¹ Zâu Yê-su coong nzuf nâyx đomc woac, Nănh songđ zaub mynb mangc cah zâyc gungh yâuc coong, “Pha lex! Tauv săngx huđ jođ phunz munh pâuh yaz, nzof yaz yâuc phunz munh pâuh Pha.” ² Pha zoz lanyf jaoz phunz yaz cun nzuf bamh canz, six Pha sađ phunz naih Săngh Mengc woax đomc Munh, Pha zoz jaoz phunz Yaz.” ³ Tuz Stâyv quâyx nyăngz Mengc Six năngđ nâyx, Pâyz tuz Nzangc Pha Tênb-Hungh six gongx quaix nyăngz seenz gâyf, Yâuc pâyz tuz paiđ Njâuv Zâu Yê-su taih woax tauh.” ⁴ Yaz yămz bamh canz pâuh phunz Zâu nyăngz manyh bux Gwăngz, Yâuc ayx songf Pha jaoz nyăngz cumh Pâuz. ⁵ Pha lex! Jođ Pha phunz yaz nâyx zanyf yămz Pha nyăngz cah đangc pâuh phunz pha nyăngz manyh bux tuz Gwăngz-eng. Năngđ lôx noib max zengx zâyx Gungh zâyx Nib Pha pâuh yaz woa Nâyx.” ⁶ Yaz yămz bamh canz, Pha jaoz phunz yaz woax đomc Munh, Yaz phunz nănh Stiz pâyz tuz mâyh,* Pha yâuc phunz Nănh stiz pâyz tuz Yaz, Nănh stiz songđ âyz Pha nyăngz woac ayx.” ⁷ Nâyx zanyf, Nănh stiz songđ pâyz tuz muif hungđ Pha jaoz phunz Yaz, Six tăng Pha Taih.” ⁸ Pha bux yaz woax đomc woac, Yaz yâuc lănv bux Nănh Stiz, Nănh stiz Yâuc Stipx Pha nyăngz woac, Nănh stiz pâyz tuz yaz seenz zâyf tăng Pha woa taih. Yâuc pâyz tuz Pha paiđ yaz Taih.” ⁹ Yaz stăngc nănh stiz Clo-Zâu, Max zâyf stăngc nyeenh mănh Clo-Zâu, Yaz stăngc Pha jaoz phunz yaz woax đomc munh Clo-Zâu, wâyc zuc nănh stiz six Săngh Pha nyăngz Munh.” ¹⁰ Yaz naih nyăngz six Pha nyăngz, Pha naih nyăngz six yaz nyăngz, Yaz yâuc wâyc nâyx đomc munh tuz gwăngz-eng.” ¹¹ Nâyx zanyf yaz oix muf Pha woa, Max yămz nây bamh canz nzof, Six nâyx đomc Munh lauf năngx yămz nây Bamh canz. Đăngb-zengh nyăngz Pha lex! jođ mâyh nongc mâyh naih quyênh nyăngz bux sađ phunz nănh stiz, Pêuz nănh stiz songc tyuh nyâuđ, Năngđ Pha cloon yaz songc tyuh nyâuđ Nâyx.” ¹² Yaz năngx cloon Nănh stiz yămz nyăngz Săngx huđ, Yaz nongc Pha naih quyênh nyăngz woac bux nănh stiz, Pha phunz yaz woax nomz bux sađ phunz Nănh stiz. Yaz tex nănh stiz max phunz toix laiv tauh dlêtc, seetb nzuf zuc mêtc woax tauh, Phunz dlayc seetb taih toix Nzuf Canyx-Stâub nyăngz woac. ¹³ Nâyx zanyf yaz oix muf Pha woa, Six yaz lauf năngx yămz nây bamh canz, Yaz năngđ nâyx lănv bux nâyx đomc Munh wâyc phunz nănh stiz tuz yaz nyăngz oonz-loc. ¹⁴ Yaz zoz Pha nyăngz woac jaoz Phunz Nănh stiz nzof gôh, Six bamh Munh yâuc hănđ nănh stiz, wâyc zuc nănh stiz max zâyf săngh bamh canz nyăngz munh. Lauf năngđ yaz max zâyf săngh bamh canz nyăngz Munh.” ¹⁵ Yaz max jođ Pha ênz nănh stiz seetb bamh canz, Six jođ Pha leđ nănh stiz tyuv đutb okx njangh woax tauh.” ¹⁶ Nănh stiz max zâyf Săngh bamh canz, Năngđ yaz max zâyf Săngh bamh canz Nâyx.” ¹⁷ Jođ Pha nongc mâyh nyăngz seenz gâyf phunz nănh stiz tuz dlăngc wayh, wâyc zuc mâyh nyăngz woac six Seenz nyăngz.” ¹⁸ Yaz paiđ stiz nzac bamh canz, Lauf Pha paiđ yaz nzac Bamh canz.” ¹⁹ Yaz wâyc nănh stiz, Yaz cănh pungx hođ yaz phunz Pha, wâyc phunz nănh Stiz pênx Pha nyăngz đăngb-zengh munh.” ²⁰ Yaz max six cungb stăngc nâyx đomc Munh Clo-Zâu cungv. Yaz wâyc Nănh stiz mungv Pha nzaox nyăngz woac, Yâuc zeen yaz woax đomc munh. ²¹ Jođ Pha phunz nănh stiz songc stymz nyâuđ, Năngđ yaz cloon Pha songc stymz nyâuđ Nâyx, Pha lex! Jođ phunz nănh stiz cloon pănh songc Mengc Săngh, năngđ Pha cloon yaz songc Mengc săngh nâyx, bamh Munh nzăngđ zeen Pha paiđ yaz Taih.” ²² Pha Sađ phunz yaz nyăngz Gwăngz-eng, Yaz yâuc Sađ phunz nănh stiz nzof, wâyc zuc Nănh stiz songc tyuh nyâuđ năngđ Pha Cloon yaz songc tyuh nyâuđ Nâyx.” ²³ Yaz cloon Nănh stiz songc Mengc Săngh, năngđ Pha cloon yaz songc mengc săngh Nâyx.” ²⁴ Pha lex! Pha phunz Yaz nâyx đomc Munh, Yaz yămz laiv, Yaz yâuc oix nongc nănh stiz cloon Yaz yămz woa, Nănh stiz songđ tuz camx Mangc Pha phunz yaz nyăngz Gwăngz-eng, Tăng max zengx zâyx gungh zâyx nib woax zanyf, Mâyh Stăngz yaz songđ phunz taih nyăngz Gwăngz-eng.” ²⁵ Pengh Stymz nyăngz Pha lex! Bamh munh max pâyz Mâyh, Six yaz pâyz mâyh, Zeen yaz woax đomc munh yâuc pâyz tuz Pha paiđ yaz Taih.” ²⁶ Yaz lănv phunz nănh stiz pâyz tuz Pha, Yâuc oix lănv phunz Nănh stiz pâyz Timb, wâyc phunz nănh stiz Stăngz Munh năngđ Pha stăngz yaz Nâyx, Yâuc phunz yaz cloon Nănh stiz songc Mengc Săngh.”