¹ Phêtv-tu tuz stipx lanyf ayx Tôngz-đôkv, Tuz pôz noib, Nănh songđ tăng Sê-sa-rê, ninyh Yê-lu-sa-lem Stengv. ² Stayb munh pyây, Cloon ayx lub nyăngz Yiu-tai munh, Ninyh tauv Phêtv-tu woa coux Phao-lô.” ³ Nănh stiz êu câuh Phêtv-tu ênz Phao-lô muf Yê-lu-sa-lem Stengv, Nănh stiz cayx ta zux-ix tayx Phao-lô woa bah đămx jau.” ⁴ Six Phêtv-tu tauz coong, “Phao-lô lauf nguyên clăngđ ănz Sê-sa-rê, Max lauh yaz lauf năngx muf woa.” ⁵ Phêt-tu bux coong, “Six coong Phao-lô năngđ ayx pamf toix lungđ Stoif, Six zuc phunz ah đomc munh lêpc yaz ninyh tauv Sê-sa-rê coux nănh geh.” ⁶ Phêtv-tu lauf năngx yămz Yê-lu-sa-lem Stengv cox yeetc tauv săpc noib nâyx,. “nzoc Nănh nzăngđ phunb đangz lauf Sê-sa-rê. Tah nyâyc noib, Phêtv-tu stâyv woa stămđ stoif tync, êu pengz ênz Phao-lô taih.” ⁷ Phao-lô tuz ênz nzac Stămđ Stoif tync taih, Tăng Yê-lu-sa-lem Stengv taih woax đomc Yiu-tai Munh stâuđ quib nănh nzêux nzuf, Lov Stoif nic nzongf coux nănh, Six lov max tuz ah nomz seenz nyăngz zanyx manyf.” ⁸ Six Phao-lô songđ coong zay Stynb nyăngz woac, Nănh coong, “Yaz max pamf Yiu-tai Munh nyăngz toix laiv hungđ Gâyf, Yâuc max ayx wâyx layf-paix toongh, Mah Six zengv Sê-sa.” ⁹ Six Phêtv-tu oix ayx phunz Yiu-tai Munh numđ nyađ nănh, “Nănh songđ naic Phao-lô coong, “Mâyh oix ninyh Yê-lu-sa-lem Stengv phunz yaz pob mâyh nyăngz dlayc max? ¹⁰ Phao-lô tauz coong, “Nâyx zanyf yaz Stâuđ nây Sê-sa nyăngz stămđ stoif tync, Six hopđ zuc yămz nây Stămđ Yaz, Yaz max ayx pamf Yiu-tai Munh nyăngz toix laiv hungđ gâyf, Six nyâuh lauf pâyz.” ¹¹ Six coong yaz ayx longđ toix lungđ jic tuz tayc têx, Yaz yâuc max aox, Six coong nâyx đomc Yiu-tai Munh taih nây coux yaz nâyx đomc dlayc max seenz têx, Max naih toix laiv lanh naih gâyf zoz yaz jaoz phunz Nănh stiz.” Yaz oix coux tauv Lô-ma nzêuh Hungh pob yaz nyăngz dlayc.” ¹² Phêtv-tu cloon cun dlayc Munh sangv Gwoangh nzuf, “songđ bux nănh coong, “Six coong mâyh năngđ oix coux tauv Sê-sa Hungh, Mâyh six zuc ninyh tauv Sê-sa Hungh woa.” ¹³ Batz noib quaix đangz, A-dipv-ba, Cloon Bê-rê-nitv, ninyh tauv Sê-sa, Stengv, Cloon Phêtv-tu ayx đaoc.” ¹⁴ Nănh stiz iz lanh yămz woax nomz Stengv ah dlapc batz lauh, Phêtv-tu zoz Phao-lô nyăngz jau lănv phunz Hungh mungv, Phêtv-tu lănv coong, “Phi-litv clangđ ah tauh Stoif munh ănz nây.” ¹⁵ Yaz ninyh Yê-lu-sa-lem Stengv woax zanyf, ayx lub nyăngz Yiu-tai Munh, Cloon Stayb