1
۱۔ آن جݙے ایشور نا ٹھا لاگی کہ فریسیاں خݨیو ہے کہ یسوع یوحنا خاں گھݨا چیلا کرئی آن بپتسمہ ݙئی۔
2
۲۔کیانکے یسوع آپ کونی بلکہ اُوئے را چیلا بپتسمہ ݙئی۔
3
۳۔تو او یہودیہ نا چھوڑ تے گلیل ݙخا گیو۔
4
۴۔ آن ایہ ضرور ہتو کہ او سامریہ خاں ہو تے جاوئے۔
5
۵۔جݙے اُو سامریہ رے ہیکے شہر تک گیو جکو سوخار خُݨیجتو اُوئے زمین رے نیڑو جکو یعقوب آپرے ݙیکرے یوسف نہ ݙنو ہَتو۔
6
۶۔آن یعقوب رو کھوہ وی اوتھ ہَتو آن یسوع سفر خاں تھکو تھی تے کھوہ کڈھے ٻیخ گیو۔ ایے چھ وئے گھنٹے رے نیڑو ہَتو۔
7
۷۔جݙے سامریہ ری ہیک لُگائی پاݨی بھرݨ آئی۔ یسوع اُوئے نا کہیو مناں پیئݨ خارو پاݨی ݙئے۔
8
۸۔کیانکے اُوئے را چیلا شہر خاں کھاوݨ پیوݨ رو خمان لیوݨ گیوڑا ہَتا۔
9
۹۔ اُوئے سامری لُگائی اُوئے نا کہیو کہ تُوں یہودی ہو تے سامری لُگائی خاں کیاں پیݨ رے خارو مانگئی کیانکہ یہودی سامریاں خاں کہڑو سلوک کرئی۔
10
۱۰۔یسوع بݪتی میں اُوئے نا کہیو کہ جے تو ایشور ری خوبی جاݨتی۔ اَن ایہ کہ او کُݨ ہے جکو تناں کہی کہ مناں پیݨ خارو پاݨی ݙے جے تو اُوئے خاں مانگت تو اُو تنے زندگی رو پاݨی ݙائت۔
11
۱۱۔ اُوئے اُوئے نا کہیو کہ مالک تے کڈھے ݙول تو ہے کونی اَن کھوہ وی اُونݙو ہے تو پچھے تئے او زندگی رو پاݨی کیتھ خاں لیو۔
12
۱۲۔کی تُو مھارے ٻاپ یعقوب خاں موٹو ہے۔ جکے مھاناں ایہ کھوہ ݙنو۔ اَن اُوئے آپ اَن اُوئے رے ݙیکراں اَن اُوئے رے جناوراں وی ایے خاں پیو۔
13
۱۳۔ یسوع بݪتی میں اُوئے نا کہیو جکو کوئی ایہ پاݨی پیخے بھݪے ترخو رہخے۔ پݨ جکو کوئی اُو پاݨی پیخے جکو ہوں اُوئے نا ݙئیخ او کݙے ترخو کونی ہوئے۔
14
۱۴۔بلکہ جکو پاݨی ہوں اُوئے نا ݙئیخ اُوئے میں پاݨی رو کھوہ بݨ جاخے جکو خاری عمر رے خارو چلتو رہئخے۔
15
۱۵۔ لُگائی اُوئے نا کہیو اے مالک اُو پاݨی مھناں ݙئے کہ مھناں بݪے ترخ نی لاگے اَن نی جی بھݪے پاݨی بھرݨ خارو ہوں ایتھ آواں۔
16
۱۶۔اُوئے اُوئے نا کہیو کہ آپرے دھݨی نا ہیلو کر اَن بھݪی تو وی ایتھ آ۔
17
۱۷۔ لُگائی بݪتی ݙنی کہ مانجو دھݨی کونی یسوع اُوئے نا کہیو کہ تو ٹھیک کہیں کہ تانجو دھݨی کونی۔
18
۱۸۔کیانکہ تئے پانچ دھݨی کریا ہے اَن جکو ہݨے تئے بھیݪو ہے تھارو دھݨی کونی تیئں خچی کہیو۔
19
