¹ Si Abraham ngayon ay matandang-matanda na. Pinagpala ni Yahweh si Abraham sa maraming bagay. ² Isang araw sinabi ni Abraham sa kanyang punong lingkod ng kanyang sambahayan, ang siyang nangangalaga sa lahat ng pagmamay-ari ni Abraham, "Ilagay mo ang iyong kamay sa pagitan ng aking mga hita upang mangako ka nang mataimtim na iyong gagawin kung anuman ang sabihin ko sa iyo. ³ Tandaan mo na si Yahweh, ang Diyos na siyang lumikha ng kalangitan at ng mundo, ay nakikinig, mangako ka na hindi ka kukuha ng asawa para sa aking anak, na si Isaac, mula sa mga anak na babae ng mga taga-Canaan na kasama ko ngayong naninirahan. ⁴ Sa halip, pumunta ka sa aking bansa at sa aking mga kamag-anak. Kumuha ka ng mapapangasawa para sa aking anak na si Isaac mula sa kanila." ⁵ Nagtanong ang lingkod sa kanya, "Kung makakahanap ako ng isang babae sa iyong mga kamag-anak, ano ang dapat kong gawin kung hindi siya pumayag na sumama sa akin pauwi rito sa lupain? Dapat ko bang dalhin pabalik doon ang iyong anak sa bansa na iyong pinanggalingan, upang makahanap siya ng mapapangasawa at manirahan doon?" ⁶ Sumagot si Abraham sa kanya, "Hindi! Tiyakin mo na hindi mo dadalhin ang aking anak doon! ⁷ Si Yahweh, ang Diyos na lumikha ng kalangitan, ay dinala ako rito. Dinala niya ako galing sa sambahayan ng aking ama at mula sa lupain ng aking mga kamag-anak kung saan sila nanirahan. Nangusap siya sa akin at gumawa ng isang taimtim na pangako para sa akin. Sinabi niya, 'Ibibigay ko itong lupain ng Canaan sa iyong mga kaapu-apuhan.' Magpapadala siya ng isang anghel na mangunguna sa'yo doon upang makakuha ka ng mapapangasawa para sa aking anak at dalhin mo siya upang dito na manirahan. ⁸ Ngunit kung ang babae na iyong mahanap ay hindi sasama sa'yo, malaya kang ipagpawalang-saysay ang pangako na iyong ginawa. Ang tanging bagay na hindi mo dapat gawin ay ang dalhin ang aking anak upang doon manirahan." ⁹ Kaya nilagay ng lingkod ang kanyang kamay sa pagitan ng mga hita ni Abraham at ginawa ang isang mataimtim na pangako patungkol sa bagay na ito. ¹⁰ Pagkatapos nagdala ang lingkod ng sampung mga kamelyo ng kanyang amo at kinargahan ang mga ito ng lahat ng uri ng mga bagay na binigay ng kanyang amo sa kanya upang dalhin niya. Pagkatapos umalis siya at tumungo sa Aram Naharaim, na naroon sa hilaga ng Mesopotamia. ¹¹ Nang dumating ang lingkod sa Nahor, noon ay magdadapit hapon na, at sa oras na iyon habang ang mga babae ay pumupunta sa balon para sumalok ng tubig. Pinaluhod niya ang mga kamelyo malapit sa balon, na nasa labas ng lungsod. ¹² Nagdasal ang lingkod, "Yahweh, ang Diyos ng aking amo na kanyang sinasamba, pagkalooban mo sana ako na maging matagumpay ngayon! Ipagpatuloy mo sana ang iyong katapatan sa aking amo, na si Abraham! ¹³ Dinggin mo ako. Nakatayo ako malapit sa isang balon ng tubig, at ang mga anak na babae ng mga tao ng lungsod ay paparating upang sumalok ng tubig.' ¹⁴ Hinihingi ko ito sa iyo: sasabihan ko ang isa sa mga babae, "Pakiusap ibaba mo ang iyong banga upang makainom ako ng kaunting tubig.' Kung sasabihin niya, 'Uminom ka ng tubig, at bibigyan ko rin ng tubig ang iyong mga kamelyo, malalaman ko na siya na ang babae na iyong pinili upang maging asawa ng iyong lingkod, na si Isaac, at malalaman ko na iniingatan mo ang iyong