1
۱۔ آن یسوع فصح رے چھوئے ݙن پہل بیت عیناہ میں آیو۔ جتھ لعزر ہَتو جکو مَر گیو ہَتو اَن جکے نا یسوع مَریوڑاں میں جیتو کریو ہَتو،
2
۲۔اتھ اُوئاں اُوئے رے خارو شام ری ٻاٹی تیار کی اَن مارتھا ٻاٹی ݙتی وی اَن لعزر وی اُوئاں بھیݪو ہَتو۔ جکو اُوئے بھیݪاں ٻاٹی کھاوݨ رے خارو ٻیٹھا ہَتا۔
3
۳۔پچھے مریم آدھو کلو خالص اَن قیمتی جٹاماسی رو عطر لے تے یسوع رے پاگاں تے لگا اَن آپرے باݪاں خاں اُوئے را پَگ اچھا کیا پورے گھر عطر ری خوشبو خاں بھریئج گیو۔
4
۴۔ پچھے اُوئے رے چیلاں میں خاں ہیک یہوداہ اسکریوتی جکو اُوئے نا جھلاوݨ آݪو ہَتو کہݨ لاگو۔
5
۵۔ایہ عطر تین خو دینار میں بیچ اَن غریٻاں نا کیا نی ݙنو گیو۔
6
۶۔اُوئے ایہ ایئے رے خارو کونی کہیو ہَتو کہ اُوئے نا غریٻاں ری فکر ہَتی۔بلکہ ایئے رے خارو کہ اُو چور ہَتو اَن تھیلی اُوئے کڈھے جی ہَتی۔ جکو کچھ اِئیے میں پڑتو اُو کاڈھ لیتو ہَتو۔
7
۷۔ پچھے یسوع کہیو کہ اُوئے نا رہݨ ݙے۔ اُوئے مھارے ٻوریجݨ آݪے ݙن رے خارو ایہ راکھیو ہَتو۔
8
۸۔کیانکہ محتاج تو خَداں تھاں بھیݪا ہے پݨ ہوں خَداں تھاں بھیݪو کونی رہا۔
9
۹۔آن یہودیاں را گھݨاں منکھ ایہ ٹھاہ کرݨ رے خارو اتھ آتا۔ نی کہ یسوع رے کرے پݨ ائیے رے خارو کہ او لعزر نا جووئے جکے نا اُوئے مَریوڑاں میں خاں جیتو کریو ہَتو۔
10
۱۰۔ پچھے سردار کاہناں ایہ خلاہ کی کہ لعزر تا وی ماراں رو۔
11
۱۱۔کیانکہ اُوئے ری وجہ خاں گھݨاں خارا یہودی یسوع کڈھے آیا اَن اُوئے تے ایمان لے آیا۔
12
۱۲۔ٻجے ݙن گھݨاں خارے منکھاں جکو عید میں آیوڑا ہَتا ایہ خُݨ تے کہ یسوع یروشلیم میں آیو ہے۔
13
۱۳۔کھجیاں رے ݙاݪے لے اَن اُوئے رو استقبال نا نکݪیا اَن رَڑے کر کہݨ لاگا۔ ہوشعنا بدھائی ہووئے او جکو پرمیشور رے ناں خاں آوئی۔بدھائی ہووئے اسرائیل را بادشاہ۔
14
۱۴۔آن یسوع گݙہی رو ٻچیو لے اُوئے تے ٻیٹھو ۔ جاں کہ لِکھت میں ہَتو۔
15
۱۵۔اے صیون ری ݙیکری نی ٻہی۔جو گݙہی رے ٻچیئے تے ٻیئخ تے تھارو بادشاہ آوئی۔
16
۱۶۔ (اُوئے را چیلاں پہل تو ایہ باتاں کونی خمجھیا۔پݨ جݙے یسوع آپرے جلال میں پوگو تو اُوئاں نا یاد آیو کہ ایہ باتاں اُوئے رے بارے میں لِکھیوڑے ہَتے۔ اَن ایہ کہ اُوئے خاں ایئاں کریو گیو ہَتو۔)
17
