1
۱۔ مریم اَن اُوئے رے ٻہن مارتھا رے گاں بیت عنیاہ رو لعزر ناں رو ہیک بیمار ہَتو۔
2
۲۔(ایہ او جی مریم ہَتی جکے ایشور رے پگاں تے عطر ڈھوݪ اَن آپرے باݪاں خاں اچھو کریو ہَتو۔لعزر بیمار ایئے رو بھائی ہَتو۔)
3
۳۔ آن ٻہناں اُوئے نا ایہ خنݙخو میلیو کہ اے ایشور جکے نا تُوں پیار کرتو او بیمار ہے۔
4
۴۔یسوع خُݨ اَن کہیو ایہ بیماری موت ری کونی۔ بلکہ ایشور رے جلال رے خارو ہے۔ تاکہ اُوئے ری وجہ خاں ایشور رے ݙیکرے رو جلال ظاہر ہووئے۔
5
۵۔ آن یسوع مارتھا آن اُوئے ری ٻہن آن لعزر نا پیار کرتو ہَتو۔
6
۶۔پچھے جݙے اُوئے خُݨیو کہ او بیمار ہے تو جتھ او ہَتو اتھ جی ٻے ݙن ٻجا رہیو۔
7
۷۔ایئے خاں پچھے چیلاں نا کہیو آؤ یہودیہ ہالاں۔
8
۸۔ چیلاں اُوئے نا کہیو گرو جی ہݨے تو یہودی تھاناں مارݨ چاہتا ہَتا۔ آن تھاں بݪے اُتھ جاوݨ چاہوئی؟
9
۹۔یسوع بݪتی ݙنی کی ݙن را ٻارہے گھنٹاں کونی ہوتا؟ جے کوئی ݙن رو بہے تو تھوݙو کونی کھاتو۔ کیانکہ اُو ایئے ݙن رے اجاݪے میں جووئی۔
10
۱۰۔ پݨ جے کݙے کوئی رات ری بݪہ بہے تو او تھوݙو کھاوئی۔ کیانکہ رات رو اجاݪو کونی ہووتو۔
11
۱۱۔اُوئے ایہ باتاں کہیں اَن پچھے اُوئاں نا کہیو اپݨو پریمی لعزر خوتو رو۔ پݨ ہوں جاوئیں کہ اُوئے نا جگاواں۔
12
۱۲۔پچھے چیلاں کہیو اے پرمیشور جے اُو خوتو ہے تو اُو بچ جاخے رو۔
13
۱۳۔یسوع تو اُوئے ری موت رے بارے میں کہیو ہَتو۔ پݨ اُوئاں خوچیو کہ اوئے اونگھ آݪے آرام ری بات کرئی وو۔
14
۱۴۔پچھے یسوع اُوئاں نا صاف کہیو کہ لعزر مَریو رو۔
15
۱۵۔ آن ہوں تھاری وجہ خاں راجی ہا کہ ہوں اتھ کونی ہَتو۔ تاکہ تھاں ایمان لے آؤ۔ پݨ آؤ آپاں اُوئے کڈھے ہالاں۔
16
۱۶۔پچھے توما جکو توام خُݨجتو اُوئے آپرے چیلاں نا کہیو کہ آؤ آپاں وی ہاݪاں تاکہ اُوئے بھیݪاں مَراں۔
17
۱۷۔ یسوع بیت عنیاہ میں آیو آن اُوئے نا چار ݙنہاں رو قبر میں راکھیوڑو جویو۔
18
۱۸۔بیت عنیاہ یروشلیم رے نیڑو تقریناً ٻے میل رے فاصلے تے ہَتو۔
19
۱۹۔آن گھݨاں خارا یہودی مارتھا اَن مریم کڈھے آتا ہَتا۔ تاکہ اُوئاں نا تسلی ݙیوئے۔
20
۲۰۔مارتھا جاں جی خُݨیو کہ یسوع آئی وو تو اُوئے نا خیٹݨ گی۔ پݨ مریم گھر میں جی ٻیٹھی رئی۔
21
۲۱۔ مارتھا یسوع نا کہیو اے پرمیشور جے تو ایتھ ہوونت تو مھارو بھائی کونی مَرنت۔
22
۲۲۔آن مناں ٹھاہ ہے کہ ہمے وی جکو کچھ تو ایشور خاں مانگئیخ ۔ ایشور تناں ݙیئخے۔