katapatan sa aking amo." ¹⁵ Bago man siya natapos sa pagdarasal, dumating doon ang isang dalaga na nagngangalang Rebeca, dala-dala ang isang banga na nasa kanyang balikat. Anak siya ni Bethuel, na anak ni Milcah, na asawa sa nakababatang kapatid ni Abraham na si Nahor. ¹⁶ Siya ay napakaganda at isang birhen. Wala pa ni isang lalaki ang sumiping sa kanya. Bumaba siya papunta sa gilid ng balon, pinuno niya ng tubig ang kanyang banga, at pagkatapos bumalik siya sa itaas. ¹⁷ Tumakbo agad ang lingkod ni Abraham patungo sa babae upang salubungin siya, at sinabing, "Pakiusap bigyan mo ako ng kaunting tubig mula sa iyong banga." ¹⁸ Sumagot siya, "Uminom ka, ginoo!" Binaba niya ang kanyang banga mula sa kanyang balikat papunta sa kanyang mga kamay at binigyan niya ang lalaki ng tubig." ¹⁹ Pagkatapos niyang binigyan ng tubig ang lalaki, nagsalita siya, "Sasalok ako ng tubig para rin sa iyong mga kamelyo, hanggang makainom silang lahat." ²⁰ Dali-dali niyang binuhos ang tubig na mula sa banga papunta sa lalagyan ng tubig ng mga kamelyo. Pagkatapos, tumakbo siyang pabalik ng balon, at nagpatuloy sa pagkuha ng tubig para sa lahat ng mga kamelyo. ²¹ Pinagmasdan ng lingkod ang babae, na walang sinabing anuman. Gusto niyang alamin kung dinulot ni Yahweh na ang kanyang paglalakbay ay maging matagumpay o hindi. ²² Sa wakas, matapos uminom ang mga kamelyo, nilabas ng lingkod ang isang gintong sing-sing para sa ilong na mayroong bigat na anim na gramo, at dalawang gintong pulseras para sa kanyang mga kamay, ang bawat isa ay mayroong bigat na 110 gramo, binigay niya ang lahat kay Rebeca at sinabihan niya na isuot ang mga ito. ²³ Pagkatapos sinabi niya, "Sabihin mo sa akin kaninong anak ka. Sabihin mo rin sa akin, mayroon bang silid doon sa bahay ng iyong ama para sa akin at sa aking mga kasamang lalaki upang matulugan namin ngayong gabi?" ²⁴ Sumagot ang babae, "Bethuel ang pangalan ng aking ama. Anak siya ni Nahor at ng kanyang asawang si Milcah. ²⁵ Oo, mayroon kaming silid na maaaring ninyong matulugang lahat ngayong gabi, at mayroon kaming maraming dayami at butil upang ipakain sa mga kamelyo." ²⁶ Yumuko ang lingkod at sumamba kay Yahweh. ²⁷ Sinabi niya, "Nagpapasalamat ako kay Yahweh" ang Diyos na siyang sinasamba ng aking amo na si Abraham. Nagpatuloy siyang nagpapakita ng kanyang katapatan at pagtitiwala sa aking amo. Pinatnubayan ni Yahweh ang aking paglalakbay patungo sa bahay ng mga kamag-anak ng aking amo!" ²⁸ Tumakbo ang babae patungo sa sambayanan ng kanyang ina at isinalaysay niya sa lahat ukol sa kung ano ang nangyari. ²⁹ Si Rebeca ay mayroong kapatid na lalaki na ang pangalan ay Laban. Agad nagpunta si Laban sa lingkod, na nasa labas ng balon. ³⁰ Nagulat siya nang makita ang sing-sing at mga pulseras na nasa mga kamay ng kanyang kapatid at narinig niya si Rebeca na nagsasalaysay patungkol sa sinabi ng lalaki sa kanya. Kaya lumabas siya at nakita niya ang lalaki na nakatayo malapit sa mga kamelyo, sa tabi ng balon. ³¹ Sinabi ni Laban sa lalaki, "Pinagpala ka ni Yahweh, halika! Bakit nakatayo ka pa rito sa labas? Naghanda ako ng isang silid sa bahay na para sa iyo, at isang lugar pahingahan para sa iyong mga mga kamelyo." ³² Kaya pumasok ang lingkod sa bahay, at diniskargahan ng mga lingkod ni Laban ang mga