¹ Blătc woa Zâu Yê-su năngx clangv quaix woax nganc Ga-li-lê Glangh synh ninyh, Nâyx nomz Glangh năngx naih ah nomz bux hipđ ayx Ti-bê-li-atv.” ² Munh hoongđ nzongf lêpc nănh ninyh, wâyc zuc nănh stiz tuz phătc ayx Jix-caox njingf nyăngz dlayc, Zany gongx gumc munh.” ³ Zâu Yê-su songđ staox woa zoongz hav ninyh cloon stâyb-sây buz stâyv woa.” ⁴ Woax zanyf cayx tauv Yiu-tai Munh nyăngz pyeenv mengc stêtz.” ⁵ Zâu Yê-su zaub mynb mangc phătc songx munh hoongđ nzongf taih tauv nănh woa, Nănh songđ naic Phi-lipv, Pănh cayx zuc ninyh laiv tix maif nzu tuz caux phunz buc lâyc munh nhlync?” ⁶ Nănh naic năngđ nây six nănh stâyv Phi-lipv, Nănh songđ pâyz tuz nănh cayx ayx laiv lungđ.” ⁷ Phi-lipv tauz, Pănh zuc nongc ayx săngh lav nyăngz congz stynh ninyh maif nzu phunz nzăngđ tuz lanh tikx.” ⁸ Nănh nyăngz pitc tauh stâyb-sây Si-môn Phê-e-rơ nyăngz yâuc Any-rê taih bux coong, “ ⁹ Yămz nây naih ah tauh nauf jeenz năngx naih pyaz nomz nzu, Nongc bakc-li blauh ayx taih nyăngz nzu, cloon iz tauh byauc jeenz. Six munh hoongđ tuz nâyx ayx laix hayh phunz tuz caux?” ¹⁰ Zâu Yê-su bux songx munh coong, “nyâuh stâyv nzac lâyc naih mađ nyăngz tync geh! songx munh songđ stâyv nzac, woax peob munh, Cungb stunx munh toonz, Cox naih pyaz tynb lanh Munh.” ¹¹ Zâu Yê-su zoz woax đomc nzu taih hâuđ Tênb-Hungh, songđ patz Phunz stâyv nzac woax đomc songx munh nhlync, Yâuc phunz cloon woax đomc byauc, dluyh coz munh toix laiv tauh oix nhlync tuz buc laiv bix nhlync. ¹² Songx munh nhlync pêu nzuf, Zâu Yê-su bux êu stâyb-sây buz, nyâuh ninyh sâub dlonf nhlync yăngc woax đomc nzu, năngx gâyf quanyf ayx huđ. ¹³ Woax đomc pyaz nomz back-li blau nzu, Songx munh nhlync pêu nzuf, Stâyb-sây buz ninyh sâub dlonf nhlync yăngc woax đomc nzu tuz săpc nyâyc đanz pong. ¹⁴ Songx munh phătc Zâu Yê-su ayx nâyx đomc Jix-caox njingf nyăngz dlayc, nănh stiz songđ coong, “ Lâyc tauh ya munh seenz zâyf oix taih bamh canz woax tauh Stênz-stengb gôh.*” ¹⁵ Zâu Yê-su pâyz tuz songx munh oix zoz nănh pâuh ayx Hungh, Nănh songđ cănh pyeenv gâyh ninyh yămz woa zoongz zâyc.” ¹⁶ Tauv gungh cayx nzămc, Zâu Yê-su nyăngz stâyb-sây buz nzac ninyh tauv Ga-li-lê Glangh synh. ¹⁷ Gungh nzămc nzof nănh yâuc max zengx lauf Stâyb-sây buz woa, Nănh stiz songđ nzac ah saz đangđ tâuc hungv ninyh Ca-bê-na-um Muôngc.” ¹⁸ Woax zanyf naih ah tâu nzaox lub sâyb woa Glangh womz bomf gapb loongc Vômh-vômh têx, ¹⁹ Nănh stiz tâuc Đangđ ninyh tuz cox pyâyz pyaz gâyf jau Nâyx, Mangc phătc Zâu Yê-su yăngh