¹ Maysa nga aldaw, adda nangibaga kenni Jacob nga agrekreklamo dagiti lallaki a putot ni Laban a kunkunada, "Bimmaknang unay ni Jacob babaen iti panangalana kadagiti amin a kukua ti amatayo." ² Nadlaw ni Jacob a saanen nga agtigtignay iti nasayaat ni Laban kenkuana saan a kas iti damo. ³ Ket kinuna ni Yahweh kenni Jacob, "Agsublika iti pagiliam ken kadagiti kakabagiam, ket tulungankanto sadiay." ⁴ Nangipatulod ngarud ni Jacob iti mensahe kada Raquel kenni Lea, ket impakaammona kadakuada a mapanda iti pagaraban nga ayan dagiti arbanna a karnero ken kalding. ⁵ Idi simmangpetda, kinunana kadakuada, "Nakitak a saanen nga agtigtignay iti nasayaat ti amayo kaniak a saan a kas iti napalabas. Ngem ti Dios a dinaydayaw ti amak, ket tinulungannak." ⁶ Ammoyo a dua a nagtrabahoak iti kasta unay para iti amayo, ⁷ ngem namin-adu a daras a linukonak babaen iti panangkiskissayna kadagiti tangdanko. Ngem saan nga impalubos ti Dios a madangrannak. ⁸ Idi kinuna ni Laban, 'Dagiti burik nga ayup ti itedko a tangdanmo, amin nga ayup ket naganak iti burik nga urbon. Idi nagbaliw ti panunotna a kinunana, 'Dagiti ayup nga addaan iti nangisit ken puraw a garit ti itedko a tangdanmo,' naganak met amin dagiti ayup iti garit nga urbon. ⁹ Iti kasta a wagas, innala ti Dios dagiti amin a taraken ti amayo ket intedna dagitoy kaniak. ¹⁰ Iti naminsan, idi agmamaya dagiti ay-ayup, nagtatagainepak. Iti tagtagainepko, kimmitaak iti ngato ket nasdaawak a nakakita a dagiti dadduma a kalakian a kalding a mangmaymaya kadagiti kaba-ian a kalding ket addaan iti nangisit ken puraw a garit, dagiti dadduma ket burik ken dagiti dadduma ket labang. ¹¹ Iti tagtagainep, kinuna kaniak ti maysa nga anghel a naggapu iti Dios, 'Jacob!' Insungbatko, "Adtoyak!' ¹² Kinunana kaniak, "Kumitaka iti ngato ket makitam nga amin a kalakian a kalding a mangmaymaya ket addaan iti nangisit ken puraw a garit, wenno burik wenno labang. Mapaspasamak daytoy gapu ta nakitak amin nga inaramid kenka ni Laban. ¹³ Siak ti Dios a nagparang kenka idiay Betel, a nangipatakderam iti bato a binukbukam iti lana ti olibo ken nangaramidam iti napasnek a kari kaniak. Isu nga ita, panawam a dagus daytoy a lugar ken agsublika iti lugar a nakaiyanakam.'" ¹⁴ Simmungbat da Raquel ken Lea kenkuana, "Saannakamin nga ikkan ti amami iti aniaman a banag inton matay isuna. ¹⁵ Tratratoennakami a kasla kami la ganggannaet! Ti trabaho nga inaramidmo a maipaay kenkuana kadagitoy amin a tawtawen ket bayad nga intedmo kenkuana para kadakami, ngem awan ti matawidmi iti aniaman a kinabaknang nga impaaymo kenkuana. Ginastos na amin! ¹⁶ Pudno nga amin a kinabaknang nga innala ti Dios manipud iti amami ket kukuami ken dagiti annakmi. Aramidem ngarud ti aniaman nga imbaga ti Dios nga aramidem!" ¹⁷ Kalpasanna, pinagsakay ni Jacob dagiti putot ken assawana kadagiti kamelio. ¹⁸ Pinaunana dagiti amin a tarakenna. Malaksid kadagiti tarakenna, innalana dagiti amin a dadduma a banbanag a naalana kabayatan ti panagnaedna idiay Paddan Aram. Iti kastoy a wagas, rinugianda ti agsubli iti ayan ti amana a ni Isaac, idiay daga ti Canaan. ¹⁹ Ita, pimmanaw ni Laban tapno mapanna pukisan dagiti karnerona. Iti kaawanna, tinakaw ni Raquel dagiti babassit a didiosen a naaramid manipud iti kayo nga adda iti uneg ti tolda ti amana. ²⁰ Maysa pay, inallilaw ni Jacob ni Laban nga Arameo babaen iti saanna a panangibaga kenkuana a pangpanggependa ti pumanaw. ²¹ Pimmanaw ngarud da Jacob ken ti pamiliana ket intugotda dagiti amin a