23
۲۳۔یسوع اُوئے نا کہیو کہ تھارو بھائی جیتو ہوخے رو۔
24
۲۴۔ مارتھا اُوئے نا کہیو مناں ٹھاہ ہے کہ قیامت آݪے ݙن جیتو ہوخے۔
25
۲۵۔یسوع اُوئے نا کہیوقیامت اَن زندگی ہوں ہا۔ جکو مھیں تے ایمان لے آوئی جے او مَر وی جاوئے تو وی جیتو رہئخے۔
26
۲۶۔آن جکو وی جیتو ہے اَن او میں تے ایمان لے آوئے اُو خَداں جیتو رہیخے مَرے کونی۔ کی تو ایہ تے ایمان راکھئیں؟
27
۲۷۔ اُوئے اُوئے نا کہیو ہاوئے اے پرمیشور ہوں ایمان راکھتی رئی۔ کہ تو المیسح ابن ایشور ہے جکو دنیا میں آوݨ آݪو ہَتو۔
28
۲۸۔ او ایہ کہہ تے بوہی اَن لُک میں آپری ٻہن نا کہیو کہ یسوع ایتھ ہے آن تناں ہیلو کرئی۔
29
۲۹۔اُوئے خُݨتے جی اُٹھی اَن اُوئے کڈھے آئی۔
30
۳۰۔ یسوع ہاݪی اِئے گاں میں آیو جی ہَتو۔ بلکہ اُوئے جگہ ہَتو جتھ مارتھا اُوئے خاں خینٹی ہَتی۔
31
۳۱۔آن جکو یہودی اُوئاں کڈھے گھرے ہَتا۔ آن اُوئاں نا تسلی ݙتا ہَتا۔ اُوئاں جویو کہ مریم اُوٻہاݪ میں اُوٹھی اَن ٻاہر نکݪ گئی ہے۔ متاں اُو قبر تے رووݨ خارو گئی ہوئے اُوئے رے لارے بوہا گیا۔
32
۳۲۔آن جݙے مریم اُوتھ آئی جیتھ یسوع ابھو ہَتو۔ اُوئے نا جویو تو اُوئے رے پگاں میں کھر گی اَن کہیو، اے پرمیشور جے تو ایتھ ہوونت تو مھارو بھائی کونی مَرنت۔
33
۳۳۔آن جݙے یسوع اُوئے نا جویو کہ اُو روئیں وی اَن یہودی وی جکو اُوئے رے بھیݪا ہتا روئیں وا۔ تو گھݨو پریشان تھی تے گھٻرا گیو۔
34
۳۴۔کہیو کہ تھاں اُوئے نا کیتھ راکھیو ہے؟ اُوئاں اُوئے نا کہیو، اے پرمیشور حال اَن جو رو۔
35
۳۵۔آن یسوع را آنخو نکݪ آیا۔
36
۳۶۔ پچھے یہودیاں کہیو کہ جو وو اُو اُوئے نا کیترو پریم کرتو ہَتو۔
37
۳۷۔پݨ اُوئاں میں خاں کہینک کہݨ لاگا کہ ایہ جکے اندھے رے آنکھیں کھولیے اترو کونی کر خگتو ہَتو کہ او نی مَرنت۔
38
۳۸۔پچھے یسوع نخکارو ناکھ اَن قبر تے آیو۔ او ہیک غار ہَتی۔اَن اُوئے رے مھانݙے تے پتھر پیو ہَتو۔
39
۳۹۔یسوع کہیو پتھر نا ہٹا ݙو۔ مَریوڑے رے ٻہن مارتھا اُوئے نا کہیو۔ اے پرمیشور اُوئے میں خاں تو ہمے باخ آتی ہوخے۔ کیانکے اُوئے نا چار ݙن ہویا را۔
40
۴۰۔یسوع اُوئے ناکہیو۔ کی میں تناں کونی کہیو ہَتو کہ جے تو ایمان راکھئیخ تو ایشور رو جلال جوئیخ۔
41
۴۱۔پچھے اُوئاں پتھر نا ہٹا ݙنو۔ آن یسوع آپرے آنکھیں اُکھݨ تے کہیو، اے ٻاپ ہوں تھارو شکر کرئیں کہ تئیں مھاری خُݨی ری۔
