¹ Kinaidda ni Adan ti asawana a ni Eva ket nagsikog isuna ken impasngayna ti maysa a lalaki a pinanagananna iti Cain, a ti kayatna a sawen ket "nakapataud," gapu ta kinunana, "Babaen iti tulong ni Yahweh nakapataudak iti anak." ² Kalpasan iti sumagmamano a tiempo, nangipasngay pay ni Eva iti maysa nga anak a lalaki, ket pinanagananna daytoy iti Abel. Idi dimmakkelen dagitoy a nga ubbing, panagaywan kadagiti karnero ken kadagiti kalding ti trabaho ni Abel, ket nagbalin met a mannalon ni Cain. ³ Maysa nga aldaw, nagapit ni Cain kadagiti mulana nga inaywananna ket indatagna dagitoy kenni Yahweh kas sagutna kenkuana, ⁴ ket nangala met ni Abel manipud iti arbanna kadagiti inauna a karnero a naipasngay ket pinartina dagitoy. Indatagna kenni Yahweh dagiti paset nga adda tabana nga isu iti kasasayaatan a paset. Naay-ayo ni Yahweh kenni Abel ken iti datonna, ⁵ ngem saan isuna a naay-ayo kenni Cain ken iti datonna. Nakaunget ngarud ni Cain iti kasta unay, ket uray la nagruppanget. ⁶ Kinuna ni Yahweh kenni Cain, "Saan a rumbeng a makaungetka! Saan a rumbeng nga agruppangetka iti kasta! ⁷ No aramidem ti umno, awatenka. Ngem no saan nga umno ti aramidem, alun-unennaka ti dakes a kayatmo nga aramiden, a kasla leon nga agur-uray iti ruar ti ridawmo a mangdarup kenka. Ti tarigagaymo nga agbasol ket kayatnaka a tenglen, ngem masapul a tenglem daytoy." ⁸ Ngem iti maysa nga aldaw, kinuna ni Cain iti adingna a ni Abel, "Sumurotka kaniak idiay taltalon." Napanda ngarud a dua. Ket idi addadan idiay away, dagus a dinarup ni Cain ti kabsatna a ni Abel ket pinatayna isuna. ⁹ Ket uray no ammo ni Yahweh ti inaramid ni Cain, kinunana kenni Cain, "Ammom kadi no sadino ti ayan ni Abel nga adingmo?" Simmungbat ni Cain, "Saan, saanko nga ammo. Saanko a trabaho ti mangbantay iti adingko!" ¹⁰ Kinuna ni Yahweh, "Nagdakes unay ti inaramidmo! Ti dara ti kabsatmo a sinagepsep iti daga ket pabpabasulennaka. ¹¹ Pinataymo ti adingmo, ket ita, sinagepsep ti daga ti dara ti adingmo, saankan a maikari iti daytoy ket mapaayto ti rigatmo nga agipataud kadagiti mula. ¹² Inton sukayem ti daga tapno agmulaka, bassitto laeng ti pataudenna para kenka. Agtultuloyka nga agalla-alla iti daga, ket awanto ti masnop a pagtaengam." ¹³ Simmungbat ni Cain kenni Yahweh, "Dusdusaennak iti nalablabes pay ngem iti maibturak. ¹⁴ Pappapanawennakon manipud iti daga a sinuksukayko, ket saanakton a mabalin nga umay iti presensiam. Maysa pay, kanayonakto lattan nga agalla-alla iti daga nga awan iti masnop a pagtaengak, ket patayendakto ti siasinoman a makakita kaniak." ¹⁵ Ngem kinuna ni Yahweh kenkuana, "Saan, saanto a mapasamak dayta. Mangikabilak iti pagilasinan a mangballaag iti siasinoman a makakita kenka a dusaekto isuna iti nakaru no patayennaka. Dusaek dayta a tao iti maminpito a daras kas iti panangdusak kenka." Ket nangikabil ni Yahweh iti pagilasinan kenni Cain. ¹⁶ Pinanawan ngarud ni Cain ni Yahweh ket napan nagnaed iti daga a maawagan iti Nod, a ti kayatna a sawen ket 'agalla-alla', nga adda iti daya ti Eden. ¹⁷ Napalabas ti saan unay a nabayag a tiempo, kinaidda ni Cain ti asawana, ket nagsikog isuna ket nagpasngay iti anak a lalaki, a pinanagananna iti Enoch. Ket nangrugi ni Cain a nangipatakder iti siudad, ket pinanagananna daytoy a siudad iti 'Enoch,' a kapada iti nagan ti putotna. ¹⁸ Dimmakkel ni Enoch ket nagasawa ket naaddaan iti putot a lalaki a pinanagananna iti Irad. Idi dimmakkel ni Irad, naaddaan isuna iti putot a lalaki a pinanagananna iti Mehujael. Dimmakel ni Mehujael ket naaddaan isuna iti putot a lalaki a pinanagananna iti Metusael. Dimmakel ni Matusael ket pinutotna ni Lamec. ¹⁹ Dimmakkel ni Lamec ket nagasawa isuna iti dua a babbai. Ti nagan ti maysa ket Ada, ket Zilla met ti nagan ti maysa pay nga asawana. ²⁰ Nagpasngay ni Ada iti lalaki ket napanaganan iti Jabal. Naglabas ti panawen, ket ni Jabal ti nagbalin a kauunaan a tao a nagnaed kadagiti tolda gapu ta nagakar-akar isuna kadagiti luglugar iti panangaywanna iti adu a dingwenna. ²¹ Ti nagan ti adingna ket Jubal. Isuna ti kaunaan a tao a nangaramid iti arpa ken plauta. ²² Nagpasngay met ti maysa nga asawa ni Lamec a ni Zilla iti anak a lalaki ket napanaganan iti Tubal Cain. Naglabas ti panawen, ket nasursurona ti panangaramid kadagiti banbanag manipud iti tanso ken landok. Ti nagan ti ading a babai ni Tubal Cain ket Naamah. ²³ Maysa nga aldaw, kinuna ni Lamec kadagiti dua nga assawana, "Ada ken Zilla, dakayao a dua nga assawak, dumngegkayo a nalaing iti ibagak. Dinangran ken sinugatannak iti maysa a lalaki, isu a pinatayko isuna. ²⁴ Imbaga ni Yahweh idi un-unana nga ibalsanna ni Cain ken dusaenna iti kas iti pannusa nga impatawna kenni Cain ti siasinoman a mangpatay kenkuana iti maminpito a daras. Ngarud, no adda ti siasinoman a mangpadas a mangpatay kaniak, madusa met koma iti pito pulo ket pito a daras." ²⁵ Kinaidda pay ni Adan iti asawana, ket nagsikog manen isuna ken nagpasngay iti maysa pay nga anak a lalaki, a pinanagananna iti Set. Kinunana, "Panaganak isuna iti Set gapu ta inikkannak manen ni Yahweh iti maysa pay nga anak a kasukat ni Abel, agsipud ta pinatay isuna ni Cain." ²⁶ Idi dimmakkel ni Set, naaddaan isuna iti putot a lalaki a pinanagananna iti Enos. Kadagidiay a tiempo, nangrugi a nagdaydayaw dagiti tattao kenni Yahweh.