kamelyo. Nagdala sila ng dayami at butil para sa mga kamelyo, at tubig para sa lalaki at sa kanyang mga kasamang lalaki upang hugasan ang kanilang mga paa. ³³ Naghanda sila ng mga pagkain sa kanyang harapan upang kanyang kainin, ngunit sinabi niya, "Hindi ako kakain hangga't hindi ko nasasabi sa inyo ang kailangan kong sabihin sa inyo." ³⁴ Kaya sinabi ni Laban, "Sabihin mo sa amin!" Kaya sinabi ng lingkod, "Lingkod ako ni Abraham. ³⁵ Lubos na pinagpapala ni Yahweh ang aking amo kaya naging napakayaman niya. Binigyan siya ni Yahweh ng maraming tupa at mga baka, maraming ginto at pilak, lalaki at babaeng mga lingkod, mga kamelyo at mga asno. ³⁶ Si Sarah, na asawa ng aking amo, ay nagsilang ng isang batang lalaki para kay Abraham, kahit napakatanda na niya, at binigay ng aking amo sa kanyang anak ang lahat ng bagay na mayroon siya. ³⁷ Pinanumpa ako ng mataimtim ng aking amo, na nagsasabing, 'Huwag kang kumuha ng mapapangasawa para sa aking anak, na si Isaac, na mula sa babaing anak ng mga tao na taga Canaan, sa lupain kung saan tayo naninirahan. ³⁸ Sa halip, ay bumalik ka sa pamilya ng aking ama, na aking sariling angkan, at kumuha ka ng mapapangasawa mula sa kanila para sa aking anak.' ³⁹ Pagkatapos tinanong ko ang aking amo, 'Ano ang aking gagawin kung ang babae na kanilang ibibigay ay hindi sasama sa akin?' ⁴⁰ Sumagot siya, 'Si Yahweh, na sinunod kong palagi, ay magpapadala ng kanyang anghel upang samahan ka, at upang maging matagumpay ang iyong paglalakbay. Gagawin ka niyang may kakayahan upang makakuha ka ng mapapangasawa para sa aking anak na mula sa aking angkan, mula sa pamilya ng aking ama. ⁴¹ Ngunit kung ang aking angkan ay tumangging payagan siyang bumalik kasama mo, magiging malaya ka mula sa sumpa at wala kang pananagutan sa akin.' ⁴² Nang dumating ako ngayon sa balon, nagdasal ako, 'Yahweh, Diyos ni Abraham, na aking amo, na kanyang sinasamba, kung gawin mo akong matagumpay sa paglalakbay na ito, pakiusap gawin mo ito para sa akin: ⁴³ Nakatayo ako sa tabi ng balon, kung saan pumupunta ang mga babae upang sumalok ng tubig. Hinihingi ko sa iyo na kung sasabihan ko sa isang babae, "Pakiusap, bigyan mo ako ng kaunting tubig mula sa iyong banga upang aking inumin." ⁴⁴ At kung sasabihin niya sa akin, "Oo, uminom ka ng marami, at paiinumin ko rin ng maraming tubig ang iyong mga kamelyo," Sa gayon hayaan mong maging siya ang babaeng pinili mo para sa anak ng aking amo!' ⁴⁵ Bago paman ako natapos sa aking pagdarasal, dumating si Rebekka na mayroong dalang banga sa kanyang balikat. Bumaba siya sa balon at nagsalok ng tubig. Sinabi ko sa kanya, 'Pakiusap bigyan mo ako ng maiinom! ⁴⁶ Agad niyang binaba ang kanyang banga at sinabi, 'Uminom ka ng marami! Paiinumin ko rin ang iyong mga kamelyo.' Kaya uminom ako ng maraming tubig, at nagsalok din siya ng tubig para sa mga kamelyo. ⁴⁷ Kaya tinanong ko sa siya, Kaninong anak ka? Sinabi niya, anak ako ni Bethuel na anak ni Nahor at ng kanyang asawang, na si Milcah.' Ipinalagay ko sa kanyang ilong ang sing-sing at nilagay ko ang mga pulseras sa kanyang mga kamay. ⁴⁸ Pagkatapos, yumuko ako at sumamba kay Yahweh, at nagpapasalamat ako kay Yahweh na Diyos, ang nag-iisang sinasamba ng aking amo na si Abraham, ang nag-iisang gumabay sa akin sa tamang daan upang makuha