۱۷۔اُو منکھ گواہی ݙتا گیا جکو اُوے گھڑی اُوئاں رے بھیݪا ہَتا۔ جݙے اُوئے لعزر نا قبر خاں ٻاہر ہیلو کریو۔ اَن مَریوڑاں میں خاں جیتو کیو ہَتو۔
18
۱۸۔ایئے رے جی کرے اُو منکھ اُوئے رے استقبال رےخارو نکݪیا۔ کیانکہ اُوئاں خُݨیو ہَتو کہ ایہ چمتکار اُوئے بتایا ہے۔
19
۱۹۔پݨ فریسیاں آپت میں کہیو جو تو تھاں خاں کئی کونی تھیو۔ جووو دنیا اُوئے رے لارے بوہی ری۔
20
۲۰۔ جکو عید میں پرستش کرݨ آیا ہَتا۔ اُوئاں میں گھݨاں یونانی ہَتا۔
21
۲۱۔او فلپس کڈھے آیا جکو گلیل رے بیت صیدای رو ہَتو۔ آن اُوئے نا منت کر اَن کہیو کہ اے مالک مھاں یسوع خاں خیٹݨ چاہوئی۔
22
۲۲۔فلپس آ تے اندریاس نا کہیو آن بھلے فلپس اَن اندریاس آ تے یسوع نا خُݨایو۔
23
۲۳۔ یسوع اُوئاں نا کہیو او گھڑی آئی ری کہ ابنِ آدم جلال پاوئے۔
24
۲۴۔ہوں تھاناں خچی خچی کہیں کہ جتری تک کݨک رو ݙاݨو دھرتی میں کھر تے مَر کونی جاوتو۔ ہیکھلو جی رئی۔ پݨ جݙے مَر جاوئی تو گھݨو خارو پھݪ لے آوئی۔
25
۲۵۔ جکو آپرے جسم خاں پیار کرئی۔ اُو اُوئے نا گُماوئی۔ پݨ جکو ایئے دنیا میں آپرے جسم نا گُماوئی اُو ہمیشہ ری زندگی رے خارو خمبھاݪئی۔
26
۲۶۔جے کوئی مھاری شیوا کرے تو مھارے لارے آوئے۔ آن جتھ ہوں ہوئیخ اُوتھ جی مھارو خادم وی ہوخے۔ جے کوئی مھاری شیوا کرخے ٻاپ اُوئے ری عزت کرخے۔
27
۲۷۔ ہمے مھارو جسم گھٻراوئی آن ہوں کی کہاں؟ ایہ کہ اے ٻاپ مناں ایئے گھڑی خاں بچا۔ پݨ ہوں ایئے رے جی کرے ایئے گھڑی تک پوگو ہا۔
28
۲۸۔اے ٻاپ آپرے ناں نا جلال ݙے۔ پچھے آسمان خاں آواز آئی کہ ”میں جلال ݙنو ہا آن ہوں بݪے جلال ݙئیخ“۔
29
۲۹۔آن جکو منکھ ابھا خُݨتا ہتَا او کہݨ لاگا کہ جھُڑ گرجیو پݨ اُو کہتا وا کہ کوئی فرشتو اُوئے خاں ٻولیو ہے۔
30
۳۰۔ یسوع بݪتی ݙنی میں کہیو۔ایہ آواز مھارے خارو کونی بلکہ تھارے خارو آئی ہے۔
31
۳۱۔ہمیں ایے دنیا ری عدالت ہوئی وی ۔ ہمے ایئے دنیا رو سردار کاڈھیو جاخے۔
32
۳۲۔ آن ہوں جݙے دھرتی خاں اُکھݨیو جائیخ تو خاراں نا آپ نی کھیچخ۔
33
۳۳۔اُوئے اشارو کریو کہ ہوں کیکر مَرݨ آݪو ہا۔
34
۳۴۔پچھے منکھاں اُوئے نا بݪتی ݙنی کہ مھاں شریعت ری ایہ بات خُݨی ہا کہ المسیح ہمیشہ تک رہخے تو پچھے کیاں کہیں کہ ضرور ہے کہ ابنِ آدم اُکھݨیو جائے؟ ایہ ابنِ آدم کُݨ ہے؟
35
