1
۱۔ تھارو من نی گھٻراوئے تھیں ایشور تے ایمان راکھئی تو مھیں تے وی ایمان راکھو۔
2
۲۔مھارے ٻاپ رے گھرے گھݨاں خارا گھر ہے۔ جے نی ہونت تو ہوں تھاں نا ݙخلنت رو۔ کیانکہ ہوں تھارے خارو جگھا تیار کرݨ جائی وو۔
3
۳۔اَن جݙے ہوں تھارے خارو جگھا تیار کر لیخ تو بھݪے پاچھو آئیخ۔ اَن تھاناں بھیݪو لے جائیخ تاکہ جتھ ہوں رہئخ اوتھ تھاں وی ہو وو۔
4
۴۔ آن جتھ ہوں جاوئی تھاناں ٹھاہ ہے اَن اُتھ رو مارگ تھاناں وی ٹھاہ ہے۔
5
۵۔توما اُوئے نا کہیو اے پرمیشور مھاناں ٹھاہ کونی کہ تُوں کِتھ جاوئی۔ تو مھاناں اُوئے مارگ ری کیکر ٹھاہ ہوخے۔
6
۶۔یسوع اُوئاں نا کہیو مارگ اَن حق اَن زندگی ہوں ہا۔ کوئی مھیں خاں ٹاݪ ٻاپ کڈھے کونی جا خگتو۔
7
۷۔جے تھاں مھنے اوݪکھئی تو مھارے ٻاپ نا وی اوݪکھنت۔ اَن ہمے خاں تھاں اُوئے نا اوݪکھخو اَن تھاں اُوئے نا ݙٹھو وی ہو۔
8
۸۔ فلپس اُوئے نا کہیو اے پرمیشور ٻاپ نا مھاناں وی جوواݪ تو مھاں خارو گھݨو ہے۔
9
۹۔یسوع اُوئے نا کہیو اے فلپس ہوں اتری دیر خاں تھاں بھیݪو ہا۔ کی تھاں مھنے کونی اوݪکھتا؟ جکے مھنے جویو ہے اُوئے ٻاپ نا جویو ہے۔پچھے تھاں کیکر کہیں کہ ٻاپ نا مھاناں جوواݪ۔
10
۱۰۔ کی تھاناں یقین کونی کہ ہوں ٻاپ خاں ہا اَن ٻاپ مھیں میں ہے۔ ایہ باتاں جکو ہوں تھاناں کہئی آپری طرف خاں کونی کہتو۔ پݨ ٻاپ جکو مھیں میں رئی اُو جی آپرا کام کرئی۔
11
۱۱۔مھارو اعتبار کرو کہ ہوں ٻاپ میں ہا اَن ٻاپ مھیں میں ہے۔
12
۱۲۔نی تو کام ری وجہ خاں جی اعتبار کرو۔ ہوں تھاناں خچی خچی کہئی کہ جکو مھیں تے ایمان لے آوئی۔ اُو وی ایہ کام کرخے۔ جکو ہوں کرئی وو بلکہ ایئے خاں وی موٹا کام کرخے کیانکہ ہوں ٻاپ کڈھے پاچھو جاوئی وو۔
13
۱۳۔اَن جکو وی تھاں مھارے ناں لے تے (ٻاپ خاں) مانگخو او ہوں جی کریخ۔تاکہ ٻاپ ݙیکرے میں جلال پاوئے۔
14
۱۴۔جے تھاں مھارے ناں خاں جکو چاہخو تو ہوں او جی کرئخ۔
15
۱۵۔جے تھاں مھنے پیار کرئی تو مھار حکم منو۔
16
۱۶۔اَن ہوں ٻاپ نا منت کریئخ اَن اُو تھاناں ٻجو وکیل ݙخے جکو خداں تے تھاں بھیݪو ہوخے۔
17
۱۷۔یعنی پویتر آتماں جکے نا دنیا لے کونی خگتی۔ کیانکہ نی تو اُوئے نا جو خگئی اَن نی جی اُوئے نا اوݪکھئی۔ پݨ تھاں اُوئے نا اوݪکھئی کیانکہ او تھاں بھیݪو رہئی اَن تھاں میں ہوخے۔