۱۹۔ لُگائی کہیو کہ اے مالک جے مناں ٹھا ہونت کہ تو نبی ہے۔
20
۲۰۔مھارے ٻاپ ݙاݙے ایئے پہاڑ تے بھگتی کرئی اَن تو کہیں کہ اُو جگہ جیتھ بھگتی کرݨی چاہجئی اُو یروشلیم میں ہے۔
21
۲۱۔ یسوع اُوئے نا کہیو بی بی مانجی بات رو یقین کر کہ اُو بݪہ آخے کہ تو ایئے پہاڑ تے اَن نی یروشلیم میں ٻاپ ری بھگتی کرخو۔
22
۲۲۔تھاں اُوئے رے جکے نا جاݨتا کونی بھگتی کرئی۔ مھاں اُوئے ری جکے نا جاݨجئی بھگتی کرئیں کیانکے مگتی یہودیاں میں خاں ہے۔
23
۲۳۔ پݨ او بݪہ آخے بلکہ ہݨئے جی ہے کہ خچا بھگت روح اَن خچیائی خاں ٻاپ ری بھگتی کرخے۔ کیانکہ ٻاپ آپرا بھگت ایڑھا جی چاہوئی۔
24
۲۴۔ایشور آتماں ہے اَن جکو اُوئے ری بھگتی کرئی اُواں نا لازم ہے کہ اُو روح اَن خچیائی خاں اُوئے رے بھگتی کرے۔
25
۲۵۔ لُگائی اُوئے نا کہیو ہوں جاݨئی کہ مسیح آوݨ آݪو ہے۔ جݙے او آخے تو مھاناں خارے باتاں خُݨاخے۔
26
۲۶۔یسوع اُوئے نا کہیو ہوں جکو تئے خاں ٻوݪی وو ہوں اُو جی ہا۔
27
۲۷۔ ایترے میں اُوئے را چیلا را آیا اَن حیران ہوݨ لاگا کہ او اُوئے لُگائی خاں باتاں کرئی وو پݨ کہی وی نی کہیو کہ تُوں کی چاہوئی جاں اُوئے خاں کیا باتاں کرئی وو۔
28
۲۸۔ پچھے لُگائی آپرو دِلو اتھ راکھیو اَن شہر میں جا لوکاں نا خݨایو۔
29
۲۹۔آؤ ہیکے منکھ نا جووو جکے خارا کام جکو میں کریا مناں خُݨایا ہے کی ایہ مسیح کونی۔
30
۳۰۔ایئے خارو او شہر خاں نکݪے اُوئے کڈھے آیا۔
31
۳۱۔ اترے میں اُوئے رے چیلاں اُوئے نا منتھ کی کہ مالک کہینک کھا لو۔
32
۳۲۔پݨ اُوئے اُواں نا کہیو کہ میں کڈھے کھاوݨ رے خارو ایڑہی خوراک ہے جکو تھاناں وی کونی ٹھاہ۔
33
۳۳۔ایئے خارو چیلا آپت میں کہݨ لاگا کہ کوئی ایئے خارو ٻاٹی لے آیو ہے۔
34
۳۴۔یسوع اُواں نا کہیو کہ مھاری ٻاٹی ایہ ہے کہ آپرے بہیر کرݨ آݪے ری مرضی مناں اَن اُوئے رو کام پورو کراں۔
35
۳۵۔کی تھیں کونی کہوتا کہ چار مہئݨاں خاں پچھے فصل تیار ہوخے رو۔ جووو ہوں تھاناں کہیں آپری آنکھیں اُکھݨو اَن فصلاں نا جووو کہ او باڈھݨ رے خارو پکی ری۔
36
۳۶۔اَن باڈھݨ آݪا نا مزدوری ملخے اَن اَمر جیوݨ رے خارو پھݪ بھݪو کرخے۔ ائیاں او جکو باوئی اَن جکو باڈھئی ٻنہئی بھیݪا راجی ہووئی۔
37
۳۷۔ اَن اُوئے تے ایہ مثال خچئی ہووئی کہ ہیک باوئی اَن ٻجو باڈھئی۔
38