۳۵۔یسوع اُوئاں نا کہیو ٻجو تھوڑی دیر تک اجاݪو تھارے بھیݪو ہے۔ جتری تک اجاݪو تھاں کڈھے ہے۔ بوہا ہالو۔ ایئاں نی ہوئے کہ اندھارو تھاناں آ جھالے۔ آن جکو اندھارے میں بہئی اُوئے نا کونی ٹھاہ کہ کیتھ جاوئی۔
36
۳۶۔جتری تک اجاݪو تھارے بھیݪو ہے۔ اُجاݪے تے ایمان لے آؤ تاکہ تھاں اجاݪے را ݙیکرا بݨو۔ یسوع ایہ باتاں کرتو بوہو گیو اَن اُوئاں خاں لُک گیو۔
37
۳۷۔ آن جے کݙے اُوئاں رے روبرو اترا چمتکار ݙخلیا تو وی اُو اُوئے تے ایمان کونی لے آیا۔
38
۳۸۔تاکہ یسعیاہ نبی رو کلام پورو تھیے۔ جکو اُوئے کہیو کہ اے پرمیشور جکو مھاں خاں خُݨیو کے اُوئے رو یقین کریو؟ آن پرمیشور ری ٻاہا کے تے ظاہر ہوئی؟
39
۳۹۔ ائیے رے خارو او ایمان نی لے آیا۔ کیانکہ یسعیاہ ایہ وی کہیو۔
40
۴۰۔اُوئے اُوئاں رے آنکھیں اندھے کیے اَن اُوئاں را من کاٹھا کیا۔ ایئاں نی ہوئے کہ اُو آنکھیاں خاں جووئے۔ جاں من خاں خمجھے۔ آن توٻا کرے۔ آن ہوں اُوئاں نا شفا ݙا۔
41
۴۱۔ یسعیاہ ایہ باتاں ایئے رے خارو کہیے کیاں کہ اُوئے اُوئے رو جلال جویو۔آن اُوئے رے بارے میں جی کلام کیو۔
42
۴۲۔ایئے رے کرے سرداراں میں خاں وی گھݨاں اُوئے تے ایمان لے آیا۔ پݨ فریسیاں رے کرے انکار کونی کرتا ہَتا۔ تاکہ بھگتی گھر خاں کاڈھیا نی جاوئے۔
43
۴۳۔کیانکہ اُو ایشور خاں عزت لیوݨ خاں زیادہ منکھاں خاں عزت لیوݨ پسند کرتا۔
44
۴۴۔یسوع زور خاں کہیو کہ جکو میں تے ایمان لے آوئی۔ او میں تے کونی بلکہ اُوئے تے ایمان لے آوئی۔ جکے مناں میلیو ہے۔
45
۴۵۔ آن جکو مناں جووئی اُو اُوئے نا جووئی۔جکے مناں میلیو ہے۔
46
۴۶۔ ہوں اجاݪو تھی تے دنیا میں آیو۔ تاکہ جکو کوئی میں تے ایمان لے آوئے او اندھارے میں نی رہئے۔
47
۴۷۔ جے کوئی مھاری بات خُݨ تے اُوئے تے عمل نی کرے۔ تو ہوں اُوئے تے الزام کونی لگاواں کیانکہ ہوں ایئے رے خارو کونی آیو۔ کہ دنیا نا الزام ݙاں بلکہ ایئے رے خارو کہ دنیا نا نجات ݙا۔
48
۴۸۔ جکو مناں گندو خمجھائی او مھارے باتاں تے اعتبار کونی کرتو۔ اُوئے تے الزام لاگݨ آݪو ہے۔ یعنی جکو کلام میں کہیو ہا او جی آخر میں اُوئے رے خارو الزام ہوخے۔
49
۴۹۔کیانکہ میں آپ خاں کئیں کونی کہیو بلکہ ٻاپ جکے مناں میلیو ہے۔ اُوئے جی مناں حکم ݙنو ہے۔ کہ کی کہاں اَن کی ٻولاں۔
50
۵۰۔آن منے ٹھاہ ہے کہ اُوئے رو حکم خَداں ری زندگی ہے۔ آن جکو کچھ ہوں کہیں جاں ٻاپ مناں کہیو ہے اُوئاں جی کہیں۔