¹ Zâu Yê-su bux stâyb-sây buz coong, “Max nongc nyâuđ woangb nyâuđ stauh, oix zuc zeen couv Tênb-Hungh, Yâuc zeen couv yaz.” ² Yaz nyăngz pha nyăngz pyau, Naih tync yămz đungx, Năngđ max naih têx, Yaz bêc lănv bux nyâuh quaix đangc nzof gôh. Yaz muf bênc tync phunz nyâuh muf yămz.” ³ Yaz muf bênc tync săngh phunz nyâuh yămz, Yaz năngx nzac taih ênz nyâuh muf cloon yaz yămz woa, Yaz yămz laiv, nyâuh songđ yămz woa, ⁴ Nyâuh yâuc pâyz tuz jau ninyh tauv yaz yămz nyăngz tync. ⁵ Thô-ma coong bux Nănh, “Zâu lex! Buz max pâyz tuz mâyh ninyh laiv, Buz ayx laix payh pâyz jau ninyh?” ⁶ Zâu Yê-su tauz, Yaz six jau ninyh Tênb-toongh, Yaz six seenz gâyf, Yaz six săngh mengc, yaz six ninyh Nzangc Pha woa nyăngz jau. ⁷ Six coong nyâuh năngđ seenz pâyz tuz yaz, nyâuh songđ pâyz tuz yaz nyăngz Pha, Six nâyx zanyf nyâuh songđ tuz phătc Nănh.” ⁸ Phi-lipv coong, “Zâu lex! Jođ nuz Nzangc Pha phunz buz phătc caux nzof gôh.” ⁹ Zâu Yê-su coong, “Phi-lipv lex! Yaz cloon nyâuh yămz lauh yongb nzof, Six nyâuh lauf max zengx pâyz tuz Yaz? Toix laiv tauh phătc quaix yaz, Six phătc quaix Nzangc Pha. Ha săngh laix nyâuh năngx coong, “Jođ nuz Nzangc Pha phunz buz Mangc?” ¹⁰ Nyâuh max zeen coong yaz yămz Pha cah njaf, nzof Pha yâuc yămz yaz cah njaf mah? Yaz coong nâyx đomc woac, Six max zâyf yaz cănh nyâyh coong, “Six Pha yămz yaz cah njaf ayx nănh nyăngz cumh Pâuz.” ¹¹ Nyâuh six zuc zeen coong yaz yămz Nzangc Pha cah njaf, Nzangc Pha yâuc yămz yaz cah njaf, Năngđ max têx, oix zuc zeen yaz ayx Jix-caox njingc nyăngz dlayc.” ¹² Yaz coong seenz bux nyâuh, “nyâuh toix laiv tauh zeen couv yaz, woax tauh ayx năngđ yaz ayx nâyx, Nănh ayx dlayc năngx lub têx Yaz, wâyc zuc yaz ninyh Nzangc Pha woa.” ¹³ Nyâuh tingz yaz nyăngz bux jođ toix lungđ, Yaz songđ ayx woax hungđ phunz Pha wâyc nănh nyăngz toonz phunz Munh pâuh.” ¹⁴ Six coong nyâuh tingz yaz nyăngz bux jođ toix lungđ, Yaz songđ ayx phunz.” ¹⁵ Six coong nyâuh stăngz yaz, nyâuh songđ âyz yaz nyăngz lanyf ayx.” ¹⁶ Yaz six stăngc jođ Nzangc Pha, Nănh six phunz pitc tauh taih stăngc nyâuh, stâyv quâyx cloon nyâuh yămz.” ¹⁷ Nâyx tauh six singx-lingh, six phunz munh pâyz tuz seenz gâyf woax tauh, bamh munh max stipx Nănh, wâyc zuc Bamh munh mangc nănh max phătc. Nănh cloon nyâuh yămz, Yâuc yămz nyâuh cah njaf. ¹⁸ Yaz max quanyf phunz nyâuh pênx canh sây đêh, Yaz six năngx phunb đangz taih lov nyâuh.” ¹⁹ Max lauh bamh caz max phătc Yaz, Six nyâuh phătc Yaz, wâyc zuc yaz yămz nyâuh cah njaf, nyâuh six tuz Săngh.” ²⁰ Tauv woax noib, nyâuh songđ pâyz tuz yaz yămz Pha cah njaf, nyâuh yâuc yămz yaz cah njaf, Yaz yâuc yămz nyâuh cah njaf.” ²¹ Toix laiv tauh stipx yaz nyăngz lanyf yâuc âyz ayx woax tauh, Yâuc stăngz yaz, Toix laiv tauh stăngz Yaz, Yaz nyăngz Pha yâuc stăngz Nănh. Yaz yâuc stăngz nănh, Yâuc oix phunz nănh pâyz tuz Yaz.” ²² Max zâyf Woax tauh Yu-đatc, ikv-sa-ca-li-ôtv, Pitc tauh Yu-đatc naic Zâu Yê-su coong, “Mâyh wâyc Săngh laix bix coong mâyh oix phunz buz pâyz tuz mâyh, Six max phunz bamh munh pâyz tuz Mâyh?” ²³ Zâu Yê-su bux Nănh, Toix laiv tauh stăngz yaz, Yâuc âyz yaz nyăngz lanyf ayx, Yaz nyăngz Pha songđ stăngz Nănh. Yaz cloon Pha songđ taih lov nănh, yâuc cloon Nănh songc yămz.” ²⁴ Toix laiv tauh max stăngz Yaz, Songđ max âyz yaz nzaox nyăngz woac, nyâuh numđ yaz coong nâyx đomc woac, Six max zâyf yaz cănh nyâyh seetb taih coong, “Six paiđ yaz taih woax tauh Nzangc Pha nyăngz woac. ²⁵ Yaz năngx cloon nyâuh Yămz nyăngz Săngx huđ, Lănv nâyx đomc woac bux nyâuh nzuf nzof. ²⁶ Stăngc Munh woax tauh, Six Nzangc Pha oix tingz yaz nyăngz bux paiđ taih nyăngz singx-lingh, oix nzaox nyâuh, Phunz nyâuh hayh săngx tuz yaz bux quaix nyăngz muif hungđ.” ²⁷ Yaz njâuh pengh oonz phunz nyâuh, Nây six cănh yaz nyăngz pengh oonz, yaz oix sađ phunz nyâuh, Yaz phunz nyăngz max năngđ bamh munh phunz nyăngz, Six nyâuh max nongc numđ Stauh, Max nongc cumh Nzav.” ²⁸ Nyâuh tuz numđ yaz coong quaix, Yaz six zuc gâyh nyâuh ninyh, Six yaz năngx phunb đangz taih lov nyâuh. Six coong nyâuh năngđ stăngz yaz, nyâuh oix zuc numđ nyađ wâyc yaz ninyh Nzangc Pha woa, wâyc zuc Nzangc Pha năngx lub têx Yaz.” ²⁹ Nâyx đomc dlayc max zengx seetb taih, Yaz lănv bux nyâuh đangc. Zu tauv dlayc seetb taih, nyâuh Nzăngc zeen Yaz.' ³⁰ Blătc nây yaz max tuz cloon nyâuh coong woac đungx, wâyc zuc nzauf quyênh cun bamh canz woax tauh oix taih tauv, Six Nănh max naih lungđ quyênh cun tuz Yaz.” ³¹ Six nây Bamh canz six zuc pâyz tuz yaz stăngz Pha, ayx âyz Pha zăpx bux nyăngz woac. nyoongz quef pănh ninyh gôh.”