¹ Nâyx đomc dlayc seetb nzuf, Zâu Yê-su năngx hynđ yangh yămz Ti-bê-ni glangh Synh phunz nănh nyăngz Stâyb-Sây buz phătc, seetb taih nyăngz dlayc six năngđ nâyx.” ² Si-môn Phê-e-rơ năngx cloon Thô-ma Munh hypđ ayx Sây toix woax tauh, Yâuc naih yămz Ga-li-lê Stengv Ca-na Njặngv woax tauh Na-ta-na-ên, Cloon Sê-bê-đê nyăngz iz tauh toonz, Năngx naih cloon iz tauh Stâyb-sây yămz woa.” ³ Si-môn Phê-e-rơ bux coong, “Pănh ninyh ayx pyauf gôh, woax đomc munh coong, “Ha buz lauf cloon mâyh ninyh, nănh stiz songđ tinyh đoih nzac đangđ ninyh, Six nănh stiz canz săngh munf max tuz lungđ tiny stăngv.” ⁴ Canz tuz tauv gungh Gwăngz lungv têx, Zâu Yê-su Stâuđ woa wăngx synh, six nănh stiz max saz nănh.” ⁵ Zâu Yê-su naic nănh stiz, “Yâuf pez lex! nyâuh ayx tuz byauf max? Nănh stiz tauz, “Max tuz lungđ đêh.” ⁶ Zâu Yê-su bux nănh stiz coong, “Pungx leđ ănz nzac lâyc byaoh phanx Đangđ synh ninyh songđ tuz tix tauh byauf gôh. Nănh stiz songđ pungx leđ nzac ninyh, Sâub tuz byauf đungx nzongf, đănx leđ max staox tuz tauv Đangđ.” ⁷ Zâu Yê-su Stăngz woax tauh Stâyb-sây coong bux Phê-e-rơ coong, "lâyc tauh six Zâu nef!” Si-môn Phê-e-rơ ah yađ numđ coong lâyc six Zâu naz, Nănh songđ zay zoz cungh ngwoaic woax yămc Gwuyz đao ayx quengx, wâyc zuc nănh bêc zay tuz Gwuyz quav nzuf nzof. Nănh songđ đanyz zomf nzac womz ninyh.” ⁸ Năngx naih woax đomc stâyb-sây tâuc đangđ ninyh yâuc đănx cloon leđ, leđ Yâuc naih byauf Pong nzuf, Nănh stiz đănx leđ seetb wăngx synh ninyh. gâyh wăngx synh max côz bah laiv, Cox gâyh ngâuf săpc yomh nâyx.” ⁹ Seetb đangđ ninyh tauv wăngx synh, Phătc naih ah lâuh tâuc tanv, Phătc naih batz tauh byauf siz ănz woa, Yâuc naih cloon nzu ănz woa.” ¹⁰ Zâu Yê-su bux nănh stiz coong, “Zoz nyâuh nzăngđ tuz woax đomc byauf taih gôh.” ¹¹ Phê-e-rơ songđ nzac đangđ ninyh đănx leđ, byauf pong nzuf, Naih ah pez stamx săpc tauh byauf lub, byauf hănđ tăng laiv đungx, Six leđ lauf max byaif.” ¹² Zâu Yê-su bux êu nănh stiz tih đoih taih nhlync bah đomz gôh, Nănh stiz max naih toix tauh nzađ naic nănh, “Mâyh six toix mănv? Wâyc zuc nănh stiz pâyz tuz nănh six Zâu.” ¹³ Zâu Yê-su songđ ninyh zoz nzu zoz byauf Phunz Nănh stiz nhlync.” ¹⁴ Nâyx hâyđ six Zâu Yê-su tayc blătc năngx săngh phunb stengb taih, hynđ yangh phunz stâyb-sây buz phătc Nănh tah stamz hâyđ. ¹⁵ Nhlync pac Zâu Yê-su naic Si-môn Phê-e-rơ coong, “Giăng nyăngz toonz Si-môn lex! Mâyh seenz Stăngz yaz năngx đungx têx nâyx đomc munh max? Pi-tê tauz, “hưrv, Zâu lex! Mâyh pâyz tuz yaz seenz Stăngz mâyh. Zâu Yê-su coong bux nănh, Mâyh yungf yaz nyăngz Pa-jiz yungh bef!” ¹⁶ Zâu Yê-su năngx naic tah nyâyc hâyđ, Giăng nyăngz toonz Si-môn lex! Mâyh seenz Stăngz yaz Max? Si-môn tauz, “Zâu lex! Stăngz lef! Mâyh pâyz tuz yaz Stăngz mâyh. Zâu Yê-su bux nănh, “Mâyh jămđ yaz nyăngz Pa-jiz yungh bef.” ¹⁷ Zâu Yê-su Năngx naic tah stamz hâyđ, Giăng nyăngz toonz Si-môn lex! mâyh seenz Stăngz yaz Max? Zâu Yê-su naic tauv tah stamz woax hâyđ, Mâyh Stăngc yaz max? Phê-e-rơ numđ munz stymz nzongf songđ coong, “Zâu lex! Mâyh pâyz tuz muif hungđ dlayc, Mâyh yâuc pâyz tuz yaz Stăngz mâyh, “Zâu Yê-su bux nănh coong, “jămđ gongx yaz nyăngz Pa-jiz yungh bef.” ¹⁸ Yaz coong seenz bux mâyh, “Năngx gunx nyăngz săngx huđ, oix ninyh laiv Yâuc tuz dluyh stymz, Yâuc cănh hayh stayb clai, Six tauv côx taih, six zuc stungđ Puf phunz Munh stăngc stayb quav langđ.” Yâuc ênz mâyh ninyh tauv, Mâyh max oix ninyh nyăngz tync.” ¹⁹ Zâu Yê-su năngđ nâyx coong wâyc phunz Phê-rơ tayc năngđ laix, phunz munh pâuh Tênb-Hungh. Zâu Yê-su coong bux Phê-e-rơ, mâyh lêpc yaz bef. ²⁰ Phê-e-rơ wynb lauf Phătc Zâu Yê-su stăngz woax tauh Stâyb-sây lêpc nănh stiz Taih, Nâyx tauh stâyb-sây six nănh stiz nhlync woax tonx năngv, Nănh bix đengh clangz quaix ninyh stătx Zâu Yê-su coong, “oix maic mâyh six toix laiv tauh? ²¹ Phê-e-rơ Phătc nănh songđ naic Zâu Yê-su, “Zâu lex! ha nâyx tauh wec! Cayx ayx laix? ²² Zâu Yê-su bux nănh coong, “Six coong yaz phunz Nănh yămz tauv yaz năngx taih, bix naih lungđ queenđ tauv mâyh? mâyh phanv lêpc yaz ninyh zef gôh.” ²³ Wâyc năngđ nâyx naih woac lunc pong Stâyz zâuv lêpc Zâu Yê-su nyăngz Yâuf-pez laic Stăngz six nâyx tauh Munh max hayh tayc, Six Zâu Yê-su max zâyf coong nănh max tayc, Nănh cungb coong, “Yaz năngđ phunz nănh yămz tauv yaz năngx taih woax zanyf, Bix naih toix lungđ queenđ tauv mâyh?” ²⁴ Nâyx tauh stâyb-sây ayx zanyx manyf coong tauv nâyx đomc dlayc, Yâuc wâyc nâyx tauh Stâyb-Sây ja Nâyx đomc dlayc, Pănh yâuc pâyz tuz pănh ayx Zanyx manyf six seenz nyăngz. ²⁵ Zâu Yê-su ayx nyăngz dlayc, Năngx naih đungx nzongf max tuz Ja ănz nây nzuf, Yaz nyâyh taih năngđ ja tuz nzuf, Nâyx nomz bamh canz max naih tync ănz tuz Nâyx đomc stâub nzuf đêh.”