¹ Yaz lănv nâyx đomc bux nyâuh, wâyc phunz nyâuh max tuih pâuc.” ² Nănh stiz oix luiđ nyâuh seetb Huyđ-toongh nyăngz săngx huđ tauv, Laiv tauh nyâyh oix tayx nyâuh, Lauf wâyc nyâuh canyx bongc Tênb-Hungh. ³ Nănh stiz năngđ Nâyx ayx, wâyc zuc Nănh stiz max pâyz tuz Nzangc Pha, yâuc max pâyz tuz Yaz.” ⁴ Nâyx đomc dlayc yaz bux nyâuh quaix đangc phunz nyâuh săngx tauv nyâuh laiv zanyf pongh Nâyx đomc dlayc nyâuh songđ săngx tauv yaz lănv bux nyâuh quaix đangc nzof.” Tăng coonz yaz max zengx lănv nâyx đomc dlayc bux nyâuh, Six wâyc zuc yaz năngx cloon nyâuh Yămz.” ⁵ Six nâyx zanyf yaz oix muf tauv Nzangc Pha woa, Six nyâuh max naih mănv naic yaz Coong, “Mâyh cayx ninyh laiv?” ⁶ Wâyc zuc lănv nâyx đomc dlayc bux nyâuh, nyâuh songđ numđ stauh Nzongf.” ⁷ Six yaz coong seenz bux nyâuh, “Yaz ninyh wâyc phunz nyâuh naih lôif, Six coong yaz max muf stăngc nyâuh woax tauh woa, Yâuc max hayh taih lov nyâuh, Yaz muf nănh nzăngđ taih lov nyâuh.” ⁸ Stăngc munh woax tauh taih tauv woax zanyf, Nănh oix goib yangh phunz bamh bunh pâyz tuz tauv ayx gongđ nyăngz jau, Cloon ayx hopđ nyăngz jau, cloon zuc tingc Stoif, ⁹ Six wâyc zuc Nănh stiz max zeen couv Yaz. ¹⁰ Coong tauv pengh stymz nyăngz jau, Six wâyc yaz ninyh nzangc Pha woa, blătc nây nyâuh songđ max tuz phătc yaz gôh. ¹¹ Tauv stămc stoif nyăngz jau, wâyc zuc cun bamh canz woax tauh songđ zuc tingc Stoif.” ¹² Yaz năngx naih đungx hungđ dlayc oix lănv bux, Six nâyx zanyf cungb woangb nyâuh tanyđ max tuz.” ¹³ Phunz munh pâyz tuz seenz gâyf woax tauh Singx-lingh taih woax zanyf, nănh oix phunz nyâuh pâyz nzuf seenz gâyf. Nănh coong nyăngz woac, Max zâyf nănh cănh nyâyh seetb taih coong, “Nănh cungb oix coong nănh tuz numđ lănv quaix đangz phanx oix seetb taih nyăngz dlayc lănv bux nyâuh. ¹⁴ Nănh oix phunz munh pâuh yaz nyăngz manyh, Nzâyz yaz nyăngz woac taih lănv bux nyâuh.” ¹⁵ Nzangc Pha naih toix laiv lungđ six yaz nyăngz, wâyc nâyx yaz nzăngđ taih lănv Singx-lingh, oix zoz yaz lănv bux nănh muif hungđ lănv bux nyâuh. ¹⁶ Max lauh nyâuh max tuz phătc Yaz, nzof max lauh nyâuh lauf năngx tuz phătc Yaz. ¹⁷ Ah po stâyb-sây lanh naic lanh coong, “stâyb-Pha coong, “Max lauh nyâuh max tuz phătc Yaz, nzof quaix đangz max lauh nyâuh năngx tuz phătc Yaz, Nâyx đomc âyz gâyf six coong laix? Nănh yâuc năngx coong wâyc zuc yaz muf Nzangc Pha woa.” ¹⁸ Nănh stiz năngx lanh naic lanh, Stâyb-Pha coong, “Quaix đangz max lauh woax zâux woac âyz gâyf six coong laix? Pănh max saz đêh.” ¹⁹ Zâu