پُگی۔
7
۷۔ آن کئینک کانٹاں آݪی جگہ کھریا پݨ اُواں کانٹاں اُواں نا دٻا ݙنا۔
8
۸۔ان کئینک بھلی دھرتی تے کھریا ان اُگیا ان خو گُناہ پھݪ لایا ان ایہ کہہ تے اُوے کہیو کہ جکے را کان ہے او خݨ لے۔
9
۹۔ اُوے رے چیلاں اُوے خاں پُوچھیو کہ ایہ کیہڑی مثال ہے۔
10
۱۰۔ان اُوے کہیو کہ اِیشور ری بادشاہی رے بھید خاں کہیو گیو ہے۔ پݨ ٻیجاں خارُو مثال ہے کیانکہ او جکو جوتا ہویا نی جوے آن خُݨتا ہویا نی خُݨے
11
۱۱۔ان او مثال اے ہےکہ ٻیج اِیشور رو کلام ہے۔
12
۱۲۔پدھر تے او منکھ ہے جکو خُݨئی تو رو پݨ شیطان آ رو اُوے رے کلام نا دل خاں کھوخ لیوی ایاں جی ہوے کہ او ایمان لے آرو مُکتی پاوے۔
13
۱۳۔آن پتھریلی دھرتی او ہے جکو کلام خݨ تے خوشی خاں منی پݨ جڑ کونی جھالتو ان کئینک ݙناں خاں بعد ایمان خاں منکر ہو جاوی۔
14
۱۴۔ان جکو کانٹاں آݪی جگہ کھریو۔ دُنیا رے فکراں ان دولت ان زندگی رے خیالاں میں پھخ گیو ان پھݪ نی لایو۔
15
۱۵۔پݨ جکو بھلی دھرتی تے کھریو اے او کلام ہے جکو خݨ تے اوے تے عمل کریو ان اُوے تے قائم رہیا ان او ایمانداری خاں پھݪ لاوی۔
16
۱۶۔کوئی منکھ وی ݙیو ٻاݪ تے اوے تے ٹھیکر کونی راکھتو۔ نی جی مانچے رے نیچا راکھئی پݨ ݙیو راکھݨ آݪی جگہ تے راکھئی کیانکہ جکو مئیں آوے اُوے نا اُجاݪو نظر آوے۔
17
۱۷۔ کیانکہ کوئی ایہڑی چیز کونی جکو تک خگے ان نی جی لُکایوڑی ہے جکے ری کھٻر نی ہووے۔
18
۱۸۔پݨ خبر دار تھیں کیکر خوئی کیانکہ جکے کڈھے ہے اُوے نا ݙنو جاخے ان جکے کڈھے کونی اُوے خاں او وی لے لنھو خاخے جکے ری اُوے نا کھٻر کونی کہ میں کڈھے ہوتو۔
19
۱۹۔ اُوے ری ماں ان اُوے را بھائی آیا پݨ ٹوݪے ری وجہ خاں اُوے تک نی پُگیا۔
20
۲۰۔ان اُوے نا کہیو کہ تاجی ماں ان تاجا بھائی ٻاہر ابھا تنا ٹکرݨ چاہوی۔
21
۲۱۔اُوے اُواں نا کہیو مھارا بھائی ان مھاری ماں او ہے جکو اِیشور رو کلام خُݨئی ان اُوے تے عمل کرئی۔
22
۲۲۔ بھݪے اُوے ݙنا میں او آپرے چیلاں بھیݪو ٻیڑی تے چڑھیو۔ ان اُوے اُواں نا کہیو کہ آؤ آپاں جھیل رے پار ہالاں ان او بُوہوا۔
23
۲۳۔جݙے ٻیڑی بُوہی جاتی تو اُوے نا اونگھ آگی۔ ان جھیل ماتھے تیز ہوا چلݨ لاگی۔ ان او ݙُبݨ لاگا ان ٻیہݨ لاگا۔
24
