¹ Idi nangrugi nga umado iti kasta unay dagiti tattao iti entero a daga, ken naaddaanda kadagiti adu nga annak a babbai, ² nakita dagiti dadduma a nainlangitan a parsua a nakapinpintas unay dagiti babbai. Pinagbalinda ngarud nga asawa ti siasinoman a napilida nga agbalin nga assawada. ³ Ket kinuna ni Yaweh, "Saan nga agtalinaed iti agnanayon kadagiti tattao ti angesko a mangtaginayon iti biagda. Narukop a lasag ti nakaaramidanda. Agbiagdanto laeng iti saan a sumurok iti 120 a tawen ket matayda." ⁴ Idi kinaidda dagitoy a nailangitan a parsua dagiti babbai a tattao, nangipasngayda kadagiti annak. Dagitoy dagiti higante a nagbiag iti rabaw ti daga iti dayta a tiempo ken kasta met kadagiti simmaruno a tiempo. Dagitoy a higante ket maingel a mannakiranget; nalatakda a lallaki idi un-unana a tiempo. ⁵ Nakita ni Yahweh a nagbalin dagiti tattao a nadangkes unay iti rabaw ti daga, ken amin a panpanunotenda nga adda iti kaungganda ket kanayun a dakes. ⁶ Nagladingit ni Yahweh iti panangaramidna kadagiti tattao iti rabaw ti daga ket nagliday isuna gapu iti daytoy. ⁷ Isu a kinuna ni Yahweh, "Dadaelekto a naan-anay dagiti tattao nga inaramidko. Dadaelekto met dagiti amin a dadakkel nga ayup ken dagiti parsua nga aggargaraw iti daga ken dagiti tumatayab. Awanto kadakuada ti mabati iti rabaw ti daga, gapu ta nasaysayaat koma lattan no saanko ida nga inaramid." ⁸ Ngem naay-ayo ni Yahweh kenni Noe. ⁹ Kastoy ti pakasaritaanna: Ni Noe ket maysa a lalaki a kanayun nga agtigtignay a sililinteg. Awan ti aniaman a banag a mabalin a pangbabalawan kenkuana ti uray maysa nga agbibiag iti dayta a tiempo. Nagbiag ni Noe nga addaan iti nasinged a pannakikadua iti Dios. ¹⁰ Naaddaan ni Noe kadagiti tallo nga annak a lallaki: da Sem, Ham, ken Jafet. ¹¹ Makita ti Dios a nadangkes unay dagiti dadduma pay a tattao iti rabaw ti daga, ket iti sadinoman a paset ti ti rabaw ti daga, agtigtignay a siuulpit dagiti tattao iti maysa ken maysa ken agririnnanggasda. ¹² Kinita ti Dios ti tunggal maysa ket nakitana ti kinadakes dagiti tattao, gapu ta nangrugi nga agtignay iti dakes a wagas ti amin a tattao iti rabaw ti daga. ¹³ Isu a kinuna ti Dios kenni Noe, "Inkeddengkon a dadaelek ti amin a tattao, gapu ta agririnnanggas dagiti tattao iti entero a daga. Isu a dandanikon ida a pukawen kasta met ti isu amin a banag iti rabaw ti daga. ¹⁴ Mangaramidka iti dakkel a daongmo manipud iti tarikayo ti sedro. Mangaramidka kadagiti siled iti uneg daytoy. Palitadaam iti alketran ti ruar ken ti uneg daytoy tapno saan a maserrek ti danum. ¹⁵ Nasken a kastoy ti panangaramidmo: Masapul a 138 a metro ti kaatiddogna, 23 a metro ti kaakabana, ken 14 a metro ti kangatona. ¹⁶ Atepam ti daong. Mangibatika iti kurang a maysa a metro nga awang ti tapaw ti diding ken ti atep tapno makaserrek ti angin ken lawag. Aramidem daytoy nga addaan iti tallo a kadsaaran iti uneg, ken mangikabilka iti ruangan iti sikiganna. ¹⁷ Dumngegka a nalaing! Umadanin ti panangiyegko iti layus a mangdadael iti amin nga agbibiag nga adda iti sirok ti tangatang. Matayto amin nga adda iti rabaw ti daga. ¹⁸ Ngem makitulagak kenka. Sika ken ti asawam, dagiti putotmo a lallaki ken dagiti assawada ket sumrekto iti daong. ¹⁹ Masapul met a mangitugotka iti uneg ti daong iti sagdu-dua kadagiti amin nga agbibiag a parsua, lalaki ken babai, tapno agtalinaedda met a sibibiag. ²⁰ Dua iti tunggal kita dagiti parsua ti umayto kenka tapno mapagtalinaedmo ida a sibibiag. Karamanto kadagitoy ti dua iti tunggal kita dagiti tumatayab ken dua iti tunggal kita dagiti dadakkel nga ayup ken dua iti tunggal kita dagiti parsua nga aggargaraw iti rabaw ti daga. ²¹ Masapul met a mangalaka iti tunggal kita dagiti taraonyo ken amin a kasapulan dagitoy a parsua, ket idulinmo iti uneg ti daong." ²² Inaramid ngarud amin ni Noe ti imbilin ti Dios nga aramidenna.