۳۸۔میئں تھاناں بہیر کرئی کہ جکے میں تھاں محنت کونی کرتا اُوئے نا باڈھو ٻجاں محنت کرئی آن تھیں اُوئے رے بھیݪا ہو۔
39
۳۹۔ اَن اُوئے شہر را گھݨئِ سامری اُوئے لُگائی رے کہݨ خاں جکے کہیو کہ اُوئے مانجاں خارا کام مھناں خُݨایا اُوئے تے ایمان لے آیا۔
40
۴۰۔پݨ اُواں سامریاں اُوئے کُڈھیا آ اَن اُوئے ری منت کر اَن کہیو مھاں کڈھے رہے اَن اُو ٻے ݙن اوتھ جی رہیو۔
41
۴۱۔ آن اُوئے رے کلام رے وسیلے خاں ٻجا وی اُوئے تے ایمان لے آیا۔
42
۴۲۔اَن اُوئے لُگائی نا کہیو کہ ہمے مھیں تھارے کہݨ تے ایمان کونی لے آیا۔ کیانکہ مھاں آپ جی خُݨ لیو رو اَن جاݨجئی کہ اصل میں ایہ جی دنیا نا مگتی ݙیݨ آݪو ہے۔
43
۴۳۔ ایئے ٻے ݙناں خاں پچھے او گلیل نی گیو۔
44
۴۴۔کیانکے یسوع آپ جی گواہی ݙنی کہ نبی ری آپرے ملک میں عزت کونی ہوتی۔
45
۴۵۔آن جݙے او گلیل میں آیو تو گلیلیاں اُوئے نا قبول کریو ایئے خارو کہ اُواں او خارو کجھ ݙٹھو جکو اُوئے یروشلیم میں عید رے ݙن کریو ہتو۔ کیانکہ اُو وی اُتھ عید مناوݨ گیا ہَتا۔
46
۴۶۔ آن او بݪے قانائے گلیل میں آیو جیتھ اُوئے پاݨی نا شربت بݨائی ۔ اَن کفرنحوم میں ہیک عزیز ہتو جکے رو ݙیکرو بیمار ہَتو۔
47
۴۷۔اُوئے جݙے خݨیو کہ یسوع یہودیہ خاں گلیل میں آیو ہے تو اُوئے کڈھے گیو آن اُوئے ری منتھ کی کہ حال مھارے ݙیکرے نا شفاہ ݙئے کیانکہ او مَرݨ رے نیڑو ہے۔
48
۴۸۔ پچھے یسوع اُوئے نا کہیو جتری تک تھاں معجزا کونی جوتا ایمان کونی لے آؤتا۔
49
۴۹۔عزیز اُوئے نا کہیو کہ اے ایشور ایئے خاں پہل کہ مھارو ݙیکرو مر جاوئے ہالو۔
50
۵۰۔یسوع اُوئے نا کہیو جا تھارو ݙیکرو جیتو ہے۔ اُوئے منکھ اُوئے ری بات رو یقین کریو۔ جکو یسوع اُوئے نا کہیو اَن بوہو گیو۔
51
۵۱۔ آن اُو مارگ میں جی ہتو کہ اُوئے را نوکر اُوئے نا ٹکریا اَن خبر ݙنی کہ تھارو ݙیکرو جیتو ہے۔
52
۵۲۔جݙے اُوئے اُواں خاں پوچھیو کہ اُوئے نا کہی گھڑی خاں آرام آوݨ لاگو ہَتو۔ تو اُواں کہیو کہ کالھے خاتوئے گھنٹے خاں اُوئے رو تا اُتر گیو ہَتو۔
53
۵۳۔ آن ٻاپ جاݨ گیو ہَتو کہ ایہ اُو جی گھڑی ہَتی جݙے یسوع اُوئے نا کہیو ہَتو کہ جا تھارو ݙیکرو جیتو ہے۔ آن او آپرے خارے گھر خُدھو ایمان لے آیو۔
54
۵۴۔ایے ٻجو معجزو ہَتو جکو یسوع یہودیہ خاں گلیل میں آ تے جووݪیو۔