jămc womz mync ninyh nănh stiz woa đangđ. Nănh stiz seenz cumh nzav nzongf.” ²⁰ Nănh bux coong, “Max nongc cumh nzav đêh, Yaz lêđ đôih.” ²¹ Nănh stiz numđ nyađ stipx nănh nzac đangđ njaf ninyh, Đangđ lênh dlih tauv nănh stiz hangc ninyh woax nomz tync. ²² Tah nyâyc noib lauf yămz woax nganc Glangh synh, Nănh stiz cungb phătc naih ah saz Đangđ zapz woa, Zâu Yê-su yâuc max cloon stayb-sây nzac đangđ. cungb cănh stâyb-sây buz ninyh.” ²³ Naih ah đomc Đangđ tăng Ti-bê-li-atv Muôngc ninyh zapz woa glangh synh, Stătx Zâu Yê-su hâuđ Tênb-Hungh phunz nzu songx Munh nhlync woax nomz tync.” ²⁴ Songx munh max phătc naih Zâu Yê-su cloon Stâyb-sây buz yămz woa, songđ nzac đangđ tâuc ninyh Ca-bê-na-um muôngc lov nănh.” ²⁵ Nănh stiz lov pongh nănh yămz woa glangh synh songđ naic nănh coong, “Săngh laix Stênz-stengb bix taih tauv nây? ²⁶ Zâu Yê-su tauz, “Yaz coong seenz bux nyâuh, nyâuh taih lov yaz max zâyf wâyc nyâuh tuz phătc yaz ayx Jix-caox njingf nyăngz dlayc, Phunz nyâuh tuz nzu nhlync pêu mah! ²⁷ Nyâuh max nongc seetb jab jov hayh huđ nyăngz nhlinc hopb, Six oix zuc lov Phunz munh hayh tuz Stâyv-quâyx nyăngz mengc woax hungđ nhlync hopb. yaz bamh munh nyăngz toonz oix phunz nâyx hungđ nhlync hopb nyâuh, wâyc zuc yaz nyăngz Pha Tênb-Hungh jaoz lanyf Phunz yaz, Năngđ tăpb yeenx nâyx, phunz yaz ayx hopđ nzuf nănh nyăngz nyâuđ. ²⁸ Nănh stiz naic, “ha Tênb-Hungh oix nongc buz ayx toix lungđ cumh pâuz?” ²⁹ Zâu Yê-su tauz, “Tênb-Hungh oix nongc nyâuh ayx nyăngz congz six oix zuc zeen couv Nănh paiđ taih woax tauh.” ³⁰ Nănh stiz naic, “ha Stênz-stengb ayx toix lungđ Jix-caox njingf nyăngz dlayc phunz buz phătc bix nzăngđ zeen? Mâyh ayx toix lungđ? ³¹ Buz nyăngz claof jex yămz woa Stâyz-phangz blănf nhlync ma-na-nzu, Năngđ Canyx-Stâub ja coong nâyx, Nănh phunz Ma-na nzu tăng Gungh nzac taih phunz nănh stiz Nhlync.” ³² Zâu Yê-su bux Nănh stiz, Yaz coong seenz bux nyâuh, Six max zâyf Mô-sê phunz tăng gungh tuih nzac taih woax hungđ nhlync hopb, Six yaz nyăngz Pha zoz yămz gungh nyăngz seenz nhlync hopb jaoz phunz nyâuh.” ³³ Wâyc zuc Tênb-Hungh nyăngz nhlync hopb six tăng Tênb-toongh nzac taih phunz bamh munh naih Mengc săngh woax tauh ya.” ³⁴ Nănh stiz coong, “Stênz-stengb lex! jođ mâyh nâyx zanyf phunz woax hungđ nhlync hopb phunz buz gôh!” ³⁵ Zâu Yê-su tauz, “Yaz six yungf Mengc nyăngz nhlync hopb. Toix laiv tauh taih lov yaz stâyv quâyx max ngoc, Toix laiv tauh zeen couv yaz stâyv quâyx max nyâuđ gatb.” ³⁶ Six năngđ yaz bux nyâuh quaix