1
۱۔آن اُوئے لنگھتے ہیک منکھ نا جویو جکو جماندرو اندھو ہَتو۔
2
۲۔آن اُوئے رے چیلاں اُوئے خاں پوچھیو گرو جی کے گناہ کریو ہَتو۔ ایئے جا ایئے رے ماں ٻاپ کہ ایہ اندھو جلمیو ہے۔
3
۳۔ یسوع بݪتی ݙنی کہ نی تو ایئے گناہ کریو ہے اَن نی جی ایئے رے ماں ٻاپ۔ پݨ ایہ ایئے خارو ہویو کہ ایشور را کام ظاہر ہو وے۔
4
۴ ۔ضرور ہے کہ جتری تک ݙن ہے اوئے را کام کراں جکے مناں میلیو ہے۔ او رات آوݨ آݪی ہے جکے میں کوئی کام منکھ کام کونی کر خگتو۔
5
۵۔جتری تک ہوں دنیا میں ہا دنیا رو نور ہا۔
6
۶۔ ایہ کہہ تے اُوئے دھرتی تے تھوکیو۔ اَن تھوک خاں مٹی گوہی اَن اُو مٹی اُوئے اندھے رے آنکھیاں تے لگائی۔
7
۷۔آن اُوئے نا کہیو جا شیلوخ(جکے رو ترجمو ہے میلیوڑو) کے تالاب میں دھو آن او گیو اَن دھویو اَن آنکھیاں آݪو ہو تے آیو۔
8
۸۔ آن پاڑے آݪاں اَن جکاں جکاں منکھاں پہل اُوئے نا پنتے جویو ہَتو کہݨ لاگا۔ کی ایے او کونی جکو ٻیٹھو پنتو ہَتو۔
9
۹۔کہینک منکھاں کہیو کہ ایہ او جی ہے اَن کہینک منکھاں کہیو کہ کونی بلکہ اُوئے جہڑو جی ہے۔ اُوئے آپ کہیو کہ ہوں اُو جی ہا۔
10
۱۰۔پچھے اُو اُوئے نا کہݨ لاگا کہ پچھے تھاری آنکھیں کیکر کُھل گے رے۔
11
۱۱۔اُوئے بݪتی ݙنی کہ اُوئے منکھ جکے رو ناں یسوع ہے مٹی گوہی اَن مھاری آنکھیاں تے لگائی اَن مناں کہیو کہ شیلوخ رے تالاب تے جا اَن دھو رے آن ہوں گیو اَن دھو لیے اَن ہوں جووݨ لاگ گیو۔
12
۱۲۔آن اُوئاں اُوئے نا کہیو کہ او کتھ ہے؟ اُوئے کہیو کہ مناں کونی ٹھاہ۔
13
۱۳۔ لوک اُوئے منکھ نا جکو اندھو ہَتو فریسیاں کڈھے لے گیا۔
14
۱۴۔( جکے ݙن یسوع مٹی لگا تے اُوئے رے آنکھیں کھولیے ہَتے۔ او سبت رو ݙن ہَتو۔)
15
۱۵۔پچھے فریسیاں وی اُوئے خاں پوچھیو کہ کیکر جووݨ لاگو ہے۔ اُوئے اُوئاں نا کہیو کہ اُوئے مھاری آنکھیاں تے مٹی لگائی اَن میں دھو لنھے اَن ہوں جووݨ لاگ گیو۔
16
۱۶۔ پچھے فریسیاں میں خاں کہینک منکھاں کہیو ایہ منکھ ایشور خاں کونی کیانکہ او سبت نا کونی منتو۔پݨ ٻجاں کہیو کہ گناہ گار منکھ ایہڑا چمتکار کیکر جو واݪ خگئی۔ آن ایئاں او آپت میں نی ٹھیا۔
17
۱۷۔اُوئاں اُوئے اندھے نا بھݪے کہیو کہ جکے تھارے آنکھیں کھولیے تو اُوئے رے بارے میں کی کہیں؟ اَن اُوئے کہیو او نبی ہے۔
18
۱۸۔پݨ یہودیاں ایہ بات خچی نی خمجھی کہ ایہ اندھو ہَتو۔ اَن ہمے جووئی وو۔ اتری تک کہ اُوئاں اُوئے اندھے رے ماں ٻاپ نا ہیلو کراں۔
19
۱۹۔ آن اوئے خاں پوچھیو کہ کی ایہ تھارو ݙیکرو ہے۔ جکے نا تھاں اندھو جݪمیو ہَتو؟ تو پچھے ہمے او کیکر جووئی وو؟
20
۲۰۔اُوئے رے ماں ٻاپ بݪتی ݙنی مھاناں ٹھاہ ہے کہ ایہ مھارو ݙیکرو ہے اَن ایہ کہ او اندھو جݪمیو ہَتو۔
21
