¹ Nizile nivwa ukupunda ukukulu ukufuma mung'anda yakupepela nga ati kuwangelo munenulambali,''Yanji mupungulile munsi yapansi indweso munenulambali izyawukali we Leza.'' ² Umungelo wakutalichila wayile pungulila indweso zyakwe munsi; uwuwipe nuwulumilwa wavilonda wizile pa wantu wano walinji nichimanyikwilo chachinymana, wawo wano wafukamilanga ikolania lyakwe. ³ Umungelo wachitiwili apungulila indweso zyakwe mwesumbi. Wizile wuwa awazi, wayine nuwazi wamuntu, nichawumi chonsi chafwile mwesumbi. ⁴ Umungelo wachititatu wapungulizile indweso muzyanduzi nu tunduzi, nga zyizile zyawa awazi. ⁵ Nivwile umungelo waminzi ati,'''we mulungamane_wino ali nawino walinji, umutele_pamulandu mwati mupanzya vyo ivintu. ⁶ Pamulandu wisile uwazi wawa wantu watele awe Leza nawatumwa, wati uwapa uwazi wang'we, avino wafwile wawe.'' ⁷ Nivwile akavuwa kasuka,'' Eta, Mfumu Leza wamaka yonsi, amapanzyo yinu aya chisinka nayalungamane.'' ⁸ Umungelo we chini wapungulizile ulweso lwakwe pilanzi, nga chazumilizizwe kweweliwe ukocha wantu numulilo. ⁹ Wosilwe nilungula ilyakusayisya, nga awasamula izina lye Leza, wino ali namaka pampungo zyoo. Watatontolosile nanti kumupa uwuchindami wakwe. ¹⁰ Umungelo wachiti sano apungulila ulweso lwakwe pandulu yachinyamana, nga imfinzi ayivwimba uwufumu wakwe. Awasyeta indimi zyawo pamulandu nuwulumilwa. ¹¹ Awasamula Leza wamwiyulu pamulandu nuwulumilwa ni vilonda vyawo, nga swinya wachilinji wakukana ukutontolokwa kwakwe vino wachisile. ¹² Umungelo wachiti mutanda apungulila ulweso lwakwe muluzi lukulu, Eyufuleti . Aminzi yakwe yakazile ukuti yapekanie inzila yazyamfumu zino zyandi zifumilile kuwufumilo wilanzi . ¹³ Naweni imizimu yitatu iyikandamane yino yalolekanga nge awachula wakufuma mumilomo yavitumbu, iyavinyamana, nawatumwa wawufi. ¹⁴ Amuno awamizimu imiwipe ukupanga ivimanyikwilo vyavizungusyo. Wapitanga ukuya ku zyamfumu zyansi yonsi ukuti wawawunganie ponga pavita pawanda uwukulu uwe Leza wamaka yonsi. ¹⁵ (''Lola! inkwiza nge amuno! amupepwe wino akutwalilila ukulola, ati asunga ivivwalo vyakwe nkani ukuti atize afume chitali nukuti walole ukusozwa nsoni yamiwele yakwe.'') ¹⁶ Wawawisile ponga pamasyo yonga yano yakwitwa Argeddon mu chihebeli. ¹⁷ Ngapano umungelo wachi munenulambali apungulila ulweso lwakwe mumpepo. Apo amazwi makulu yafumile ku ng'anda yakupepelamo nakundulu, nukuti,'' chawombwa!'' ¹⁸ Kwalinji ukuwala kwavimesya, ukujilimisya, ukupantula kwaviwulumo, nichizumanzi chakutinia _ichizumanzi ichikulu ukulusya chino chatezile chiwombwa pakuwako awantu pansi yapansi, choo ichizumanzi chalinji ichikulu. ¹⁹ Umusumba uwukulu wagawinkine muvipya vitatu, nga nimisumba yansi yaponile. Apano Leza ayizuka Babeloni umukulu, nga apa umusumba wowo ulupindi ulwizule ni pala ulupangwe ukufuma kuwukalale wakwe. ²⁰ Insi yonsi iyiliwilizwe nesumbi yitalolesile, ni myamba yitazanwanga swinya. ²¹ Amawe makulu yamvula, ayang'wame uwung'wame, yisile ukufuma mupela pawantu. Watifile Leza pampungo yiwe lyamvula pamulandu ni mpungo yamawe yamvula pamulandu impungo yoyo yanlinji inkulu nkaninye.