nâyx, nyâuh hănđ phătc quaix yaz yâuc max zeen.” ³⁷ Tinyh phanv yaz nyăngz Pha sađ phunz yaz nyăngz munh muif tauh oix taih lov yaz, Six toix laiv tauh taih lov yaz stâyv quâyx max quanyf nănh stiz.” ³⁸ Wâyc zuc yaz tăng Tênb-toongh nzac taih six max zâyf dluyh yaz nyăngz âyx ayx, Six yaz taih ayx âyz paiđ yaz taih woax tauh nyăngz âyx.” ³⁹ Paiđ yaz taih woax tauh nyăngz âyx six năngđ nâyx, Nănh sađ phunz yaz woax đomc Munh, Nănh max oix nongc toix tauh dlêtc, Tauv stêtb mâyv zomc woax noib, Yaz oix phunz nănh stiz săngh phunb stengb taih nzuf.” ⁴⁰ Yaz nyăngz pha nyăngz âyx six năngđ nâyx, Toix laiv tauh phătc nănh nyăngz toonz, Yâuc zeen couv Nănh nyăngz toonz woax tauh, Songđ tuz stâyv quâyx nyăngz mengc. Tauv stêtb mâyv zomc woax noib yaz oix phunz nănh stiz săngh phunb stengb taih.” ⁴¹ Yiu-tai munh yônx Nănh, Six wâyc nănh coong, “Yaz six tăng gungh nzac taih nyăngz nhlync hopb.” ⁴² Nănh stiz lanh bux lanh, Lâyc tauh Yê-su six pănh lauf pâyz lec, Nănh nyăngz nzif Pha max zâyf Yô-sepv mah? Nănh six Yô-sepv nyăngz sây lec, Săngh laix nănh bix nzađ coong nănh six tăng gungh nzac taih?” ⁴³ Six Zâu Yê-su tauz nănh stiz, “nyâuh max nongc poc lâyc lanh yônx ănz lanh đêh! ⁴⁴ Yaz six Nzangc Pha paiđ taih, Max zâyf nzangc Pha ênz taih lov yaz, Six max naih laiv tauh hayh taih lov yaz. Six laiv tauh taih lov yaz, Tauv stêtb mâyv zomc woax noib, Yaz six ayx phunz nănh săngh phunb stengb taih.” ⁴⁵ Tâuc woac Munh nyăngz Stâub ja coong, “Tênb-Hungh cănh nzaox Nănh stiz, Toix laiv tauh numđ Nzangc Pha nyăngz woac, Toc yâuc pâyz, woax Tauh six oix taih lov yaz.” ⁴⁶ Max zengx naih laiv tauh tuz phătc Nzangc Pha, Cungb tăng Tênb-Hungh taih woax tauh nzăngđ tuz phătc Nzangc Pha.” ⁴⁷ Yaz coong seenz bux nyâuh, Laiv tauh zeen Six tuz Stâyv quâyx nyăngz mengc.” ⁴⁸ Yaz six ayx yungf Mengc nyăngz nzu.” ⁴⁹ Nyâuh nyăngz claof jex buz yămz Stâyz-phangz blănf nhlync Ma-na nzu, Six nănh stiz lauf zuc tayc nzuf.” ⁵⁰ Nây six tăng gungh nzac taih nyăngz nzu, Toix laiv tauh năngđ nhlync six max zuc tayc gôh. ⁵¹ Yaz six săngh mengc nyăngz nzu tăng Gungh nzac taih, Toix laiv tauh nhlync nâyx hungđ ya nzu six Stâyv quâyx săngh, Nâyx hungđ ya nhlync hopb six bamh Munh toonz nyăngz stynb A. Mungc nănh phunz bamh Munh tuz Mengc săngh.” ⁵² Wâyc nâyx zâux woac, Yiu-tai Munh songđ zengv nănh, Lâyc tauh munh ayx laix hayh zoz Nănh nyăngz stynb a phunz pănh nhlync?” ⁵³ Zâu Yê-su bux nănh stiz coong, “Yaz coong seenz bux nyâuh, nyâuh oix zuc Nhlync bamh munh toonz