sanikuada. Binallasiwda ti Karayan Eufrates ken inrugida ti agdaliasat nga agpaabagatan nga agturong iti katurturodan a pagilian ti rehiyon ti Galaad. ²² Iti maikatlo nga aldaw kalpasan a pimmanawda, adda iti nangibaga kenni Laban nga awanen ni Jacob ken ti pamiliana. ²³ Isu nga inayabanna dagiti dadduma a kabagianna ket kinamatda ni Jacob. Pito nga aldaw a nagnagnada. ²⁴ Ket iti rabii, nagparang ti Dios kenni Laban iti maysa a tagtagainep. Kinunana kenkuana, "No makamatam da Jacob, annadam dagiti ibagam kenkuana." ²⁵ Iti simmaruno nga aldaw, idi nakamatanen ni Laban ni Jacob, naipatakderen da Jacob ken ti sangkabalayanna dagiti toldada idiay turturod ti Galaad. Isu nga impatakder met da Laban ken dagiti kakabagianna dagiti toldada sadiay. ²⁶ Kalpasanna, napan ni Laban kenni Jacob ket kinunana kenkuana, "Apay nga inaramidmo daytoy? Inallilawnak babaen iti panangalam kadagiti annakko a babbai a kasla tiniliw mo ida iti gubat! ²⁷ Apay a pimmanawka ken inallilawnak? Apay a saanmo nga imbaga kaniak a pumanawka, tapno nakapagrag-otayo koma ken nakakanta kabayatan nga agtuktukar dagiti tattao iti tamborin ken arpa sakbay a nagpakaadaak kenka? ²⁸ Saannak man laeng a pinalubosan a mangagek kas panagpakadak kadagiti appo ken annakko sakbay a pimmanawda! Minamaag ti inaramidmo! ²⁹ Siak ken dagiti kakabagiak ket addaan iti pannakabael a mangdangran kenka, ngem idi rabii, ti Dios a daydayawen ti amam ket kinunana kaniak iti tagtagainep, 'Annadam ti aniaman nga ibagam kenni Jacob.' ³⁰ Ita, ammokon a pimmanawka gapu ta kayatmon ti agawid iti pagtaengam. Ngem apay a tinakawmo dagiti didiosek?" ³¹ Simmungbat ni Jacob kenni Laban, "Saanko nga imbaga kenka a pangpanggepenmi ti pumanaw, gapu ta nagbutengak nga amangan no pilitem nga alaen dagiti annakmo a babbai kaniak. ³² Ngem no adda ti siasinoman ditoy a masarakam nga adda kenkuana dagiti didiosem, papatayentayo dayta a tao. Kabayatan a makitkita dagiti kakabaggianta, agsukimatka tapno kitaem no adda ti aniaman a banag a kukuam nga adda kaniak. No adda mabirukam, mabalinmo nga alaen daytoy!" Idi imbaga ni Jacob dayta, saanna nga ammo a tinakaw ni Raquel dagiti didiosen ti amana. ³³ Ket simrek ni Laban iti tolda ni Jacob, simmaruno iti tolda ni Lea ken kalpasanna kadagiti tolda dagiti dua a tagabu a babai ket binirokna dagiti didiosen, ngem saanna a nasarakan dagitoy. Kalpasan a pinanawanna dagiti toldada, simrek isuna iti tolda ni Raquel. ³⁴ Ngem innala ni Raquel dagiti didiosen ken inkabilna dagitoy iti pagtugawan nga ikabkabil iti likod ti kamelio, ket tinugawanna daytoy. Isu nga idi binirok ni Laban dagitoy iti entero a tolda ni Raquel saanna a nasarakan dagitoy. ³⁵ Kinuna ni Raquel iti amana, "Saanka a makaunget kaniak, apo, ngem saanak a makatakder iti imatangmo a mangraem kenka, ta agregreglaak. Isu nga uray nagbirok pay iti kasta unay ni Laban, saanna a nabirukan dagiti didiosenna. ³⁶ Ket nakaunget ni Jacob. Kinunana kenni Laban, "Ania ti dakes a naaramidko? Ania a basol ti nangkamatam kaniak? ³⁷ Ita sinukimatmon amin a sanikuak, ket awan ti nabirukam a kukuam! No adda nasarakam, ikabilmo iti sangngoanan dagiti kakabagiak ken kakabagiam, tapno maikeddengda no siasino ti husto, sika wenno siak! ³⁸ Addaak kenka iti duapulo a tawen. Kadagidiay amin a tiempo, saan a naalisan dagiti karnero wenno kaldingmo. Saanak a nangpatay wenno nangan kadagiti karnero manipud kadagiti arbanmo. ³⁹ No kasta nga adda maysa kadagiti ayupmo a dinarup ken dinangran ti atap nga ayup, saanko