باب۴
1
۱۔ہُوں اِیشوَر اَن مسیح یسوع نا گواہ بَݨا رو، جکو پاچھو آ رو بادشاہ بݨ رو جیوتاں اَن مَریوڑاں رو انصاف کرخے، تھناں خَمجھاوئیں۔
2
۲۔ کہ تُوں مسیح ری خُوشی ری خبر رو پرچار کرتو رہ، ہر گھڑی تیار رہ، ہر قسم رے صبر خاں خِکھاوتو اَن خَمجھاوتو رہ اَن سختی خاں خَمجھاوݨ رے بھیݪو اُوئاں ری ہمت وی بَدھا۔
3
۳۔کیان٘کے ایَہڑو ٹائیم آخے جَݙے لوک ٹھیک خِکھایوڑے باتاں برداشت کونی کرے پݨ آپرے بُرے مرضیاں نا پُورے کرݨ رے خارُو ایَہڑے خِکھاوݨ آݪاں نا بھیݪا کرخے کہ اُوئاں نا ایَہڑے باتاں خِکھاوے جکو او خُݨَݨ چاہوئی۔
4
۴۔او خَچ نا خُݨَݨ چھوڑ ݙیخے اَن فرضی باتاں تے دھیان ݙیخے۔
5
۵۔اِیئے خارُو تُوں خارے باتاں میں ہُشیار رہ، ݙُکھ برداشت کر، خُوشی ری خبر رو پرچار کرتو رہ اَن آپرے شیوا رے کام نا ذِمے داری خاں پُورو کر۔
6
۶۔باقی رہئی مھاری بات تو ہمے ہُوں آپری جان ٻلِیدان ݙیوݨ خارُو تیار ہاں اَن مھارو اِیئے دُنیا خاں جاوݨ رو ٹائیم آ گیو رو۔
7
۷۔مھیں بھَلی کُشتی بِڑھ لِنی ری، مھیں آپری ناخݨ رو مُقابلو پُورو کریو رو اَن ہُوں آپرے وشواس تے پَکو رہیو۔
8
۸۔ہمے مھیں خارُو خَچائی رو تاج راکھیوڑو ہے۔ پربھُو یسوع جکو انصاف خاں فیصلو کرݨ آݪو ہے، او آپرے آوݨ آݪے ݙن مھناں او تاج ݙیخے۔ نی چھَڑو مھناں پݨ اُوئاں خاراں نا وی جکو اُوئے رے پاچھو آوݨ ری اُمید راکھئی۔
9
۹۔مھیں کَڈھے بیگو آوݨ ری کوشش کرے۔
10
۱۰۔کیان٘کے دیماس اِیئے دُنیا رے مرضیاں میں پھاخ رو مھناں چھوڑ گیو رو اَن تھِسلُنِیکے شہر ݙِخا گیو رو۔ اُوئے خاں ٹاݪ کریسکینس گِلَتیہ صُوبے ݙِخا گیو رو اَن طِطُس دلمتیہ علاقے ݙِخا گیو رو۔
11
۱۱۔چھَڑو لُوقا مھیں کَڈھے ہے۔ مرقس نا آپ بھیݪو لے آئے کیان٘کے اِیشوَر ری شیوا رے کام میں او مھاری بھَلی مدد کرئی۔
12
۱۲۔تُخِکُس نا مھیں اِفِسُس شہر ݙِخا میل ݙِنو رو۔
13
۱۳۔جَݙے تُوں آوے تو مھارو چوغو لیوتو آئے جکو ہُوں تروآس شہر میں کرپُس کَڈھے بھُول آیو ہَتو اَن مھارے کِتاباں وی لیوتو آئے خاص کر چامٻڑے تے لِکھیوڑے کِتاباں۔
14
۱۴۔پیتݪ را ٹھاں بݨاوݨ آݪے سکندر مھیں خاں گھݨو بُرو کریو۔ پربھُو اُوئے نا اُوئے رے کاماں رے مطابق سزا ݙیخے۔
15
۱۵۔تُوں وی اُوئے خاں ہُشیار رہ کیان٘کے اُوئے اَپݨے پرچار ری تمام گھݨی مُخالفت کی ہے۔
16
۱۶۔مھاری پہلکی پیشی تے کَئی مھارو ساتھ کونی ݙِنو پݨ خاراں مھناں چھوڑ ݙِنو۔ مھاری مرضی ہے کہ اِیشوَر اُوئاں خاں اِیئے رو حِساب نی لے۔
17
۱۷۔پݨ پربھُو مھیں بھیݪو ہَتو اَن اُوئے مھناں طاقت ݙِنی کہ مھاری وجہ خاں اُوئے ری خُوشی ری خبر رو پرچار پُورو ہو جاوے اَن خارے غیر قوماں اُوئے رے بارے میں خُݨ لے۔ اِیئاں اِیشوَر مھناں شیر رے ماہن٘ݙے خاں چھُڑایو۔
18
۱۸۔پربھُو مھناں ہر بُرے کام خاں بَچاخے اَن آپری اَکاش ری بادشاہی میں خئی خلامت پُگاخے۔ اُوئے ری بَݙائی ہمیشہ تک ہووتی رہ۔ اِیئان٘ج ہووے۔
19
۱۹۔پرسکِلہ اَن اَکوِلہ اَن اُنیسفِرُس رے خاندان نا سلام کَہے۔
20
۲۰۔اِراستُس کُرِنتھُس شہر میں رہ گیو اَن ترُفِمُس بِیمار ہَتو اِیئے خارُو مھیں اُوئے نا مِیلیتُس شہر میں چھوڑیو۔
21
۲۱۔تُوں خِیاݪے خاں پہل مھیں کَڈھے آوݨ ری کوشش کر۔ یُوبُولُس، پُودینس، لِینُس، کلُودیہ اَن خارا وشواسی بھائی تھناں سلام کَہئی۔
22
۲۲۔ پربھُو تھاری آتما بھیݪو رہ اَن تھاں خاراں تے اِیشوَر ری کِرپا ہووتی رہ۔