۲۴۔ پچھے اواں کڈھے جا تے اُوے نا اُٹھاوݨ لاگا۔ اے اُستاد مھیں مریا جاویں۔ پچھے او اُٹھیو ان ہوا ان پاݨی رے لہراں ناں دڑکو ݙنو ان او رک گیو ان سکون آگیو۔
25
۲۵۔ان ااُوے اوان نا کہیو تھانرو ایمان کِیا گیو پݨ او ٻہی گیا او خوچ تے کہوݨ لاگا کہ اے کݨ ہے جکے رو ہوا ان پاݨی وی ایئے رو کہیو منئی۔
26
۲۶۔ان او گراسینیوں رے علاقے میں جا پُگیا جکو گلیل رے خامھے ہَتو۔
27
۲۷۔ان جݙے او کنارے تے پُگو تو شہر رو ہیک منکھ اُوے نا ٹکریو۔ جکے میں بھونت ہَتا ان او ڈھگ ݙناں خاں گابھا کونی پیہرتو ہتو۔ ان گھرے کونی بلکہ قبراں میں رہوتو ہَتو۔
28
۲۸۔ جݙے اُوے یسوع نا جویو تو رڑے کر تے اُوے رے آگے کھر گیو ان اُونچی آواز خاں کہیو۔ اے یسوع اِیشور را ݙیکرا۔ مھیں خاں تناں کی کام ہے ہُوں تھاری منت کراں کہ مناں عذاب نی ݙے۔
29
۲۹۔ کیانکہ او بھُونت نا حُکم ݙیوتو کہ ایئے منکھ خاں نکݪ جا کیانکہ او اکثر اُوے نا تنگ کرتی ان اُوے نا زنجیراں خاں ٻاندھ آن کھٻڑیاں خاں قاٻو کریوڑو ہَتو۔ تو وی او زنجیراں نا توڑ ݙیوتو ان بھونت اُوے نا پدھران میں نخاݨے پھِرتا۔
30
۳۰۔جݙے یسوع اُوے خاں پوچھیو تھارو ناں کی ہے۔ ان اُوے کہیو کہ لشکر کیانکہ گھݨا خارا بھُونت اُوے مئینا ہَتا۔
31
۳۱۔ان او اُوے ری منت کرݨ لاگا کہ مھاں نا حُکم نی ݙے کہ مھیں ݙُباں۔
32
۳۲۔ اوتھ پہاڑاں تے خوؤراں رو جتھو چرتو ووہ۔ اُوے منت کری کہ مھاناں اُوے جتھے میں میل ان اُوے اُواں نا میل ݙنا۔
33
۳۳۔ان او بھُونت اُوے منکھ خاں نکݪ تے اُوے خوؤراں میں گیئے۔ ان او جتھو رڑے کرتو ہویو جھیل میں ݙب گیو۔
34
۳۴۔ایہ نظارو جو رو او ریڈھار شہر آن دیہات میں خبر کری۔
35
۳۵۔ان لوگ یہ نظارو جوݨ خارُو یسوع کڈھے آیا ان او منکھ جکے خاں بھونت کاڈھیا ہَتا۔ اُوے نا گابھا پیرے ان اور یسوع رے پگاں میں ݙٹھو۔ ان او ٻہی گیا۔
36
۳۶۔ ان جوݨ آݪا اُواں نا کہیو کہ جکے بھونت ہَتا او کِکر ٹھیک ہویو۔
37
۳۷۔ان گراسینیو رے رے کڈھے رے علاقے رے منکھاں اُوے نا کہیو کہ مھاں خاں جا رو کیانکہ او ٻہی گیا ان اُواں تے دہشت چھا گی۔
38
۳۸۔ان او منکھ جکے خاں بھُونت نکݪ گیا تا۔ اُوے منت کری کہ منا تھیں بھیݪو راکھو۔ پݨ یسوع اُوے نا واپس میل ݙنو ان کہیو۔
39