Munh pyây Taih nây coux Nănh, Nănh stiz êu yaz tayx nănh zef!” ¹⁶ Six yaz tauz nănh stiz coong, “ayx năngđ nâyx Six max hopđ Lô-ma munh nyăngz Gâyf, Max cun toix laiv tauh naih dlayc, Six zuc phunz nănh cloon coux nănh woax đomc Munh cloon nănh tix toix nzuf, Nzăngđ hayh zoz nănh jaoz phunz toix laiv Tauh.” ¹⁷ Taih nây coux nănh woax đomc Yiu-tai Munh, Taih tauv nây Se-sa-dê, Yaz songđ max ngaih, Tah nyâyc noib, Yaz songđ ninyh stâyv woa Huyđ-toongh, êu munh ênz Phao-lô nzac taih.” ¹⁸ Woax đomc Yiu-Ttai Munh nyoongz quef stâuđ woa coux Nănh, “Six yaz max phătc nănh stiz coux nănh naih toix laiv hungđ Stoif nic âyz yaz đoanx. ¹⁹ Nănh stiz cungb nzengz tauv nănh stiz Yiu-tai Munh nyăngz gâyf cungv, Yâuc năngx nzengz tauv ah tauh đaof daov nyăngz bux hipđ ayx Zâu Yê-su, Nănh tayc nzof, “Six Phao-lô coong nănh Năngx săngh phunb stengb taih." ²⁰ Nănh stiz tih nzengz yaz max hayh mungv lêpc laiv lepz, Yaz songđ naic Phao-lô, Tah mâyh oix ninyh Yê-lu-sa-lem Stengv Stămđ Stoif max? ²¹ Six nănh jođ ninyh phunz Lô-ma nzêuh Hungh Stămđ, Yaz songđ seetb lanyf êu pengz ênz nănh clangđ ănz nây nzauh, Tauv yaz naih congv yaz nzăngđ ênz nănh ninyh Lô-ma nzêuh Hungh.” ²² A-ripv-ba bux Phêtv-tu coong, “ha yaz lauf oix mungv nănh lănv. “Phêtv-tu tauz, “ha săngx đomz Hungh mănc mungv.” ²³ Tah nyâyc noib, A-ripv-ba, Cloon Phêtv-tu bênc dloih, Cloon pengz pyây, ayx lub nyăngz Munh, Cloon naih manyh tauh nyăngz Munh, Tinyh đoih nzac Hungh tync nyăngz huyđ-toongh dloih nzuf, Phêtv-tu, Seetb lanyf êu pengz ênz Phao-lô nzac Taih.” ²⁴ Phêtv-tu quef coonz coong, “A-ripv-ba Hungh cloon songx munh lex! Muif tauh Yiu-tai Munh naih mynb yămz Nây, Yâuc yămz Yê-lu-sa-lem Stengv taih nyăngz Munh, hamv coux nănh coong, “Nâyx tauh ya max jic tuz Săngh.” ²⁵ Six yaz zah max phătc nănh longđ toix laiv hungđ jic tuz tayx nănh tayc nef, Six nănh yâuc cănh jođ phunz Lô-ma nzêuh Hungh pob nănh nyăngz dlayc, nzof yaz nzăngđ ênz nănh ninyh tauv Woangh-đev Sê-sa Hungh.” ²⁶ Six yaz lov max laiv hungđ dlayc nongc ja jeenx stungx phunz Sê-sa quanz Hungh. Nâyx noib yaz songđ ênz nănh taih nyâuh tinyh đoih nây cah đangc, Tah yeetx six A-ripv-ba Hungh, Yaz mungc nyâuh zah naic nănh yaz nzăngđ naih woac ja jeenx.” ²⁷ Âyz yaz nyâyh taih, Stungx ah tauh Stoif-munh ninyh tauv Hungh pâu, Bix max naih coux nănh woax đomc woac nzâyz lêpc nănh ninyh, Six max hođ gâyf.”