¹ Adda uppat nga ar-ari a nagkakadua. Isuda da Ari Amrafel ti Babilonia, ni Ari Arioc ti Ellasar, ni Ari Kedorlaomer ti Elam, ken ni Ari Tidal ti Goiim. ² Nagsaganada a mangraut iti bunggoy iti lima nga ar-ari: ni Ari Bera ti Sodoma, ni Ari Birsa ti Gomora, ni Ari Sinab ti Adma, ni Ari Semeber ti Zeboiim, ken ti ari ti Bela, ti siudad a maawaganen iti Zoar. ³ Naguummong dagidiay a lima nga ari ken dagiti armadada idiay tanap ti Siddim, a maawagan met iti tanap ti Natay a Baybay, tapno makirangetda a maibusor kadagiti uppat nga ari ken kadagiti suldadoda. ⁴ Inturayan ida ni Ari Kedorlaomer iti sangapulo ket dua a tawen. Ngem iti maikasangapulo ket tallo a tawen, immalsada a maibusor kenni Ari Kedorlaomer ken nagkedkeddan a mangted iti buis kenkuana. ⁵ Iti simmaruno a tawen, inummong ni Ari Kedorlaomer ken dagiti dadduma nga ar-ari a kakaduana dagiti armadada ket nagturongda iti lugar dagiti lima nga ari. Pinarmekda dagiti tattao a maaw-awagan iti Refaim idiay Astarot-Karnaim, dagiti tattao a maw-awagan iti Zuzim idiay Ham, ken dagiti tattao a maaw-awagan iti Emin idiay Save-Kiriataim. ⁶ Pinarmekda pay dagiti tattao a maaw-awagan iti Horeo iti katurturodan a disso ti Seir inggana idiay El Paran, nga asideg iti let-ang. ⁷ Kalpasanna ket nagrikusda ket napanda idiay En Mispat, a maawagan itan iti Kades. Pinarmekda ti amin a daga a kukua dagiti Amalekita ken Amorreo nga agnanaed iti Hazazon Tamar. ⁸ Kalpasanna, rimmuar dagiti armada dagiti ari ti Sodoma, Gomorra, Adma, Zeboiim ken Bela tapno gubatenda dagiti armada dagiti uppat nga ar-ari idiay Tanap ti Siddim. ⁹ Nakirangetda kadagiti armada ni Kedorlaomer nga ari ti Elam, ni Tidal nga ari ti Goiim, ni Amrafel nga ari ti Sinar ken ni Arioc nga ari ti Ellasar. Dagiti armada dagiti uppat nga ar-ari ket makirangranget a maibusor kadagiti armada dagiti lima nga ar-ari. ¹⁰ Napunpunno iti palab-og nga adda alketranna ti Tanap ti Siddim, isu nga idi pinadas dagiti armada dagiti ari ti Sodoma ken Gomorra a tumaray, adu kadakuada ti natinnag kadagitoy nga abot. Naglibas dagiti dadduma ket nagkamangda kadagiti katurturodan. ¹¹ Iti panaglibasda, sinamsam dagiti kabusorda dagiti amin a banbanag a napapateg nga adda idiay Sodoma ken Gomora, agraman dagiti amin a taraon. ¹² Tiniliwda pay ni Lot a kaanakan ni Abram ken amin a sanikuana, agsipud ta agnanaed isuna idiay Sodoma iti dayta a tiempo. ¹³ Agnanaed idi ni Abram iti asideg dagiti dadakkel a kaykayo a kukua ni Mamre, a kameng iti puli ti Amor, iti dayta a tiempo. Nakitulag ni Abram kenni Mamre ken kadagiti dua a kakabsatna a da Escol ken Aner, nga agtitinnulongda no adda iti gubat. ¹⁴ Maysa kadagiti tattao a nakalibas manipud iti gubat ti nangipadamag kenni Abram a Hebreo iti napasamak ken impadamagna pay kenkuana a tiniliw dagiti kabusor ni Lot a kaanakanna, ken impanawda daytoy. Inayaban ngarud ni Abram dagiti tallo gasut ken sangapulo ket walo a lallaki nga adipenna, lallaki a siguden nga adda kenni Abram manipud pannakaiyanakda ken ammoda iti makiranget a kas mannakigubat. Nagkukuyogda a napan ket kinamatda dagiti kabusorda inggana idiay siudad iti Dan. ¹⁵ Iti rabii, biningay ni Abram dagiti lallaki iti sumagmamano a bunggoy, ket dinarupda dagiti kabusorda manipud iti nadumaduma a suli ket pinarmekda dagitoy. Kinamatda ida inggana idiay Hoba, nga adda iti amianan ti siudad ti Damasco. ¹⁶ Napasubli met laeng dagiti lallaki a kadua ni Abram dagiti amin a taraon a naala. Naispalda pay ni Lot ken amin a sanikuana ken kasta met dagiti babbai ken dadduma pay nga innala dagiti kabusorda. ¹⁷ Iti panagawid ni Abram iti balayna kalpasan iti panangparmekna ken dagiti tattaona kadagiti armada ni Ari Kedorlaomer ken kadagiti dadduma pay nga ar-ari a nangtulong kenkuana a nakiranget, napan ti Ari ti Sodoma iti amianan tapno sabtenna ni Abrahamiti Tanap ti Save, nga aw-awagan met dagiti tataao iti Tanap ti Ari. ¹⁸ Ni Melkizedek, nga ari iti siudad ti Salem, ket maysa met a padi ti Kangatoan a Dios. Nangiyeg isuna iti sumagmamano a tinapay ken arak kenni Abram. ¹⁹ Kalpasanna, binendisionanna ni Abram a kinunana, "Bendisionannaka koma ti kangatoan a Dios, a nangparsua iti langit ken daga. ²⁰ Madaydayaw ti Kangatoan a Dios, gapu ta impaayna kenka ti kabaelan a mangparmek kadagiti kabusormo." Kalpasanna ket nangted ni Abram kenni Melkizedek iti apagkapullo a paset dagiti amin a banbanag a nasamsamna. ²¹ Kinuna ti Ari ti Sodoma kenni Abram, "Uray alaem amin dagiti sanikua a napasublim. Ipalubosmo laeng koma nga alaek dagiti tattao, manipud iti siudadko, a natiliwmo." ²² Ngem kinuna ni Abram iti Ari ti Sodoma, "Nagkariak a sipapasnek kenni Yahweh, a Kangatoan a Dios, a nangparsua iti langit ken iti daga, ²³ a saanakto a mangala iti uray maysa a sinulid wenno uray galut ti sandalias manipud iti aniaman a kukuam. Iti kasta, saanmonto a pulos a mabalin nga ibaga, 'Siak ti gapuna a nagbalin a nabaknang ni Abram'. ²⁴ Ti laeng awatek ket ti taraon a kinnan dagiti tattaok. Ngem ni Aner, ni Escol, ken ni Mamre a kakadduak a napan nakiranget, bay-am ida a mangala iti bingayda kadagiti banbanag a naipasublimi."