۲۱۔پݨ ایہ مھاناں کونی ٹھاہ کہ ہمے کیکر جووئی وو۔ آن نی جی ایہ ٹھاہ ہے کہ کے اُوئے رے آنکھیں کھولیے ہے۔ او پوری عمریا رو ہے۔ اُوئے خاں پوچھو او آپ جی آپرو حال خُݨاخے رو۔
22
۲۲۔ ایہ اُوئے رے ماں ٻاپ یہودیاں رے ٻہی خاں کہیو۔ کیانکہ یہودیاں ہیک خلہا کری ہَتی۔ کہ جکو وی ایہ منخے کہ اُو مسیح ہے تو اُوئے نا بھگتی گھر خاں کاڈھیو جاخے۔
23
۲۳۔ایئے رے خارو اُوئے رے ماں ٻاپ اُوئاں نا کہیو کہ ایہ پوری عمریا رو ہے ایئے خاں جی پوچھو۔
24
۲۴۔ پچھے اُوئاں اُوئے منکھ نا بھݪے ہیلو کرایو جکو پہل اندھو ہَتو اَن پوچھیو۔ کہ ایشور ری بݙائی ہووئے۔ مھاناں ٹھاہ ہے کہ ایہ منکھ گنہگار ہے ۔
25
۲۵۔پچھے اُوئے بݪتی ݙنی کہ مناں کونی ٹھاہ کہ او گہنگار ہے جاں کونی۔ مناں تو ہیک بات ری جی ٹھاہ ہے کہ ہوں اندھو ہَتو ہمے جووئی وو۔
26
۲۶۔ تو پچھے اُوئاں اُوئے نا کہیو کہ اُوئے تے خاں کی کریو؟ کیکر تھارے آنکھیں کھولیے؟
27
۲۷۔آن پچھے اُوئاں نا کہیو کہ میں ہݨے تو تھاناں کہیو اَن تھاں کونی خُݨیو۔ تو کیاں خُݨݨ چاہوئی۔ کی تھاں وی اُوئے را چیلا بݨخو۔
28
۲۸۔ پچھے اُوئاں اُوئے تے لعنت کی اَن کہیو کہ تو جی اُوئے رو چیلا بݨ مھاں تو موسٰی را چیلا ہا۔
29
۲۹۔مھاناں ٹھاہ ہے کہ ایشور موسٰی خاں کلام کرتو۔ پݨ مھاناں کونی ٹھاہ کہ ایہ کتھ رو ہے۔
30
۳۰۔ اُوئے منکھ بݪتی ݙنی کہ ایہ تو ݙکھ ری بات ہے کہ تھاناں وی کونی ٹھاہ کہ اُو کتھ رو ہے۔ بݪے وی اُوئے مھارے آنکھیں کھولیے ہے۔
31
۳۱۔مھاناں ٹھاہ ہے کہ ایشور گنہگاراں ری کونی خُݨتو۔ پݨ جے کوئی ایشور نا منݨ آݪو اَن اُوئے ری مرضی تے بہے تو اُو اُوئے ری خُݨی۔
32
۳۲۔ دنیا رے شروع خاں کݙے وی خݨیجݨ میں کونی آیو کہ کہئی وی جماندرو اندھے رے آنکھیں کھولیے ہووئے۔
33
۳۳۔جے ایہ منکھ ایشور خاں کونی ہَتو تو کئیں کونی کر خگتو ہَتو۔
34
۳۴۔اُوئاں بݪتی میں اُوئے نا کہیو تُوں تو گناہواں میں جݨیجو ہے تو کی مھاناں خیکھاوئی؟ پچھے اُوئاں اُوئے نا ٻاہر کاڈھ ݙنو۔
35
۳۵۔ یسوع خُݨیو کہ اُوئاں اُوئے نا ٻاہر کڈھیو رو۔ اَن جݙے اُوئے نا لابھو تو اُوئے نا کہیو کہ کی تو ابنِ آدم تے ایمان لے آئیخ۔
36
۳۶۔اُوئے بݪتی میں کہیو اے پرمیشور اُو کُݨ ہے کہ ہوں اُوئے تے ایمان لے آواں؟
37
۳۷۔یسوع اُوئے نا کہیو تئیں تو اُوئے نا جویو ہےاَن جکو تئیں خاں بات کرئی وو او جی ہے۔
38
۳۸۔اُوئے کہیو اے پرمیشور ہوں ایمان لے آوئی اَن اُوئے نا سجدو کریو۔
39
۳۹۔پچھے یسوع کہیو ہوں شرعی حکم ݙیوݨ خارو ایئے دنیا میں آیو ہا۔ تاکہ جکو نی جووئے اُو جووئے اَن جکو جووئی وا اُو اندھاں ہو جاوے۔
40
۴۰۔اَن فریسیاں میں خاں جکو اُوئے بھیݪا ہَتا۔ ایہ خُݨ تے اُوئے نا کہیو کی مھاں وی اندھا ہا۔
41
۴۱۔یسوع اُوئاں نا کہیو جے تھاں اندھا ہونت تو تھاں گنہگار نی ہونت۔ پݨ جے ہمے تھاں کہیں کہ مھاں جووئی وا۔ تو تھارا گناہ قائم رہخے۔