۳۹۔آپرے گھرے جا ان جکو موٹا کام تھیں واسطے ایشور کریا ٻجاں نا خُݨا۔ او جا رو خارے شہر میں مشہور کرݨ لاگو کہ یسوع مھیں واسطے کی کی کریو۔
40
۴۰۔ان جݙے یسوع پاچھو آیو تو ٹوݪے اُوے رو جی آیو کریو۔ کیانکہ خارا اُوے نا جوتا ہتا۔
41
۴۱۔ان جووہ یائیر ناں رو ہیک منکھ ہَتو جکو بھگتی گھر رو سردار ہَتو۔ آن یسوع رے پگاں میں کھریو۔ ان اُوے ری کنت کرݨ لاگو۔ کہ مھارے گھرے حال۔
42
۴۲۔ کیانکہ اُوے ری ہیک ݙیکرے ہَتی ٻارہے سال ری جکو مرݨ آݪی ہوتی۔ ان جݙے او جاوتو تو لوگ اُوے تے کھرتا ووا
43
۴۳۔اب ہیک لُگائی جکے نا ٻارہے برخ خاں لوہی بہاݨ ری بیماری ہَتی۔ ان اُوے رو خارو مال ݙاگداراں نا ݙے ݙنو ہَتو۔ پݨ کے خاں وی ٹھیک کونی ہوئی۔
44
۴۴۔اُوے رے لارے ہو ری اُوے رے گابھے نا ہاتھ لگایو ان او اُوے گھڑی ٹھیک ہوگی۔
45
۴۵۔ایئے تے یسوع کہیو او کݨ ہے جکے مناں ہاتھ لگایو۔ جݙے خاراں نی منیو تو پطرس ان اُوے را ساتھی کہوݨ لاگا اے اُستاد لوگ تھانا دٻائے ان لتاڑے جاوی۔
46
۴۶۔پݨ یسوع کہیو کہ کے تو منا ہاتھ لگایو ہے کیانکہ مھیں خاں قوت نکݪی ہے
47
۴۷۔جݙے اُوے لُگائی جویو کہ ہُوں لک کونی خگتی ان او کانپتی آئی ان پگاں میں کھر گی ان خارے لوکاں رے خامھے کہیو کہ میں کِکر تنا ہاتھ لگایو ان کِکر ٹھیک ہوئی۔
48
۴۸۔اُوے اُوے نا کہیو کہ ݙیکری تاجو ایمان تنا ٹھیک کریو۔ خاجی خُوری جا۔
49
۴۹۔ان ایہ کہوتو جی ہتو ووہ کہ بھگتی گھر رے سردار رے گھر خاں کئی آتے کہیو کہ تھاری ݙیکری مری ری اُستاد نے تنگ نی کر۔
50
۵۰۔یسوع خݨ رو اوے نا کہیو نی ٻیہی ان ایمان راکھ او بچ جاخے۔
51
۵۱۔ان جݙے او گھرے آیو تو پطرس ان یوحنا ان یعقوب ان چھوکری را ماں ٻاپ خاں ٹاݪ ٻجو مہینا کئی نا کونی آوݨ ݙنو۔
52
۵۲۔ان خارا اوے واسطے روتا آن ماتم کرتا ووا۔ پݨ اُوے کہیو نی رووہ او مری کونی پݨ خُوتی ہے۔
53
۵۳۔او اُوے تے ہخݨ لاگا۔ کیانکہ اُواں نا کھٻر ہتی کہ او مر گی ری۔
54
۵۴۔ پݨ اُوے اُوے رو ہاتھ جھالیو ان کہیو اے چھوکری اٹھ۔
55
۵۵۔ان اُوے رو خاخ بݪے پاچھو آیو۔ ان اُوے گھڑی اُٹھی۔ ان یسوع حُکم ݙنو کہ ایئے نا کئینک کھاوݨ خارُو ݙو۔
56
۵۶۔جݙے اُوے را ماں ٻاپ حیران ہویا پݨ اُوے اُواں نا خمجھایو کہ جکو کجھ ہویو ہے کہیں نا نی کہیا۔