¹ Zâu Yê-su jămc jau ninyh pongh ah tauh tăng stengb taih bix mâyc Buđ nyăngz Munh.” ² Stâyb-Sây buz taih naic Zâu Yê-su, “Stâyb Pha lex, lâyc tauh munh tăng Stengb stâyv taih bix mâyc buf nzof gôh, Nây six wâyc Nănh nyăngz Stoif, Mah six wâyc nănh nzif Pha nyăngz Stoif?” ³ Zâu Yê-su tauz, “Nâyx tauh Munh mâyc buf, Six max Zâyc wâyc Nănh nyăngz Stoif, Yâuc max âyc wâyc Nănh Nzif Pha nyăngz stoif đêh, Nâyx tauh munh mâyc Buđ six wâyc Tênb-Hungh ayx nyăngz dlayc tăng nâyx tauh Munh nyăngz stynb hynđ yangh seetb taih.” ⁴ Max zengx nzămc pănh oix zuc ayx paiđ yaz taih woax tauh nyăngz cumh Pâuz, Tauv nzămc taih, Max naih laiv tauh hayh ayx lungđ.” ⁵ Yaz năngx yămz bamh canz nyăngz săngx huđ, Yaz six ayx bamh canz nyăngz Gwăngz-eng.” ⁶ Coong songf nănh nzuv nzanh womz ănz woa nib ta pênx pamc, đêux taih hâuh ănz mâyc buf munh nyăngz mâyc. ⁷ Bux nănh coong, “Mâyh ninyh tauv đangđ phanx woa ( Si-lôm ) Glangh đaox mâyh nyăngz mâyc gôh. Si-lôm woax zâux woac âyz gâyf six paiđ ninyh, woax tauh munh ninyh tauv woa đaox dlăngc phunb đangz lauf tauv woa tync, songđ hayh mangc tuz phătc.” ⁸ Nănh nyăngz njăngv sangc munh, Cloon njynh leox phătc nănh nyanh nhlync woax đomc munh, Lanh naic lanh, Lâyc tauh ya munh max zâyf njynh leox Stâyv woa jođ nhlync woax tauh munh mah?” ⁹ Ah phanx coong, “Zâyc gôh, ah phanx coong max zâyf đêh, Naih munh năngđ nănh lêđ, woax tauh mâyc Buđ munh cănh coong, “Seenz six yaz gôh nef.” ¹⁰ Woax đomc munh naic nănh coong, “ha Mâyh nyăngz mâyc nâyx zanyf ayx laix bix hayh mangc tuz phătc? ¹¹ Nănh tauz, “Naih ah tauh munh bux hipđ ayx Yê-su, Nănh ta pamc hâuh ănz yaz nyăngz mâyc năngx êu yaz ninyh woa ( Si-lôm ) womz Glangh đaox. Đaox songf yaz songđ mangc tuz phătc jau.” ¹² Woax đomc munh năngx naic, woax tauh munh yămz laiv? Nănh tauz, Yaz max pâyz đêh.” ¹³ Nănh stiz ênz woax tauh mâyc buf munh ninyh tauv Pha-li-si Munh woa. ¹⁴ Six woax noib, Zâu Yê-su ta pamc hâuh ănz mâyc buđ tuz gongx taih woax noib six toix tingc congz.” ¹⁵ Woax đomc Pha-li-si Munh yâuc naic Nănh, “Mâyh nyăngz mâyc ayx laix hayh mangc tuz phătc jau? Nănh lănv coong, “Zâu Yê-su zoz pamc womz hâuh ănz yaz nyăngz mâyc tuz, Bix êu yaz ninyh đaox tuz dlăngc bix hayh mangc tuz phătc jau.” ¹⁶ Six naih ah phanx aox coong, “Pamf Stoif-nyăngz munh ayx laix hayh ayx tuz lâyc đomc Jix-caox njingc nyăngz dlayc? Năngđ ha Nănh stiz songđ taux woa phunz đanv.” ¹⁷ Nănh Stiz naic woax tauh mâyc buđ munh coong, “Mâyh nyâyh mungv, Stăngc zany tuz mâyh nyăngz mâyc Gwăngz woax tauh six toix lungđ Munh? Woax tauh munh tauz, “Nănh six ah tauh Stênx-stengb Munh.” ¹⁸ Ayx lub woax đomc Yiu-tai Munh lauf max zeen nănh, Cah đangc noib mâyc buđ, Nâyx zanyf bix năngx hayh Mangc tuz phătc jau, Nănh stiz năngx êu nănh nyăngz nzif Pha taih naic.” ¹⁹ Nănh stiz naic, “Nâyx tauh max zâyf nyâuh nyăngz sây mah?, nyâuh coong nănh tăng nănh yămz woa yămz Stâyz bix mâyc buđ woax tauh mah? Ha săngh laix nâyx zanyf nănh ayx laix hayh mangc tuz phătc jau? ²⁰ Nănh nyăngz Nzif Pha tauz, “Buz pâyz tuz nănh six ayx buz nyăngz Sây, Yâuc pâyz nănh tăng stengb stâyv taih bix mâyc buđ. ²¹ Six buz max pâyz nănh ayx laix hayh mangc tuz phătc