nyăngz a, Yâuc hopb nănh nyăngz samđ, Năngđ max têx, nyâuh max hayh tuz stipx săngh mengc đêh.” ⁵⁴ Toix laiv tauh nhlync yaz nyăngz a. Hopb yaz nyăngz samđ woax tauh naih stâyv quâyx nyăngz Mengc. Tauv đangz phanx stêtb mâyv zomc woax noib, Yaz yâuc phunz nănh săngh phunb stengb taih.” ⁵⁵ Wâyc zuc yaz nyăngz a, Cloon yaz nyăngz samđ Six seenz nyăngz nhlync hopb.” ⁵⁶ Laiv tauh nhlync yaz nyăngz a yâuc hopb yaz nyăngz samđ, woax tauh cloon yaz songc mengc săngh, nzof yaz yâuc cloon Nănh songc Mengc săngh, ⁵⁷ Săngh Mengc nyăngz Nzangc Pha paiđ yaz taih, Toix laiv tauh nhlync yaz nyăngz a nănh yâuc wâyc yaz tuz săngh Mengc. ⁵⁸ Yaz six max zâyf năngđ nyâuh nyăngz claof jex buz nhlync woax đomc nzu, nhlync blătc zâyf Năngx hayh tayc, six laiv tauh nhlync tăng Tênb-toongh nzac taih nyăngz nhlinc hopb six tuz stâyv quâyx nyăngz mengc săngh.” ⁵⁹ Zâu Yê-su coong nâyx đomc woac woax zanyf, Six yămz Ca-bê-na-um Muôngc nyăngz Huyđ-toongh nzaox Munh.” ⁶⁰ Naih đungx lanh Zâu Yê-su nyăngz Stâyb-sây buz coong, ”Nzaox nâyx đomc woac seenz ayx tuz zâuđ nâyx naih mănv mungv tuz?” ⁶¹ Zâu Yê-su pâyz tuz nănh nyăngz stâyb-sây buz yônx Nâyx đomc woac songđ bux Nănh stiz, Max zâyf wâyc yaz nzaox nâyx đomc woac nyâuh bix numđ zâuđ mungv mah?" ⁶² Ha six coong nyâuh năngđ phătc yaz bamh munh nyăngz toonz staox tauv lôx noib nănh yămz nyăngz tync, nyâuh cayx ayx laix? ⁶³ Singx-lingh phunz munh tuz mengc săngh, Bamh munh max hayh phunz munh naih săngh mengc. Six yaz coong nyăngz woac six săngh mengc. ⁶⁴ Six nyâuh naih đomc max zeen yaz.” Wâyc zuc Yê-su tăng coonz pâyz tuz quaix đangc toix laiv tauh max zeen nănh, Toix laiv tauh oix maic nănh. ⁶⁵ Nănh năngx coong, “wâyc zuc yaz coong bux nyâuh quaix, Blătc nzuf max zâyf Nzangc Pha phunz taih woax đomc, Max naih laiv lanh hayh taih lov yaz. ⁶⁶ Zâu Yê-su coong nâyx đomc blătc, Naih đungx lanh Stâyb-sây toiv max lêpc nănh ninyh.” ⁶⁷ Zâu Yê-su naic woax đomc săpc nyâyc lanh Stâyb-sây, ha nyâuh oix quanyf yaz max? ⁶⁸ Si-môn Phê-e-rơ tauz, “Zâu lex! buz năngx zuc ninyh lêpc toix laiv tauh timb? lunv Zâu coong nyăngz woac bix hayh phunz munh naih mengc săngh lêc.” ⁶⁹ Buz zeen yâuc pâyz tuz Stênz-stengb six ayx Tênb-Hungh paiđ taih nyăngz đăngb-zengh nyăngz munh.” ⁷⁰ Zâu Yê-su tauz, “Max zâyf yaz sên nyâuh săpc nyâyc lanh taih mah? Six nyâuh đomc naih ah tauh stanyv manđ.” ⁷¹ Zâu Yê-su coong nâyx six, Six coong zuc Si-môn nyăngz toonz, Ikv-sa-ca-li-ôtv, Yu-đa.” Săpc nyâyc lanh Stâyb-sây ah lanh maic Nănh.”