¹ Nang matanda na si Isaac, naging halos bulag na siya. Isang araw pinatawag niya si Esau, na unang anak niyang lalaki at sinabi sa kanya, "Anak ko?" Sumagot siya, "Narito po ako!" ² Sinabi ni Isaac, "Makinig ka sa akin. Ako ay napakantanda na, at hindi ko alam kung kailan ako mamamatay. ³ Kaya dalhin mo ang iyong pana at sisidlan na puno ng palaso at magpunta ka sa gubat, at ipangaso mo ako ng mabangis na hayop. ⁴ Pumatay ka ng isa at ihanda ang masarap na uri ng karneng gusto ko. Pagkatapos dalhin mo iyon sa akin upang matapos ko itong kainin, mabigyan kita ng pagpapala bago ako mamatay. ⁵ Nakikinig si Rebeca nang sabihin iyon ni Isaac sa kanyang anak na si Esau. Kaya nang iwan ni Esau ang tolda para mangaso, ⁶ sinabi ni Rebeca sa kanyang anak na si Jacob, "Makinig ka sa akin. Narinig ko ang iyong ama na nakikipag-usap sa kapatid mong si Esau, na nagsasabing, ⁷ 'Humayo ka at pumatay ng mabangis na hayop at dalhin iyon dito, at ihanda ang karne sa masarap na paraan, upang kainin ko iyon. Pagkatapos bago ako mamatay ibibigay ko sa iyo ang aking pagpapala habang nakikinig si Yahweh.' ⁸ Kaya ngayon, anak ko, gawin mo ang sinasabi ko sa iyo. ⁹ Pumunta sa kawan at pumatay ng dalawang magandang batang kambing at dalhin ang karne sa akin. Pagkatapos maghahanda ako ng masarap na pagkain para sa iyong ama, sa paraang gusto niya. ¹⁰ Pagkatapos ay maaari mong dalhin iyon sa iyong ama, upang makain niya, at pagkatapos ay ibibigay niya sa iyo ang kanyang pagpapala bago siya mamatay." ¹¹ Subalit sinabi ni Jacob sa kanyang inang si Rebeca, "Ang balat ng kapatid kong si Esau ay puno ng balahibo, at ang balat ko ay hindi tulad niyon! Ang balat ko ay makinis! ¹² Anong mangyayari kung himasin ako ng aking ama? Malalaman niyang nililinlang ko siya, at magdadala ako ng isang sumpa sa aking sarili, hindi isang pagpapala!" ¹³ Sinabi ng kanyang ina sa kanya, "Kung iyan ay mangyari, anak ko, hayaang ang sumpa ay mapunta sa akin. Gawin mo kung ano ang sinasabi ko sa iyo. Lakad at kunin mo ang mga kambing para sa akin!" ¹⁴ Kaya umalis si Jacob at pumatay ng dalawang kambing at dinala ang mga iyon sa kanyang ina. Pagkatapos ay naghanda ang kanyang ina ng masarap na pagkain, sa paraang gusto ng kanyang ama. ¹⁵ Pagkatapos ay kinuha ni Rebeca ang pinakamagandang damit ni Esau na nasa kanya sa tolda, at ipinasuot iyon sa kanyang nakababatang anak na si Jacob. ¹⁶ Inilagay rin niya ang balat ng kambing sa kanyang mga kamay at sa makinis na bahagi ng kanyang leeg. ¹⁷ Pagkatapos inilagay niya sa kanyang kamay ang ilang tinapay at ang masarap na pagkaing inihanda niya. ¹⁸ Dinala iyon ni Jacob at pumunta sa kanyang ama at sinabi, "Ama ko!" Sumagot si Isaac, "Narito ako; alin ka sa mga anak ko?" ¹⁹ Sinabi ni Jacob sa kanyang ama, "Ako si Esau, ang inyong unang anak na lalaki. Nagawa ko na po ang sinabi ninyo. Maupo kayo at kainin ang ilan sa karne upang mapagpala mo ako." ²⁰ Subalit tinanong ni Isaac ang kanyang anak, "Anak ko, paano mo nakayang makahanap at makapatay ng hayop nang mabilis?" Sumagot si Jacob, "Dahil si Yahweh, na inyong sinasamba ay idinulot na ako ay maging matagumpay." ²¹ Sinabi ni Isaac kay Jacob, "Halika lumapit ka sa akin, anak ko, upang mahimas kita at malaman kung tunay ngang ikaw ang anak kong si Esau." ²² Kaya si Jacob ay lumapit sa kanyang amang si Isaac. Hinimas siya ni Isaac at sinabi, "Ang tinig ay tinig ni Jacob, subalit ang mga kamay ay mabalahibo, tulad ng mga kamay ng kanyang nakatatandang kapatid na si Esau." ²³ Hindi siya nakilala ni Isaac, sapagkat siya ay bulag at dahil ang mga kamay ni Jacob ay mabalahibo, tulad ng sa nakatatanda niyang kapatid na si Esau. Kaya si Isaac ay naghanda na upang pagpalain siya. ²⁴ Subalit nagtanong muna si Isaac, "Ikaw ba talaga ang anak kong si Esau?" Sumagot si Jacob, "Oo, ako nga." ²⁵ Sinabi ni Isaac, "anak ko, dalhan mo ako ng ilan sa karne na iyong niluto, upang kainin ko at ibigay sa iyo ang aking pagpapala." Kaya dinalhan siya ni Jacob ng kaunti, at kinain niya iyon. Dinalhan din siya ni Jacob ng kaunting alak, at ininom iyon. ²⁶ Pagkatapos ang kanyang amang si Isaac ay sinabi sa kanya, "Anak ko, halika at hagkan mo ako." ²⁷ Kaya si Jacob ay lumapit sa kanya, at hinalikan siya ng kanyang ama sa pisngi. Naamoy ni Isaac ang amoy ng damit na suot ni Jacob. Iyon ay may amoy na tulad ng damit ni Esau. Kaya sinabi niya, "Tunay na ang amoy ng anak ko ay tulad ng amoy ng kabukirang pinagpala ni Yahweh." ²⁸ Hininiling ko na ang Diyos ay magpadala ng hamog mula sa langit upang diligan ang iyong mga bukid, at idulot na magkaroon ka ng masaganang pananim mula sa lupa, at mabuting mga ani ng butil, at mga ubas para sa alak. ²⁹ Hinihiling ko na ang mga tao ng maraming mga lahi ay paglingkuran ka at yumuko sa iyo. Hinihiling ko na pamunuan mo ang iyong mga kapatid na lalaki at yumuko rin sa iyo ang mga kaapu-apuhan ng iyong ina. Hinihiling ko na sumpain ng Diyos ang mga sumumpa sa iyo, at pagpalain ang mga magpala sa iyo." ³⁰ Nang matapos pagpalain ni Isaac si Jacob, at si Jacob ay kaaalis pa lamang sa silid na kinaroroonan ng kanyang ama, ang nakatatandang kapatid niyang si Esau ay bumalik mula sa pangangaso. ³¹ Nagluto si Esau ng masarap na karne at dinala iyon sa kanyang ama. Sinabi niya sa kanyang ama, "Ama ko, pakiusap, maupo kayo at kainin ang ilan sa karneng nailuto ko, sa gayon ay maibigay ninyo sa akin ang inyong pagpapala!" ³² Ang kanyang amang si Isaac ay nagsabi sa kanya, Sino ka?" Sumagot siya, "Ako si Esau, ang unang anak mong lalaki!" ³³ Pagkatapos si Isaac ay nagsimulang manginig ng matindi. Sinabi niya, "kung gayon, sino pala ang nagdala sa akin ng ilang karne ng hayop na pinangaso at pinatay niya, at kinain kong lahat iyon? Narito lamang siya bago ka dumating. Pinagpala ko siya, at hindi ko na mababawi ang pagpapalang iyon." ³⁴ Nang marinig ni Esau ang mga salitang iyon ng kanyang ama, umiyak siya nang malakas. Siya ay labis na nalungkot. Sinabi niya sa kanyang ama, "Ama ko, pagpalain mo rin ako!" ³⁵ Subalit sinabi ng kanyang ama, "Dumating ang iyong kapatid, nilinlang ako, at kinuha ang iyong pagpapala!" ³⁶ Sinabi ni Esau, "Hindi ba tama lang na ang pangalan niya ay Jacob dahil ninlinlang niya ako ng dalawang beses. Sa unang pagkakataon ay kinuha niya ang aking karapatan bilang unang anak, at ngayon naman ay kinuha niya ang aking pagpapala!" Pagkatapos ay nagtanong siya, "Wala ka na bang anumang natitirang pagpapala para sa akin?" ³⁷ Sumagot si Isaac at sinabi kay Esau, "Naipahayag ko na pamumunuan ka ng iyong nakababatang kapatid, at naipahayag ko na ang lahat ng kanyang mga kamag-anak ay maglilingkod sa kanya. At nasabi ko na bibigyan siya ni Yawheh ng maraming butil at mga ubas para sa alak. Kaya anak ko, ano ang magagawa ko para sa iyo?" ³⁸ Sinabi ni Esau sa kanyang ama, "Ama ko, mayroon ka ba lamang isang pagpapala? Ama ko, pagpalain mo rin ako!" Pagkatapos ay umiyak si Esau nang napakalakas. ³⁹ Ang kanyang amang si Isaac ay sumagot at sinabi sa kanya, "Ang lugar na titirahan mo ay magiging malayo sa mabungang lupa at sa hamog na padala ni Yahweh mula sa langit upang diligan ang kabukiran. ⁴⁰ Magnanakaw ka at papatay ng mga tao upang makuha ang kailangan mo para mabuhay, at ikaw ay magiging parang alipin ng iyong kapatid na lalaki. Subalit sa sandaling magpasya kang maghimagsik laban sa kanya, makakalaya ka mula sa kanyang pamamahala." ⁴¹ Dahil sa pagpapalang binigay ng kanyang ama kay Jacob, nagalit si Esau sa kanyang kapatid. Sinabi ni Esau sa kanyang sarili, "Pagkatapos mamatay ng aking ama at matapos kaming magluksa para sa kanya, papatayin ko si Jacob!" ⁴² Subalit napag-alaman ni Rebeca ang iniisip ng nakatatanda niyang anak na si Esau. Kaya ipinatawag niya ang nakababatang anak niyang si Jacob at sinabi sa kanya, "Makinig ka sa akin. Ang iyong nakatatandang kapatid na si Esau ay inaaliw ang kanyang sarili sa pagbabalak na patayin ka, upang makaganti sa iyong panlilinlang sa inyong ama. ⁴³ Kaya ngayon, anak ko, makining kang mabuti sa sinasabi ko sa iyo. Tumakas ka agad at magpunta at manatili sa kapatid kong lalaking si Laban, sa Haran. ⁴⁴ Manatili ka sandali sa piling niya hanggang sa ang nakatatanda mong kapatid ay hindi na galit. ⁴⁵ Kapag nalimutan na niya ang ginawa mo sa kanya, magpapadala ako ng pasabi sa iyo upang sabihan kang bumalik na mula roon. Kung patayin ka ni Esau, sunod ay papatayin siya ng iba, at sa gayon ang dalawang anak ko ay mamamatay nang sabay!" ⁴⁶ Pagkatapos sinabi ni Rebeca kay Isaac, "Itong mga dayuhang babaeng napangasawa ni Esau, na mga kaapu-apuhan ni Heth ay ginagawang malungkot ang buhay ko. Kung si Jacob ay mag-asawa rin ng babae mula sa mga kaapu-apuhan ni Heth sa dakong ito, mawawalan ng kabuluhan ang buhay ko!"