Yê-su pâyz tuz nănh stiz oix nongc nănh lănv nux nănh stiz coong, “Yaz coong max lauh nyâuh max tuz phătc Yaz, nzof quaix đangz max lauh nyâuh năngx tuz phătc yaz, six nâyx zâux woac nyăngz âyz gâyf nyâuh bix lanh naic lanh max zâyf mah?” ²⁰ Yaz coong zac bux nyâuh, “nyâuh oix zuc haoh Njămz-njămz têx, Six bamh munh numđ nyađ, nyâuh six zuc stauh, Six nyâuh nyăngz stauh songđ wav pênx Hônb-hiđ.” ²¹ Munh Nzif cayx đutb stynb nyăngz săngx huđ, Nănh seenz numđ stauh zuc tanyđ munz, Six stengb tuz sây blătc stynb nănh songđ max săngx tauv zuc tanyđ munz, wâyc zuc nănh numđ nyađ nănh tuz ah tauh sây yămz nây Gungh-đi.” ²² Pây tauv nyâuh lauf Năngđ naz, Nâyx zanyf nyâuh numđ Stauh, Six yaz năngx taih lov nyâuh, Tauv woax zanyf nyâuh songđ numđ nyađ nzongf, wâyc zuc nâyx hungđ oonz-loc Max naih laiv tauh hayh zoz tuz seetb.” ²³ Tauv woax noib nyâuh songđ max jođ yaz toix laiv hungđ, Yaz coong seenz bux nyâuh, nyâuh tingz yaz nyăngz bux jođ Nzangc Pha toix laiv hungđ, Nănh songđ phunz woax hungđ nyâuh.*” ²⁴ Tauv nâyx zanyf nyâuh max zengx tingz yaz nyăngz bux jođ toix laiv hungđ, nyâuh phanv jođ geh! nyâuh songđ seenz tuz oonz-loc tauv tauh Clakx-clunh.” ²⁵ Nâyx đomc yeetx stong dlayc Yaz nongc woac jiz lănv bux nyâuh, Six tauv săngx huđ yaz max nongc nzof gôh, Yaz nyăngz Pha nyăngz jau yaz lănv zac bux nyâuh.” ²⁶ Tauv woax noib nyâuh songđ oix tim yaz nyăngz bux jođ Nzangc Pha tix hungđ, Yaz max zâyf coong yaz Stăngc nyâuh jođ, Yaz max zâuđ stăngc jođ.” ²⁷ Wâyc zuc Nzangc Pha cănh stăngz nyâuh, Nănh stăngz nyâuh, Six wâyc zuc nyâuh Stăngz yaz, Yâuc zeen yaz six tăng Tênb-Hungh taih.” ²⁸ Yaz tăng Nzangc Pha woa nzac nây bamh canz taih, Six nâyx zanyf yaz oix muf Nzangc Pha woa.” ²⁹ Nănh nyăngz stâyb-sây buz coong ănz Nănh, Nâyx zanyf stâyb-Pha max nongc woac jiz lănv bux pănh nzof. ³⁰ Nâyx zanyf buz pâyz tuz mâyh, Pâyz nzuf manf-dlayc, Songđ max sămv zuc toix tauh naic mâyh toix laiv hungđ, wâyc năngđ nâyx buz songđ seenz zeen coong mâyh six tăng Tênb-Hungh taih gôh.” ³¹ Zâu Yê-su bux nănh Stiz, “Nâyx zanyf nyâuh zeen gef?” ³² Six tauv Săngx huđ, nyâuh songđ đanv tyuv quengx ănz yaz nzuf, Mănv muf mănv pyau, Quengx yaz ah lanh yămz, Six yaz lauf max zâyf năngđ canh Sây, Năngx naih Nzangc Pha cloon yaz Yămz.” ³³ Yaz lănv bux nyâuh năngđ Nâyx, Six oix phunz nyâuh cloon yaz Songc Mengc Săngh, Songđ tuz oonz-loc. Yămz nây bamh canz nyâuh naih zâuđ Nanc, Six phanv pungx nyâuđ, Yaz hingh quaix nây bamh canz nzof gôh.”