nga inyeg kenka daytoy. Sinukatak ti natay nga ayup iti sibibiag manipud iti bukodko nga ay-ayup. Tunggal matakaw ti maysa kadagiti ayupmo, iti aldaw wenno iti rabii, dinawatmo a sukatak daytoy iti bukodko nga ay-ayup. ⁴⁰ Nagsagabaak manipud iti kinapudot ti aldaw ken iti kinalammiis ti rabii. Masansan a saanak pay a makaturturog! ⁴¹ Nagnaedak iti balaymo iti duapulo a tawen. Nagtrabahoak kenka iti sangapulo ket uppat a tawen tapno maasawak dagiti dua nga annakmo a babbai, ken innem pay a tawen tapno magatangko iti sumagmamano a karnero ken kaldingmo. Bayat iti dayta a tiempo, binaliwam ken kinissayam ti tangdanko iti naminsangapulo a daras. ⁴² No ti Dios, a daydayawen ni Apongko a ni Abraham, ken ti pagbubutngan iti kasta unay ti amak a ni Isaac, ket saan a nakikaadda kaniak ken saannak a tinulongan, mabalin a pinapanawnak nga ima-ima! Ngem nakita ti Dios no kasano a nagsagsagabaak ken no kasano ti panagbanbannogko, isu nga idi rabii, imbagana kenka a saan a nasayaat dagiti inaramidmo kaniak." ⁴³ Simmungbat ni Laban, "Dagitoy a dua a babbai ket annakko, ken dagiti ubbing ket appokok, ken dagiti ay-ayup ket ay-ayupko. Amin a banag a makitkitam ditoy ket kukuak! ⁴⁴ Awan ti maaramidak tapno mapagtalinaedko ida kaniak, isu a masapul nga agaramidta iti katulagan iti kapia. Agbalin daytoy a kas saksi iti nagbaetanta." ⁴⁵ Nangala ngarud ni Jacob iti dakkel a bato ken impatakderna ti pungto daytoy. ⁴⁶ Ket kinuna ni Jacob kadagiti kabagianna, "Agurnongkayo iti bato." Nangalada ngarud kadagiti batbato ket pinagtutuonda, ken nanganda iti asideg ti binuntonda a batbato. ⁴⁷ Pinanaganan ni Laban ti nabunton a batbato iti Aramaic a nagan a Jegar Saha Dutha, ngem pinanaganan ni Jacob ti bunton iti Hebreo a nagan a Galeed. ⁴⁸ Kinuna ni Laban kenni Jacob, "Daytoy a bunton ti batbato nga impatakderta ita nga aldaw ket isu ti mangtulong kadata a manglagip iti katulaganta." Daytoy ti gapuna nga iniwagan ni Jacob daytoy a Galeed. ⁴⁹ Pinanagananda pay ti lugar iti Mizpah, a kaun-uni ti sao ti Hebreo a ti kaipapananna ket "pagwanawanan a torre", gapu ta kinuna ni Laban, "Dawatenta kenni Yahweh a bantayannata a dua kabayatan nga adayota iti tunggal maysa, tapno saanta a madangran ti maysa ken maysa. ⁵⁰ No tratoem iti saan a nasayaat dagiti annakko a babbai, wenno mangasawaka pay iti sabali a babbai, uray no awan ti mangibaga kaniak iti maipapan iti dayta, saanmo a liplipatan a makitkita ti Dios no ania ti ar-aramidenta!" ⁵¹ Kinuna pay ni Laban kenni Jacob, "Makitam daytoy a dakkel a bato ken ti bunton ti batbato nga impatakderta iti nagbaetanta. ⁵² Daytoy a bunton ti batbato ken dakkel a bato ket agpada a mangipalagip kadata, a saanakto a lumabes kadagitoy a batbato nga umay mangdangran kenka, ken saankanto a lumabes kadagitoy a batbato tapno umaynak dangran. Dawatenta iti Dios a dinaydayaw ni Abraham ken ni Nahor, a dusaenna ti siasinoman kadata no dangranta ti maysa ken maysa." ⁵³ Isu a sipapasnek a nagkari ni Jacob nga aramidenna ti aniaman a naibaga iti tulaganda maipapan iti kapia. Ken dinawatna iti Dios a pagbutbutngan ti amana a ni Isaac, a denggegenna ti inkarida. ⁵⁴ Nagdaton isuna iti Dios idiay katurturodan a pagilian ken inawisna dagiti kakabagianna a makipangan kenkuana. Kalpasan ti pannanganda, naturogda sadiay iti dayta a rabii. ⁵⁵ Kinabigatanna, inagkan ni Laban dagiti appo ken annakna a babbai, dinawatna iti Dios a bendisionanna ida. Kalpasanna, pimmanawdan ken dagiti tattaona ket nagsublidan iti pagtaenganda.