jau, Yâuc max pâyz tuz toix laiv tauh zany tuz nănh mâyc Gwăngz, nyâuh cănh zah Naic nănh geh! Nănh lub hayh lănv Nănh nyăngz jau nzof.” ²² Nănh nyăngz Nzif Pha năngđ nâyx coong Six wâyc nănh stiz cumh nzav ayx lub nyăngz Yiu-tai munh, ayx quanz lub woax đomc coong, “Toix laiv tauh nhlimc Zâu Yê-su ayx Njâuv Zâu, woax tauh six zuc luiđ seetb Huyđ-toongh.” ²³ Wâyc zuc năngđ nâyx nănh nyăngz Nzif Pha nzăngđ coong, “Nănh lub nzof nyâuh cănh naic nănh geh!” ²⁴ Pha-li-si Munh năngx êu đangc noib mâyc buđ, Nâyx zanyf tuz gongx woax lanh munh taih naic nănh tah nyâyc hâyc, “Nănh stiz bux nănh coong, “Mâyh phanv toongx Tênb-Hungh nhlimc coong zac. Buz pâyz tuz zany mâyh nyăngz mâyc gongx woax tauh six Stoif-Munh.” ²⁵ Woax tauh munh tauz, “Nănh naih Stoif max naih yaz max Pâyz, Yaz cungb pâyz, Lôx noib yaz mâyc buđ, Nâyx zanyf yaz hayh mangc tuz phătc.” ²⁶ Nănh stiz năngx naic, “Nănh zany mâyh ayx laix? Tah claof ayx laix phunz mâyh nyăngz mâyc hayh mangc tuz phătc? ²⁷ Nănh tauz, “Yaz bêc lănv bux nyâuh quaix nzof, nyâuh yâuc max jiuc mungv, nyâuh wâyc săngh laix zâyf năngx oix mungv timb naz? nyâuh max zâyf oix ayx nănh nyăngz Stâyb-sây mah?” ²⁸ Nănh stiz mađ nănh coong, “Mâyh nzăngđ zâyf ayx nănh nyăngz Stâyb-sây nef, Buz six ayx Mô-sê nyăngz Stâyb-sây.” ²⁹ Buz pâyz tuz Tênb-Hungh cloon Mô-sê coong woac quaix, Six buz max pâyz tuz woax tauh ya munh tăng laiv tix taih đêh.” ³⁰ Woax tauh munh tauz coong, “nyâuh phătc njingf max? Nănh hayh coib tuz yaz nyăngz mâyc Gwăngz, Six nyâuh lenf lôx max pâyz tuz nănh tăng laiv tix taih.” ³¹ Pănh pâyz tuz Tênb-Hungh max mungv pamf Stoif-munh clo Zâu nyăngz woac, Six toix laiv tauh pâuh Tênb-Hungh. Yâuc âyz nănh nyăngz âyx ayx, Tênb-Hungh songđ mungv woax tauh nyăngz woac.” ³² Tăng cah loc tauv nâyx zanyf, Max zengx numđ lănv coong naih toix laiv tauh tăng Stengb stâyv taih bix mâyc buđ. Bix naih toix laiv tauh hayh coib tuz phătc jau nef.” ³³ Six coong lâyc tauh munh năngđ max zâyf tăng Tênb-Hungh phunz taih têx, Nănh max hayh ayx tuz seetb toix laiv lungđ đêh.” ³⁴ Nănh stiz tauz, “Mâyh tăng Stengb taih toongz stoif tuz lub, Mâyh năngx nzađ nzaox buz naz? Nănh stiz songđ luiđ nănh seetb Huyđ-toongh. ³⁵ Zâu Yê-su numđ Munh lănv coong, “Nănh stiz luiđ nâyx tauh munh seetb Huyđ-toongh, Nănh songđ ninyh lov tuz pongh yâuc naic nănh coong, “Mâyh zeen yaz bamh munh nyăngz toonz max?” ³⁶ Woax tauh munh tauz, “Tah lex! Nănh six toix tauh? Jođ mâyh bux yaz, nzof yaz nzăngđ hayh zeen nănh nef!” ³⁷ Zâu Yê-su bux nănh coong, “Mâyh phătc nănh quaix nzof gôh, Six nâyx zanyf cloon mâyh lănv woac nâyx tauh ya gôh nef.” ³⁸ Woax tauh munh coong, “Yaz zeen gôh,. woax tauh munh lênh dlih quâyc nzac cah đangc ninyh paix Nănh.” ³⁹ Zâu Yê-su coong, “Yaz taih Stămđ bamh canz. Phunz mâyc buđ nyăngz munh hayh Mangc tuz phătc jau, Six mangc tuz phătc woax đomc wav pênx mâyc buđ.” ⁴⁰ Naih batz lanh Pha-li-si Munh Stâuđ woa numđ Nănh coong ayx ha songđ naic, “ha mâyh lauf coong buz six mâyc buđ naz?" ⁴¹ Zâu Yê-su tauz, “Six coong nyâuh năngđ coong nyâuh mâyc buđ têx, nyâuh six max naih Stoif, Six coong nyâuh coong buz mangc tuz phătc têx, nyâuh lauf năngx naih Stoif.”