1
۱۔ اَن تیجے ݙن قانائے گلیل میں بیاہ ہویو آن یسوع ری ماں اتھ ہَتی۔
2
۲۔اَن یسوع اَن اُوئے رے چیلاں نا وی اُوئے بیاہ رو ہیلو ہَتو۔
3
۳۔ آن جݙے انگوراں رو شربت کھٹ گیو تو یسوع ری ماں اُوئے نا کہیو کہ اُوئاں کڈھے انگوراں رو شربت مُکو رو۔
4
۴۔اَن یسوع اُوئے نا کہیو اماں آپاں نا کی مھارو ٹائم ہالی کونی آیو۔
5
۵۔اُوئے رے اماں نوکراں نا کہیو جو ایئے تھاناں کہے او کریا۔
6
۶۔ آن اُتھ یہودیاں رے رعت رے مطابق پتھراں را چھ مٹ پیا ہَتا۔جکے میں ٻے ٻے تین تین مݨ ری گنجایش ہوتی۔
7
۷۔یسوع اُوئاں نا کہیو مٹاں میں پاݨی بھر ݙو۔ آن اُوئاں اُوئے نا فل بھر ݙنا۔
8
۸۔اَن بھݪے اُوئے اُوئاں نا کہیو کے ہمے ایئے نا کاڈھو اَن خصوصی مہمان نی لے جاؤ۔ اَن او لے گیا۔
9
۹۔ جݙے اُوئے خصوصی مہمان اُو پاݨی چکھیو جو انگوراں رو شربت بݨ گیو ہَتو۔ اُوئے نا کونی ٹھا ہَتی کہ ایہ کیتھ خاں آئی ہے۔ (پݨ او نوکر جکے پاݨی کھاڈھیو ہَتو جاݨتو ہَتو) تو خصوصی مہمان بینݙ نا ہیلو کرایو۔
10
۱۰۔آن اُوئے نا کہیو کہ ہر منکھ پہلی بھلو انگوراں رو شربت پیاݪی اَن ہݪکو اُوئے گھڑی جݙے خارا گھݨی پی لئی پݨ تھیں تو بھلو انگوراں رو شربت لُکا راکھیو ہے۔
11
۱۱۔ نخانیاں ری ایے شروعات یسوع قانائے گلیل میں کی اَن اُوئے آپ رو جلال بتایو اَن اُوئے را چیلا اُوئے تے ایمان لے آیا۔
12
۱۲۔ اُوئے خاں پچھے اُوئے ری ماں اَن بھائی اَن اُوئے را چیلا کفرنحوم نی گیا پݨ اُتھ گھݨا ݙن نی رہیا۔
13
۱۳۔ آن یہودیاں ری عید نیڑی ہَتی آن یسوع یروشلیم نی گیو۔
14
۱۴۔آن اُوئے ہیکل میں ڈھگا اَن بھیݙاں اَن کبوتر بیچݨ آݪاں نا جویو اَن بپاریاں نا وی جکو اُتھ ٻیٹھا ہَتا۔
15
۱۵۔پچھے اُوئے رنڈھوڑیاں رو کوڑو بݨا اَن خارے بھیݙاں اَن ڈھگاں بھیݪا ہیکل خاں ٻاہر کاڈھ ݙنا اَن یپاریاں را پیخا اُݙا اَن پھٹا اُندھا کر ݙنا۔
16
۱۶۔آن کبوتر بیچݨ آݪاں نا کہیو ایئاں نا ایتھ خاں لے جاؤ مھارے ٻاپ رے گھر نا بپار رو گھر نی بݨاو۔
17
۱۷۔ آن اُوئے رے چیلاں نا یاد آیو۔ کہ ائیاں لکھیوڑو ہے کہ تھارے گھر ری غیرت مناں کھا جاخے ری۔
18
۱۸۔پچھے یہودی بولݨ لاگا اَن کہیو کہ تو مھاناں کہی نخانی بتا اَن ایہ کام کریں۔
19
۱۹۔یسوع بݪتی میں اُوئاں نا کہیو ایئے ہیکل نا بکھیر ݙو ہوں تیناں ݙناں میں ایئے نا کھڑی کر ݙئیخ ری۔
20
۲۰۔یہودیاں کہیو کہ چھیاݪخ برخاں میں ہیکل بݨی ہے اَن تو ایئے نا تین ݙناں میں کھڑی کریخ ری۔
21
۲۱۔پݨ اُوئے آپرے من ری ہیکل ری بات کی ہتی۔
22
۲۲۔ایئے خارو جݙے او مریوڑاں میں خاں جیتو ہویو تو اُوئے رے چیلاں نا یاد آیو کہ اُوئے کہیو ہتو۔ اَن او لِکھت تے ان یسوع ری ایئے بات تے جکو اُوئے کہی ہَتی ایمان لے آیا۔
23
۲۳۔ جݙے اُو عید رو یروشلیم میں ہَتو۔ گھݨاں اُوئے نخانیاں نا جو جکو اُو جوݪتو ہَتو جو را اُوئے رے ناں تے ایمان لے آیا۔
24
۲۴۔پݨ یسوع آپ رے خیال خاں اُوئاں تے اعتبار کونی کرتو ہتو۔
25
۲۵۔ایئے خارو کہ او خاراں نا اُݪکھتو ہَتو۔آن اُو متھاج کونی ہَتو کہ کوئی وی منکھ اُوئے رے حق میں گواہی ݙے۔ کیونکہ او آپ جی جاݨتو ہَتو کہ انسان رے من میں کی کی ہے۔