18
۱۸۔ ہوں تھاناں اوتریا کونی چھوڑا۔ ہوں تھاں کڈھے آئیخ۔
19
۱۹۔ہمے تھوڑی دیر ٻجی ہے۔ کہ دنیا مھنے بݪے کونی جووئے۔ پݨ تھاں مھنے جوتا رہخو کیانکہ ہوں جیتو ہا تھاں وی جیتا رہخو
20
۲۰۔اُوئے ݙن تھاناں ٹھاہ لاگخے کہ ہوں آپرے ٻاپ میں ہا اَن تھاں میں میں ہو اَن ہوں تھاں میں۔
21
۲۱۔جکے کڈھے مھارو حکم ہے اَن اُو اُوئے نا منئی او جی مھنے پیار کرئی۔ اَن جکو مھنے پیار کرئی۔ او مھارے ٻاپ نا پیارو ہوخے ۔ اَن ہوں اُوئے نا پیار کریئخ۔ اَن آپرے آپ نا اُوئے تے ظاہر کریئخ۔
22
۲۲۔اُوئے یہوداہ جکو اسکریوتی کونی ہَتو اُوئے نا کہݨ لاگو اے پرمیشور ایہ بات کیکر ہے۔ کہ تُو آپرے آپ نا مھاں تے تو ظاہر کریئخ پݨ دنیا تے کونی۔
23
۲۳۔ یسوع بݪتی میں اُوئے نا کہیو جے کوئی مھنے پیار کرئی۔ تو اُو مھارے کلام تے عمل کرخے۔ اَن مھارو ٻاپ وی اُوئے خاں پیار کرخے۔ اَن مھاں اُوئے کڈھے آ خاں آن اُوئے بھیلا رہئخاں۔
24
۲۴۔جکو مھنے پیار کونی کرتو.اُو مھارے باتاں تے عمل کونی کرتو۔اَن جکو کلام تھاں خُݨئِ اُو مھارو کونی بلکہ ٻاپ رو ہے جکے مھنے میلیو ہے۔
25
۲۵۔ میں ایہ باتاں تھاناں بھݪے ہوتے تھاں نا کہہ۔
26
۲۶۔پݨ اُو وکیل یعنی روح القدس جکے نا ٻاپ مھارے نا خاں میلخے۔ او جی تھاناں خارے باتاں خکھاخے اَن جکو وی مھیں تھاناں کہیو ہا تھاناں یاد کراخے۔
27
۲۷۔ہوں تھاناں سلامتی ݙئے جاوئیں۔ آپری سلامتی تھاناں ݙئی۔ جاں دنیا ݙئی ہوں اُوئاں کونی ݙوتو۔ تھارو دل نی گھٻراوئے اَن نی ٻہیے۔
28
۲۸۔ تھاں خُݨیو ہے کہ مھیں تھاناں کہیو ہا کہ ہوں جاوئی وو۔ اَن تھاں کڈے پاچھو آئیخ۔ جے تھاں مھنے پیار کرنت تو تھاں راجی ہوونت کہ ہوں ٻاپ کڈے جائی وو۔ کیانکہ ٻاپ مھیں خاں موٹو ہے۔
29
۲۹۔اَن مھیں تھاناں ایہ ہووݨ خاں پہل کہیو رو کہ جݙے ہو جاوئے تو تھاں ایمان لے آؤ۔
30
۳۰۔ ہمے خاں ہوں تھاں خاں گھݨے باتاں کونی کراں۔ کیانکہ دنیا رو سردار آئی وو اَن اُوئے رو مھیں میں کئیں کونی ۔
31
۳۱۔پݨ ایہ ایئے رے خارو ہووئی وو کہ دنیا نا ٹھاہ لاگے کہ ہوں ٻاپ خاں پیار کرئیں۔ اَن جاں ٻاپ مھنے حکم ݙنو ہے۔ ہوں اُوئاں جی کرئیں۔ اُٹھو اتھ خاں ہالاں۔