ang apo na babae ng kapatid ng aking amo upang maging asawa para sa anak ng aking amo. ⁴⁹ Ngayon, kung ikaw ay kikilos ng matapat sa aking amo at bilang bahagi sa kanyang malawak na pamilya, sabihin ninyo sa akin na gagawin ninyo kung ano ang aking hinihingi. Kung hindi ninyo ito gagawin, sabihin niyo rin sa akin, upang malaman ko kung ano ang aking gagawin." ⁵⁰ Sumagot sina Laban at Bethuel, "Ito ay malinaw na nagmula kay Yahweh. Kaya kaming dalawa ay hindi makakapagsabi kung ito ay tamang bagay o maling bagay na gawin. ⁵¹ Narito sa harapan mo si Rebeca. Dalhin mo siya at humayo kayo, at siya ay maging asawa ng anak ng iyong amo, gaya ng pinahihiwatig ni Yahweh." ⁵² Nang narinig ng lingkod ni Abraham ang kanilang mga salita, lumuhod siya sa lupa kay Yahweh. ⁵³ Pagkatapos, nilabas ng lingkod ang pilak at gintong alahas at mga damit, at binigay ang mga ito kay Rebeca. Binigyan niya ng mga regalo ang kapatid ni Rebeca na si Laban at ang kanyang ina. ⁵⁴ Pagkatapos, kumain sila ng pagkain at uminom. Natulog din doon ang mga lalaking kasama ng lingkod ni Abraham ng gabing iyon. Kinaumagahan, sinabi ng lingkod, "Payagan ninyo ako ngayon na bumalik sa aking amo." ⁵⁵ Ngunit sumagot ang kanyang kapatid na lalaki at ang kanyang ina, "Hayaan mo munang manatili rito ang babae sa amin nang sampung araw. Pagkatapos niyan, maaari mo na siyang dalhin at humayo kayo." ⁵⁶ Ngunit, sumagot siya sa kanila, "Ginawa ni Yahweh na matagumpay ang paglalakbay ko, kaya huwag ninyo akong antalain. Hayaan ninyong dalhin ko siya pauwi sa aking amo ngayon!" ⁵⁷ Sinabi nila, "Tawagin natin ang babae at tanungin siya upang sabihin niya kung ano ang kanyang gustong gawin." ⁵⁸ Kaya tinawag nila si Rebeca at tinanong siya, "Sasama ka ba ngayon sa lalaking ito? Sumagot siya, "Opo, sasama ako." ⁵⁹ Kaya pinadala nila si Rebeca, kasama ang kanyang babaeng lingkod na nag-alaga sa kanya sa buong buhay niya, upang sumama kasama ng lingkod ni Abraham at sa mga lalaking sumama sa kanya. ⁶⁰ Pagkatapos hiniling nila sa Diyos na pagpalain si Rebeca at sinabi sa kanya, "Aming kapatid, hinihiling namin kay Yahweh na pagpalain ka upang magkaroon ka ng milyun-milyong mga kaapu-apuhan, at payagan talunin silang lahat ng nasusuklam sa kanila." ⁶¹ Pagkatapos naghanda si Rebeca at ang kanyang mga lingkod na mga babae. Sumakay sila sa kanilang mga kamelyo at sumama sa lingkod ni Abraham. Sinama niya si Rebeca at umalis. ⁶² Ngayon, naninirahan si Isaac sa silangang ilang ng Judea. Galing siya sa Beerlahairoi. ⁶³ Isang gabi lumabas si Isaac papunta sa parang upang magnilay-nilay habang naglalakad. Tumingala siya at nagulat nang makita ang mga kamelyo na paparating. ⁶⁴ Tumingala rin si Rebeca at nakita niya si Isaac. Bumaba siya sa kamelyo, ⁶⁵ at tinanong niya ang lingkod, "Sino ang lalaking iyon na paparating?" Sumagot ang lingkod, "Iyan ay si Isaac, ang aking amo." Kaya kinuha niya ang kanyang belo at tinakpan ang kanyang mukha, upang ipakita ang kahinhinan sa harapan niya. ⁶⁶ Isinalaysay ng lingkod kay Isaac ang buong pangyayari. ⁶⁷ Pagkatapos dinala ni Isaac si Rebeca sa loob ng tolda na pagmamay-ari ng kanyang ina na si Sara, at siya ay kanyang naging asawa. Minahal niya si Rebeca. Sa ganitong paraan naginhawaan si Isaac tungkol sa pagkamatay ng kanyang ina.