42
۴۲۔آن مناں تو ٹھاہ جی ہَتی کہ تُوں خدائی مھاری خُݨتو رئی۔ پݨ ایئے لوکاں ری وجہ خاں جکو آخے پاخے ابھا ہے میں ائیاں کہیو تاکہ اُو ایمان لے آوئے۔ کہ مناں تئیں جی میلیو ہے۔
43
۴۳۔ آن ایہ کہہ تے اُوئے رَڑ کر اَن کہیو اے لعزر نکݪ آ۔
44
۴۴۔جکو مَر گیو ہَتو او کفن خُودھو ہاتھ اَن پَگ ٻادھوڑا نکݪ آیو۔ اَن اُوئے رو مھانݙو رُمال خاں بیڑھیوڑو ہَتو۔ یسوع اُوئاں نا کہیو کہ اُوئے نا کھولو اَن جاوݨ ݙو۔
45
۴۵۔ پچھے یہودیاں میں خاں گھݨاں جکو مریم کڈھے آیوڑا ہَتا اَن جکاں یسوع رو ایہ کام جویو اُوئے تے ایمان لے آیا۔
46
۴۶۔پݨ اُوئاں میں خاں کہینک فریسیاں کڈھے گیا اَن جکو کچھ یسوع کریو ہَتو اُوئاں نا جا خُݨایو۔
47
۴۷۔ ایئے تے سردار کاہناں اَن فریسیاں صدر عدالت رے منکھاں نا بھیݪا کر تے کہیو کہ آپاں کی کرئیں وا؟ ایہ منکھ تو گھݨاں چمتکار بتاوئیں۔
48
۴۸۔جے آپاں اُوئے نا ائیاں جی چھوڑ ݙا تو خارا اُوئے تے ایمان لے آخے۔ آن رومی آ تے مھاری جگہ اَن قوم ٻنہاں تے قبضو کر لیخے۔
49
۴۹۔ آن اُوئاں میں خاں ہیک کائفا ناں رے منکھ جکو اُوئے برخ رو سردار کاہن ہَتو۔ اُوئاں نا کہیو تھاں کئیں کونی جاݨتا۔
50
۵۰۔آن نی جی ایہ خیال کرئیں کہ تھارے خارو ایہ بھلو ہے۔ کہ ہیک منکھ قوم رے خارو مَرے نی کہ خاری قوم مَر جاوئے۔
51
۵۱۔ اُوئے ایہ آپری طرف خاں کونی کہیو، پݨ ایئے رے خارو کہ اُو ایئے برخ رو سردار کاہن ہَتو۔ اُوئے ایہ نبوت کی کہ یسوع قوم ری خاطر مَرݨ آݪو ہے۔
52
۵۲۔آن نی جی اُوئے قوم ری خاطر بلکہ ایئے رے خارو وی کہ ایشور رے پراگندہ منکھاں ہیک کر اَن بھیݪا کر ݙے۔
53
۵۳۔آن اُوئے ݙن خاں اُوئاں فیصلو کریو کہ اُوئے نا مار ناکھخاں۔
54
۵۴۔ایئے رے خارو اُوئے ݙن خاں یسوع یہودیاں میں کھلے عام کونی پھرتو ہَتو۔ بلکہ اُوئے رے نیڑے جھنگل رے علاقے میں جکو افرائیم ناں رے ہیک شہر میں گیو آن آپرے چیلاں بھیݪو اتھ جی رہݨ لاگو۔
55
۵۵۔آن یہودیاں ری عیدِ فصح نیڑی ہَتی۔ آن گھݨائی فصح خاں پہل دیہاتاں خاں یروشلیم نی گیا۔ تاکہ آپرے آپ نا پوتر کرے۔
56
۵۶۔آن اُو یسوع نا لابھݨ لاگا۔ آن ہیکل میں ابھیج تے آپت میں کہݨ لاگا۔ تھاں کی خوچئیں کہ یسوع عید آݪے ݙن کونی آوئے؟
57
۵۷۔آن سردار کاہناں اَن فریسیاں حکم ݙنو ہَتو کہ جکے نا وی ٹھاہ ہووئے۔ کہ اُو کیتھ ہے۔ او مھاناں ݙخلے تاکہ اُوئے نا جھال لاں۔